Onlad karga

Onlad saray karga

 TULONG PARAD SARAY INATEYAN

Say Sankaabigan a Tulong Parad Saray Inateyan

Say Sankaabigan a Tulong Parad Saray Inateyan

SAY SAKIT YA NALILIKNA LAPUD IMPATEY NA INAD-ARO ET AARALEN A MAONG NA SARAY EKSPERTO. Balet singa anengneng tayod akauna iran artikulo, say sankaabigan ya bilin na saray eksperto et mabetbet ya mitunosan ed karunongan ya walad daan ya libro, say Biblia. Prueba itan ya ag-onkukupas so bilin a manlalapud Biblia. Balet, aliwa labat ya napanmatalkan ya bilin so nabasa ed Biblia. Nabasa met ditan iray impormasyon ya anggapod arum a libro, ya makaligliwan maong ed saray inateyan.

  • Panamaseguro ya agmaniirap iray inatey ya inad-aro tayo

    “Saray inatey et anggapon balot so amta ra,” so ibabaga na Biblia diad Eclesiastes 9:5. “Naandi [la] so nonot” da. (Salmo 146:4) Ontan met, inkompara na Biblia so patey ed aralem ya ugip.​—Juan 11:11.

  • Katuaan ya say maaron Dios et mangiiter na ligliwa

    Ibabaga na Biblia diad Salmo 34:15: “Saray mata nen Jehova * et onnenengneng ed saray matunong, tan saray layag to et ondedengel ed ikekerew day tulong.” Say pangibaga tayod Dios na nalilikna tayo panamegley na pikakasi et aliwa labat ya paraan pian onlemew so liknaan tayo odino ondeen so nonot tayo. Diad tua, makatulong itan pian nawalaan itayoy personal ya relasyon ed Amalsa, ya sarag ton usaren so pakayari to pian ligliwaen itayo.

  • Balibalin ilalo ed arapen

    Imadyin moy panaon ed arapen sano saramay walad lubok et bilayen lamet diad dalin! Aminpigan abitla ed Biblia so nipaakar ed satan. Deneskribe na Biblia so kipapasen ed dalin no nagawa la itan. Nabasa ditan ya say Dios et “punasen to so amin a lua ed kamataan [tayo], tan anggapo lay patey, anggapo met lay panermen tan panakis tan panotot.”​—Apocalipsis 21:3, 4.

Dakel ya totoon manisia ed si Jehova, say Dios ya nabasa ed Biblia, so apabiskeg a maong pian nasarag so ermen da lapud nanmatalek irad ilalo ya nanengneng da lamet so inatey ya inad-aro da. Singa bilang, si Ann, ya inatey so asawa to ya 65 a taon ton akaiba, et imbaga to: “Ipapaseguro ed siak na Biblia ya agmaniirap iray inatey ya inad-aro tayo tan paolien na Dios so amin ya walad memorya to. Araya so sankanonot ko kada no nanonotan koy asawak, kanian asarag ko so sankagrabian ya agawad bilay ko!”

Oniay imbaga nen Tiina, ya abitla ed saray akaunan artikulo: “Manlapud samay agew ya inatey si Timo, aliknak so suporta na Dios. Talagan tinulongan ak nen Jehova diad panaon ya maer-ermen ak. Tan tudtua ed siak so impromisa na Biblia ya kioli. Atan so mamapabiskeg ed siak pian agak onsuko anggad agew ya nanengneng ko lamet si Timo.”

Napatnagan ed sarayan balikas so nalilikna na minilyon ya totoo ya manmamatalek ed Biblia. Anggano iisipen mo ya aliwan tua odino kugkugip labat iray ibabaga na Biblia, parad pankaabigan mo ya aralen iray ebidensya ya talagan napanmatalkan iray bilin tan promisa ya wadtan. Nayarin ditan mo napruebaan ya say Biblia so sankaabigan ya tulong parad saray inateyan.

AMTAEN NI SO NIPAAKAR ED ILALO NA SARAY INATEY

Bantayan iray video diad website mi ya jw.org

Impromisa na Biblia ya diad arapen et abeten tayo ray inad-aro tayo ya inatey

 ANTO SO KIPAPASEN NA SARAY INATEY?

Antoy nagawa ed sikatayo no ompatey itayo? Say malinew ya ebat na Biblia et makaligliwa tan makapabiskeg na liknaan

Nengnengen ed PUBLIKASYON > VIDEO (Kategorya na Video: Biblia)

LABAY MOY MAKARENGEL NA MAONG A BALITA?

Diad karakel na mauges a balita, iner so pakaromogan moy maong a balita? Naamtaan mod sayan video so nipaakar ed brosyur ya Maong a Balita ya Nanlapud Dios!

Nengnengen ed PUBLIKASYON > VIDEO (Kategorya na Video: Saray Aral tan Ministeryo Mi)

^ par. 7 Nabasa ed Biblia ya Jehova so ngaran na Dios.