1, 2. Ano an panhunahuna han damu nga tawo ha ira trabaho?

DAMU an naghuhunahuna nga an bili han usa nga tawo nakadepende ha iya trabaho o katungdanan. Ha pipira nga kultura, basi makilala an usa, kasagaran na nga ginpapakianhan hiya, “Ano an imo trabaho?”

² Usahay, iginpapakilala han Biblia an mga tawo pinaagi han ira trabaho. Iginpapakilala hito hi Mateo sugad nga “parasukot hin buhis,” hi Simon sugad nga “parahimo hin anit,” ngan hi Lucas sugad nga “hinigugma nga doktor.” (Mat. 10:3; Buh. 10:6; Col. 4:14) Nakikilala liwat an mga tawo pinaagi han mga toka nga iginhahatag ha ira han Dios. Mababasa naton an mahitungod kan Hadi David, propeta Elias, ngan apostol Pablo. Ginpabilhan gud hini nga kalalakin-an an ira toka nga tikang ha Dios. Kon may mga pribilehiyo kita ha pag-alagad, sadang liwat naton ito pabilhan.

3. Kay ano nga kinahanglan bansayon han mga edaran an mga burobata? (Kitaa an retrato hini nga pahina.)

³ Damu ha aton an nalilipay ha aton toka ha pag-alagad ngan karuyag naton nga himoon ito ha kadayonan. Pero makasurubo nga tikang han panahon ni Adan, an mga tawo nalalagas ngan may nasaliwan nga bag-o nga henerasyon. (Ekles. 1:4) Tungod kay nagbabag-o hin  henerasyon, an tinuod nga mga Kristiano yana naatubang hin naiiba nga problema. An buruhaton han katawohan ni Jehova nagtitikahaluag ngan nag-uuswag, salit nagkakaada bag-o nga mga pamaagi ha pagbuhat hito ngan kasagaran na nga nag-uupod ini ha paggamit han bag-o nga teknolohiya. May mga edaran nga bangin makurian ha pagdungan hini nga mga pagbag-o. (Luc. 5:39) Pero bisan kon makadungan hira hini, an burobata nga kabugtoan kasagaran na nga mas makusog kay ha mga edaran. (Prob. 20:29) Salit iginpapakita han mga edaran an ira pagin mahigugmaon ngan maaramon kon igin-aandam nira an mga burobata para ha dugang nga responsabilidad.—Basaha an Salmos 71:18.

4. Kay ano nga nakukurian an pipira ha paghatag hin toka? (Kitaa an kahon nga “ Kon Kay Ano nga an Pipira Diri Nahatag hin Toka.”)

⁴ Adton may mga awtoridad bangin makurian ha paghatag hin toka ha mga burobata nga kabugtoan. An pipira nahahadlok nga mawara ha ira an ira ginpapabilhan nga pribilehiyo. An iba nababaraka nga bangin diri magin maopay an mga butang kon diri hira an manginginano. An iba liwat bangin mangatadongan nga waray hira panahon ha pagbansay ha iba. Ha luyo nga bahin, kinahanglan diri mauyam ha paghulat an mga burobata kon diri pa hira gintatagan hin dugang nga responsabilidad.

5. Ano nga mga pakiana an hihisgotan hini nga artikulo?

⁵ Hisgotan naton an may kalabotan ha paghatag hin toka ha duha nga anggulo. Siyahan, paonan-o mahimo mabuligan han mga edaran an mga burobata basi magin andam para ha dugang nga responsabilidad, ngan kay ano nga importante ini? (2 Tim. 2:2) Ikaduha, kay ano nga importante para ha mga burobata nga magkaada husto nga disposisyon samtang nagbubuhat kaupod han eksperyensyado nga kabugtoan ngan nahibabaro tikang ha ira? Ha pagtikang, kitaon naton kon paonan-o igin-andam ni Hadi David an iya anak para ha daku nga responsabilidad.

6. Ano an karuyag himoon ni Hadi David, ngan ano an ginsiring ni Jehova?

⁶ Katapos ni David magkinabuhi sugad nga puga  ha sulod hin pipira ka panahon, nagin hadi hiya ngan inukoy ha komportable nga balay. Nasubo gud hiya nga waray “balay,” o templo, para kan Jehova, salit karuyag niya magtukod hin templo. Tungod hini, iya ginsidngan hi propeta Natan: “Kitaa, ako naukoy ha balay nga sedro, kondi an arka han kaoyonan ni Jehova naukoy ha ilarum han mga biray. Ngan hi Natan nagsiring kan David: Buhata an ngatanan nga aada ha imo kasingkasing; kay an Dios upud ha imo.” Pero iba an karuyag ni Jehova. Ginsugo niya hi Natan nga sumatan hi David: ‘Diri ikaw an magtitindog para ha akon hin balay nga urukyan.’ Bisan kon mahigugmaon nga ginpasarig ni Jehova hi David nga padayon hiya nga bibendisyonan, an Dios nagsiring nga an iya anak nga hi Solomon an magtutukod han templo. Ano an nagin reaksyon ni David?—1 Kron. 17:1-4, 8, 11, 12; 29:1.

7. Ano an nagin reaksyon ni David ha sugo ni Jehova?

⁷ Padayon nga ginsuportaran ni David an pagtukod han templo; waray hiya masubo nga diri mahingangada ha iya an kadungganan han pagtukod hito. Ha pagkamatuod, ito nga istraktura gintawag nga templo ni Solomon, diri templo ni David. Bisan kon bangin nasubo gud hi David tungod kay diri na matutuman an iya hingyap, bug-os nga ginsuportaran niya an proyekto. Malipayon nga nag-organisar hiya hin mga trabahador ngan nagtirok hin puthaw, bronse, silber, ngan bulawan, pati mga kahoy nga sedro. Dugang pa, gindasig niya hi Solomon pinaagi ha pagsiring: “Yana, anak ko, hi Jehova umupud unta ha imo; ngan maguswag ka, ngan magtindog ka han balay ni Jehova nga imo Dios, sugad han iya iginyakan mahatungud ha imo.”—1 Kron. 22:11, 14-16.

8. Kay ano nga bangin nahunahuna ni David nga diri pa maaakos ni Solomon an toka, pero ano an iya ginhimo?

⁸ Basaha an 1 Kronikas 22:5. Posible nga nahunahuna ni David nga diri pa maaakos ni Solomon nga pangunahan iton daku gud nga proyekto, labi na nga an templo “kinahanglan nga magmatahom gud.” Ngan hito nga panahon, “bata pa” ngan diri pa eksperyensyado hi Solomon. Pero maaram hi David nga bubuligan ni Jehova hi Solomon ha pagtuman han toka nga Iya iginhatag kan Solomon. Salit nagpokus hi David ha kon ano an iya maibubulig; nagtirok hiya hin damu hinduro nga materyales.

9. Kay ano nga sadang malipay an mga edaran nga kabugtoan ha paghatag hin responsabilidad? Iilustrar.

⁹ An mga edaran diri sadang masubo kon kinahanglan ihatag an ira toka ha mga burobata. Lugod, sadang nira hunahunaon nga an pagbansay ha mga burobata para hin dugang nga responsabilidad mas makakabulig ha pagpauswag ha buruhaton han Ginhadian. Sadang malipay an mga pinili nga kalalakin-an ha kongregasyon kon an ira ginbansay nga burobata nagin kwalipikado ha pagbuhat han toka. Ha pag-ilustrar, tagda an usa nga tatay nga nagtututdo ha iya anak ha pagdrayb. Han bata pa an anak, nagkikita la hiya ha iya tatay. Han tin-edyer na hiya, iginsasaysay na ha iya an ginhihimo han iya tatay. Katapos, han adulto na an anak, hiya na an nagdadrayb samtang gintatagan hiya hin dugang nga instruksyon han iya tatay. Usahay, bangin magsurosaliwan  hira pagdrayb, pero ha urhi bangin an anak na an kasagaran nga magdadrayb para ha iya nagtitikalagas na nga tatay. Nalilipay an maaramon nga tatay nga an iya na anak an nagdadrayb ngan diri hiya nababaraka nga bangin diri magin maopay an resulta hito. Sugad man, nalilipay an mga edaran kon an ira nabansay nga mga burobata nagkakaada responsabilidad ha organisasyon ni Jehova.

10. Ano an panhunahuna ni Moises ha kadungganan ngan awtoridad?

¹⁰ An mga edaran diri sadang maawa ha toka han iba. Tagda an nagin reaksyon ni Moises han an pipira ha kampo han Israel nagtikang gumios sugad nga propeta. (Basaha an Numeros 11:24-29.) Karuyag hira pugngan han kabulig ni Moises nga hi Josue. Naghunahuna hiya nga gin-aagawan nira hi Moises hin kadungganan ngan awtoridad. Pero ginsidngan hiya ni Moises: “Mayada ka ba pagkaawa tungud ha akon? Hinaut pa unta nga an ngatanan nga katawohan ni Jehova magmanaragna, basi hi Jehova magbutang han iya espiritu ha bawbaw nira!” Maaram hi Moises nga kontrolado ni Jehova an mga butang. Diri hiya naghihingyap hin kadungganan para ha iya kalugaringon. Lugod, karuyag niya nga an ngatanan nga surugoon ni Jehova magkaada han sugad nga espirituwal nga regalo. Pariho kan Moises, nalilipay ba liwat kita kon nakakakarawat an iba hin mga pribilehiyo nga bangin para unta ha aton?

11. Ano an ginsiring han usa nga bugto may kalabotan ha paghatag han iya toka?

¹¹ Yana, damu nga brother an madasigon nga nag-aalagad ha sulod hin mga dekada na ngan nabulig ha iba nga magin andam para ha dugang nga responsabilidad. Pananglitan, tagdon naton hi Peter. Sobra 74 ka tuig na hiya ha bug-os-panahon nga pag-alagad, ngan an 35 ka tuig hito iya gin-gamit ha pag-alagad ha sanga nga opisina han Europa. Ha sulod hin damu ka tuig, hiya an paramangno han Service Department. Pero hinin bag-o la, ginsaliwnan hiya han burobata nga hi Paul nga iya katrabaho ha sulod hin pipira ka tuig. Han ginpakianhan hi Peter kon ano an iya inaabat may kalabotan han pagbag-o han iya toka, hiya nagsiring, “Nalilipay gud ako nga may kabugtoan nga nabansay para ha dugang nga responsabilidad ngan nagbubuhat han gimaopayi ha ira toka.”

12. Ano nga leksyon an aton mahibabaroan ha asoy han Biblia mahitungod kan Rehoboam?

¹² Kamatay ni Solomon, an iya anak nga hi Rehoboam an nagin hadi. Han nanginahanglan hi Rehoboam hin sagdon may kalabotan ha pagdumara han iya toka, an mga edaran an iya una nga ginpakianhan. Pero waray niya sunda an ira sagdon! Lugod, ginsunod niya an sagdon han mga burobata nga kalalakin-an nga iya mga kadungandungan ngan nagin iya mga kabulig hito nga panahon. Maraot gud an nagin resulta hito. (2 Kron. 10:6-11, 19) Ano an leksyon? Maaramon gud an pangaro hin sagdon ha mga edaran ngan eksperyensyado nga kabugtoan, ngan sundon ito. Bisan kon puydi bag-uhon han mga burobata an daan nga mga pamaagi ha pagbuhat han mga butang, diri nira sadang igbalewaray an sagdon han mga edaran nga kabugtoan.

13. Paonan-o sadang trataron han mga burobata an mga edaran nga nagbubuhat kaupod nira?

¹³ May mga burobata nga kabugtoan nga bangin amo na an nanginginano han mga buruhaton hadto han mga edaran nga kaupod nira. Bisan kon ginsaliwnan na nira an mga edaran, magpapahimulos gud hira kon ikukonsiderar nira an kinaadman ngan eksperyensya han mga edaran antes magdesisyon. Hi Paul, nga gin-unabi kanina nga sumaliwan kan Peter sugad nga paramangno han usa nga departamento ha Betel, nagsiring: “Naggagahin ako hin panahon ha pangaro hin sagdon kan Peter, ngan gin-aaghat ko an iba ha amon departamento nga himoon liwat ito.”

14. Ano an aton hibabaroan ha pagbinuligay nira Timoteo ngan apostol Pablo?

¹⁴ An burobata nga hi Timoteo nagbuhat kaupod  ni apostol Pablo ha sulod hin damu ka tuig. (Basaha an Filipos 2:20-22.) Hi Pablo nagsurat ha mga taga-Corinto: “Ginsusugo ko ha iyo hi Timoteo, kay hiya an akon hinigugma ngan matinumanon nga anak ha Ginoo, ngan ipapahinumdom niya ha iyo an akon pamaagi ha pag-alagad kan Kristo Jesus, sugad la han akon pagtutdo ha tagsa nga kongregasyon ha bisan diin.” (1 Cor. 4:17) Iginpapakita hini nga teksto an pagbinuligay nira Pablo ngan Timoteo. Naggahin hi Pablo hin panahon ha pagtutdo kan Timoteo han iya “pamaagi ha pag-alagad kan Kristo.” Nabansay gud hi Timoteo ngan ginhigugma hiya ni Pablo, ngan nasarig gud hi Pablo nga maaataman hin maopay ni Timoteo an espirituwal nga panginahanglan han mga taga-Corinto. Maopay gud ini nga susbaranan para ha mga tigurang yana samtang ira ginbabansay an iba ha pagpanguna ha kongregasyon!

15. Kon apektado kita han pagbag-o, paonan-o makakabulig ha aton an sagdon ni Pablo ha mga Kristiano ha Roma?

¹⁵ Nagkikinabuhi kita ha importante gud nga panahon. An organisasyon ni Jehova nag-uuswag ha damu nga paagi, salit ginkikinahanglan an pagbag-o. Bisan kon apektado kita han pagbag-o, hinaot magin mapainubsanon kita ngan pirme naton unahon an pag-alagad kan Jehova diri an aton kalugaringon. An pagbuhat hito makakabulig nga matipigan an pagkaurosa. Nagsurat hi Pablo ha mga Kristiano ha Roma: “Ginsusumatan ko an tagsa ha iyo nga diri maghunahuna mahitungod ha iya kalugaringon hin labaw kay ha angay niya hunahunaon, lugod ipakita niyo nga may maopay nga panhunahuna kamo uyon ha pagtoo nga iginhatag han Dios ha tagsa ha iyo. Kay sugad la nga an aton lawas may damu nga bahin pero diri parapriho an buruhaton, sugad man kita, bisan kon damu, mga bahin kita han uusa la nga lawas nga kahiusa han Kristo.”—Roma 12:3-5.

16. Ano an mahimo buhaton han mga edaran ngan burobata nga kabugtoan, pati na han mga asawa basi matipigan an kamurayawan ngan pagkaurosa han organisasyon ni Jehova?

¹⁶ Salit anoman an aton kahimtang, buhaton naton an ngatanan ha pagpauswag han buruhaton han Ginhadian ni Jehova. Mga edaran, buligi an mga burobata nga mahibaro han iyo ginbubuhat. Mga burobata, karawata an responsabilidad, magin mapainubsanon, ngan magpabilin nga matinalahuron ha mga edaran. Ngan mga asawa, subara an asawa ni Aquila nga hi Priscila; maunungon nga ginsuportaran niya hi Aquila han nagbag-o an ira mga kahimtang.—Buh. 18:2.

17. Ano an ginlalaoman ni Jesus ha iya mga disipulo, ngan kay ano nga ginbansay niya hira?

¹⁷ May kalabotan ha pagin andam ha pagbansay ha iba para ha dugang nga responsabilidad, hi Jesus an pinakamaopay nga susbaranan hini. Maaram hiya nga matatapos an iya ministeryo ha tuna ngan ipapadayon ito han iba. Bisan kon diri hingpit an iya mga disipulo, nasarig hiya ha ira ngan ginsumatan hira nga labaw pa an ira bubuhaton kay han iya ginhimo. (Juan 14:12) Ginbansay niya hira hin maopay, ngan iginsangyaw nira an maopay nga sumat ha ngatanan nga nasud hito nga panahon.—Col. 1:23.

18. Ano nga paglaom an aton ginpapamulat, ngan ano an aton mahimo buhaton yana?

¹⁸ Katapos ihalad ni Jesus an iya kinabuhi, ginbanhaw hiya ha langit ngan gintagan hin mas damu nga buruhaton ngan daku nga awtoridad nga “mas hitaas gud kay ha ngatanan nga gobyerno, awtoridad, gahum, pagmando.” (Efe. 1:19-21) Kon mamatay kita antes han Armagedon, babanhawon kita ha matadong nga bag-o nga kalibotan ngan tatagan hin damu nga makapatagbaw nga buruhaton. Samtang ginpapamulat naton ito, may importante gud nga buruhaton nga kita ngatanan mahimo makigbahin—an pagsangyaw han maopay nga sumat ngan pagtutdo ha mga tawo nga magin disipulo. Hinaot kita ngatanan, batan-on man o edaran, padayon nga magkaada ‘damu nga ginbubuhat ha buruhaton han Ginoo.’—1 Cor. 15:58.