Joshua 2:1-24
2 Nun fapa Joshua nih mi-ngiatu pahnih kha Shittim in a thli tein a thlah hna i “Va kal u law ram kha va ngia u, a hleiin Jeriko khua kha va ngia u” tiah a ti hna. Cucaah an kal i hlawhhlangnu Rahab inn ah an lut i an i ṭhum.
2 “Ram ngiat awkah Israel pa hna cu tuzan ah an rak phan” timi thawng kha Jeriko siangpahrang nih a theih.
3 Mah tikah Jeriko siangpahrang nih Rahab cu “Na inn ah a tlungmi pa pawl kha rak chuah hna. Annih cu ram vialte ngiat awkah a rami an si” tiah bia a cah.
4 Rahab nih pa pahnih cu a thuh hna. Cun “Pa pawl cu ka sinah an ra ko. Asinain khoika in dah an rat ti cu ka hngal lo.
5 Khua a muih i khua hauka khar a si lai ah khan an chuak cang. Khoika ah dah an kal ti cu ka hngal lo. Khulrang in nan dawi hna ahcun nan phanh ko hna lai” tiah a ti.
6 (A tak ti ahcun Rahab nih inncung ah a kaipi hna i an phomi khum kung lakah a thuh hna.)
7 Siangpahrang thlahmi pa hna nih Jordan Tiva a puanhnak lei ah khan an dawi hna. An chuahle cangka khua hauka cu an khar.
8 Mi-ngiatu pawl an i hngilh hlanah Rahab cu inncung ah a va kai i,
9 hitin a ti hna: “Jehovah nih hi ram hi aan pek hna lai ti kha ka hngalh. Nannih cu kan in ṭih tuk hna. Rammi dihlak cu nanmah ruang ah an hnabei a dong.
10 Izipt ram in nan chuah lioah Jehovah nih Rili Sen a roternak kong le Jordan Tiva khattalei ral* i Amor siangpahrang pahnih Sihon le Og nan rak hrawh cikcek hnanak kong kha kan theih.
11 Mah kong kan theih tikah kan lung a zor i nanmah doh awkah ralṭhatnak kan ngei ti lo. Zeicahtiah nan Pathian Jehovah lawng hi cunglei van ah siseh, tanglei vawlei ah siseh Pathian a si.
12 Nan cung ah a fekmi dawtnak ka langhter bantuk in ka pa chungkhar cung ah a fekmi dawtnak langhter ve awkah zaangfahnak in Jehovah min chalh in chiatser u. Cun zumhawk a tlakmi hmelchunhnak pakhat zong ka pe u.
13 Ka nu le ka pa, ka unau hna le anmah he aa pehtlaimi vialte kha an nunnak zuah hna u law thihnak in rak kan khamh u.”
14 Mah tikah mi-ngiatu hna nih “Kan nunnak chalh in bia kan in kamh. Kan kong hi na phuan lo ahcun Jehovah nih hi ram a kan pek tikah na cung ah a fekmi dawtnak kan langhter lai i kan bia ning in kan tuah lai” tiah an ti.
15 Rahab inn cu khua kulhnak vanpang ah a ummi a si caah thlalang awng in hri a thlak i mi-ngiatu cu a ṭumter hna.
16 Cun “Aan dawitu hna nih an in hmuh hna nakhnga lo tlang cung ah va kai u law nithum chung vaa thup u. Aan dawitu hna an rak kir hnu lawng ah va lan te u” tiah bia a cah hna.
17 Annih nih hitin an ti: “Chiat na kan sertermi kong he aa tlaiin mawhchiat kan si nakhnga lo,
18 hi ram i kan rak luh tikah na kan ṭumternak thlalang awng ah hin hi hri sen hi na rak thlai lai. Cun na nu le na pa, na unau le na pa chungkhar dihlak cu hi inn ah na rak pumh hna lai.
19 Pakhatkhat cu inn leng ah a chuah ahcun a thihmi cu amah ruang ah a si lai.* Kannih tu cu mawhchiatnak in kan luat lai. Asinain innchung ah a um ko buin harnak a ton i a thih ahcun cucu kanmah ruang ah a si lai.
20 Kan kong hi na phuan ahcun chiat na kan sertermi kong he aa tlaiin mawhchiat kan si lai lo.”
21 Cu tikah Rahab nih “Nan chim ning in si ko seh” tiah a ti hna.
Cun a thlah hna i an kal. An kal hnuah hri sen kha thlalang awng ah cun a ṭem.
22 Mi-ngiatu pawl cu tlang cung ah an kai i a dawitu pawl an kir hlan tiang cuka ah nithum chung an i thup. A dawitu pawl nih khuazakip ah an kawl hna nain an hmu hna lo.
23 Cu hnuah mi-ngiatu pahnih cu tlang cung in an ṭum, tiva kha an tan i Nun fapa Joshua sinah an phan. Cun an tonmi thil vialte kha an chimh.
24 “Jehovah nih ram kha a pumpi in a kan pek cang. Ram chung mi vialte cu kanmah ruang ah an hnabei a dong” tiah Joshua kha an chimh.
