Promé Karta pa Timoteo 4:1-16
4 Sinembargo, palabra inspirá pa Dios* ta bisa bon kla ku lo bini un tempu ku algun hende lo kai for di fe, pasobra nan lo skucha mensahe engañoso ku supuestamente ta bini di Dios*+ i siñansa di demoño.
2 I nan lo skucha hende hipókrita ku ta papia mentira+ i ku tin un konsenshi ku ta sin heful, komo si fuera kimá ku heru kayente.
3 E hendenan hipókrita ei lo prohibí hende di kasa+ i di kome sierto kuminda, + pero Dios a krea e kumindanan ei pa hende ku tin fe i konosementu eksakto di e bèrdat por kome nan i gradisí Dios pa nan.+
4 Tur loke Dios a krea ta bon,+ i un hende no mester rechasá nada+ si e ta kom’é ku orashon di gradisimentu.*
5 Pues, kuminda ta limpi* pasobra Dios a deklará nan limpi i pasobra nos ta hasi orashon di gradisimentu pa nan.
6 Ora bo duna e rumannan e konsehonan ei, lo bo mustra ku bo ta un bon sirbidó* di Kristu Hesus; sí, lo bo mustra ku bo ta un persona ku a laga e palabranan di e bèrdat* i e bon siñansa ku bo a sigui fielmente entrená bo.+
7 Pero rechasá kuenta falsu ku ta mustra falta di rèspèt pa Dios,+ manera e kuentanan ku hende muhé bieu sa konta. Hasi esfuerso* pa demostrá deboshon* na Dios.
8 Ora un hende ta hasi ehersisio,* esei tin sierto benefisio. Pero ora un hende ta demostrá deboshon* na Dios, esei ta benefisi’é den tur kos, pasobra esei ta laga nos haña e bendishonnan ku Dios a primintí den e bida ku nos tin awor i den e bida ku nos lo haña den futuro.+
9 Loke mi a kaba di bisa ta bèrdat i meresé di ser aseptá kompletamente.
10 P’esei mes nos ta traha duru i hasi esfuerso,+ pasobra nos a pone nos speransa den un Dios bibu, kende ta Salbador+ di tur sorto di hende,+ spesialmente di hende ku ta sirbi Dios fielmente.
11 Sigui duna e rumannan e instrukshonnan ei, i siña nan tokante e instrukshonnan ei.
12 Nunka no laga niun hende menospresiá bo pasobra bo ta yòn. Mas bien, sea un bon ehèmpel pa e rumannan ku ta sirbi Dios fielmente; pone un bon ehèmpel den bo manera di papia, bo komportashon, bo amor, bo fe i bo kondukta puru.
13 Miéntras bo ta warda pa mi yega, sigui dediká bo mes na lesamentu den públiko,+ na dunamentu di konseho* i na siñamentu di otro hende.
14 No neglishá e abilidat* ku bo tin, sí, e abilidat ku bo a haña ora ku e kuerpo di ansiano a pone man riba bo+ di akuerdo ku loke a ser profetisá tokante bo.
15 Meditá* riba e kosnan ei; dediká bo mes kompletamente na nan pa tur hende por mira bon kla ku bo a hasi progreso.
16 Sigui hasi bo bèst pa bo komportashon ta bon i pa bo ta un bon maestro.+ Sigui hasi esfuerso pa kumpli ku tur e kosnan ku mi ta bisa bo aki, pasobra hasiendo esei lo bo salba bo mes i tambe e hendenan ku ta skucha bo.+
Nota
^ Lit.: “Sinembargo, e spiritu.”
^ Òf: “nan lo presta atenshon na spiritu engañoso.”
^ Lit.: “ta asept’é ku gradisimentu.”
^ Òf: “santu.”
^ Na griego, diákonos; na latin, minister.
^ Lit.: “fe.”
^ Lit.: “Entrená bo mes ku e meta.”
^ Òf: “ta entrená su kurpa pa hasié fuerte.”
^ Òf: “animashon.”
^ Òf: “don.”
^ Òf: “Reflekshoná.”
