•  Ke ka baka la eng o swanetše go diriša nako ya gago gabotse?

•  Seo o ka se dirago

•  Seo dithaka tša gago di se bolelago

•   Re ka swantšha nako le tšhelete. Ge o ka senya tšhelete, o ka se be le yona ge o tlo e hloka. Ka mo go swanago, ge o ka se diriše nako ya gago gabotse, o ka se tle o eba le yona ge o e hloka.

   Seo Beibele e se bolelago: “Sebodu se duma dilo, eupša moya wa sona o a diila. Lega go le bjalo, moya wa diroto wona o tla nontšhwa.”—Diema 13:4.

   Nnete še: Ge o diriša nako ya gago gabotse o tlo kgona go ba le nako ya go dira dilo tše dintši.

•   Go tlwaela go diriša nako ya gago gabotse go tla go thuša ge o godile. E bile ge o swara nako, seo se tla go thuša gore o se rakwe mošomong. Ka mohlala, ge nkabe o be o na le kgwebo, o be o ka se rate go ba le mošomi yo a dulago a latetšwe mošomong.

   Seo Beibele e se bolelago: “Motho yo a botegago go se senyenyane, o botega le go se segolo.”—Luka 16:10.

   Nnete še: Tsela yeo o dirišago nako ka yona e bontšha gore o motho wa mohuta mang.

 Eupša re a tseba gore go diriša nako gabotse ga go bonolo. Tše dingwe tša dilo tšeo di dirago gore go be thata go dira seo ke tše:

 Bagwera

 Cynthia o re: “Ge bagwera ba ka ba nkgopela gore ke intšhe le bona, ke no dumela le ge ke bona gore ga ke na nako. Ke no re, ‘Aa, ke tla boa ke dira mošomo wo kapejana ge ke boa gae.’ Go dira dilo ka tsela ye ga go thuše ka selo, e bile go dira gore dilo di senyege le go feta.”

 Ditšhitišo

 Ivy o re: “TV e a goketša. O ka e bogela mosegare ka moka.”

 Marie yena o re: “Ke kgona go tšea nako e ntši ke kgotlakgotla thabolete. Ke lešwa dihlong ke gore ga ke kgone go e tlogela ntle le gore battery e fele.”

 Go dikadika

 Beth o re: “Ke dikadika go dira mešomo ya sekolo le dilo tše dingwe tšeo ke swanetšego go di dira. Ke senya nako ke dira dilo tša go se re selo, go ba go fihlela ke gapeletšega go dira mošomo wa sekolo. Ruri wo ga se mokgwa o mobotse.”

1.   Ngwala dilo tšeo o nyakago go di dira. Ka mohlala, o ka ngwala mešomo ya ka gae le ya sekolo. O ka ngwala le nako yeo o tlago go e tšea o dira mošomo o mongwe le o mongwe mo bekeng.

    Keletšo ya Beibele: “Le kgonthišetše dilo tše bohlokwa kudu.”—Bafilipi 1:10.

2.   Ngwala dilo tšeo o ka di dirago ge o feditše go dira dilo tše bohlokwa. Ka mohlala, o ka ngwala dilo tša go swana le go bogela TV le go bolela le bagwera Inthaneteng. Le gona mo, o ka ngwala le nako yeo o e fetšago o dira dilo tšeo mo bekeng.

    Keletšo ya Beibele: “Tšwelang pele le sepela ka bohlale . . . , le diriša nako ya lena ka bohlale.”—Bakolose 4:5.

3.   Beakanya dilo tša gago. Lebeledišiša mananeo a mabedi ao o a dirilego. Ipotšiše gore: ‘Ke beile nako e kaaka’ng ya go dira mešomo e bohlokwa? Na ke swanetše go fokotša nako yeo ke e fetšago ke dira dilo tšeo di sego bohlokwa?’

    Leka se: Letšatši le letšatši ngwala dilo tšeo o nyakago go di dira, ke moka o phumole e nngwe le e nngwe ge o fetša go e dira.

    Seo Beibele e se bolelago: “Maano a motho yo mafolofolo a a mo hola.”—Diema 21:5.

4.   Dira dilo tšeo o ipoditšego gore o tlo di dira. Ke nnete gore o ka swanelwa ke go fela o gana taletšo e le gore o dire dilo tše bohlokwa pele. Ge o ka dira seo o tlo hwetša gore o ba le nako e ntši, le gona o tla ipshina ka yona ka gobane o tla be o thomile ka go dira dilo tše bohlokwa.

    Keletšo ya Beibele: “Fišegang, le se ke la tšwafa.”—Baroma 12:11.

5.   O se ke wa iteboga ka pela. Tara yo a nago le mengwaga e 20 o re: “Ka dinako tše dingwe ge ke feditše go dira dilo tše pedi go tšeo ke ngwadilego gore ke tla di dira letšatšing leo, ke no ipotša gore, ‘E re ke no lebelela TV metsotso e 15 feela, ke moka ke tla tšwela pele ka mešongwana ya ka.’ Ge ke re phaphara, ke hwetša metsotso yeo e 15 e le diiri tše pedi ke bogetše TV!”

    O ka dira eng? Iteboge ge o feditše go dira mešomo ya gago ka moka, o se ke wa no dula o iteboga.

    Seo Beibele e se bolelago: “Ga go se se phalago gore motho . . . a thabiše moya wa gagwe ka tše botse ka baka la boitapišo bja gagwe.”—Mmoledi 2:24.