መስከረም 27, 2022 | የታደሰው፦ መጋቢት 22, 2024
ዓለም አቀፋዊ ዜና

ወቅታዊ መረጃ—የጥፋተኝነት ብይን ተቀለበሰ | በይሖዋ እርዳታ አሉታዊ ስሜቶችን ማሸነፍ

አጫውት

መጋቢት 21, 2024 የክራይሚያ ሪፑብሊክ ጠቅላይ ፍርድ ቤት፣ በወንድም ታራስ ኩዝዮ እና ባለቤቱ እህት ዳርያ ኩዝዮ እንዲሁም በወንድም ሰርጌ ልዩሊን እና በወንድም ፕዮተር ዢልትሶቭ ላይ የተላለፈውን የጥፋተኝነት ብይን ሽሯል። ወንድሞች ወዲያውኑ ከእስር ተለቀዋል። ክሳቸው በድጋሚ እንዲታይ በክራይሚያ ሪፑብሊክ ወደሚገኘው የያልታ ከተማ ፍርድ ቤት ተመልሷል።

የካቲት 27, 2023 በክራይሚያ ሪፑብሊክ የሚገኘው የያልታ ከተማ ፍርድ ቤት፣ ወንድም ታራስ ኩዝዮ እና ባለቤቱ እህት ዳርያ ኩዝዮ እንዲሁም ወንድም ሰርጌ ልዩሊን እና ወንድም ፕዮተር ዢልትሶቭ ጥፋተኛ ናቸው የሚል ብይን አስተላልፏል። ዳርያ የሦስት ዓመት የገደብ እስራት ተበይኖባታል። በአሁኑ ወቅት ወህኒ አትወርድም። ታራስ የስድስት ዓመት ተኩል እስራት ተፈርዶበታል። ሰርጌ እና ፕዮተር ደግሞ እያንዳንዳቸው የስድስት ዓመት ከአንድ ወር እስራት ተበይኖባቸዋል። ሦስቱም ወንድሞች ከፍርድ ቤት በቀጥታ ወደ ወህኒ ቤት ተወስደዋል።

የክሱ ሂደት

መጋቢት 4, 2021

ታራስ ‘ለጽንፈኛ ድርጅት የገንዘብ ድጋፍ አድርጓል’ በሚል የወንጀል ክስ ተመሠረተበት
መጋቢት 11, 2021

የእነ ታራስንና የእነ ሰርጌን ቤት ጨምሮ ዘጠኝ የይሖዋ ምሥክሮች ቤቶች ተፈተሹ። ታራስ ማረፊያ ቤት እንዲገባ ተደረገ
መጋቢት 12, 2021

ታራስ ከማረፊያ ቤት ተለቅቆ የቁም እስረኛ ተደረገ፤ ሆኖም ከቤተሰቡ ጋር እንዲኖር አልተፈቀደለትም
ሐምሌ 29, 2021

በዳሪያ፣ በፕዮተርና በሰርጌ ላይ የወንጀል ክስ ተመሠረተ። ፕዮተር ማረፊያ ቤት እንዲገባ ተደረገ
ሐምሌ 30, 2021

የሁሉም ክስ በአንድ መዝገብ ተካተተ። ፕዮተር ከማረፊያ ቤት ተለቅቆ የቁም እስረኛ ተደረገ
ነሐሴ 11, 2021

ሰርጌ በቁጥጥር ሥር ውሎ 800 ኪሎ ሜትር ገደማ ርቆ ወደሚገኝ ማረፊያ ቤት ተወሰደ። አሥራ ስድስት ሰዓት በፈጀው ጉዞ ላይ እጆቹ ከጭንቅላቱ በላይ ካለ ዘንግ ጋር ታስረው እንዲሁም እግሮቹ ከወንበሩ ጋር ታስረው ነበር
መጋቢት 1, 2022

ሰርጌ ከማረፊያ ቤት ተለቅቆ የቁም እስረኛ ተደረገ
ሚያዝያ 4, 2022

ክሱ በፍርድ ቤት መታየት ጀመረ
ሐምሌ 11, 2022

ፕዮተር፣ ሰርጌና ታራስ ከቁም እስር ነፃ ተደረጉ፤ የጉዞ እገዳ ተጣለባቸው

አጭር መግለጫ

ዳርያ ኩዞ

የትውልድ ዘመን፦ 1982 (ቮሮኒሽ፣ ቮሮኒሽ ክልል)

ግለ ታሪክ፦ መምህርት፣ የሆቴል አስተዳዳሪና የፀጉር ባለሙያ ሆና ሠርታለች። አሁን መዋቢያ ዕቃዎች ትሸጣለች

እውነትን የሰማችው ልጅ እያለች ነው። በ2000 ተጠምቃ የይሖዋ ምሥክር ሆነች። በ2008 ከታራስ ጋር ትዳር መሠረተች። አንድ ወንድና አንዲት ሴት ልጅ አላቸው

የሰጠችው ሐሳብ

በዚህ አስቸጋሪ ጊዜ ልጆቻችሁ ያገዟችሁ እንዴት ነው?

መታጠቢያ ቤት ውስጥ ተደብቄ፣ ይሖዋ ለመጽናት እንዲረዳኝ እያለቀስኩ የለመንኩበትን ጊዜ አስታውሳለሁ። ልክ በዚያ ሰዓት የዘጠኝ ዓመቱ ልጃችን መጣና ‘አይዞሽ አታልቅሺ’ አለኝ። ከዚያም “እናንተ ምሥክሮች ወደፊት ግፉ!” ከሚለው ከመዝሙር 61 ላይ ሁለተኛውን ቁጥርና አዝማቹን አሳየኝ። በመዝሙሩ ላይ የሚገኘው ሐሳብ በጣም አበረታታኝ! ይሖዋ፣ ድፍረት በሚጠይቅ አስቸጋሪ ጎዳና ላይ መሆናችንን በልጄ ተጠቅሞ ስላስታወሰኝ ከልቤ አመሰገንኩት።

ታራስ ኩዝዮ

የትውልድ ዘመን፦ 1978 (ያልታ)

ግለ ታሪክ፦ የኢኮኖሚክስ ባለሙያ ነው

ከልጅነቱ ጀምሮ ስለ መጽሐፍ ቅዱስ ማወቅ ይፈልግ ነበር። በ1999 ከይሖዋ ምሥክሮች ጋር ተገናኘ። የሚማረው ነገር ሁሉ በመጽሐፍ ቅዱስ ላይ የተመሠረተ መሆኑ በጣም አስገረመው። በ2001 ተጠመቀ

በ2008 ከዳርያ ጋር ትዳር መሠረተ

የሰጠው ሐሳብ

ተስፋ እንዳትቆርጥ የረዳህ ምንድን ነው?

በቁም እስር ላይ በነበርኩበት ወቅት የተጣለብኝ እገዳ ከቤተሰቤ ጋር መገናኘት እንዳልችል አድርጎኝ ነበር። ስልክና ኢንተርኔትም መጠቀም ስለተከለከልኩ ከእነሱ ጋር መነጋገር አልቻልኩም። ብቸኝነት ከባድ ፈተና ሆኖብኝ ነበር። የሚገርመው ሁኔታዎች በጣም በከበዱኝ ቀናት ብቅ ብሎ የሚጠይቀኝ ወንድም አይጠፋም። ምንጊዜም ከወንድሞቼ ጋር የተወሰነ ካወራሁ በኋላ ቀለል ይለኛል። በተጨማሪም የመንግሥቱን መዝሙሮች በቃሌ በማጥናት ጊዜዬን በአግባቡ ለመጠቀም እጥር ነበር። ሐሳብህንና ትኩረትህን በመንፈሳዊ ነገሮች ላይ ስታደርግ ፈተናዎችን በጽናት መወጣት ይበልጥ ይቀላል።

ሰርጌ ልዩሊን

የትውልድ ዘመን፦ 1984 (ያልታ)

ግለ ታሪክ፦ ካቢኔት በመሥራት ይተዳደራል

ስለ መጽሐፍ ቅዱስ የማወቅ ፍላጎት ያደረበት ገና በልጅነቱ ነው። የይሖዋን መሥፈርቶች መከተል ጠቃሚ መሆኑን አስተዋለ። በ1993 ተጠመቀ

በ2010 ዳርያን አገባ

የሰጠው ሐሳብ

በታማኝነት ለመጽናት የረዳህ ምንድን ነው?

በአምላክ ቃል ላይ ማሰላሰሌ ስላለሁበት ሁኔታ አዎንታዊ አመለካከት እንዲኖረኝ ረድቶኛል። ለይሖዋ ያለኝ ፍቅርና ላደረገልኝ በርካታ ነገሮች ያለኝ አድናቆት ለስሙ ጥብቅና መቆምን እንደ ታላቅ ክብር እንድቆጥረው አድርጎኛል።

ፕዮተር ዢልትሶቭ

የትውልድ ዘመን፦ 1987 (ያልታ)

ግለ ታሪክ፦ የማሞቂያና ማቀዝቀዣ መሣሪያ ጥገና ባለሙያ ነው

ከይሖዋ ምሥክሮች ጋር የተገናኘው ከቤት ወደ ቤት እየሄዱ ሲሰብኩ ነው፤ መጽሐፍ ቅዱስን ለማጥናት ተስማማ። በ2005 ተጠመቀ

የሰጠው ሐሳብ

አዎንታዊ አመለካከት ይዘህ መቀጠል የቻልከው እንዴት ነው?

በተስፋ መቁረጥ ስሜት የምዋጥባቸው ጊዜያት አሉ። ብዙውን ጊዜ ይህ የሚሆነው ስላጣኋቸው ነገሮች ሳውጠነጥን ነው። በዚህ ወቅት፣ ከሁሉ በላይ ትልቅ ቦታ የሚሰጠው ነገር የይሖዋን ሞገስ ማግኘት እንደሆነ ለማስታወስ እሞክራለሁ፤ ይህም ለተስፋ መቁረጥ እጅ እንዳልሰጥ ይረዳኛል። ይሖዋ ለሚያቀርብልን መንፈሳዊ ምግብም በጣም አመስጋኝ ነኝ። ይህ ምግብ ያጋጠመኝ ችግር ከአቅሜ በላይ እንዳልሆነ እንድገነዘብ ይረዳኛል፤ በተጨማሪም በዚህ ክፉ ዓለም ውስጥ የሚያጋጥሙኝን ችግሮች ለመቋቋም የሚያስችል ብርታት ይሰጠኛል እንዲሁም ከይሖዋ ጋር የጠበቀ ወዳጅነት እንዲኖረኝ አስችሎኛል።

በእስር ቤት፣ በማረፊያ ቤት ወይም በቁም እስር ላይ የሚገኙ ታማኝ ክርስቲያኖች ‘መፈናፈኛ እንዳጡ’ ይሰማቸው ይሆናል፤ ሆኖም ይሖዋ ለስሙ ሲሉ የሚሰደዱ ክርስቲያኖችን ፈጽሞ አይተዋቸውም።—2 ቆሮንቶስ 4:8, 9