SANE BIMI 17
Ngɛ Mɛni Blɔ Nɔ Nɛ Baiblo ɔ Ma Nyɛ Maa Ye Bua O Weku ɔ?
HUNOMƐ/TSƐMƐ
“Jã nɔuu kɛ̃ lɛ e sa kaa hunomɛ hu nɛ a suɔ a yi ɔmɛ kaa mɛ nitsɛmɛ a nɔmlɔ tso ɔmɛ. Nyumu nɛ e suɔ e yo ɔ suɔ lɛ nitsɛ e he, ejakaa nɔ ko be nɛ e nyɛɔ lɛ nitsɛ e nɔmlɔ tso, mohu ɔ, e haa lɛ niye ní nɛ e fiɛ we e he . . . E sa kaa nyɛ ti nɔ fɛɛ nɔ nɛ e suɔ e yo kaa bɔ nɛ e suɔ lɛ nitsɛ e he ɔ.”
“Tsɛmɛ, nyɛ ko hi nyɛ bimɛ ɔmɛ a mi mi la woe, mohu ɔ, nyɛɛ ya nɔ nɛ nyɛɛ hi mɛ tsɔsee ngɛ Yehowa tsɔsemi kɛ e ga womi mi.”
YIGBAYIHI
“E sa kaa yogbayo hu nɛ e je bumi nɛ mi kuɔ kpo kɛ ha e huno.”
“Nyɛ yigbayihi, nyɛɛ ba nyɛ he si kɛ ha nyɛ hunomɛ kaa bɔ nɛ e sa ngɛ Nyɔmtsɛ ɔ hɛ mi ɔ.”
BIMƐ
“Bimɛ, nyɛɛ bu nyɛ fɔli ɔmɛ tue ngɛ Nyɔmtsɛ ɔ mi, ejakaa enɛ ɔ da ngɛ Mawu hɛ mi. Kekleekle mlaa nɛ si womi piɛɛ he ji: ‘Buu o tsɛ kɛ o nyɛ, konɛ e hi ha mo nɛ o se nɛ kɛ ngɛ zugba a nɔ.’”
“Nyɛ bimɛ, nyɛɛ bu nyɛ fɔli ɔmɛ tue ngɛ nɔ́ fɛɛ nɔ́ mi, ejakaa enɛ ɔ saa Nyɔmtsɛ ɔ hɛ mi saminya.”
