SANE BIMI 6
Mɛni Baiblo ɔ Gba Kɛ Kɔ Mesia a He?
GBAMI
“Mo, Betlehem Efrata, . . . o mi lɛ nɔ nɛ maa ye matsɛ ngɛ Israel ha mi ɔ maa je kɛ ba.”
E MI BAMI
“Benɛ a fɔ Yesu ngɛ Betlehem nɛ ngɛ Yudea ngɛ Matsɛ Herode yi nɔ ɔ, hyɛ! dodoe mi hyɛli je Puje He kɛ ba Yerusalem.”
GBAMI
“A gba ye tade ɔmɛ ha a he, nɛ a fɔ ye tade ɔ nɔ sɔ.”
E MI BAMI
“Jehanɛ ɔ, benɛ tabuli ɔmɛ ka Yesu kɛ wo tso ɔ he ɔ, a ngɔ tadehi nɛ e wo ngɛ e tade ɔ nɔ ɔ nɛ a gba mi eywiɛ . . . Se tade nɛ e wo ngɛ e tade ɔ sisi ɔ lɛɛ pi nɛ a kpɛ, mohu ɔ, a lo kɛ je hiɔwe kɛ ba ma si. Enɛ ɔ he ɔ, a de a sibi ke: ‘Wa ko gba lɛ, mohu ɔ, nyɛ ha nɛ waa fɔ nɔ sɔ konɛ waa na nɔ nɛ e maa pee e nɔ́.’”
GBAMI
“E buɔ e wu ɔmɛ tsuo a he; kake ngmelu po ku we.”
E MI BAMI
“Benɛ a su Yesu nɔ ɔ, a na kaa e gbo momo, enɛ ɔ he ɔ, a ku we e nanehi.”
GBAMI
“A gbɔ lɛ nɔ́ ngɛ wa yayami ɔmɛ a he je.”
E MI BAMI
“Tabuli ɔmɛ a kpɛti nɔ kake ngɔ akplɔ kɛ gbɔ e kasa, nɛ amlɔ nɔuu nɛ muɔ kɛ nyu je mi kɛ be.”
GBAMI
“A ha mi ye hiɔwo ɔ, sika hiɔ 30.”
E MI BAMI
“Kɛkɛ nɛ Ni Nyɔngma Kɛ Enyɔ ɔmɛ a kpɛti nɔ kake nɛ a tsɛɔ lɛ ke Yuda Iskariot ɔ pue nɔ kɛ ho osɔfo nikɔtɔma amɛ a ngɔ ya nɛ e ya bi mɛ ke: ‘Mɛni nyɛ ma ha mi konɛ ma tsɔɔ nyɛ e se blɔ?’ A kane sika hiɔ 30 ngɔ ha lɛ.”
