Joshua 7:1-26
7 Israel mi hna cu hrawh cikcek awk thil he aa tlaiin zumhawktlak loin an um. Judah phun Zerah fapa, Zabdi fapa, Karmi fapa Akhan nih hrawh cikcek awk thil cheukhat kha a lak caah Jehovah thinhunnak cu Israel mi cung ah a alh.
2 Joshua nih Jeriko in Beth-aven pawng le Bethel nichuahlei ah a ummi Ai khua kha va ngiat awkah mi a hei thlah hna i “Va kai u law cuka ram cu va ngia u” tiah a ti hna. Cucaah an i thawh i Ai khua cu an va ngiat.
3 Joshua sin an rak kir ṭhan tikah hitin an ti: “Ai khua va doh awkah ralkap dihlak in kal a hau lai lo. Thonghnih, thongthum hrawng kal ahcun a za ko lai. Mi tlawmte lawng an si caah ralkap dihlak an kal ahcun an ba lehlam lai.”
4 Cucaah ralkap 3,000 hrawng cu an i thawh. Asinain an sungh caah Ai mi hna sinin an zam.
5 Ai mi nih an thahmi hna cu 36 an si. Khua leng hauka in Shebarim* tiang, chuk zuan in an dawi hna i an doh hna. Cucaah mi cu an lung a zor i ṭihnak an hun ngei.
6 Mah tikah Joshua nih a angki kha a thleh i Jehovah biakamnak kuang hmaiah zanlei tiang a bawk. Israel upa hna zong nih cutin an tuah ve i an lu ah leidip an i phulh.
7 Joshua nih hitin a ti: “Maw Lianngan Bik Bawipa Jehovah, Amor mi hna kut in thih awk men ah zeicah Jordan Tiva hikalei ral ah na kan ratpi? Jordan Tiva khattalei ral* ah rak um u sih law a ṭha deuh hnga!
8 Maw Jehovah, Israel mi cu an ral hna sinin an zam cang caah zeidah ka chim khawh ti lai?
9 Mah kong hi Kanaan mi le ram chung ah a ummi vialte nih an theih tikah an kan kulh lai, an kan hrawh lai i vawleicung in kan min kha an hloh lai. A liannganmi na min kilven awkah zeidah na tuah lai?”
10 Jehovah nih Joshua cu hitin a ti: “Tho tuah, zeicah na bawh?
11 Israel mi cu an sual cang. Zulh awkah nawl ka pekmi hna ka biakamnak kha an buar cang. Hrawh cikcek awk a simi thil cheukhat kha an fir i anmah thilri lakah a thli tein an thuh.
12 Cucaah Israel mi nih an ral kha an tei kho hna lai lo. Annih cu hrawh cikcek awk an si cang caah an ral hna sinin an zam lai. Hrawh cikcek awk thil kha nan lakin nan hloh hlan cu nan sinah ka um ti lai lo.
13 Tho law mi kha thianter hna. Hitin chim hna, ‘Thaizing caah nanmahle nanmah i thianter u. Zeicahtiah Israel Pathian Jehovah nih hitin a ti: “Maw Israel, hrawh cikcek awk thil cu nan lakah a um. Hrawh cikcek awk thil kha nan lakin nan hloh hlan chung paoh cu nan ral kha nan tei kho hna lai lo.
14 Zinglei ah nan phun ning cio in nan i pum lai. Cu hna lakin Jehovah nih a thimmi phun cu a hmaiah nan chuak lai. Cu phun lakin Jehovah nih a thimmi chung cu a hmaiah nan chuak lai. Cu chung lakin Jehovah nih a thimmi innchungkhar cu a hmaiah nan chuak lai. Cu innchungkhar lakin thim a simi pa cu a hmaiah a chuak lai.
15 Hrawh cikcek awk thil a rak lami pa cu amah he a ngeihmi dihlak he mei in khangh a si lai. Zeicahtiah Jehovah biakamnak kha a buar i Israel mi hna lakah ningzah awk tlak thil a tuah caah a si.”’”
16 A thaizing zingkate ah Joshua cu a tho i Israel mi kha an phun ning cio in a pumh hna tikah Judah phun cu thim an si.
17 Judah phun kha a hmaiah a ratter hna tikah Zerah te chung cu thim an si. Zerah te chung cu pakhat hnu pakhat in a hmaiah a ratter hna tikah Zabdi cu thim a si.
18 A donghnak ah Zabdi innchungkhar cu pakhat hnu pakhat in a hmaiah a ratter hna tikah Judah phun Zerah fapa, Zabdi fapa, Karmi fapa Akhan cu thim a si.
19 Mah tikah Joshua nih Akhan kha “Ka fapa, Israel Pathian Jehovah kha upatnak pe law na sualnak kha phuang. Na tuahmi kha rak ka chim. Zeihmanh thup hlah” tiah a ti.
20 Akhan nih Joshua kha hitin a ti: “Hmaan tein chim ahcun Israel Pathian Jehovah cung ah sualnak a tuahmi cu keimah ka si ko. Ka tuahmi cu hihi a si.
21 Hranchaw lakah Shinar ram in a chuakmi aa dawh tukmi puan le ngun shekel* 200 le shekel 50 a ritmi suitlang kha ka hmuh tikah ka mit an thi i ka lak hna. Mah cu ka thlam chung i vawlei tang ah ka thuh ko. Ngun le sui cu a tang bik ah an um lai.”
22 Joshua nih mi a hei thlah colh hna. Annih cu thlam ah an va tlik tikah thlam chung ah puan le a tang ah ngun le sui a thuhmi kha an va hmuh.
23 Mah kha Joshua le Israel mi vialte sinah an rak put i Jehovah hmaiah an chiah.
24 Joshua le Israel mi vialte nih Zerah fapa Akhan cu ngun, puan, suitlang, a fapale, a fanule, a caw, a laa, a tuu, a thlam le a ngeihmi thil vialte he Akhor Horkuang ah an ratpi hna.
25 Joshua nih “Zeicah kan cung ah harnak na tlunter? Nihin ni ah Jehovah nih na cung ah harnak a tlunter ve lai” tiah a ti. Cun Israel mi dihlak nih lung in an cheh hna i mah hnuah mei in an khangh hna. Cuticun an dihlak in lung in thi lakin cheh an si.
26 Cun Akhan ruak cung ah lungpon nganpi an pon i mah cu nihin ni tiang a um. Mah tikah Jehovah thinlinhnak cu a dai. Cucaah cuka hmun cu Akhor* Horkuang tiah nihin ni tiang auh a si.
Footnotes
^ A sullam “Lungcawhnak Khor.”
^ Mah cu nichuahlei a si.
^ Shekel 1 cu 11.4 g he aa tluk. Thlaihhlei B14 ah zoh.
^ A sullam “Harnak, Pheunak.”
