Maan e suan e wun ase kanlɛ
Maan e suan e wun ase kanlɛ
“Sran ng’ɔ ti amun kwlaa amun nun kaan’n, i sɔfuɛ’n yɛ ɔ ti dan-an.”—LIK 9:48.
?AMUN KWLA TƐ KOSAN NGA’M BE SU?
?Wafa sɛ yɛ e kwla suan e wun ase kanlɛ ɔ?
?Kɛ be se kɛ sran m’ɔ yo i wun kaan’n, yɛ ɔ ti ‘dan’n’ i bo’n yɛle benin?
?Aja’n nun nin asɔnun’n nun, ɔ nin e nin e niaan mun e tranlɛ’n nun’n, wafa sɛ yɛ e kwla kan e wun ase ɔ?
1, 2. ?Afɔtuɛ benin yɛ Zezi mɛnnin i akoto mun ɔn? ?Yɛ ngue ti yɛ ɔ mannin be afɔtuɛ sɔ’n niɔn?
LE KUN’N, kɛ Zezi o Galile mɛn nun lɔ’n, akplowa kun tɔli i akoto wie’m be afiɛn. Yɛle kɛ be waan bé wún be nun sran ng’ɔ ti sran dan’n. Afuɛ nga be flɛ i 32 nun’n, yɛ sa sɔ’n yoli ɔ. Liki m’ɔ klɛli Zezi i jasin’n fɛ’n seli kɛ: “Akplowa wie tɔli i sɔnnzɔnfuɛ’m be afiɛn kɛ bé wún be nun sran ng’ɔ ti sran dan tra be kwlaa’n. Kɛ Jésus wunnin be akunndan nga be bu’n, ɔ fa ba kaan kun jrɛnnin i wun lɛ, yɛ ɔ seli be kɛ: ‘Sran ng’ɔ sɔ bakan nga nun n dunman nun’n, wuun m bɔbɔ min yɛ w’a sɔ min nun-ɔn, yɛ sran ng’ɔ sɔ min nun’n, wuun sran b’ɔ sunmannin min’n i nun yɛ w’a sɔ-ɔ. Afin sran ng’ɔ ti amun kwlaa amun nun kaan’n, i sɔfuɛ’n yɛ ɔ ti dan-an.’” (Lik 9:46-48) Zezi trɛli i awlɛn i sɔnnzɔnfuɛ’m be wun ukali be blɛblɛblɛ. Sanngɛ ɔ jrannin su kpa kleli be kɛ ɔ fata kɛ be yo wun ase kanfuɛ.
2 Zezi waan i akoto’m be kan be wun ase. ?Sanngɛ wafa sɛ yɛ i blɛ sufuɛ’m be bu wun ase kanlɛ’n niɔn? ?Ɔ ti be cinnjin annzɛ kusu be wun dandan yolɛ yɛ ɔ ti be cinnjin ɔn? Fluwa kun kannin blɛ sɔ nunfuɛ’m be nzuɛn’n i ndɛ seli kɛ: “Sa kwlaa nun’n, saan bé sí sran ng’ɔ ti be nun danfuɛ’n i su akplowa. Aɲinyiɛ ng’ɔ fata kɛ be fa man sran kun’n, be fa kanman ngowa, ɔ ti be like dan kun.” (Theological Dictionary of the New Testament) Ɔ maan, afɔtuɛ nga Zezi mannin be’n, ɔ kle kɛ ɔ fataman kɛ i akoto’m be nin be blɛ sufuɛ’m be nzuɛn’n yo kun.
3. (a) ?Kɛ be se kɛ sran kun yo i wun “kaan’n” i bo’n yɛle benin? ?Yɛ ngue ti yɛ, ɔ ju wie’n, e wun ase kanlɛ’n kwla yo kekle man e ɔ? (b) ?E wun ase kanlɛ’n i su kosan benin mun yɛ ɔ fata kɛ e tɛ be su ɔ?
3 Glɛki aniɛn nun’n, kɛ be se kɛ sran kun yo i wun “kaan’n” i bo’n yɛle kɛ ɔ si i awɛ, ɔ kɛn i wun ase, kpɛkun ɔ ti sran m’ɔ yimɛn i wun nglo ɔ. Kɛ Zezi mɛ́n i akoto’m be afɔtuɛ’n, ɔ fali bakan kun fa sieli be afiɛn. Ɔ yoli sɔ naan b’a wun i wlɛ kɛ ɔ fata kɛ be kan be wun ase. I ndɛ sɔ’n ti e liɛ wie andɛ. Afin ɔ ju wie’n, e wun ase kanlɛ’n kwla yo kekle man e. Yɛle kɛ, fɔ m’ɔ o e nun’n ti’n, e kwla kunndɛ dunman. Be nga be bo sin yia e’n kusu, be kpli naan b’a ɲan dunman, be tu be wun, yɛ be fa be nuan nun fɛ laka sran mun. ?Ngue yɛ ɔ́ úka e naan y’a kan e wun ase ɔ? Zezi waan ‘sran ng’ɔ ti e kwlaa e nun kaan’n, i sɔfuɛ’n yɛ ɔ ti dan ɔn.’ ?Wafa sɛ yɛ ɔ kwla yo sɔ ɔ? ?Yɛ sran benin mun yɛ ɔ fata kɛ e mian e ɲin e kan e wun ase e man be wie ɔ?
“EEE, NYANMIƐN TI ANYANBEUNFUƐ O! Ɔ SI NGWLƐLƐ O! Ɔ SI SA’N KWLAKWLA KPAN!”
4, 5. ?Ngue yɛ ɔ kwla uka e naan y’a yo wun ase kanfuɛ ɔ? An fa sran kun i ndɛ’n fa yiyi nun.
4 Like kun nga ɔ kwla uka e naan y’a yo wun ase kanfuɛ’n, yɛle Zoova i dan m’ɔ ti tra e’n, i su akunndan bulɛ. Nanwlɛ, “be kwlá wun-mɛn i ngwlɛlɛ’n i bo.” (Eza. 40:28) Akoto Pɔlu kannin Zoova i ɲrun ng’ɔ le i’n, i ndɛ. Ɔ klɛli i kɛ: “Eee, Nyanmiɛn ti anyanbeunfuɛ o! Ɔ si ngwlɛlɛ o! Ɔ si sa’n kwlakwla kpan! ?Wan yɛ ɔ si i klun lɔ akunndan nin-ɔn? ?Wan yɛ ɔ wun sa ng’ɔ yo be’n be wlɛ-ɔ?” (Rɔm. 11:33) Sɛ i li bɔɔ Pɔlu klɛli ndɛ sɔ’n w’a di afuɛ 2.000 naan klɔ sran’m be like nga be si i’n, w’a uka su dan’n, i ndɛ sɔ’n te yo nanwlɛ. Kannzɛ e sa silɛ’n cɛnnin sɛ’n, sanngɛ ninnge kpanngban te o lɛ mɔ e simɛn i Zoova nin i junman’n nin sa ng’ɔ yo be’n, be su ɔ. Ɔ maan i ti’n, ɔ fata kɛ e kan e wun ase.
5 Ninnge nga Ɲanmiɛn yo’n, e kwlá siman be bo. I sɔ mɔ e niaan kun mɔ be flɛ i Leo’n *, ɔ wunnin i wlɛ’n ti’n, ɔ yoli i wun kaan. I nun ng’ɔ te yo gbanflɛn kan’n, ɔ klo nglo lɔ ninnge mun be su like suanlɛ kpa. I sɔ’n ti’n, ɔ wa ɔli suklu nga be suan nglo lɔ ninnge kɛ nzraama nin wia’n, ɔ nin anglo ba’n be su like i nun, naan w’a si be su like kpa ekun. I sin’n, ɔ wa wunnin like cinnjin kpa kun i wlɛ. Ɔ seli kɛ: “M ma wunnin i kɛ, like nga siansifuɛ’m be kle’n be ngunmin be kwlá ukaman klɔ sran mun naan b’a si ninnge nga be o mɛn’n nun’n be kpa. Ɔ maan, m ma sɔli nvle’m be mmla’m be suanlɛ.” Leo wa yoli be klɔ’n su akpasua kun su jɔlɛ difuɛ. Naan kasiɛn w’a ko yo ndɛ kanwlɛ (tribunal) lɔ jɔlɛ difuɛ kun. Kɛ ɔ́ kɔ́ i ɲrun’n, ɔ nin i yi be wa suannin Biblu’n nun like, be wɔli be ɲrun be yoli be batɛmu, be kacili Ɲanmiɛn sufuɛ. Leo si fluwa kpa. Sanngɛ, ɔ kwla yoli i wun kaan. ?Ngue yɛ ɔ ukɛli i ɔ? Ɔ tɛ su kɛ: “M ma wunnin i wlɛ kɛ, kannzɛ maan e suan Zoova ɔ nin nglo lɔ ninnge’m be su like e ju sɛ’n, sanngɛ ɔ juman lika fi.”
6, 7. (a) ?Ngue ti yɛ Zoova i wun ase kanlɛ’n yo ɲɛnmɛn dan ɔn? (b) ?Wafa sɛ yɛ Zoova i wun ase kanlɛ’n kwla yo maan i sufuɛ kun ɲan ɲrun ɔn?
6 Like kun ekun ng’ɔ kwla uka e naan y’a yo wun ase kanfuɛ’n, yɛle kɛ maan e si kɛ Zoova bɔbɔ kɛn i wun ase. Amun bu ndɛ nga i akunndan nian. Biblu’n waan “e nin Nyanmiɛn yɛ e di junman” ɔn. (1 Kor. 3:9) Ɔ maan Zoova mɔ like fi nunmɛn i sin’n, ɔ man e atin kɛ e fa Biblu’n m’ɔ ti i Ndɛ’n, e bo jasin fɛ’n e kle sran mun. I sɔ m’ɔ yo’n kle kɛ ɔ bu e sran. Jasin fɛ’n nga e bo’n, sɛ ɔ ti kɛ ninnge mma sa’n, nn é sé kɛ e yɛ e lua ɔ, yɛ e yɛ e gua su nzue ɔ. Kannzɛ bɔbɔ Zoova yɛ maan ɔ yo kpa’n, sanngɛ kɛ ɔ fa e kɛ e nin i e di junman’n, nanwlɛ, i sɔ’n ti e aɲrunɲan like. (1 Kor. 3:6, 7) Ɲanmiɛn i wun ase kanlɛ sɔ’n, ɔ yo ɲɛnmɛn dan. Ɔ fata kɛ i sɔ’n su e bo naan e yo e wun kaan.
7 Ɲanmiɛn i wun ase kanlɛ’n, ɔ kannin Davidi m’ɔ ti jue tofuɛ’n i awlɛn’n dan. Ɔ toli jue manmannin Zoova seli kɛ: “Anannganman, a ti kɛ nyrɛn sa, a sasa min, yɛ a de min. Ɔ klun ufue’n [“wun ase kanlɛ,” NW] ti maan min dunman’n fu.” (2 Sam. 22:36) Davidi seli kɛ ɲrun ng’ɔ le i Izraɛlifuɛ’m be afiɛn’n, ɔ fin Zoova m’ɔ kpɛli i ɲin ase niɛnnin i’n. Yɛle kɛ Zoova kɛnnin i wun ase niɛnnin i lɔ. (Jue. 113:5-7) ?Nɛ́n i kunngba’n yɛ Zoova kusu yo i e lika ɔ? ?Afin sɛ e nzuɛn yɛ ɔ ti kpa o, sɛ ngwlɛlɛ wie yɛ e si i o, annzɛ sɛ asɔnun’n nun junman wie yɛ be mannin e kɛ e di o, ‘nán Zoova yɛ ɔ mannin e ɔ?’ (1 Kor. 4:7) Sa nga ti mɔ Zoova i sufuɛ’n m’ɔ yo i wun kaan’n, yɛ ɔ ti ‘dan’n,’ i kun ekun yɛle kɛ ɔ kaci i sran nanndoliɛ kpa. (Lik 9:48) Like nga ti yɛ ɔ ti sɔ’n, maan e bo e ɲin ase e nian.
‘SRAN NG’Ɔ TI AMUN NUN KAAN’N, I SƆFUƐ’N YƐ Ɔ TI DAN-AN”
8. ?Sɛ e kan e wun ase’n, wafa sɛ yɛ e nin Zoova i anuannzɛ’n é nánti ɔ?
8 E wun ase kanlɛ’n ti cinnjin. Afin, sɛ e kan e wun ase’n, é dí aklunjuɛ Ɲanmiɛn i anuannzɛ’n nun. Yɛ wafa nga be fa siesie ninnge mun’n asɔnun’n nun’n, é sɔ́ nun kpa. Sa ng’ɔ juli aniaan bla kun mɔ be flɛ i Petra’n i su’n yɛ. I si nin i nin be ti Zoova i Lalofuɛ. Sanngɛ Petra waan be yaci i nun naan i bɔbɔ yo i klunklo sa. I sɔ’n ti’n, ɔ yacili aɲia’m be bo kɔlɛ. Kɛ ɔ́ jú i ɲrun’n, ɔ wa sɛli i sin ɔli aɲia’m be bo ekun. Siɛn’n, ɔ di aklunjuɛ kpa Zoova i anuannzɛ’n nun, yɛ wafa nga be siesie ninnge mun asɔnun’n nun’n, ɔ sɔ nun klanman. ?Ngue yɛ maan Petra kacili ɔ? I waan: “N wunnin i wlɛ kɛ, sɛ n kunndɛ kɛ ń dí aklunjuɛ Zoova i anuannzɛ’n nun’n, like ng’ɔ fata kɛ n suɛn i yolɛ kpa’n, yɛle min wun ase kanlɛ’n.”
9. ?Wafa sɛ yɛ sran ng’ɔ kɛn i wun ase’n, ɔ bu fluwa nga Zoova fa be kle e like’n mun ɔn? ?Yɛ wafa sɛ yɛ ɔ kaci sran nanndoliɛ kpa ɔ?
9 Sran ng’ɔ kɛn i wun ase’n, ɔ si ninnge nga Zoova man e’n, mɔ i wie yɛle fluwa nga ɔ fa be kle e like’n, be su ye. Ɔ maan, i sɔ sran liɛ’n, ɔ ti Biblu’n nun like suanfuɛ dan, kpɛkun ɔ ti Sasafuɛ Tranwlɛ’n nin Réveillez-vous ! be nun kannganfuɛ dan wie. Kɛ Zoova i sufuɛ onga’m be fa yo’n sa’n, e fluwa kwlaa ng’ɔ fite’n, ɔ dun mmua kanngan nun naan w’a fa sie i fluwa siewlɛ’n nun lɔ. Sɛ e kle kɛ e si ye, naan e kan e wun ase e kanngan e fluwa’m be nun naan e suan be nun like titi’n, é kɔ́ e ɲrun Ɲanmiɛn i sulɛ nun. Yɛ Zoova kusu fá e dí junman kpa.—Ebr. 5:13, 14.
10. ?Asɔnun’n nun’n, wafa sɛ yɛ e kwla yo e wun kaan ɔn?
10 Sa uflɛ ekun o lɛ, mɔ i ti yɛ sran ng’ɔ yo i wun kaan’n, ɔ ti ‘dan’n’ niɔn. E asɔnun’m be kwlaa be nun’n, aniaan nga be nin asɔnun kpɛnngbɛn junman’n fata’n, Zoova i wawɛ’n maan be sie be kɛ be di i sɔ junman’n. Aniaan sɔ’m be siesie asɔnun aɲia mun nin jasin fɛ’n bolɛ aɲia mun. Kpɛkun be siesie be wun be ko nian be niaan’m be lika, be fa Ɲanmiɛn Ndɛ’n wla be fanngan. Ɔ maan, sɛ e yo e wun kaan’n, naan ninnge mɔ be siesie sɔ’n, e sɔ nun kpa’n, e kusu é yó maan aklunjuɛ nin anuannzɛ’n bé trán asɔnun’n nun. (An kanngan Ebre Mun 13:7, 17 nun.) ?Amun mɔ amun ti asɔnun kpɛnngbɛn annzɛ asɔnunfuɛ’m be lika nianfuɛ’n, junman cinnjin sɔ mɔ Zoova fa wlali amun sa nun’n ti’n, ɔ fataman kɛ amun lɛ i ase?
11, 12. ?Ngue yɛ ɔ fata kɛ e yo naan y’a kwla kaci sran nanndoliɛ kpa Zoova i anuannzɛ’n nun ɔn? ?Ngue ti yɛ i sɔ yolɛ’n ti cinnjin ɔn?
11 Sran ng’ɔ yo i wun kaan’n, ɔ ti ‘dan,’ yɛle kɛ ɔ ti sran nanndoliɛ kpa Zoova i anuannzɛ’n nun. Afin i wun ase kanlɛ’n ti’n, ɔ kaci Ɲanmiɛn i sa nun junman difuɛ kpa. Like nga ti yɛ Zezi seli i sɔnnzɔnfuɛ’m be kɛ be yo be wun kaan’n, yɛle kɛ be nun wie’m be kunndɛli kɛ bé yó be wun dandan kɛ be blɛ sufuɛ mun sa. Lik 9:46 se kɛ “akplowa wie tɔli [...] be afiɛn kɛ bé wún be nun sran ng’ɔ ti sran dan tra be kwlaa’n.” ?E kusu, ɔ yo e kɛ like wie nun’n, e ti kpa tra e wiengu Klistfuɛ mun annzɛ sran onga mun? Sran kpanngban be di be nuan yɛ be bɔbɔ be ngunmin be wun akunndan yɛ be bu ɔ. Nán maan e di tutre. Maan e kan e wun ase. Sɛ e yo sɔ’n naan e fa Zoova i klun sa yolɛ’n fa dun mmua like kwlaa ɲrun’n, é yó maan e niaan’m be wun kpája be.
12 Nanwlɛ, afɔtuɛ nga Zezi man e kɛ e yo e wun kaan’n, ɔ ti kpa man e. Ɔ maan, like kwlaa nga e yo’n nun’n, ɔ nin i fata kɛ e mian e ɲin e yo e wun kaan. Siɛn’n, maan e kan sran wie m’ɔ fata kɛ e mian e ɲin e kan e wun ase e man be’n, be ndɛ.
E MIAN E ƝIN E YO E WUN KAAN
13, 14. ?Wafa sɛ yɛ ɔ fata kɛ yasua’n annzɛ bla’n ɔ yo i wun kaan ɔn? ?Yɛ wafa sɛ yɛ i sɔ’n yó be aja’n i ye ɔ?
13 Aja’n nun. Andɛ sran mun, like ng’ɔ fata kɛ be yo be man be’n, yɛ ɔ ti be cinnjin kpa ɔ. Sɛ i li bɔ ɔ fata kɛ be bu sran lufle’n naan w’a yo sɔ’n, be yo. Sanngɛ sran ng’ɔ yo i wun kaan’n i liɛ’n, afɔtuɛ nga Pɔlu mɛnnin i yɛ’n su’n yɛ ɔ fa ɔ. Fluwa ng’ɔ klɛli ko mannin Rɔmufuɛ mun’n nun’n, ɔ seli kɛ: “Maan e yo sa ng’ɔ jɔ e wiengu klun b’ɔ maan e kwlaa é yó kpa’n.” (Rɔm. 14:19) Sran ng’ɔ kɛn i wun ase’n, ɔ yo like kwlaa ng’ɔ kwla yo naan i wiengu’m be klun w’a jɔ’n. I li bɔbɔ sɛ ɔ ti i yi annzɛ i wun m’ɔ klo i kpa’n, yɛ ɔ fata kɛ ɔ yo i sɔ bɔbɔ kpa’n niɔn.
14 Maan e nian wafa nga be ɲin su yiyilɛ nun’n, yasua nin bla’n be kwla yo i sɔ’n. Be ɲin su yiyilɛ nun’n, yasua’n nin bla’n be akunndan’n kwla yo fanunfanun. Kɔlɛ’n, kɛ yasua’n leman like yoman’n, ɔ klo kɛ ɔ́ trán awlo diin kɛ́nngɛn i fluwa nun. Sanngɛ bla’n i liɛ’n, ɔ kunndɛ kɛ be fite naan be ko di aliɛ kan, annzɛ be ko nian be janvuɛ wie’m be osu. Sɛ yasua’n seman kɛ saan fii i liɛ’n su yɛ ɔ ka’n, naan ɔ kɛn i wun ase bu i yi’n i akunndan’n, ɔ́ yó pɔpɔ mán bla’n kɛ ɔ bu i sran. ?Nɛ́n i ɔ? Sɛ bla’n kusu kɛn i wun ase naan ɔ bu i wun’n i akunndan’n, naan nán i ndɛ liɛ’n su yɛ ɔ ka’n, bian’n kló i kpa lele. ?Nɛ́n i ɔ? Kɛ yasua’n nin bla’n be nɲɔn’n be yo be wun kaan’n, be afiɛn’n sɛ kpa.—An kanngan Filipfuɛ Mun 2:1-4 nun.
15, 16. ?Afɔtuɛ benin yɛ Davidi mɛn i Jue mun 131 nun ɔn? ?Yɛ wafa sɛ yɛ ɔ fata kɛ e nian su e nanti asɔnun’n nun ɔn?
15 Asɔnun’n nun. Andɛ mɛn nunfuɛ mun, like nga be ɲin o i sin’n, be waan maan be ka be ja nun lɛ be ɲɛn i. Awlɛn tralɛ’n ti kekle be sa nun. Sanngɛ e liɛ’n, e wun kaan yolɛ’n, ɔ́ úka e naan y’a fa e wla y’a guɛ i Zoova su. (An kanngan Jue Mun 131:1-3 nun.) Sran ng’ɔ kɛn i wun ase m’ɔ fɛ i wla gua Zoova su’n, ɔ ɲan mmlusuɛ. Yɛle kɛ i klun titimɛn i, Zoova sa wo i su, yɛ i klun jɔ. Ɔ maan, nán ngbɛn ti yɛ Davidi wlali i niaan Izraɛlifuɛ’m be fanngan kɛ be fa be wla gua be Ɲanmiɛn’n i su’n niɔn!
16 Sɛ e kan e wun ase, naan e fa e wla’n kwlaa e guɛ i Zoova su’n, e kusu, e klun jɔ́ wie. (Jue. 42:6) Atrɛkpa’n, e kunndɛ kɛ é dí ‘junman m’ɔ ti kpa’n.’ Yɛle kɛ ‘e klo kɛ é yó asɔnun sunianfuɛ.’ (1 Tim. 3:1-7) I yo, sɛ ɔ ti sɔ’n, ɔ fata kɛ e yo like kwlaa nga e kwla yo naan Ɲanmiɛn wawɛ’n w’a uka e naan y’a yi asɔnun sunianfuɛ nzuɛn’n i nglo. ?Yɛ sɛ be sie e niaan wie asɔnun sunianfuɛ naan kɛ é sé yɛ’n, be nin a sieman e sɔ wie’n nin? Sɛ e ti sran m’ɔ yo i wun kaan m’ɔ trɛ i awlɛn minndɛ junman nga i ɲin o i sin’n, é sú Zoova aklunjuɛ’n nun titi. Yɛ junman kwlaa nga be fa man e kɛ e di’n, é nían nun é dí i aklunjuɛ su.
17, 18. (a) ?Sran kpatalɛ’n nin e wiengu’m be wun sa yaci cɛlɛ’n, be su mmlusuɛ’n yɛle benin? (b) ?Afɔtuɛ benin yɛ ɔ o Ɲanndra Mun 6:1-5 nun ɔn?
17 E nin e niaan mun e tranlɛ’n nun. Be wiengu kpatalɛ’n ti kekle sran’m be dan lika be sa nun. Sanngɛ Ɲanmiɛn i sufuɛ’m be liɛ’n, sɛ be yo be wiengu sa’n, be di i nanwlɛ yɛ be kpɛtɛ i. I sɔ’n nun’n, be suan be wun ase kanlɛ. Sɛ kusu be yɛ be yo be sa’n, be yaci cɛ. Be wun tulɛ’n yo maan sran’m be afiɛn saci, yɛ ɔ kpɛ ndɛnngan ba. Sanngɛ sa yaci cɛlɛ’n yo maan fɔundi tran asɔnun’n nun.
18 Sa wie kwla tɔ e nin e niaan kun e afiɛn. Yɛle kɛ wienun ɔn, e niaan’n i like wie o e sa nun, yɛ ɔ fata kɛ e yi e mɛn i. Kpɛkun, sanvuɛsa wie ti’n, y’a kwlá yi a mɛnmɛn i. I lɛ nun kusu’n, ɔ nin i fata kɛ e kan e wun ase, naan e kpɛtɛ i. E wiengu kun’n kusu, ɔ kwla ijɔ e kan sɔ, sanngɛ sɛ ɔ ti wun ase kanfuɛ’n ɔ su yoman e finfin. Afin i bɔbɔ si jrɛiin kɛ ɔ fɔn wie.—An kanngan Nyanndra Mun 6:1-5 nun.
19. ?Ngue ti yɛ ɔ fata kɛ e tinuntinun e si Zoova i ye ɔ?
19 Fanngan nga Ɲanmiɛn Ndɛ’n wla e kɛ e suan e wun ase kanlɛ’n ti’n, e si Zoova i ye! Kannzɛ bɔbɔ e wun ase kanlɛ’n ti kekle man e blɛ wie nun’n, sanngɛ sɛ e bu E Yifuɛ’n i dan m’ɔ ti tra e’n, ɔ nin i wun m’ɔ kɛn i ase’n be su akunndan’n, é kwlá yó e wun kaan. Sɛ e yo sɔ’n, é káci Zoova i sran nanndoliɛ kpa. I sɔ’n ti’n, maan e tinuntinun e yo e wun kaan.
[Ja ngua lɛ ndɛ’n]
^ Be kacili be dunman mun.
[Kosan mun]
[Foto, bue 19]
Zoova bu e sran ti’n, ɔ fali jasin fɛ’n bolɛ junman’n wlali e sa nun.
[Foto, bue 22]
?Sran benin mun yɛ ɔ fata kɛ e mian e ɲin e kan e wun ase e man be wie ɔ?
