Promé Karta pa Timoteo 1:1-20
1 Esaki ta un karta di ami, Pablo. Mi a ser nombrá komo apòstel di Kristu Hesus riba òrdu di Dios, nos Salbador, i riba òrdu di Kristu Hesus, kende ta nos speransa.+
2 Mi ta skirbi e karta akí pa abo, Timoteo.*+ Bo ta un kompañero den fe ku ta manera mi yu.+
Mi ta deseá pa bo haña bondat inmeresí, miserikòrdia i pas ku ta bini di Dios, e Tata, i di Kristu Hesus, nos Señor.
3 Bo ta kòrda ku tempu ku mi tabata kla pa bai Masedonia,* mi a pidi bo pa keda Efeso? Awèl, awor mi ta bolbe pidi bo pa keda einan pa bo duna algun persona òrdu pa nan no plama siñansa falsu
4 i pa nan no presta atenshon na kuenta falsu+ ni na lista di nòmber di antepasado. E kosnan ei no ta yuda ku nada.+ Al kontrario, e kosnan ei ta hiba na spekulashon, i nan no ta parti di loke Dios a duna pa fortalesé nos fe.
5 E meta di e instrukshonnan* ei ta pa yuda nos stima+ otro ku un kurason puru, ku un konsenshi limpi i ku fe+ sin hipokresia.
6 Algun persona a stòp di hasi e kosnan ei, i nan a haña nan den diskushon sin sentido.+
7 Nan ke ta maestro+ di lei di Dios,* pero nan no ta komprondé e kosnan ku nan ta papia ni e kosnan ku nan ta insistí asina tantu riba dje.
8 Pero nos sí sa ku Lei ta bon, basta ku un hende aplik’é korektamente.*
9 I nos sa ku no ta pa hende hustu ta saka lei, sino pa hende ku ta kibra lei+ i ku ta rebelde, pa hende malbado i pekadó, pa hende ku no ta leal* i ku ta mustra falta di rèspèt pa loke ta santu. Sí, ta saka lei pa hende ku ta mata nan tata, nan mama òf otro hende,
10 pa hende ku ta praktiká inmoralidat seksual,* pa hòmber ku ta praktiká homoseksualidat,* pa sekuestradó, pa gañadó i pa hende ku ta hasi huramentu falsu. Sí, ta saka lei pa tur kos ku ta kontra siñansa ku ta benefisiá hende.*+
11 E siñansanan ei ta bini di e Dios felis, i nan ta basá riba e maravioso bon notisianan ku Dios a konfia mi kuné.+
12 Mi ta gradisidu na Kristu Hesus, nos Señor. El a duna mi poder, i el a asigná mi na su sirbishi+ pasobra el a konsiderá mi konfiabel.*
13 Ántes, mi tabata blasfemá Dios i persiguí su pueblo, i mi tabata un hòmber arogante i ònbeskòp.+ Sinembargo, Kristu a tene miserikòrdia di mi pasobra mi no tabata sa mihó i pasobra mi a aktua sin fe.
14 Mi a risibí bondat inmeresí di nos Señor na gran abundansia, i el a yuda mi pa mi tin fe den dje. Ademas, mi a haña amor di Kristu Hesus pasobra mi ta su disipel.
15 Loke mi ta bai bisa ta bèrdat i meresé di ser aseptá kompletamente: Kristu Hesus a bini na mundu pa salba pekadó.+ I di eseinan, ami ta esun di mas pió.+
16 Sinembargo, Kristu Hesus a tene miserikòrdia di mi, pa asina pa medio di mi, komo e kaso di mas pió, lo e por a demostrá tur su pasenshi. Di e manera ei, el a laga mi bira un ehèmpel pa e hendenan ku lo pone nan fe den dje pa nan por haña bida eterno.+
17 E Rei di eternidat,+ kende ta indestruktibel+ i invisibel,+ i kende ta e úniko Dios,+ meresé onor i alabansa pa tur eternidat. Amèn.
18 Timoteo, mi yu, mi ta duna bo e instrukshonnan ei di akuerdo ku e palabranan ku a ser profetisá tokante bo. E palabranan ei lo yuda bo sigui ku e bon bataya ku nos tin.+
19 Miéntras ku bo ta hasi esei, mantené bo fe i keda ku un konsenshi limpi.+ Algun ruman no a hasi kaso di nan konsenshi, i esei a pone nan fe noufragá manera un barku ta noufragá.*
20 Himeneo+ i Aleksander ta entre e hendenan ei, i mi a entregá nan na Satanas*+ pa e korekshon ei siña nan pa no blasfemá Dios.
Nota
^ Ku ta nifiká “persona ku ta onra Dios.”
^ Òf: “mandatonan; òrdunan.”
^ Lit.: “maestro di lei.”
^ Lit.: “legítimamente.”
^ Òf: “no tin amor leal.”
^ Òf: “ku ta saludabel; ku ta probechoso.”
^ Òf: “hòmber ku ta tene relashon seksual ku otro hòmber.” Lit.: “hòmber ku ta drumi ku hòmber.”
^ Òf: “fiel.”
^ Òf: “pone ku nan fe a disparsé manera un barku ku a senk.”
^ Esta, nan a ser saká for di e kongregashon.
