Joshua 22:1-34
22 Joshua nih Reuben phun, Gad phun le Manasseh phun a cheu kha a auh hna i,
2 hitin a ti hna: “Jehovah sal Moses nih nawl aan pekmi hna ning in nan tuah dih. Keimah nih nawl kaan pekmi hna vialte zong nan zulh dih.
3 Nihin ni tiang nan unau pawl kha nan kaltak bal hna lo. Jehovah Pathian nih nawl aan pekmi hna kha nan zulh dih.
4 Jehovah nan Pathian nih bia a rak i kam bantuk in nan unau hna kha dinhnak a pek cang hna. Cucaah Jehovah sal Moses nih Jordan Tiva khattalei ral* ah aan pekmi hna nan ram le nan thlam cio ah nan kir kho cang.
5 Jehovah sal Moses nawlbia le nawl peknak kha ralring tein zul u. Nan Pathian Jehovah kha daw u law a lam vialte kha zul u. A nawlbia kha zul u law Pathian sinah i bek peng u. Pathian kha nan lungthin dihlak, nan nunnak* dihlak in bia u.”
6 Mah hnuah Joshua nih thluachuah a pek hna i a thlah hna, cun an thlam cio ah an kir.
7 Manasseh phun a cheu kha Moses nih Bashan ram ah ro a rak pek cang hna. A dang a cheu tu kha cu Joshua nih Jordan Tiva nitlaklei ah an unau pawl he ro a pek ve hna. Joshua nih a thlah hna hlanah thluachuah a pek hna i,
8 hitin a ti hna: “Chawva, saṭil, sui, ngun, dar, thir le thilpuan tampi kha i lak u law i kalpi u. Nan ral hna sinin nan lakmi hranchaw zong kha nan unau pawl he va i phaw u.”
9 Mah hnuah Reuben phun, Gad phun le Manasseh phun a cheu cu a dang Israel mi an umnak Kanaan ram Shiloh in an i thawh i Jehovah nih Moses sinin co awkah a rak pekmi hna Gilead ram lei ah cun an kir.
10 Kanaan ram Jordan Tiva an phanh tikah Reuben phun, Gad phun le Manasseh phun a cheu nih tivakam ah rumra a ngeimi biakṭheng nganpi an ser.
11 Mah kong kha a dang Israel mi nih an theih tikah “Zoh hmanh u. Reuben phun, Gad phun le Manasseh phun a cheu nih Kanaan ramri Jordan Tiva i kanmahlei ral ah biakṭheng pakhat an ser” tiah an ti.
12 Israel mi nih mah thawng kha an theih tikah anmah va doh awkah an bu ningpi in Shiloh ah an i pum.
13 Mah hnuah Israel mi nih Gilead ram ah a ummi Reuben phun, Gad phun le Manasseh phun a cheu sinah tlangbawi ngan Eleazar fapa Finehas kha an thlah.
14 A sinah hruaitu pahra zong an kal ve. Annih cu Israel phun pakhat cio aiawhtu an si i Israel mi a thongthong in a hruaitu chungkhar lu an si.
15 Gilead ram i a ummi Reuben phun, Gad phun le Manasseh phun a cheu sin an rak phanh tikah hitin an ti hna:
16 “Jehovah miphun dihlak nih hitin an in ti hna: ‘Israel Pathian cung ah zeicah zumhawktlak loin nan um? Biakṭheng kha nan ser i Jehovah kha nan ralchanh. Mah cu Jehovah nan kaltakmi a si.
17 Peor i kan rak tuahmi sualnak kha kan i za rih lo maw? Jehovah miphun cung ah rai a rak tlunmi kha nan philh cang maw? Mah sualnak in nihin ni tiang kan thian rih ṭung lo.
18 Atu zong Jehovah kha kaltak ṭhan maw nan timh? Nihin ah Jehovah kha nan ralchanh ahcun thaizing ah Israel miphun dihlak cung ah a thin a hung tuk lai.
19 Nan comi ram cu a thiang lo tiah nan ruah ahcun Jehovah puan thlam a umnak, Jehovah ta a simi ram ah ra u law kan sinah rak um u. Jehovah tu cu ralchanh hlah u. Kan Pathian Jehovah biakṭheng hlei ah a dang biakṭheng nan i sernak thawng in kanmah zong kha ralchanhtu kan siter ve hlah u.
20 Zerah fapa Akhan cu hrawh cikcek awk thil he aa tlaiin zumhawktlak loin a um tikah a sualnak ruang ah a thimi cu amah lawng a si lo. Pathian thinhunnak cu Israel miphun dihlak cung ah a rak tlung, a si ko lo maw?’”
21 Reuben phun, Gad phun le Manasseh phun a cheu nih Israel mi a thongthong a hruaitu hna kha hitin an ti hna:
22 “Pathian hna i Pathian Jehovah! Pathian hna i Pathian Jehovah nih a hngalh ko. Israel mi zong nih an hngalh lai. Jehovah kha kan ralchanh i a cung ah zumhawktlak loin kan um ahcun nihin ah kan nunnak hi rak kan zuah hlah u.
23 Jehovah kha kaltak in khangh thawinak, changvut thawinak le hawikomhnak thawinak pekchanh awkah biakṭheng kan sermi a si ahcun Jehovah nih dan rak kan tat ko seh.
24 Hitin kan tuahmi cu kan thinphanmi thil a um caah a si. ‘Hmailei ah nan tefa hna nih kan tefa hna kha “Nannih cu Israel Pathian Jehovah he nan i pehtlaihnak zeidah a um?
25 Jehovah nih kanmah le nanmah Reuben phun le Gad phun karah Jordan Tiva kha ramri caah a chiah cang. Nannih cu Jehovah he nan i pehtlaihnak zeihmanh a um lo” tiah an ti hna lai. Cuticun nan tefa hna nih kan tefa hna kha Jehovah an biak khawh nakhnga lo an kham hna lai.’
26 “Cucaah kannih nih ‘Biakṭheng pakhat ser hna u sih. Khangh thawinak le raithawinak pek awkah si loin,
27 nanmah le kanmah, nan tefa le kan tefa hna karlak ah tehte caah a si lai. Jehovah hmai lawng ah khangh thawinak, raithawinak le hawikomhnak thawinak kha kan pekchanh lai i kan biak lai ti langhternak ca men ah a si. Mah lawng ah hmailei ah nan tefa hna nih kan tefa hna kha “Nannih cu Jehovah Pathian he nan i pehtlaihnak zeihmanh a um lo” tiah an ti kho hna lai lo’ tiin kan i ruah.
28 Cucaah ‘Hmailei ah annih nih kanmah le kan tefa hna kha cutin an kan ti ahcun “Zoh hmanh u, Jehovah biakṭheng he aa lomi mah biakṭheng hi kan pupa hna nih an rak ser. Khangh thawinak le raithawinak hna pekchanh awkah a si lo. Nanmah le kanmah karah tehte caah a si” tiah kan leh hna lai’ tiin kan rak i ruah.
29 Jehovah ralchanh awk le Jehovah kaltak awk cu a ruah hmanh kan ruat ngam lo. Khangh thawinak, changvut thawinak le a dang raithawinak hna pekchanh awkah puan biakinn hmai i Jehovah biakṭheng hlei ah a dang biakṭheng ser kan i timhmi a si lo.”
30 Reuben phun, Gad phun le Manasseh phun nih an chimmi kha tlangbawi Finehas le amah sinah a kal vemi Israel a thongthong in a hruaitu chungkhar lu hna nih an theih tikah an lung a tling.
31 Reuben phun, Gad phun le Manasseh phun kha tlangbawi Eleazar fapa Finehas nih hitin a ti hna: “Nihin ah Jehovah cu kan sinah a um ti kha kan hngalh. Zeicahtiah Jehovah cung ah zumhawktlak loin nan ummi a si lo. Israel mi kha Jehovah kut in nan khamh cang hna.”
32 Mah hnuah tlangbawi Eleazar fapa Finehas le hruaitu hna cu Gilead ram i a ummi Reuben phun le Gad phun sinin Kanaan ram ah an rak kir i a dang Israel mi kha a konglam vialte an chimh hna.
33 Mah kong kha Israel mi nih an theih tikah an lung a tling i Pathian kha an thangṭhat. Reuben phun le Gad phun kha va doh in an umnak ram va hrawhnak kong zeihmanh an ceih ti lo.
34 Cucaah Reuben phun le Gad phun nih “Kan dihlak caah mah biakṭheng hi Jehovah cu a hmaanmi Pathian a si ti a langhtertu tehte a si” tiah an ti i biakṭheng kha min an pek.*
Footnotes
^ Mah cu nichuahlei a si.
^ Biafang Fianternak ah zoh.
^ Tehte tiah min an pekmi a si kho men.
