Onlad karga

Onlad saray karga

MANUNAN ARTIKULO | NABILAY LAMET IRAY INATEY—POSIBLE KASI?

Panon Kan Makaseguro ya Nabilay Iray Inatey?

Panon Kan Makaseguro ya Nabilay Iray Inatey?

Wala kasi basiyan ed panisian nabilay lamet iray inatey? On, ontan so inisip nen apostol Pablo. Diad tulong na espiritu na Dios et insulat to: “No say paniilalo tayo ed si Kristo et diad sayan bilay labat, sikatayo lay sankapakaskasian ed amin a totoo. Balet, si Kristo et pinaoli la manlapud inaatey, a sikatoy unonan pinaoli manlapud inaatey.” (1 Corinto 15:19, 20) Segsegurado si Pablo ed kioli na saray inatey. Say garantiya et say mismon inkioli nen Jesus. * (Gawa 17:31) Kanian imbaga nen Pablo ya si Jesus et “unonan pinaoli”—sikatoy unonan pinaoli pian manbilay ya andi-angga. No unaan si Jesus, wala ni sirin so onsublay.

Imbaga nen Job ed Dios: “Manpilalek ka ed gawa na saray limam.”Job 14:14, 15

Nia ni sananey a rason no akin ya segurado tayod ilalon kioli. Si Jehova et Dios na katuaan. Say Dios et “agnayarin mantila.” (Tito 1:2) Agnin balot nantila si Jehova, tan anggan kapigan et agbalot mantila. Kasin mangiter na ilalo ya onoli iray inatey, tan ipanengneng to ni ingen ya sarag ton gawaen itan, insan agto lanlamang gawaen? Imposible!

Akin et inyuksoy nen Jehova ya bilayen to ray inatey diad arapen? Lapud panangaro to. “No say sakey a too ompatey, ombilay ta lamet?” so intepet nen Job. “Ontawag ka, et onebat ak ed sika. Manpilalek ka ed gawa na saray limam.” (Job 14:14, 15) Kombinsido si Job ya pirawaten na maaron Ama tod tawen ya sikatoy paolien ed bilay. Anguman la kasi Dios? Say kuan to, “Siak, si Jehova, agak manguman.” (Malaquias 3:6) Siansia nin pipilaleken na Dios ya bilayen iray inaatey tan nanengneng to ran maksil tan maliket. Ontan so labalabay ya nagawa na anggan siopan maaron ateng ya inateyan na anak. Siempre, say  pandumaan balet et walay pakayari na Dios ya gawaen so pipirawaten to.Salmo 135:6.

Say patey et balbaleg a problema, balet walay balibalin solusyon na Dios

Ikdan nen Jehova na pakayari so Anak to ya mangiter na agnasabaan ya liket ed saray maneermen ya inateyan. Tan antoy liknaan nen Jesus ed kioli? Antis ton binilay si Lazaro, anengneng toy graben ermen na agagi tan kakaaro nen Lazaro, tan manakis met si Jesus. (Juan 11:35) Diad sananey ya inkagawa, anengneng nen Jesus so balo ya taga Nain ya inatey so saksakey ya anak to. “Sikatoy naabagey [nen Jesus] tan inkuan to ed sikato: ‘Agka la onaakis.’” Tan tampol ton binilay so anak na balo. (Lucas 7:13) Kanian talagan ansakit ed si Jesus so ermen tan patey. Seguradon panliketan to ya salatan na sobran liket so paneermen ed interon mundo!

Asalim lay nanermen a maong? Ompan say antam, say patey et probleman anggapoy solusyon. Balet wala! Say pamaoli ya gawaen na Dios panamegley na Anak to. Tandaan ya labay na Dios ya nanengneng mo itan ya solusyon. Labay ton wadman ka pian lakapen lamet iray inar-arom. Isip mo pan wadman kayon saniiba manpa-plano parad andi-anggaan ya arapen, tan agki lan balot mansisian!

Oniay sankanonot nen Lionel ya abitlad gapo: “Naaralan ko lanlamang ya walay kioli. Nen unaan, singa agko napanisiaan, tan anggapoy talek kod samay angibagad siak. Balet ninengneng kod Biblia tan abasak ya tua manaya! Labalabay ko lan nanengneng si lakik.”

Labay mo ni makaaral? Maliket iray Tasi nen Jehova ya ipanengneng ed sika diad mismon Bibliam no akin ya kombinsido ran nabilay lamet diad arapen iray inatey. *

^ par. 3 Pian napaneknekan ya pinaoli si Jesus, nengnengen so libron The Bible—God’s Word or Man’s? pahina 78-86 ya im-publish na Saray Tasi nen Jehova.

^ par. 9 Ipangasin nengnengen so kapitulo 7 na libron Anto so Peteg ya Ibabangat na Biblia? ya im-publish na Saray Tasi nen Jehova.