දෙවිට නාමයක් තිබේ!

දෙවිගේ නාමය කුමක්ද? මිනිසුන්ට සාමාන්‍යයෙන් පෞද්ගලික නම් තිබෙනවා නොවේද? සුරතල් සතුන්ට පවා මිනිස්සු නම් තබති! එසේනම් දෙවිටද නාමයක් තිබීම සාධාරණ නොවේද? කෙනෙකුට පෞද්ගලික නමක් තිබීම හා එය භාවිත කිරීම මිනිස් සබඳතාවලදී හා ගනු දෙනුවලදී අනිවාර්යයෙන්ම දක්නට පුළුවන. දෙවි සමඟ අප පවත්වන සබඳතාවේදී අප වෙනස් ප්‍රතිපත්තියක් දැරිය යුතුද? ඇත්තෙන්ම පුදුමයට කරුණක් වන්නේ බයිබලයේ සඳහන් දෙවි කෙරෙහි විශ්වාසයක් තිබෙන බවට කියා සිටින ජනයාගෙන් මිලියන සංඛ්‍යාතයක් ඔහුගේ පෞද්ගලික නාමය භාවිත නොකිරීමය. එහෙත්, සියවස් ගණනාවක් පුරා මහජනයා දෙවිගේ නාමය ගැන නොදැන සිටියා නොවේ. ඔබ මෙම ලිපි මාලාව කියවද්දී, දෙවිගේ නාමය පුළුල්ව භාවිත කළ කාල වකවානුවක් ගැන ඔබට දැනගත හැකි වේ. මෙහිදී වඩාත් වැදගත් දේ නම්, දෙවිව නමින් හඳුනාගැනීම ගැන බයිබලය පවසන දේද ඔබට දැනගත හැකි වීමය.

දාහත්වන සියවස වෙද්දී යුරෝපීය රටවල් කිහිපයක දෙවිගේ නාමය දක්වන කාසි අච්චු ගසන ලදි. නිදසුනකට 1634 වසරේ නිෂ්පාදනය කළ ජර්මන් කාසියක යෙහෝවා යන නාමය ඉතා පැහැදිලිව දැකගත හැකි විය. එම කාසි ප්‍රසිද්ධ වූයේ යෙහෝවා තාලර් හෙවත් යෙහෝවා කාසි ලෙසයි. ඒවා දශක ගණනාවක් පුරා භාවිත කෙරිණ.

යෙහෝවා * යනු දෙවිගේ නාමය සඳහා සියවස් ගණනාවක් පුරා පිළිගෙන ඇති නාමයයි. හෙබ්‍රෙව් භාෂාව යනු දකුණු පැත්තේ සිට වම් පැත්තට කියවනු ලබන භාෂාවකි. එමනිසා එම භාෂාවේ දෙවිගේ නාමය දක්වා ඇත්තේ יהוה යන ගාත්‍රාක්ෂරවලිනි. මෙම හෙබ්‍රෙව් අක්ෂර සතර සිංහලෙන් දක්වන්නේ ය්හ්ව්හ් වශයෙනි. ඒවා හැඳින්වීමට ටෙට්‍රග්‍රැමටනය යන යෙදුම භාවිත කෙරේ. යුරෝපීය කාසිවල දශක ගණනාවකට දෙවිගේ නාමය මෙයාකාරයෙන් දක්වා තිබිණ.

දෙවිගේ නාමය ගොඩනැඟිලි, ස්මාරක, කලා කෘතිවල සහ පල්ලියේ ගායනා කරනු ලබන නොයෙකුත් ගීතිකාවල සොයාගත හැකිය. ජර්මානු බ්‍රොක්හවුස් විශ්වකෝෂයට අනුව රෙපරමාදු කුමාරයන් යම් කාලයකට චාරිත්‍රයක් ලෙස පැළඳූ පදවි ලාංඡනයේ හිරුගේ සංකේතය සහ ටෙට්‍රග්‍රැමටනය කොටා තිබිණ. කොඩිවල මෙන්ම කාසිවල භාවිත කළ මෙම ලාංඡනය හඳුන්වන ලද්දේ යෙහෝවා-හිරු පදවි ලාංඡනය ලෙසයි. මින් පැහැදිලි වන්නේ 17වන සහ 18වන සියවස්වල විසූ යුරෝපීය බැතිමතුන් සර්වබලධාරී දෙවිට නාමයක් තිබෙන බව දැන සිටි වගයි. එමෙන්ම එය භාවිත කිරීමට ඔවුන් පසුබට නොවීම විශේෂයෙන්ම සඳහන් කළ යුත්තකි.

අමෙරිකාවේ ජනපදවාසීන් අතරද දෙවිගේ නාමය අභිරහසක් නොවීය. නිදසුනකට, අමෙරිකානු විප්ලවයේ සොල්දාදුවෙකු වූ ඊතන් ඇලන් ගැන සිතා බලන්න. ඔහුගේ චරිත කතාවට අනුව 1775දී තම සතුරන්ට බල කර සිටියේ “ශ්‍රේෂ්ඨ යෙහෝවාගේ නාමයෙන්” යටත් වන්නට කියාය. අනතුරුව ඒබ්‍රහැම් ලින්කන් ජනාධිපති ධුරය දැරූ කාලයේදී උපදේශකයන් කිහිපදෙනෙක්ම ලින්කන් වෙත ලියූ ලිපිවල යෙහෝවා ගැන නිතරම පාහේ සඳහන් කළෝය. දෙවිගේ නාමය සඳහන් වෙනත් අමෙරිකානු ඓතිහාසික ලිපි ලේඛන, පුස්තකාල බොහොමයක මහජන ප්‍රදර්ශනය සඳහා තබා තිබේ. දෙවිගේ නාමය සියවස් ගණනාවක් පුරාම ප්‍රසිද්ධ වී ඇති ආකාරය ගැන දැන් සඳහන් කළේ නිදසුන් අතළොස්සක් පමණි.

වර්තමානය ගැන කුමක් කිව හැකිද? දෙවිගේ නාමය අමතක වී ගොස් ඇද්ද? කිසිසේත් නැත. බයිබල් පරිවර්තන කිහිපයකම නොයෙකුත් පදවල දෙවිගේ පෞද්ගලික නාමය දැකගත හැකිය. ඔබ පුස්තකාලයකට ගියොත්, එසේ නැතහොත් ඔබ සතු ශබ්දකෝෂයක් දැන්ම පෙරළා සුළු මොහොතකට බැලුවොත්, ටෙට්‍රග්‍රැමටනය සඳහා ඔබේ භාෂාවේ  භාවිත කරන්නේ යෙහෝවා බව දැකගත හැකි වේ. නිදසුනකට, එන්සයික්ලොපීඩියා ඉන්ටර්නැෂනල් යන විශ්වකෝෂය යෙහෝවා යන නාමය පැහැදිලිව නිර්වචනය කරන්නේ “දෙවි සඳහා හෙබ්‍රෙව් බසින් භාවිත කරන පරිශුද්ධ නාමයේ නූතන ස්වරූපය” ලෙසය. ද නිව් එන්සයික්ලොපීඩියා බ්‍රිටැනිකා විශ්වකෝෂයේ මෑතක පළ වූ සංස්කරණයක පැහැදිලි කරන්නේ “දෙවි සඳහා යුදෙව් ආගමිකයන් සහ ක්‍රිස්තියානීන් භාවිත කරන නාමය” යෙහෝවා බවය.

‘එනමුත් දෙවිගේ නාමය වත්මන් ජනයාගේ සැලකිල්ලට බඳුන් විය යුතු විෂයක්දැයි’ යන්න ඔබට ප්‍රශ්නයක් විය හැක. දෙවිගේ නාමය විවිධාකාර අක්ෂර මාලාවලින් නොයෙකුත් ප්‍රසිද්ධ ස්ථානවල තවමත් දැකගත හැකිය. නිදසුනකට, නිව් යෝක් නගරයේ ගොඩනැඟිල්ලක මුල් ගලේ යෙහෝවා යන නාමය කොටා තිබේ. එම නුවරෙහිම ඉතා ජනාකීර්ණ වූ දුම්රියපොළක අලංකාරය සඳහා තනා ඇති වර්ණවත් මොසෙයික් නිර්මාණයක එම නාමය හෙබ්‍රෙව් අක්ෂරවලින් දක්නට ලැබේ. කෙසේවෙතත්, මෙම ස්ථාන පසු කරගෙන දහස් ගණනක් ජනයා ගමන් කළද, එම නාමය වැදගත් යමක් ලෙස නොසලකන බව පැවසුවහොත් එය නිවැරදි විය හැක.

ඔබ ජීවත් වන රටෙහි ජනයා දෙවිගේ නාමය වැදගත්කොට සලකනවාද? එසේ නැතහොත් වැඩිදෙනා මැවුම්කරුට “දෙවියන්” කියා අමතමින්, මෙම පදවි නාමය ඔහුගේ සැබෑ නාමය හැටියට සලකනවාද? දෙවිට නාමයක් තිබෙනවාද නැද්ද යන්න ගැන වැඩිදෙනාගේ අවධානයට ලක් වී නැති දෙයක් බව ඔබ පෞද්ගලිකව දැක ඇති දෙයින් අවබෝධ විය හැක. ඔබ මේ සම්බන්ධයෙන් දරන ආකල්පය කුමක්ද? යෙහෝවා යන දෙවිගේ පෞද්ගලික නාමය භාවිත කරමින්, ඔහුව ඇමතීම ඔබට පහසු යමක් සේ දැනෙනවාද?

[පාදසටහන]

[4වන පිටුවේ කොටුව⁄පින්තූරය]

යෙහෝවාගේ නාමය පතළ කළ රජෙක්

වර්ෂ 1852දී හවායි රටෙන් මිෂනාරිවරු කණ්ඩායමක් මයික්‍රෝනීසියා දූපත් බලා පිටත් වූහ. මෙම පිරිස ගමන් කළේ හවායි දූපත්වල එවකට පාලනය කරමින් සිටි රජු වූ තුන්වන කාමේහාමේහා රජතුමාගේ නිල ලාංඡනය ඇති ලිපියක් සමඟිනි. මෙම ලිපිය මුලින්ම ලියන ලද්දේ හවායන් බසිනි. පැසිෆික් දූපත්වල පාලකයන් කිහිපදෙනෙකු අමතමින් එහි කොටසක මෙසේ සැල වේ. “ඔබ සතු දූපත් බලා යාත්‍රා කරනු ඇති පිරිසක් ගැනයි මා කතා කරන්නේ. ඔවුහු මහෝත්තම දෙවි වූ යෙහෝවා ගැන උගන්වන ගුරුවරුය. ඔවුන්ගේ අභිප්‍රාය වන්නේ ඔබේ සදාතනික ගැලවීමට හේතු පාදක වන්නාවූ ඔහුගේ වචනයේ සත්‍යතාවන් ගැන ඔබව දැනුවත් කිරීමයි. . . . මෙම යහපත් ගුරුවරුන් ඔබේ ඉමහත් ගෞරවයට පාත්‍ර විය යුතු බව මම ප්‍රකාශ කරමි. එමෙන්ම මා අවවාද කරන්නේ ඔවුන්ගේ ඔවදන්වලට සවන් දෙන ලෙසයි. . . . මාගේ අවවාදය නම් ඔබේ රූප පසෙක ලා ඔබේ දෙවි ලෙස ස්වාමි වූ යෙහෝවාව පිළිගෙන, ඔහුට නමස්කාර කරන්න, ඔහුට ප්‍රේම කරන්න යන්නයි. එවිට ඔහු ඔබට ආශීර්වාද කරයි. ඔහු ඔබව ගලවයි.”

[පින්තූරය]

තුන්වන කාමේහාමේහා රජතුමා

[හිමිකම් විස්තර]

Hawaii State Archives

[3වන පිටුවේ පින්තූරය]

ටෙට්‍රග්‍රැමටනය යනු “අක්ෂර සතරය.” හෙබ්‍රෙව් බසින් දෙවිගේ පෞද්ගලික නාමය දැක්වෙන්නේ මෙලෙසිනි