God i Yusum Tabu Spirit Blong Hem Blong Mekem Olgeta Samting

“Olgeta samting long skae, Hae God i mekem olgeta long tok blong hem nomo. San mo mun mo ol sta oli kamaot long tok we hem i talem.”—SAM 33:6.

1, 2. (a) ?Taem ol yia oli stap pas, save we man i gat long saed blong wol mo yunives i kam antap olsem wanem? (b) ?Wanem kwestin we yumi mas faenemaot ansa blong hem?

BITIM wan handred yia finis, plante saentis oli bilif se i gat wan galaksi * nomo long yunives * hemia galaksi blong yumi we yumi kolem Milky Way. !Be oli mekem mastik taem oli talem se hemia nao saes blong yunives! Tede, ol saentis oli faenemaot se i gat bitim 100 bilian galaksi long yunives, we sam long ol galaksi ya i gat bilian sta long hem. Naoia we oli wokem sam strongfala glas we i gud moa blong lukluk ol sta, oli stap faenem plante moa galaksi.

² I tru se ol saentis we oli laef 100 yia bifo, oli save moa samting i bitim ol bubu blong olgeta bifo. Be ol save ya we oli gat long saed blong yunives i smol nomo. Mo hemia i tru tu long save we oli gat long saed blong wol ya. I no isi long man blong kasem save fulwan long ol samting raonabaot long yumi we oli wok long wan fasin we i nambawan blong mekem se laef i save gohed long wol. Nating se i olsem, tede yumi kasem save moa long saed blong ol samting ya i bitim bifo. Mo yumi save se long ol yia we oli stap kam, bambae yumi lanem plante moa samting long saed blong wol mo yunives. Be i gud blong tingbaot kwestin ya se, ?Ol samting ya evriwan oli kamaot olsem wanem fastaem? God we i Mekem yumi, hem nomo i save talemaot ansa blong kwestin ya, mo ansa i stap long Tabu Tok blong hem, Baebol.

Ol Naesfala Samting We God i Mekem

3, 4. ?God i mekem yunives olsem wanem, mo ol wok ya blong hem oli leftemap hem olsem wanem?

³ Fas vas blong Baebol, i eksplenem olsem wanem yunives i kamaot. Vas ya i talem se: “Bifo we bifo olgeta, God i mekem skae mo graon wetem olgeta samting we i stap long tufala.” (Jen. 1:1) Tok ya i soemaot klia se taem Jehova i stat blong mekem ol samting, i nogat wan samting i stap we hem i save yusum blong mekem yunives long hem. Be wetem tabu spirit blong hem, we hemia strongfala paoa blong hem, hem i mekem skae, wol ya mo ol narafala samting we oli stap long yunives. Yumi save se wan kapenta i mas yusum han blong hem mo ol tul blong hem, blong hem i save wokem samting. Be long saed blong God i defren. God i sanem tabu spirit blong hem blong mekem ol bigbigfala wok we Hem i wantem.

⁴ Baebol i yusum wan pijatok blong tokbaot tabu spirit se, hem i olsem “fingga” blong God. (Luk 11:20, NW; Mat. 12:28) Mo ol samting we Jehova i yusum tabu spirit blong hem blong mekem olgeta, oli stap leftemap hem bigwan. Deved, man ya blong raetem Sam, i singsing se: “Oltaem skae i stap soemaot bigfala paoa blong God, mo olgeta samting we oli stap long hem oli stap soemaot ol gudgudfala wok we God i mekem.” (Sam 19:1) Yes, ol samting we yumi luk long skae mo wol, oli soemaot bigfala paoa blong tabu spirit blong God. (Rom. 1:20) ?Oli mekem samting ya olsem wanem?

Bigfala Paoa Blong God

5. Yu traem tokbaot paoa blong tabu spirit blong Jehova we hem i yusum blong mekem ol samting.

⁵ Ol samting we yumi save tingbaot long yunives,  oli pruvum se paoa blong Jehova i bigwan we i bigwan olgeta. (Ridim Aesea 40:26.) Yu traem tingbaot san. San i wan sta mo hem i stap bitim 150 milian kilometa longwe long wol, mo hot blong hem i kasem samwe 15 milian digri Selsias. Nating se san i givimaot plante hot olsem wanem, be hem i stap long stret ples blong hem longwe long wol, blong mekem se olgeta samting long wol oli save laef. I klia se i nidim bigfala paoa blong mekem san mo ol narafala bilian sta tu. Jehova nomo i gat bigfala paoa blong mekem olsem.

6, 7. (a) ?From wanem yumi save talem se God i yusum tabu spirit blong hem long wan fasin we i gat oda? (b) ?Wanem i soemaot se ol samting long yunives oli no kamaot olsem nomo?

⁶ Plante samting raonabaot long yumi oli soemaot se God i yusum tabu spirit blong hem long wan fasin we i gat oda. Yu traem tingbaot samting ya: Sipos yu gat wan katon we i gat ol defdefren kala bol insaed long hem, ale yu traem seksekem katon ya blong ol bol oli miks gud insaed. Biaen yu kafsaedem evriwan wantaem i go long graon. ?Yu ting se taem ol bol ya oli kamkamaot bambae oli hivap folem kala blong olgeta, olsem blu wanples, yelo wanples, mo sem mak long ol narafala kala? !Nogat! Ol samting olsem we yumi no bos long olgeta, oli no save folem wan prapa oda, be oli olbaot nomo. Hemia wan samting we ol man oli agri long hem.

⁷ ?Taem yumi yusum wan spesel glas blong lukluk ol naesfala samting we oli stap long skae, yumi luk wanem? Yumi luk se i gat oda long ol galaksi, ol sta mo ol planet, mo oli muv stret, we wan i no mestem rod blong hem nating. Ol samting ya oli no save kamaot olsem nomo. I mas gat wan man we i bos long olgeta. Ale, ?wanem paoa ya we i mekem se ol samting ya long yunives, oli wok long fasin we i gat oda? Yumi man, yumi no naf blong kasem save long paoa ya, nating se yumi yusum ol save blong saentis mo ol tul blong olgeta. Be, Baebol i soemaot se paoa ya hemia tabu spirit blong God. Paoa ya i bigwan olgeta i bitim ol narafala paoa long yunives. Man blong raetem Sam i singsing se: “Olgeta samting long skae, Hae God i mekem olgeta long tok blong hem nomo. San mo mun mo ol sta oli kamaot long tok we hem i talem.” (Sam 33:6) !Long naet, taem yumi lukluk skae, yumi save luk wan smol haf nomo blong ol sta!

Tabu Spirit Mo Wol

8. ?Yumi gat hamas save long saed blong ol samting we Jehova i mekem?

⁸ Save we yumi gat naoia long saed blong ol samting raonabaot long yumi i smol nomo taem yumi skelem wetem plante samting we yumi mas lanem yet. Yumi gat smol save nomo long ol samting we God i mekem. Job i agri long samting ya taem hem i talem se: “Hemia ol smosmol samting nomo we i stap soemaot paoa blong hem. Ol tok ya blong ol wok blong hem, yumi harem olsem tok blong man we i stap tok smosmol nomo.” (Job 26:14) Sam handred yia biaen, King Solomon, wan waes man we i lukluk gud ol samting we Jehova i mekem, i talem se: “Olgeta samting, hem i wokem oli naes long stret taem blong olgeta. Laef we i no save finis, hem i putum long hat blong olgeta, blong bambae olgeta man oli no save faenemaot olgeta wok we tru God i mekem, long stat blong olgeta i go kasem en blong olgeta.”—Pri. 3:11, NW; 8:17.

9, 10. ?God i yusum wanem paoa blong mekem wol, mo wanem sam samting we hem i mekem long ol trifala dei ya?

⁹ Yes, Jehova i givim ol impoten save long yumi  long saed blong ol samting we hem i mekem. Olsem nao, Baebol i talemaot long yumi se God i yusum paoa blong hem blong mekem wol ya longlongtaem bifo finis. (Ridim Jenesis 1:2.) Long taem ya, i no gat graon, laet mo win long wol yet.

¹⁰ Baebol i gohed blong talemaot ol samting we God i mekem long ol dei ya we hem i stap mekem ol samting. Ol dei ya we God i mekem ol samting, oli no ol dei blong 24 aoa, be hem i wan longfala taem. Long fas dei, hem i mekem delaet i kamtru long wol. Blong mekem olsem, hem i mekem san mo mun blong i saen long wol. (Jen. 1:3, 14) Long namba tu dei, hem i mekem wan samting we i olsem bigfala ruf we i raon, blong mekem wota i seraot, wan haf antap mo wan haf daon. (Jen. 1:6) Ale, i gat wota, laet mo win long wol be i no gat graon yet. Long stat blong namba tri dei, Jehova i yusum tabu spirit blong hem blong mekem graon i kamaot long solwota. Maet God i yusum ol paoa we i stap nomo long wol ya, blong mekem ol bigfala kantri oli kamkamaot long solwota. (Jen. 1:9) Long namba tri dei ya mo long ol dei biaen, i gat sam narafala nambawan samting we God i mekem.

Tabu Spirit Mo Ol Laef Samting

11. Ol laef samting we oli defdefren, oli stret gud, mo oli naes, ?oli soemaot wanem?

¹¹ God i yusum tabu spirit blong hem blong mekem plante laef samting long wol we oli folem plan. Long namba tri dei kasem namba sikis dei, God i yusum tabu spirit blong hem blong mekem plante defdefren samting we oli gru long graon, mo hem i mekem ol anamol. (Jen. 1:11, 20-25) Ol laef samting ya we oli stap raonabaot long yumi oli defdefren, oli stret gud, mo oli naes. Oli soemaot se i gat wan man we i gat bigfala paoa, we i mekem olgeta.

12. (a) ?Kemikol ya we oli kolem DNA i mekem wanem wok? (b) ?Fasin blong DNA blong gohed long nambawan wok blong hem, i tijim yumi long wanem samting?

¹² Yu traem tingbaot olgeta laef samting long wol, olsem ol bebet, gras, elefen, blu welfis, mo ol man. Nating se olgeta evriwan oli defdefren, be evri save long saed blong wanwan bodi blong olgeta i stap insaed long DNA (deoxyribonucleic acid). DNA i wan long ol kemikol we i stap pasem evri save long bodi blong ol laef samting i go long pikinini blong olgeta. DNA i mekem se ol laef samting ya oli no save jenis blong oli kam wan narafala laef samting, nating se plante yia oli pas. Folem stamba tingting blong Jehova God long saed blong wol ya, olgeta defdefren laef samting long wol, nomata oli smol no oli bigwan be bambae oli gohed blong mekem ol wok blong olgeta. (Sam 139:16) Fasin blong DNA blong mekem gud wok blong hem mo blong wok folem oda olsem, i wan narafala pruf se tabu spirit blong God i mekem ol laef samting ya.

Wan Samting We i Nambawan Olgeta We God i Mekem

13. ?God i mekem man olsem wanem?

¹³ Afta wan longlongfala taem i pas, wol ya i no moa “stap nating nomo, we i no gat wan samting nating i stap long hem.” God i mekem ol laef samting mo ol samting we oli no gat laef. Biaen, Jehova i gohed blong yusum tabu spirit blong hem blong mekem wan samting we i nambawan olgeta long ol narafala samting we hem i mekem long wol. Klosap long en blong namba sikis dei, God i mekem man. ?Jehova i mekem samting ya olsem wanem? Hem i yusum tabu spirit blong hem mo ol samting blong wol ya.—Jen. 2:7.

14. ?Long wanem fasin, ol man oli defren long ol anamol?

¹⁴ Jenesis 1:27 i talem se: “Hem [God] i mekem man, mo man ya i tekem fasin blong hem, i olsem hem stret. Fastaem, hem i mekem tu man nomo, wan we i man mo wan we i woman.” Taem God i mekem yumi ol man blong yumi tekem fasin blong hem, i min se yumi naf blong soemaot lav, blong jusum samting, mo blong wokem wan fasin fren wetem God ya we i Mekem yumi. Yes, bren blong yumi i defren olgeta long bren blong ol anamol. Blong talem stret, Jehova i mekem bren blong yumi ol man blong yumi save harem gud blong lanem samting long saed blong hem mo ol wok blong hem, gogo i no save finis.

15. ?Adam mo Iv, tufala i gat janis blong kasem wanem?

¹⁵ Long stat, taem God i mekem Adam mo Iv, hem i givim wol ya long tufala wetem olgeta samting we oli stap long hem, blong tufala i savegud olgeta mo harem gud long olgeta. (Jen. 1:28) Jehova i givim plante kakae long tufala mo wan naesfala paradaes we i hom blong tufala. Tufala i  gat janis blong laef olwe mo blong gat plante plante pikinini we oli stret gud olgeta. Be ol samting i no kamtru olsem we Jehova i wantem.

Yumi Mas Luksave Wok Blong Tabu Spirit

16. ?Nating se Adam mo Iv tufala i rebel, yumi gat wanem promes?

¹⁶ Bitim we Adam mo Iv tufala i obei long God we i Mekem tufala, tufala i girap, tufala i rebel agens long hem. Ale, frut blong samting ya hemia se olgeta man we oli kamaot biaen long tufala, oli harem nogud. Be Baebol i eksplenem olsem wanem God bambae i stretem olgeta nogud samting we oli kamaot from sin blong tufala fas papa mama ya bifo. Baebol i soemaot tu se Jehova bambae i mekem stamba tingting blong hem i kamtru. Wol ya bambae i kam wan paradaes we i fulap wetem ol man we oli hapi, oli gat gud helt mo we bambae oli laef gogo i no save finis. (Jen. 3:15) Blong bilif blong yumi i stap strong long nambawan promes ya, yumi nidim tabu spirit blong God blong halpem yumi.

17. ?Yumi mas blokem wanem tingting?

¹⁷ Yumi mas prea long Jehova blong kasem tabu spirit. (Luk 11:13) Taem yumi mekem olsem, samting ya i mekem tingting blong yumi i strong se olgeta samting long wol ya, God nomo i mekem. Tede, plante man oli no bilif se i gat wan God i stap mo plante tu oli bilif se ol samting raonabaot long yumi oli kamaot olsem nomo. Ol man ya oli no gat wan samting blong pruvum bilif blong olgeta. Taswe yumi no mas letem ol rong tingting ya oli mekem tingting blong yumi i fasfas mo oli mekem yumi fraet. Olgeta Kristin oli mas rere blong agensem olkaen tingting olsem mo ol fren we oli traem pulum olgeta blong gat tingting olsem.—Ridim Kolosi 2:8.

18. ?Taem yumi tingbaot stat blong yunives mo ol man, from wanem i no stret blong ting se i no gat wan God we i mekem olgeta samting?

¹⁸ Taem yumi tingting gud long ol samting we God i mekem, samting ya bambae i mekem we yumi gat strong bilif long Baebol mo long God. Tingting blong plante man se i no gat wan God we i mekem yunives mo ol man. Be sipos yumi mas  tokbaot tingting ya, bambae yumi no naf blong pruvum klia eni samting. Mo tu, bambae yumi no moa luksave se ol samting raonabaot long yumi oli stap long oda, mo we oli “plante we plante, we man i no save kaontem.” (Job 9:10; Sam 104:25) Yumi ol Kristin, yumi bilif fulwan se Jehova nomo i yusum tabu spirit blong hem blong mekem olgeta samting.

Tabu Spirit Mo Bilif Blong Yumi Long God

19. ?Wanem ol samting we oli pruvum se i gat wan God i stap mo se tabu spirit blong hem i stap wok?

¹⁹ Blong yumi bilif long God, blong yumi lavem hem bigwan, mo blong yumi mekem wosip long hem, yumi no nid blong save evri samting long saed blong ol samting we God i mekem. Bilif we yumi gat long God i no stanap long ol pruf nomo. Tingbaot fasin fren bitwin tu man. Taem tufala i stap savsave tufala moa, ale, bambae fasin fren blong tufala i kam strong tu. Long sem fasin, taem yumi lanem moa long saed blong God, ale bambae bilif blong yumi long hem i kam strong moa. Yes, yumi bilif se God i stap from we hem i stap ansa long ol prea blong yumi. Mo tu, yumi luksave se taem yumi folem ol rul blong hem long laef blong yumi, yumi kasem gudfala frut from. Yumi kam klosap moa long Jehova taem yumi luksave se hem i stap lidim yumi, hem i lukaotgud long yumi, hem i stap blesem yumi taem yumi wok strong long wok blong hem, mo hem i givim ol samting we yumi nidim. Olgeta samting ya oli soemaot klia se i gat wan God i stap mo se tabu spirit blong Jehova i stap wok.

20. (a) ?From wanem God i mekem yunives mo ol man? (b) ?Yumi save kasem wanem sipos yumi letem tabu spirit blong God i lidim yumi?

²⁰ Baebol i buk ya we i soemaot gud se Jehova i stap yusum tabu spirit blong hem. Hemia from we “Tabu Spirit i stap givim tok” long olgeta we oli raetem Baebol, “nao oli talemaot tok we i kamaot long God.” (2 Pita 1:21) Taem yumi stadi gud long Baebol, samting ya i save mekem bilif blong yumi long God i strong moa se hem nao i mekem olgeta samting. (Rev. 4:11) Jehova i God we i gat bigfala lav, taswe hem i mekem olgeta samting. (1 Jon 4:8) From samting ya, i gud yumi traehad blong halpem ol narafala blong oli save Papa mo Fren blong yumi long heven we hem i lavem ol man. Mo sipos yumi gohed blong letem tabu spirit i lidim yumi, bambae yumi gat janis blong lanem plante moa samting long saed blong hem gogo i no save finis. (Gal. 5:16, 25) I gud we wanwan long yumi i gohed blong lanem moa long saed blong Jehova mo ol bigbigfala wok blong hem. Mo long laef blong yumi, yumi mas soemaot lav ya we Jehova i soemaot long yumi taem hem i yusum tabu spirit blong hem blong mekem skae, wol, mo ol man.

[Ol futnot]

?Yu Yu Save Eksplenem?

• ?Ol samting long yunives oli tijim wanem long yumi long saed blong fasin blong God blong yusum tabu spirit blong hem?

• ?From we God i mekem yumi blong yumi tekem fasin blong hem, samting ya i givim janis long yumi blong mekem wanem?

• ?From wanem yumi mas stadi gud long ol pruf we oli stap long ol samting raonabaot long yumi?

• ?Long wanem rod, fasin fren blong yumi wetem Jehova i save kam strong moa?

[Kwestin]

[Tok blong pija long pej 13]

?Ol samting long yunives we oli folem oda, oli tijim yumi long wanem samting?

[Credit Line]

Stars: Anglo-Australian Observatory/David Malin Images

[Tok blong pija long pej 15]

?From wanem DNA i stap long ol samting ya?

[Tok blong pija long pej 16]

?Yu yu rere blong talemaot bilif blong yu?