Kɛ Ya Ha Kolosebi Ɔmɛ 3:1-25
3 Ke a tle nyɛ si kɛ piɛɛ Kristo ɔ he ɔ,+ nyɛɛ ya nɔ nɛ nyɛ hla níhi nɛ a ngɛ hiɔwe ɔ, he nɛ Kristo ɔ hii si ngɛ ngɛ Mawu hiɔ nɔ ɔ se blɔ.+
2 Nyɛɛ ngɔ nyɛ juɛmi kɛ ma níhi nɛ a ngɛ hiɔwe ɔ nɔ,+ se pi níhi nɛ a ngɛ zugba a nɔ ɔ nɔ.+
3 Ejakaa nyɛ gbo nɛ a ngɔ nyɛ wami ɔ kɛ laa kɛ piɛɛ Kristo ɔ he ngɛ Mawu mi.
4 Ke a je Kristo ɔ, nɛ ji wa wami ɔ+ kpo heii ɔ, kɛkɛ a ma je nyɛ hu nyɛɛ kɛ lɛ kpo heii ngɛ hɛ mi nyami mi.+
5 Enɛ ɔ he ɔ, nyɛɛ gbe nyɛ nɔmlɔ tso ɔ he ní ɔmɛ+ nɛ a ngɛ zugba a nɔ ngɛ ní nɛ ɔmɛ a he, ajuama bɔmi,* mu ní tsumi, bɔmi nami he akɔnɔ nɛ́ e nɔ hí yemi,+ akɔnɔ nɛ yeɔ nɔ awi, kɛ hɛkɔ nɛ́ e ji wɔ jami ɔ.
6 Jamɛ a ní ɔmɛ a he je lɛ Mawu mi mi fumi ɔ ma a nɛ.
7 Be ko nɛ e be ɔ, jã ji bɔ nɛ nyɛ hu nyɛ ba nyɛ je mi.*+
8 Se amlɔ nɛ ɔ, e sa nɛ nyɛ je ní nɛ ɔmɛ tsuo kɛ je nyɛ he kɛ pue he: mi mi fumi, mi mi la, yayami peemi,+ jɛmi munyu,+ nɛ nyɛ je yakayaka munyu tumi+ kɛ je nyɛ nya mi.
9 Nyɛ ko ye nyɛ sibi lakpa.+ Nyɛ je su* momo ɔ+ kɛ e ní peepee ɔmɛ ngɛ nyɛ he,
10 nɛ nyɛɛ wo su ehe ɔ,+ nɔ́ nɛ kɛ gu nile nitsɛnitsɛ nɔ ɔ, a ngɛ lɛ pee ehe ngɛ nɔ nɛ e bɔ ɔ henɔ ɔ nɔ ɔ,+
11 he nɛ Helano aloo Yudano be, he nɛ nɔ nɛ a po lɛ aloo mɔmlɔtɔtsɛ be, nɛ ma se no, loo Sikitino,* loo nyɔguɛ, loo nɔ nɛ e ye e he be ɔ; mohu ɔ, Kristo ji níhi tsuo, nɛ e ngɛ nihi tsuo a mi.+
12 Enɛ ɔ he ɔ, akɛnɛ nyɛ ji nihi nɛ Mawu hla,+ nɛ nyɛ ngɛ klɔuklɔu nɛ a suɔ nyɛ he je ɔ, nyɛɛ wo mi mi sami nɛ mi kuɔ,+ mi mi jɔmi, he si bami,*+ he jɔmi,+ kɛ tsui si tomi.+
13 Ke nɔ ko ngɛ nɔ́ ko nɛ e maa da nɔ kɛ tu munyu kɛ si nɔ kpa ko po ɔ,+ nyɛɛ ya nɔ nɛ nyɛ ná nyɛ sibi a he tsui nɛ nyɛɛ ngɔ kɛ ke nyɛ sibi faa.+ Kaa bɔ nɛ Yehowa* ngɔ kɛ ke nyɛ faa a, e sa nɛ nyɛ hu nyɛɛ pee jã nɔuu.+
14 Ngɛ ní nɛ ɔmɛ tsuo a se ɔ, nyɛɛ wo suɔmi,+ ejakaa e ji kpa nɛ fiɔ wɔ wawɛɛ kɛ peeɔ kake.+
15 Jehanɛ se hu ɔ, nyɛ ha nɛ Kristo ɔ tue mi jɔmi ɔ nɛ ye tsɛ ngɛ nyɛ tsui mi,*+ ejakaa a tsɛ nyɛ kɛ ba jamɛ a tue mi jɔmi ɔ he ngɛ nɔmlɔ tso kake mi. Nɛ nyɛɛ pee nyɛ he nihi nɛ a le sina.
16 Nyɛ ha nɛ Kristo ɔ munyu ɔ nɛ hi nyɛ mi, konɛ e ha nɛ nyɛ ná juɛmi. Nyɛɛ ya nɔ nɛ nyɛɛ hi ní tsɔɔe, nɛ nyɛɛ hi nyɛ sibi he wami woe* kɛ lahi,+ Mawu yi jemi lahi, mumi mi lahi nɛ a kɛ bua jɔmi laa,* nɛ nyɛɛ hi lae ngɛ nyɛ tsui mi kɛ ha Yehowa.*+
17 Nɔ́ fɛɛ nɔ́ nɛ nyɛ ngɛ pee ɔ, munyu tumi mi jio, ní peepee mi jio, nyɛɛ pee kulaa ngɛ Nyɔmtsɛ Yesu biɛ mi, nɛ nyɛɛ gu e nɔ kɛ na Mawu nɛ ji Tsɛ ɔ si.+
18 Nyɛ yigbayihi, nyɛɛ ba nyɛ he si kɛ ha nyɛ hunomɛ*+ kaa bɔ nɛ e sa ngɛ Nyɔmtsɛ ɔ hɛ mi ɔ.
19 Nyɛ hunomɛ, nyɛɛ ya nɔ nɛ nyɛɛ suɔ nyɛ yi ɔmɛ+ nɛ nyɛ mi mi nɛ ko fu mɛ wawɛɛ.*+
20 Nyɛ bimɛ, nyɛɛ bu nyɛ fɔli ɔmɛ tue ngɛ nɔ́ fɛɛ nɔ́ mi,+ ejakaa enɛ ɔ saa Nyɔmtsɛ ɔ hɛ mi saminya.
21 Nyɛ tsɛmɛ, nyɛ ko hi nyɛ bimɛ ɔmɛ a mi mi la woe,*+ konɛ a kɔni mi nɛ ko jɔ̃.
22 Nyɛ nyɔguɛhi, nyɛɛ bu nyɛ nyɔmtsɛmɛ ɔmɛ nɛ a ji adesahi ɔ* tue ngɛ nɔ́ fɛɛ nɔ́ mi,+ pi be mi nɛ a ngɛ nyɛ hyɛe pɛ, konɛ nyɛ kɛ sa adesahi a hɛ mi* kɛkɛ, se mohu nyɛɛ pee jã kɛ tsui nɛ mi tsɔ, kɛ Yehowa* gbeye yemi.
23 Nɔ́ fɛɛ nɔ́ nɛ nyɛ ngɛ tsue ɔ, nyɛ tsu kɛ nyɛ klaa* tsuo kaa Yehowa* lɛ nyɛ ngɛ pee ha,+ se pi adesahi,
24 ejakaa nyɛ le kaa Yehowa* ngɔ lɛ nyɛ nine maa su weto ní ɔ nɔ kɛ je kaa hiɔwo.+ Nyɛ sɔmɔ Nyɔmtsɛ ɔ, nɛ ji Kristo ɔ.
25 Ngɛ anɔkuale mi ɔ, nɔ nɛ e peeɔ nɔ́ nɛ dɛ blɔ ɔ ma ná níhi nɛ dɛ blɔ nɛ e peeɔ ɔ he hiɔwo,+ nɛ nɔ hɛ mi hyɛmi ko be mi.+
Sisi Ningmahi
^ Hela munyungu ɔ ji, porneiʹa. Hyɛ Munyu Komɛ A Sisi Tsɔɔmi.
^ Aloo “nyɛ hu nyɛ nyɛɛ.”
^ Ngɛ Hela gbi mi ɔ, “Nyɛ je nɔmlɔ.”
^ “Sikitino” ɔ tsɔɔ nɔ ko nɛ e hɛ bli we.
^ Aloo “he si bami juɛmi.”
^ Hyɛ Mi Tsɔɔmi Munyu A5.
^ Aloo “kudɔ nyɛ tsui.”
^ Aloo “ga woe.”
^ Aloo “nɛ a laa ngɛ blɔ nɛ hɛ mi ngɛ nyami nɔ.”
^ Hyɛ Mi Tsɔɔmi Munyu A5.
^ Ngɛ Hela gbi mi ɔ, “nyɛɛ ngɔ nyɛ he kɛ wo nyɛ hunomɛ a sisi.”
^ Aloo “nyɛ ko wa mɛ yi mi.”
^ Aloo “abofu woe.”
^ Ngɛ Hela gbi mi ɔ, “he lo nya nyɔmtsɛmɛ.”
^ Ngɛ Hela gbi mi ɔ, “pi kɛ hɛngmɛ nɔ sɔmɔmi kaa adesahi a hɛ mi sali.”
^ Hyɛ Mi Tsɔɔmi Munyu A5.
^ Hyɛ Munyu Komɛ A Sisi Tsɔɔmi, “Klaa.”
^ Hyɛ Mi Tsɔɔmi Munyu A5.
^ Hyɛ Mi Tsɔɔmi Munyu A5.
