Onlad karga

Onlad saray karga

 ISTORYAY BILAY

Inter ed Siak nen Jehova so Mas ni nen say Kanepegan Ko

Inter ed Siak nen Jehova so Mas ni nen say Kanepegan Ko

Desi-sietek ni labat ed saman tan saray ambisyon tan iisipen ko et singa met ed maslak ya tinedyer. Labalabay koy miulop ed saray barkadak, man-swimming, tan man-soccer. Balet sakey a labi, anguma-uman so bilay ko. Naaksidente ak ed motor tan abaldadoy interon laman ko. Agawa man manga 30 taon lay linmabas, kanian abayag ak lan bedridden.

Taga kamid syudad na Alicante, diad bukig na Spain. Maguloy pamilya mi, kanian nen tinedyer ak, labalabay koy manistambay. Walay asingger ed sikami ya vulcanizing shop. Akaarok so sakey ed saray mantratrabaho diman, si José María. Maar-aro tan inter tod siak so atension ya aanapen kod pamilyak. No walay problema, singa tuan kuyak—sakey a tuan kaaro, anggano mas matatken na 20 taon ed siak.

Ginmapon inyaralan na Biblia si José María na Saray Tasi nen Jehova. Nibagak ya labalabay toy Biblia, tan mabetbet ton iistoryaen ed siak iray katuaan ed Biblia. Marespetok met ya dedengelen, balet diad tua, agak talaga interesado. Lapud tinedyer ak, sananey so lilimengen ko. Balet, magano la itan ya manguman.

ANGUMAN SO BILAY KO LAPUD AKSIDENTE

No nayari agko labay lan pantongtongan iman ya aksidente. Say nibagak labat et kaambagelan tan palpalaran so ginawak. Diad sakey agew labat, anguma-uman so bilay ko. Dati maligligsa ak ya balolaki, insan biglan baldado ak la tan agak la makaalis ed ospital. Mairap kon awatey situasyon ko. Lanang kon tetepetay sarilik, ‘Anto ni kana na pambilay?’

Binisita ak nen José María tan imbaga ton tampol ed Saray Tasi nen Jehova ed asingger ya kongregasyon ya pasyaren da ak diad ospital. Naliliketan so pusok ed regular ya ibibisita da. Kapaway kod ICU, nanaral ak na Biblia. Naamtaan koy katuaan no akin ya maniirap tan ompapatey iray totoo tan no akin ya aabuloyan na Dios iray mauges ya nagagawa. Naaralan ko met iray pormisa na Dios ya nagawad arapen, ya napano na perpekton totoo so interon dalin tan anggapo lan balot so mangibagan: “Mabeblay ak.” (Isaias 33:24) Diad interon bilay ko, natan ak labat awalaay ilalo.

Kapaway kod ospital, maples so inyaligwas kod panagaral koy Biblia. Makakaatendi ak ni ingen ed arum ya aral na Saray Tasi nen Jehova tan makakapampulong diad tulong na pinasadyan wheelchair. Nen Nobyembre 5, 1988, diad edad ya 20, abautismoan ak ed sakey ya impreparan bathtub. Tinulongan ak nen Jehova a Dios ya magmaliw a positibo. Balet panon kon nipanengneng so pisasalamat ko?

AKTIBO ANGGANO BALDADO

Determinado ak ya ag-abuloyan so situasyon kon makaamper a gawaey anggaay nayarian kon lingkoray Jehova. Labay ko ni onaligwas. (1 Timoteo  4:15) Nen unaan, nairapan ak ta kontray pamilyak ed balon pananisiak. Balet wadtan iray kapananisiaan ko, sikaray espiritual ya agagik. Sineguro dan naatendian koy amin ya aral tan aktibo ak ed panagpulong.

Balet diad ilalabas na panaon, kaukolan ko lay 24 oras ya bantay. Abayag kamin nananap, pero akalmo kami lanlamang na dugarugan pasilidad parad saray disable diad syudad na Valencia, 160 kilometro ed norte na Alicante. Ditan ak la nanayam.

Anggano bedridden ak, determinado ak ya ipaamtad arum so pananisiak

Anggano bedridden ak, determinado ak ya mantultuloy ya manlingkor ed si Jehova. Inusar koy disability pension ko tan arum nin tulong ya nanlapud gobierno pian makasaliw ak na computer ya impa-install kod abay na dukolan ko. Angaliw ak met na cell phone. Natan, kada kabuasan, i-switch na caregiver so computer tan cell phone ko. Pian makapan-computer ak, manguusar ak na joystick ya kokontrolen kod timir ko. Wala met so pinasadyan panagtelpek ya kokontrolen kod sangik pian makapan-type ak ed keyboard tan makatawag ed cell phone.

Diad tulong na panagtelpek, sarag koy ontawag diad cell phone koe

Panon ya akatulong ed siak iyan teknolohiya? Unona, nalulukasan koy jw.org ya website tan Watchtower ONLINE LIBRARY. Talagan baleg so agawaan da irayad siak! Kada agew, mabetbet ya pigay oras ak ya manaaral tan manre-research ed saray based Biblian publikasyon pian tuloytuloy ak ya makaaral nipaakar ed Dios tan ed saray balibalin kualidad to. Tan no naeermenan ak odino medyo nadidismaya, walan walay nabasak ed website ya manpaligsad siak.

Lapud computer ko, narerengel koy aral ed Kingdom Hall tan makakapibiang ak. Mankokomento, mangidadauloy pikakasi, manpapaliwawa, tan manbabasa ak na Panag-bantayan no siak so aka-asain. Anggano agak mismon makakaakar diman, siansia nin naliliknak ya parte ak na kongregasyon mi.

Lapud telepono tan computer, aktibo ak met ya makakapampulong. Tua, agak makakaakar ed kaabungan ya singa gagawaen na Saray Tasi nen Jehova. Balet agak nadidismaya. Sarag kon ibagay pananisiak ed arum diad tulong na sarayan teknolohiya. Diad tua, naliliketan ak ya maong ed pampupulong kod telepono, kanian siak so inyasain na saray elder ya mangorganisa ed pampulong panamegley na telepono. Makakatulong itan lalo lad saray membro na kongregasyon ya agla makaalis ed abung da.

Mangiyaaral ak na Biblia

Balet aliwan puros teknolohiya labat so tetelekay bilay ko. Inagew-agew ya walay pinabpablin kakaaro ya ombibisita ed siak. Ipipila da ray kakanayon  tan kabat da ya interesadod Biblia. Mabetbet, kekerewen da ni ingen ya siak so mangiyaral na Biblia. No arum, ombibisita iray pamilya tan ipipila da ak ed panagdayew na pamilya ra. Labalabay ko no onyurong iray ugugaw ed abay na dukolan ko insan da ibagad siak no akin et inaro day Jehova.

Labalabay koy milad panagdayew na pamilya na kakaarok

Misalsalamat ak no dakel so ombibisitad siak. Lanang ya napnoy kuartok na kakaaron nanlapud arawi tan asingger. Kanian naisip yo seguro ya talagan nabibigla iray caregiver ed maaron atension ya naaawat ko. Inagew-agew kon pisasalamatan si Jehova ta inabuloyan to ak ya magmaliw a kabiangan na sayan marakdakep ya ulopan na sanaagi.

AG-ONSUSUKO

Kada no walay mangibanod siak tan kumustaen da ak, say ibagak, “E onia, agak onsusuko!” Siempre, antak ya agko bukbukor ed sayan pilalaban ko. Antokaman so situasyon odino limitasyon tayo, amin ya Kristiano et milalaban—diad “maabig a pilalaban nipaakar ed pananisia.” (1 Timoteo 6:12) Antoy akatulong ed siak ya mananos ed dakel lan taon? Inagew-agew ak ya manpipikasi tan misasalamat ed si Jehova diad impangiter toy gagala na bilay ko. Tan gagawaen koy anggaay nayarian kon mansiansian busy ed panaglingkor ed Dios, manpopokus ak ed ilalod arapen.

José María

Lanang kon iimadyinen so balon mundo tan no antoy liknaan na makabatik tan makalugtot lamet. No maminsan, lulureyen koy kaarok ya si José María—ya walay polio to—ya manlumba kamin ombatik. “Siopay manalo ey?” so tepet kod sikato. “Agla importante no siopay manalo,” so ebat to. “Say talagan importante et wadman ta’n manlumba, diad Paraiso.”

Aliwan mainomay ya awaten so situasyon ko. Antak ya palpalaran ak nen tinedyer ak, tan balbaleg so pinerdik. Balet, agaylay pisasalamat ko ta agak pinaulyanan nen Jehova. Dakdakel so inter tod siak—say baleg ya espiritual a pamilya, say determinasyon ya manbilay, say liket ya ontulong ed arum, tan say marakdakep ya ilalod arapen. No ipaliwawak so naliliknak diad antikey, say nibagak et talagan inter ed siak nen Jehova so mas ni nen say kanepegan ko.