Аллаһын Кәламындан нә өјрәнирик?
Һөкм ҝүнүндә нә баш верәҹәк?
Ола билсин, һөкм ҝүнү илә бағлы сиздә мүәјјән суаллар јараныб. Мәгаләдә һәмин суалларын бәзиләри нәзәрдән кечирилир. Ҝөрүн Јеһованын Шаһидләри бу суаллара Мүгәддәс Китаб әсасында неҹә ҹаваб верирләр.
1) Һөкм ҝүнү нәдир?
Сағ тәрәфдәки шәкилдә дә тәсвир олундуғу кими, чохлары дүшүнүр ки, Һөкм ҝүнүндә милјардларла инсанын руһу Аллаһын тахты гаршысында дајанаҹаг вә кечмишдә етдикләри әмәлә ҝөрә Аллаһ онларла һагг-һесаб чәкәҹәк: бәзиләринә ҹәннәти мүкафат верәҹәк, бәзиләри исә ҹәһәннәмдә әзаб чәкәҹәк. Амма Мүгәддәс Китаба әсасән, Һөкм ҝүнүнүн мәгсәди инсанлары әдаләтсизликдән азад етмәкдир (Зәбур 96:13). Јер үзүндә әдаләти бәрпа етмәси үчүн Аллаһ Иса Мәсиһи һаким тәјин едиб. (Әшија 11:1—5; Һәвариләрин ишләри 17:31 ајәләрини охујун.)
2) Һөкм ҝүнүндә әдаләт неҹә бәрпа олунаҹаг?
Илк инсан олан Адәм Аллаһа үсјан етмәклә бүтүн инсанлары ҝүнаһын, әзаб-әзијјәтин вә өлүмүн көләси етди (Ромалылара 5:12). Бу әдаләтсизлији арадан галдырмаг үчүн Иса милјардларла инсаны дирилдәҹәк. «Вәһј» китабында дејилир ки, Иса Мәсиһ буну миниллик һакимијјәти вахты едәҹәк. (Вәһј 20:4, 11, 12 ајәләрини охујун.)
Дирилмиш инсанлар өлүмләриндән габаг ҝөрдүјү әмәлләрә ҝөрә мүһакимә едилмәјәҹәкләр, әксинә, Вәһј 20-ҹи фәсилдә дә дејилдији кими, јени «тумарларда» јазыланлара ујғун давраныб-давранмајаҹагларына әсасән мүһакимә едиләҹәкләр (Ромалылара 6:7). Дирилиб Аллаһ һагда өјрәнмәк имканы оланларын сырасында, Булусун да дедији кими, һәм салеһләр, һәм дә гејри-салеһләр олаҹаг. (Һәвариләрин ишләри 24:15 ајәсини охујун.)
3) Һөкм ҝүнүндә нәләр олаҹаг?
Аллаһ һагда ешитмәдән вә Она хидмәт етмәк имканы олмадан өлмүш инсанлара дириләндә дәјишиб јахшы ишләр ҝөрмәк үчүн фүрсәт вериләҹәк. Әҝәр онлар бу ҹүр даврансалар, «һәјата говушмаг үчүн» дирилмиш олаҹаглар. Амма дирилмиш инсанлардан бәзиләри Јеһоваја ибадәт етмәк истәмәјәҹәк. Бу инсанлар исә «һөкмә дүчар олмаг үчүн» дирилмиш олаҹаг. (Јәһја 5:28, 29; Әшија 26:10; 65:20 ајәләрини охујун.)
Мин ил давам едәҹәк Һөкм ҝүнүнүн сонунда итаәткар бәшәријјәт камил олаҹаг (1 Коринфлиләрә 15:24—28). Итаәткар кәсләри, һәгигәтән дә, ҝөзәл ҝәләҹәк ҝөзләјир! Сонунҹу сынаг заманы Аллаһ мин иллијә дибсиз гујуја һәбс етдији Шејтан Иблиси азад едәҹәк. Шејтан бу дәфә дә инсанлары Аллаһдан узаглашдырмаға чалышаҹаг. Шејтана ујмајанлар јер үзүндә әбәдијјән хошбәхт јашајаҹаглар. (Әшија 25:8; Вәһј 20:7—9 ајәләрини охујун.)
4) Даһа һансы һөкм ҝүнү вар вә о ҝүн инсанлара һансы немәтләри ҝәтирәҹәк?
Мүгәддәс Китабда башга һөкм ҝүнүндән дә данышылыр. Бу һөкм ҝүнү јашадығымыз зәманәнин сонуну ҝәтирән һадисәдир. Нуһ пејғәмбәрин дөврүндә бүтүн пис инсанлары мәһв едән дашгын кими, бу һөкм ҝүнү дә гәфил башлајаҹаг. Тезликлә аллаһсыз инсанлар мәһв едиләҹәк. Бунунла да салеһлијин мәскунлашаҹағы јени инсан ҹәмијјәтинин јаранмасы үчүн шәраит јаранаҹаг. (2 Бутрус 3:6, 7, 13 ајәләрини охујун.)