“Masulok ya 39 taon kami lan kasal nen Sophia * nen inatey lapud abayag ya impansakit to. Dakel ya kakaaro mi so sinmuporta, tan ginawak ya busy so bilay ko. Balet diad loob na sakey taon, ansakisakit so aliknak. Manguman-uman so emosyon ko, agko nakontrol. Anggad natan, ngalngali taloran taon la manlapud impatey to, pawilpawil nin siansia so sakit ya naliliknak, tan mabetbet ya bigla labat.”​—Kostas.

Kasin asalim lay inateyan na inad-aro? No on, nayarin aliknam met may imbaga nen Kostas. Say ipatey na asawa, kapamilya, odino kaaro et kaibad saray sankairapan odino sankasakitan ya naeksperiensya tayo. Onabobon ed satan iray eksperto ya panaaralan day sakit ya nalilikna na saray inateyan. Nabasa ed artikulon im-publish ed The American Journal of Psychiatry ya no inateyan so sakey, atan so sankasakitan ya naeksperiensya to lapud pakalikna to et agto lan balot nakaiba so inad-aro to. Lapud graben ermen, nayarin naisip to: ‘Anggad kapigan ko ’ya nalikna? Magmaliw ak ni kasin maliket? Panon ak ya nainawaan?’

Sarayan tepet et naebatan ed sayan isyu na Onliing! Nabasa ed onsublay ya artikulo iray posiblin nagawa no agano ka nin inateyan na inad-aro. Ipaliwawa na saray manumtumbok ya artikulo iray paraan ya nayarin makatulong pian nasarag moy paneermen mo.

Komon ta sayan magasin et makaligliwa tan makatulong ed saray maneermen diad impatey na inad-aro da.