Ngmami Klɔuklɔu ɔ ji womi nɛ Mawu ha nɛ a ngma, nɛ e guɔ nɔ nɛ e kɛ wɔ tsuo tuɔ munyu. E sa nɛ waa kase konɛ waa le e Ngmalɔ ɔ saminya. (Yohane 17:3; 2 Timoteo 3:16) Ke o kane Baiblo ɔ, o maa na yi mi tomi nɛ Yehowa ngɛ kɛ ha adesahi kɛ zugba a nɛ ji a hi he ɔ.—1 Mose 3:15; Kpojemi 21:3, 4.

Womi ko be nɛ e náa nihi a nɔ he wami pe Baiblo ɔ. Baiblo ɔ woɔ wɔ he wami kaa wa je Yehowa suhi nɛ ji suɔmi, mɔbɔ nami, kɛ mi mi sami ɔ kpo. E haa nɛ wa náa hɛ kɛ nɔ fɔmi, nɛ e yeɔ buaa nihi nɛ a daa haomihi nɛ a nya wa nya. Jehanɛ hu ɔ, e haa nɛ wa naa níhi nɛ a ngɛ je nɛ ɔ mi nɛ a kɛ Mawu suɔmi nya ní kɔ we ɔ heii.—La 119:105; Hebribi 4:12; 1 Yohane 2:15-17.

Gbi nɛ a kɛ ngma Baiblo ɔ kekleekle ji Hebri, Aram, kɛ Hela, nɛ a tsɔɔ e fã ko aloo lɛ tsuo sisi kɛ ya gbihi nɛ hiɛ pe 3,000 mi. Ngɛ yi nɔ sane mi ɔ, Baiblo ɔ pɛ ji womi nɛ a tsɔɔ sisi kɛ ya gbihi babauu a mi, nɛ́ nihi babauu ngɛ eko. E sɛ nɛ enɛ ɔ nɛ pee wɔ nyakpɛ, ejakaa Baiblo ɔ gba ke: “Nɛ sane kpakpa nɛ ɔ nɛ kɔɔ Matsɛ Yemi ɔ he ɔ [sɛ gbi titli nɛ ngɛ Baiblo ɔ mi], a maa fiɛɛ ngɛ zugba a nɔ tsuo nɛ a kɛ maa ye je ma amɛ tsuo odase, nɛ lɔ ɔ se loko nyagbe ɔ maa ba.”—Mateo 24:14.

Akɛnɛ wa le kaa Baiblo ɔ mi sɛ gbi ɔ he hia he je ɔ, oti nɛ waa kɛ ma wa hɛ mi ji kaa wa maa tsɔɔ Baiblo ɔ sisi nɛ e kɛ blema Baiblo nɛ a ngma a nɛ kɔ, nɛ jehanɛ se hu ɔ, e kanemi kɛ e sisi numi nɛ e ko ye. Mi Tsɔɔmi Munyuhi nɛ ji “Sisi Tomi Mlaahi Nɛ Kudɔɔ Baiblo Sisi Tsɔɔmi,” “Níhi Nɛ Ngɛ Sisi Tsɔɔmi Nɛ ɔ Mi,” kɛ “Bɔ Nɛ Pee Nɛ Wa Nine Su Baiblo ɔ Nɔ” ɔ tsɔɔ sisi tomi mlaa komɛ nɛ waa kɛ tsu ní kɛ ní kpa komɛ nɛ ngɛ sisi tsɔɔmi nɛ ɔ mi.

Nihi nɛ a suɔ Yehowa Mawu nɛ a jaa lɛ ɔ suɔ nɛ a ná Baiblo sisi tsɔɔmi nɛ da, nɛ e sisi numi hu yi. (1 Timoteo 2:4) Lɔ ɔ he ɔ, oti nɛ waa kɛ ma wa hɛ mi ji kaa, wa maa tsɔɔ Je Ehe Sisi Tsɔɔmi ɔ sisi kɛ ya gbihi fuu a mi bɔ nɛ wa ma nyɛ. Enɛ ɔ he je nɛ wa tsɔɔ Baiblo ɔ sisi kɛ ba Dangme mi ɔ nɛ. Wa suɔ mo, nɛ wa sɔlemi kɛ wa blɔ hyɛmi ji kaa, o ná Ngmami Klɔuklɔu nɛ ɔ he se saminya be mi nɛ o ngɛ ‘Mawu se blɔ hlae konɛ o na lɛ ɔ.’—Ní Tsumi 17:27.