Joshua 11:1-23
11 Hazor siangpahrang Jabin nih mah kong cu a theih tikah Madon siangpahrang Jobab, Shimron siangpahrang le Akshaf siangpahrang kha bia a cah hna.
2 Cun chaklei tlangram ah a ummi, Khinnereth thlanglei nelrawn* ah a ummi, Shefelah ah a ummi le nitlaklei Dor tlangpang ah a ummi siangpahrang hna le,
3 nichuahlei le nitlaklei ah a ummi Kanaan mi, Amor mi, Hit mi, Periz mi, tlangram ah a ummi Jebus mi le Mizpah ram Hermon tlanghram ah a ummi Hiv mi hna zong bia a cah hna.
4 Cucaah rilikam thetse zat in a tammi an ralkap vialte, rang le raldohnak rangleng tampi he an rak i thawh.
5 Siangpahrang vialte cu hmunkhat ah an i tong i Israel mi doh awkah Merom tiva ah riahhmun an khuar.
6 Mah tikah Jehovah nih Joshua cu hitin a ti: “Annih cu ṭih hna hlah, thaizing atu bantuk caan hrawng ah an dihlak in Israel mi pawl kut chung ah ka pek hna lai. An rang kha an tha na pheh hna lai i an rangleng kha mei in na khangh dih lai.”
7 Joshua le a ralkap vialte nih Merom tiva thluangthluan ah riahhmun a khuarmi an ral pawl kha ruahlopi in an doh hna.
8 Jehovah nih an kut ah a pek hna caah Israel mi nih an tei hna. Sidon Khuapi le Misrephoth-maim tiang, nichuahlei ah Mizpah Horkuang tiang an dawi hna i pakhat hmanh taang loin an thah hna.
9 Jehovah nih a fialmi ning in Joshua nih a tuah; an rang kha an tha a pheh hna i an rangleng kha mei in a khangh dih hna.
10 Mah hnuah Joshua cu a kir i Hazor kha a lak. Siangpahrang cu vainam in a thah. A hlanah Hazor cu mah pennak vialte lakah a ṭhawng bikmi a rak si.
11 Khuami dihlak kha pakhat hmanh taang loin vainam in an thah dih hna i an hrawh cikcek hna. Cun Hazor khua cu mei in a khangh.
12 Joshua nih mah khua vialte cu a lak i an siangpahrang vialte cu vainam in a thah dih hna. Jehovah sal Moses nih nawl a rak pek bantuk in a hrawh cikcek hna.
13 Asinain Israel mi nih tlangbo khua hna lakah Hazor khua dah ti lo cu a dang zei khua hmanh mei in an khang lo. Hazor khua lawng kha Joshua nih mei in a khangh.
14 Israel mi nih cuka khua hna in hranchaw le saṭil cu an i lak nain minung tu cu vainam in an thah dih hna. A nungmi pakhat hmanh an taang lo.
15 Jehovah nih a sal Moses nawl a pek i Moses nih Joshua nawl a pek chin bantuk in Joshua nih a tuah. Jehovah nih Moses nawl a pekmi vialte kha pakhat hmanh taang loin Joshua nih a tuah dih.
16 Joshua nih tlangram vialte, Negeb ram vialte, Goshen ram vialte, Shefelah, Arabah le Israel tlangram le tlanghram* hna i telin ram vialte cu a lak dih.
17 Seir ram lei ah a kaimi Halak Tlang in Hermon tlanghram i a ummi Lebanon Horkuang chung i Baal-gad khua tiang a si. Mah ram ah a ummi siangpahrang vialte kha a tlaih hna i a thah dih hna.
18 Joshua cu mah siangpahrang hna he caan saupi an i do.
19 Gibeon khua i a ummi Hiv mi hna dah ti lo cu Israel mi he daihnak a sermi a dang zei khua hmanh an um lo. Mah khua hna kha Israel mi nih an doh hna i an tei hna.
20 Jehovah nih zaangfahnak ngei loin a hrawh dih cikcek hna nakhnga an lung a khonmi kha a awnh. Cucaah Israel mi cu an rak doh hna. Jehovah nih Moses nawl a pek bantuk in annih cu hloh dih an si.
21 Mah lioah Joshua nih tlangram, Hebron khua, Debir khua, Anab khua, Judah tlangram vialte le Israel tlangram vialte ah a ummi Anak mi kha a hloh dih hna. Anmah he, an khua he a hrawh cikcek hna.
22 Israel ram ah Anak mi pakhat hmanh an taang lo. Gaza khua, Gath khua le Ashdod khua lawng ah an taang.
23 Jehovah nih Moses bia a rak kamhmi ning in Joshua nih ram vialte cu a lak dih. Israel mi kha an phun ning cio in a phawt hna i ro ah a pek hna. Cun ram chung ah raldohnak a um ti lo i a dai.
