1, 2. (a) Bwinga bwa kwa nani ubukalenga mu muulu mukabe ukusekelela ukukalamba? (b) Mepusho nshi twalalanshanyapo?

PA KUTI fye abantu bapekanye ubwinga balapoosapo inshita iikalamba sana. Lelo twalalanda pa bwinga ubwaibela nga nshi, no bu bwinga bwa mfumu. Baleni tontonkanyeni! Napapita nomba ne myaka 2,000 ukutula apo batendekela ukupekanya ubu bwinga. Nomba inshita naipalama iya kuti shibwinga ope nabwinga wakwe. Nomba line kwi sano lya Mfumu kukaba ukwimba inyimbo sha kusekelela, kabili aba mu muulu bakemba ati: “Lumbanyeni Jah, pantu Yehova Lesa wesu, Uwa Maka Yonse, natendeka ukuteka. Natusekelele no kwanga, kabili natumucindike, pantu yafika inshita ya bwinga bwa Mwana wa mpaanga, no mukashi wakwe naipekanya.”—Ukus. 19:6, 7.

² “Umwana wa mpaanga” uo balandapo muli ili lembo, ni Yesu Kristu. Ubwinga bwakwe bukalenga mu muulu mukabe ukusekelela ukukalamba. (Yoh. 1:29) Fya kufwala nshi afwele pa bwinga bwakwe? Bushe nabwinga wakwe nani? Bushe nabwinga bamupekanishisha shani ku bwinga bwakwe? Ni lilali kukaba ubwinga? Ubu bwinga bukalenga aba mu muulu ukusekelela nga nshi, lelo bushe ababa ne subilo lya kwikala umuyayaya  pe sonde na bo bakasekelelako? Tulefwaisha ukwishiba ifyasuko kuli ifi fipusho, kanshi pa kuti tusange amasuko, twalatwalilila ukusambilila ifyaba mu Amalumbo 45.

3, 4. (a) Fya kufwala fya musango nshi ifyo Shibwinga afwele pa bwinga, kabili finshi fyalenga ukuti acilepo ukusansamuka? (b) Bushe “abana banakashi aba mfumu” na “namfumu” abasansamukila pamo na Shibwinga, ni bani?

³ Belengeni Amalumbo 45:8, 9. Shibwinga, Yesu Kristu, afwala ifya kufwala fya pa bwinga ifya bukata. Ifya kufwala fyakwe ‘filenunkila ubusaka’ kwati ni filya fyalenunkila muri na kasia, ifyo balebika mu mafuta ya mushilo aya kusubilako abantu mu Israele.—Ukufu. 30:23-25.

⁴ Inyimbo ishilelila kwi sano lya kwa Shibwinga mu muulu shalenga ukuti acilepo ukusansamuka ilyo ubwinga bulepalama. Abalesansamukila pamo na Shibwinga ni “namfumu,” nelyo icilonganino ca kwa Lesa ica ku muulu, umwaba “abana banakashi aba mfumu,” e kutila bamalaika ba mushilo. Aba mu muulu balesosa abati: “Natusekelele no kwanga. . . pantu yafika inshita ya bwinga bwa Mwana wa mpaanga”!

5. Bushe “umukashi wa Mwana wa mpaanga” nani?

⁵ Belengeni Amalumbo 45:10, 11. Apo Shibwinga twamwishiba, nga nabwinga nani? Nabwinga bantu ababa mu cilonganino ico Yesu Kristu abapo umutwe. (Belengeni Abena Efese 5:23, 24.) Bakalateka pamo na Kristu mu Bufumu bwakwe ubwa buMesia. (Luka 12:32) Aba Abena Kristu basubwa, ba 144,000, “e bakonka Umwana wa mpaanga konse uko aya.” (Ukus. 14:1-4) Baba “umukashi wa Mwana wa mpaanga,” kabili bekala nankwe ku muulu.—Ukus. 21:9; Yoh. 14:2, 3.

6. Mulandu nshi abasubwa babetila ukuti “umwana mwanakashi wa mfumu,” kabili mulandu nshi babebela ukuti bafwile ‘ukulaba abantu babo’?

⁶ Nabwinga tabamwita fye ukuti “umwana mwanakashi,” lelo bamwita no kuti “umwana mwanakashi uwa mfumu.” (Amalu. 45:13) Nge yi “mfumu” nani? Yehova alibuula Abena Kristu basubwa ukuba “abana” bakwe. (Rom. 8:15-17) Apo bakaba banabwinga ku muulu, abasubwa babeba ati: “Laba abantu bobe ne ng’anda ya kwa wiso.” Bafwile ukubika imitima yabo pa fya ku “muulu, te fya pano isonde.”—Kol. 3:1-4.

7. (a) Bushe Kristu apekanya shani nabwinga wakwe? (b) Bushe nabwinga amona shani uukaba umulume wakwe?

⁷ Pa myaka iingi nga nshi, Kristu alapekanya nabwinga wakwe ku bwinga ubukabela ku muulu. Umutumwa Paulo atile, Kristu “atemenwe icilonganino no kuipeela pali cena, pa kuti acilenge ukuba ica mushilo, ukucisangulwila ku menshi ya mu musambilo, e kutila ku cebo ca kwa Lesa, ukuti aituulile umwine icilonganino icasambika, icabulamo ifiko atemwa inkanshi nangu akabi akali konse, lelo ukuti cibe ica mushilo kabili icabula akalema.” (Efes. 5:25-27) Paulo aebele Abena Kristu basubwa mu Korinti ukuti: “Naba no bufuba pali imwe, pantu nine wine namulaile ukuti mukoopwa ku mwaume umo, e kutila kuli Kristu, kabili ndefwaya nkamupeele kuli ena nga nacisungu uwasanguluka.” (2 Kor. 11:2) Imfumu Yesu Kristu amona nabwinga wakwe ukuti ‘aliyemba’ pantu ukupepa kwakwe kwalisanguluka kabili kulasekesha Lesa. Nabwinga na o ‘alakontamina’ uukaba umulume wakwe kabili amumona ukuti ni ‘shikulu’ wakwe.

8. Mulandu nshi balandila pali nabwinga ukuti ‘nayemba icine cine’?

⁸ Belengeni Amalumbo 45:13, 14a. Nabwinga ‘napuulamikilwa umulume  wakwe’ kabili ‘nayemba icine cine.’ Pa Ukusokolola 21:2, nabwinga bamupashanya ku musumba, e kutila Yerusalemu Mupya. Uyu musumba wa ku muulu ulabengeshima no “bukata bwa kwa Lesa” kabili ukubengeshima kwa uko kwaba “nge libwe ilyauma umutengo nga nshi, nge libwe lya yaspi ilyabeeka kwati ni krustali.” (Ukus. 21:10, 11) Ibuuku lya Ukusokolola lyalilondolola bwino ifyo Yerusalemu Mupya ayemba. (Ukus. 21:18-21) E mulandu wine uwaimbile amalumbo alondolola ukuti nabwinga ‘nayemba icine cine’! Ifi fine e fyo twingenekela nabwinga ukumoneka pantu ubu bwinga bwa mfumu bubelele ku muulu.

9. Bushe “imfumu” iyo batwalako nabwinga nani, kabili fya kufwala fya musango nshi ifyo nabwinga afwele?

⁹ Nabwinga bamutwala kuli Shibwinga, Imfumu Mesia. Shibwinga ‘alasangulwila nabwinga ku menshi ya mu musambilo, e kutila ku cebo ca kwa Lesa.’ Nabwinga ‘wa mushilo kabili takwata akalema.’ (Efes. 5:26, 27) Nabwinga na o afwile ukufwala ifya kufwala ifisuma ifya pa bwinga. Na kuba ifi fine e fyo afwele! “Mu fya kufwala fyakwe balipikwilamo utwa golde,” kabili “akaletwa ku mfumu mu fya kufwala fyapikulwa.” Pali ubu bwinga bwa Mwana wa mpaanga, nabwinga “napeelwa insalu ishabuuta tuutu, isha busaka, ishawama ukuti afwale, pantu insalu ishawama e milimo yalungama iya ba mushilo.”—Ukus. 19:8.

10. Ni lilali ubwinga bwa Mwana wa mpaanga bukabako?

¹⁰ Belengeni Ukusokolola 19:7. Ni lilali ubwinga bwa Mwana wa mpaanga bukabako? Nangu ca kutila “umukashi wakwe naipekanya” ukuupwa, ifikomo fyakonkapo tafilanda pa bwinga. Lelo filanda pa fikacitika mu lubali lwa kulekeleshako ulwa bucushi bukalamba. (Ukus. 19:11-21) Bushe ici cilolele mu kuti ubwinga bukabako ilyo Imfumu ishilapwishishisha ukucimfya? Iyo. Ifimonwa fyaba mwi buuku lya Ukusokolola tafyalembwa ukulingana ne fyo fikacitika. Mu Amalumbo 45, ubwinga bwa mfumu bukabako pa numa Imfumu Yesu Kristu, akakila ulupanga no ‘kuya alecimfya’ abalwani bakwe.—Amalu. 45:3, 4.

11. Finshi Kristu akacita ilyo inshita ya bwinga ishilafika?

¹¹ Kanshi kuti twatila ifintu fikakonkana nge fi: Ica kubalilapo, “cilende mukalamba,” e kutila Babiloni Mukalamba ukupepa kwa bufi konse, akonaulwa. (Ukus. 17:1, 5, 16, 17; 19:1, 2) Lyena, Kristu akonaula icalo cabipa ica kwa Satana pa Armagedone, “inkondo ya bushiku bukalamba ubwa kwa Lesa Wa Maka Yonse.” (Ukus. 16:14-16; 19:19-21) Na mu kulekelesha, Imfumu ikapwishishisha ukucimfya ilyo ikapoosa Satana ne fibanda fyakwe mu cilindi cabula impela, umo bashakakwate amaka ya kutunka uuli onse.—Ukus. 20:1-3.

12, 13. (a) Ni lilali kukaba ubwinga bwa Mwana wa mpaanga? (b) Ni bani mu muulu abakasekelela pa bwinga bwa Mwana wa mpaanga?

¹² Abena Kristu basubwa nga bapwisha umulimo wabo uwa pe sonde muli shino nshiku sha kulekelesha, balabuukila ku muulu. Pa numa ya konaulwa kwa Babiloni Mukalamba, Yesu akalonganya bonse abakashalapo aba mwi bumba lya kwa nabwinga. (1 Tes. 4:16, 17) E ico ilyo inkondo ya Armagedone ishilatendeka, bonse aba mwi bumba lya kwa “nabwinga” bakaba ku muulu. Pa numa ya iyi nkondo, e lyo kukaba ubwinga bwa Mwana wa mpaanga. Ala kukaba ukusekelela nga nshi pali ubu bwinga! Pa Ukusokolola 19:9 patila, “Balipaalwa abaitwa ku mulaalilo wa bwinga bwa Mwana wa mpaanga.” Ca cine, ba 144,000 ababa mwi bumba lya kwa nabwinga bakasekelela nga nshi. Kabili Shibwinga na o akasekelela icine cine ukuba pamo  na bo akateka nabo mu bufumu, kabili mu mampalanya ‘bakalya no kunwa nankwe pe tebulo mu Bufumu bwakwe.’ (Luka 22:18, 28-30) Lelo te Shibwinga fye na nabwinga abakasekelela pali ubu bwinga.

¹³ Nga fintu tumwene kale, aba mu muulu bakemba ukuti: “Natusekelele no kwanga, kabili natumucindike [Yehova], pantu yafika inshita ya bwinga bwa Mwana wa mpaanga, no mukashi wakwe naipekanya.” (Ukus. 19:6, 7) Inga ababomfi ba kwa Yehova aba pe sonde, bushe nabo bakasekelela?

14. Bushe “banacisungu” abo Amalumbo 45 yalandapo, ni bani?

¹⁴ Belengeni Amalumbo 45:12, 14b, 15. Kasesema Sekaria aseseme ukuti mu nshita ya ku mpela, abantu ukufuma mu nko bakalabombela Yehova pamo na bashalapo aba muli Israele wa kwa Lesa. Atile: “Mu nshiku shilya e mo abantu 10 aba mu ndimi shonse isha nko, bakekata ku nsenkebele sha ku ca kufwala ca muYuda umo, abati: ‘Tuleya na imwe, pantu natumfwa ukuti Lesa ali na imwe.’” (Seka. 8:23) Pa Amalumbo 45:12, aba “bantu 10” aba mampalanya babeta ukuti “umwana mwanakashi wa ku Turi” no kuti “abakankaala ba mu bantu.” Balapeela abashalapo abasubwa ifya bupe pa kuti ‘babanakilishe’ no kuti babafwe ukubombela Yehova. Ukutula mu 1935, abashalapo balileta abantu abengi nga nshi “mu bulungami,” e kutila balibasambilisha icine pali Yehova. (Dan. 12:3) Aba abanabo ba Bena Kristu basubwa bali-isangulula ku mipepele ya bufi, e co babetila ukuti banacisungu. Aba “banacisungu” bali-ipeela kuli Yehova kabili balilanga ukuti ba cishinka kuli Shibwinga, Imfumu yabo.

15. Bushe “banacisungu” babombela shani pamo na ba mwi bumba lya kwa nabwinga abacili pe sonde?

 ¹⁵ Abashalapo aba mwi bumba lya kwa nabwinga balatasha sana aba “banacisungu” pa fyo babombesha mu mulimo wa kushimikila “imbila nsuma iyi iya bufumu” mwi sonde lyonse. (Mat. 24:14) Te ‘mupashi fye na nabwinga abasosa abati, “Iseni!”’ lelo na baleumfwa nabo balasosa abati, “Iseni!” (Ukus. 22:17) “Impaanga shimbi” balyumfwa uko abashalapo aba mwi bumba lya kwa nabwinga basosa abati “Iseni!” kabili nabo baleba abantu mwi sonde lyonse ukuti “Iseni!”—Yoh. 10:16.

16. Lishuko nshi ilyo Yehova apeela impaanga shimbi?

¹⁶ Abasubwa balitemwa abanabo kabili baliba ne nsansa ukwishiba ukuti Wishi wa kwa Shibwinga Yehova, alipeela impaanga shimbi ishuko lya kusekelela pamo nabo pa bwinga bwa Mwana wa mpaanga ubukaba ku muulu. Calisobelwe ukuti aba “banacisungu” “bakaletwa no kusekelela no kwanga.” Ca cine, impaanga shimbi, abakwata isubilo lya kwikala umuyayaya pe sonde bakasekelela pamo na ba ku muulu ilyo kukaba ubwinga bwa Mwana wa mpaanga ku muulu. E mulandu wine, ibuuku lya Ukusokolola lilandila pa baba mwi “bumba likalamba” ukuti “nabeminina pa ntanshi ya cipuna ca bufumu na pa ntanshi ya Mwana wa mpaanga.” Balabombela Yehova umulimo wa mushilo mu lubansa lwa pe sonde ulwe tempele lya kwa Lesa ilya mampalanya.—Ukus. 7:9, 15.

17, 18. Mapaalo nshi ayo ubwinga bwa Mwana wa mpaanga bukaleta mu calo cipya, kabili bushe Kristu akaba wishi wa bani ilyo akateka mu myaka 1,000?

¹⁷ Belengeni Amalumbo 45:16. “Banacisungu,” abanankwe ba kwa nabwinga wa kwa Kristu bakasekelela sana ilyo bakamona amapaalo ayo ubwinga bwa Mwana wa mpaanga bukaleta mu calo cipya. Shibwinga Imfumu akabuusha “ifikolwe” fyakwe ifya pe sonde kabili bakesaba ‘abana bakwe abaume’ aba pe sonde. (Yoh. 5:25-29; Heb. 11:35) Pali aba e po akasonta “bacilolo mwi sonde lyonse.” Kabili nalimo Kristu akasonta na baeluda bamo aba cishinka ukuba bacilolo abakalatungulula abantu mu calo cipya.—Esa. 32:1.

¹⁸ Ilyo Kristu Akalateka pa Myaka Ikana Limo, akaba wishi wa bantu na bambi. Na kuba, bonse abakekala pe sonde bakaba no mweo wa muyayaya pantu balicetekela ilambo lya cilubula ilya kwa Yesu. (Yoh. 3:16) E ico, Kristu akaba “Wishi wa pe.”—Esa. 9:6, 7.

19, 20. Bushe ifintu ifisuma ifyalembwa mu Amalumbo 45 fyakuma shani Abena Kristu muno nshiku?

¹⁹ Belengeni Amalumbo 45:1, 17. Ukwabula no kutwishika, ifyalembwa mu Amalumbo 45 fyalikuma Abena Kristu bonse. Abasubwa abacili pe sonde balasekelela pantu nomba line bali no kuba pamo na bamunyinabo ku muulu e lyo na Shibwinga. Aba mpaanga shimbi nabo balafwaisha ukunakila Imfumu yabo iya bukata kabili balatasha pe shuko bakwata ilya kwampana pamo na ba mwi bumba lya kwa nabwinga abacili pe sonde. Pa numa ya bwinga, Kristu na bo akalateka nabo, bakaleta amapaalo ayengi nga nshi pa bantunse pe sonde.—Ukus. 7:17; 21:1-4.

²⁰ Ilyo tulelolela ukufikilishiwa kwa fintu ifisuma ifyo Ubufumu bwa kwa Mesia bukaleta, ukwabula no kutwishika, tulafwaisha ‘ukulumbula ishina lyakwe’! Shi natube pa bantu ‘abakalalumbanya Imfumu umuyayaya, kabili pe na pe.’