Kɛ Ya Ha Efesobi Ɔmɛ 6:1-24
6 Bimɛ, nyɛɛ bu nyɛ fɔli ɔmɛ+ tue ngɛ Nyɔmtsɛ ɔ mi, ejakaa enɛ ɔ da ngɛ Mawu hɛ mi.
2 Kekleekle mlaa nɛ si womi piɛɛ he ji: “Buu o tsɛ kɛ o nyɛ,+
3 konɛ e hi ha mo* nɛ o se nɛ kɛ ngɛ zugba a nɔ.”
4 Tsɛmɛ, nyɛ ko hi nyɛ bimɛ ɔmɛ a mi mi la woe,+ mohu ɔ, nyɛɛ ya nɔ nɛ nyɛɛ hi mɛ tsɔsee+ ngɛ Yehowa* tsɔsemi kɛ e ga womi nya.*+
5 Nyɔguɛhi, nyɛɛ kɛ gbeye yemi kɛ he domi blibliibli kɛ tsui nɛ mi tsɔ nɛ bu nyɛ nyɔmtsɛmɛ ɔmɛ nɛ a ji adesahi ɔ* tue,+ kaa nɔ́ nɛ Kristo lɛ nyɛ ngɛ pee ha,
6 pi be mi nɛ a ngɛ nyɛ hyɛe pɛ, konɛ nyɛ kɛ sa adesahi a hɛ mi* kɛkɛ,+ se mohu kaa Kristo nyɔguɛhi nɛ a kɛ a klaa* tsuo ngɛ Mawu suɔmi nya ní pee.+
7 Nyɛɛ kɛ juɛmi kpakpa nɛ sɔmɔ, kaa nɔ́ nɛ Yehowa*+ lɛ nyɛ ngɛ pee ha, se pi adesahi,
8 ejakaa nyɛ le kaa kpakpa fɛɛ kpakpa nɛ nɔ fɛɛ nɔ peeɔ ɔ, Yehowa* maa to lɛ nane mi,+ nyɔguɛ ji lɛ jio, nɔ nɛ e ye e he ji lɛ jio.
9 Jehanɛ se hu ɔ, nyɛ nyɔmtsɛmɛ, nyɛɛ ya nɔ nɛ nyɛɛ kɛ nyɛ nyɔguɛ ɔmɛ nɛ hi si jã nɔuu kɛ̃, nyɛ ko hi a he gbeye woe, ejakaa nyɛ le kaa a Nyɔmtsɛ ɔ nɛ e ji nyɛ hu nyɛ Nyɔmtsɛ ɔ ngɛ hiɔwe,+ nɛ e hlɛ nɔ mi.
10 Nyagbe ɔ, nyɛɛ ya nɔ nɛ nyɛ ná he wami+ nɛ je Nyɔmtsɛ ɔ ngɔ ɔ kɛ gu e he wami ngua a nɔ.
11 Nyɛɛ wo tabuli a he piɛ pomi ní ɔmɛ tsuo+ nɛ je Mawu ngɔ ɔ, konɛ nyɛ nyɛ nɛ nyɛɛ da si kpɛii nɛ nyɛɛ hwu kɛ si Abosiami ga tsɔmi ɔmɛ;
12 ejakaa wa ngɛ atlibo ko fiae,*+ pi waa kɛ he lo kɛ muɔ, se mohu waa kɛ nɔ yemihi, kɛ blɔ nyahi, kɛ je ɔ mi nɔ yeli nɛ a ngɛ diblii nɛ ɔ mi ɔ, kɛ mumi yayamihi babauu+ nɛ a ngɛ hiɔwe ní ɔmɛ a mi ɔ.
13 Enɛ ɔ he ɔ, nyɛɛ wo tabuli a he piɛ pomi ní ɔmɛ tsuo nɛ je Mawu ngɔ ɔ,+ konɛ nyɛ nyɛ nɛ nyɛɛ hwu ta ngɛ ligbi yayami ɔ nɔ, bɔ nɛ pee nɛ ke nyɛ gbe nɔ́ fɛɛ nɔ́ nya a, nyɛɛ da si kpɛii.
14 Lɔ ɔ he ɔ, nyɛɛ da si kpɛii nɛ nyɛɛ ngɔ anɔkuale ɔ kɛ fi nyɛ mlɛ mi kaa mlɛ mi fimi nɔ́,+ nɛ nyɛɛ wo dami kaa gugue nɔ dama,+
15 nɛ nyɛɛ wo tue mi jɔmi he sane kpakpa a kaa tokota, nɛ́ nyɛɛ pee klaalo kaa nyɛ maa jaje.+
16 Ngɛ ní nɛ ɔmɛ tsuo a se ɔ, nyɛɛ hɛɛ hemi kɛ yemi nɛ ji tsɛ̃i ngua a,+ lɔ ɔ lɛ nyɛɛ kɛ ma nyɛ maa gbe nɔ yayami ɔ kɛ̃ɛ̃ mi bihi* nɛ a ngɛ tsoe ɔ tsuo.+
17 Jehanɛ se hu ɔ, nyɛ bu yi wami hemi nɛ ji dade pɛɛ ɔ,+ nɛ nyɛɛ hɛɛ mumi ɔ klaate ɔ nɛ ji Mawu munyu ɔ,+
18 konɛ nyɛɛ gu sɔlemi slɔɔtohi+ kɛ pɛɛ kpami nɛ mi wa nɔ kɛ hi sɔlee be fɛɛ be ngɛ mumi mi.+ Yi mi tomi nɛ ɔ he je ɔ, nyɛ ko hwɔ mahe, nyɛɛ hɛɛ pɛɛ kpami nɛ mi wa mi kɛ ha ni klɔuklɔu ɔmɛ tsuo be fɛɛ be.
19 Nyɛɛ sɔle ha imi hulɔ, konɛ ke i pã ye nya mi ɔ, a ha mi nɔ́ nɛ ma de, bɔ nɛ pee nɛ ma nyɛ ma tu munyu kɛ kã, nɛ́ ma ha nɛ a le sane kpakpa a he laami sane nɛ e ngɛ klɔuu ɔ.+
20 Mawu ji nɔ nɛ tsɔ mi+ ke ma jaje sane kpakpa a nɛ. Enɛ ɔ he je lɛ a wo mi kɔsɔkɔsɔhi ɔ nɛ. Nyɛɛ sɔle ha mi konɛ ma jaje sane kpakpa a kɛ kã, kaa bɔ nɛ e sa nɛ ma pee ɔ.
21 Jehanɛ ɔ, bɔ nɛ pee nɛ nyɛɛ le níhi nɛ ngɛ nɔ yae kɛ bɔ nɛ ye he mi ngɛ ha a, Tihiko,+ nɛ ji nyɛmi nɛ wa suɔ lɛ nɛ e ji sɔmɔlɔ anɔkualetsɛ ngɛ Nyɔmtsɛ ɔ mi ɔ ma ha nɛ nyɛ maa le nɔ́ fɛɛ nɔ́.+
22 I ngɛ lɛ nyɛ ngɔ tsɔe ngɛ yi mi tomi nɛ ɔ he je, konɛ nyɛɛ le bɔ nɛ wa ngɛ ha, nɛ́ e wo nyɛ bua.
23 Nyɛmimɛ ɔmɛ a nine nɛ su tue mi jɔmi kɛ suɔmi kɛ hemi kɛ yemi nɛ je Mawu nɛ ji Tsɛ ɔ, kɛ Nyɔmtsɛ Yesu Kristo a ngɔ ɔ nɔ.
24 Nihi tsuo nɛ suɔmi nɛ a ngɛ kɛ ha wa Nyɔmtsɛ Yesu Kristo ɔ se pui ɔ, Mawu dloomi ɔ kɛ mɛ nɛ hi si.
Sisi Ningmahi
^ Aloo “konɛ níhi nɛ ya nɔ saminya ha mo.”
^ Hyɛ Mi Tsɔɔmi Munyu A5.
^ Aloo “blɔ tsɔɔmi nya.” Ngɛ Hela gbi mi ɔ, “nɛ nyɛɛ ngɔ Yehowa juɛmi kɛ hi a mi woe.”
^ Ngɛ Hela gbi mi ɔ, “nyɔmtsɛmɛ ngɛ he lo nya a.”
^ Hyɛ Munyu Komɛ A Sisi Tsɔɔmi, “Klaa.”
^ Ngɛ Hela gbi mi ɔ, “pi kɛ hɛngmɛ nɔ sɔmɔmi kaa adesahi a hɛ mi sali.”
^ Hyɛ Mi Tsɔɔmi Munyu A5.
^ Hyɛ Mi Tsɔɔmi Munyu A5.
^ Aloo “danue ko fĩe.”
^ Aloo “akplɔ tsɔwihi.”
