Bai na kontenido

Kiko Ta Piká?

Kiko Ta Piká?

E kontesta ku Beibel ta duna

Piká ta kualke akshon, sintimentu òf pensamentu ku ta kontrali na Dios su normanan. E ta inkluí kibra e leinan di Dios dor di hasi loke ta robes, òf inhustu, den bista di Dios. (1 Huan 3:4; 5:17) Beibel ta bisa ku si un persona keda sin hasi loke ta korekto, esei tambe ta piká.—Santiago 4:17.

Den e idiomanan original di Beibel, e palabra piká ta nifiká “hera e marka.” Por ehèmpel, un grupo di sòldá den antiguo Israel tabata asina apto den slenger piedra, ku nan no tabata “hera.” E ekspreshon ei lo por ser tradusí literalmente komo lo no a “peka.” (Huesnan 20:16, Beibel Santu) Pues, peka ta nifiká hera e marka di Dios su normanan perfekto.

Komo e Kreador, Dios tin e derecho di establesé normanan pa humanidat. (Revelashon 4:11) Nos tur tin ku duna kuenta na dje pa nos akshonnan.—Romanonan 14:12.

Ta posibel pa no peka nunka?

Nò. Beibel ta bisa ku nos “tur a peka i no por reflehá e gloria di Dios.” (Romanonan 3:23; 1 Reinan 8:46; Eklesiástes 7:20; 1 Huan 1:8) Dikon esei ta asina?

Na prinsipio, e promé hendenan, Adam ku Eva tabata sin piká. Esei ta pasobra Dios a krea nan perfekto, segun su imágen. (Génesis 1:27) Pero, nan a bira imperfekto ora nan a desobedesé Dios. (Génesis 3:5, 6, 17-19) Anto ora Adam ku Eva a haña yu, nan a pasa piká i imperfekshon pa nan yunan, manera un defekto ku nan ta heredá. (Romanonan 5:12) Rei David di Israel a bisa: “Den kulpa mi a nase.”—Salmo 51:5, Beibel na papiamentu koriente.

Tin algun piká ku ta mas grave ku otro?

Si. Por ehèmpel, Beibel ta bisa ku e hòmbernan di antiguo Sódoma tabata “masha malbado mes” i nan piká tabata “masha pisá mes.” (Génesis 13:13; 18:20, Beibel Santu) Laga nos wak tres faktor ku ta determiná e gravedat, òf seriedat, di un piká.

  1. Gravedat. Beibel ta bisa ku nos mester evitá pikánan serio manera inmoralidat seksual, idolatria, hòrtamentu, buracheria, ekstorshon, matamentu i bruheria. (1 Korintionan 6:9-11; Revelashon 21:8) Pero, Beibel ta hasi un diferensia entre e pikánan akí i otro piká ku nos ta hasi sin ku nos por yuda òf sin pensa. Por ehèmpel, nos akshon i palabra por hùrt otro hende sin ku nos ke. (Proverbionan 12:18; Efesionan 4:31, 32) Sin embargo, Beibel ta animá nos pa no minimisá e gravedat di ningun piká pasobra esaki por hiba na violashonnan mas serio di e leinan di Dios.—Mateo 5:27, 28.

  2. Intenshon. Tin hende ta kometé piká pasobra nan no konosé e mandamentunan di Dios. (Echonan 17:30; 1 Timoteo 1:13) Aunke Beibel no ta hustifiká e tipo di pikánan akí, e ta distinguí nan for di e tipo di pikánan unda un persona ta kibra Dios su lei deliberadamente. (Numbernan 15:30, 31) Beibel ta indiká ku e persona ku ta peka deliberadamente tin un “kurason malbado.”—Yeremías 16:12, Beibel Santu.

  3. Frekuensia. Beibel ta hasi un distinshon tambe entre kometé un piká un biaha i praktiká e mesun pika pa un tempu largu. (1 Huan 3:4-8) Dios ta kondena esnan ku ta “praktiká piká deliberadamente” asta despues di a haña sa loke ta korekto.—Hebreonan 10:26, 27.

Personanan ku a kometé pika serio, por sinti nan hopi malu pa motibu di e fayonan ku nan a kometé. Por ehèmpel, Rei David a skirbi: “Mi kulpa a subi pasa riba mi kabes, manera un peso fuera di mi forsa.” (Salmo 38:4, Beibel na papiamentu koriente) Sin embargo, Beibel ta duna e speransa akí: “Laga e malbado bandoná su kaminda, i e hende inhustu su pensamentunan; i lag’é bolbe serka SEÑOR, i e lo tin kompashon kuné; i serka nos Dios, pasobra e lo pordoná abundantemente.”—Isaías 55:7, Beibel Santu.