Eya go dikagare

Eya go menyu wa bobedi

Dihlatse tša Jehofa

Sepedi

BAFSA BA A BOTŠIŠA

Nka Dira’ng ge e ba go na le Bolwetši bjo bo Ntshwenyago?—(Karolo 1)

Nka Dira’ng ge e ba go na le Bolwetši bjo bo Ntshwenyago?—(Karolo 1)

Na go na le mofsa yo o mo tsebago yoo a babjago kudu? Na le wena o swerwe ke bolwetši goba o na le bogole bjoo bo dirago gore o se ke wa kgona go dira dilo tšeo dithaka tša gago di kgonago go di dira?

Ge e ba go le bjalo, ke ga tlhago gore ka dinako tše dingwe o ikwe o nolegile moko. Lega go le bjalo, ka Beibeleng go na le dintlha tše pedi tšeo di kgothatšago kudu.

  • Mmopi wa gago e lego Jehofa Modimo, o tseba boemo bja gago. Go feta moo, ‘o a go babalela.’—1 Petro 5:7, PK.

  • Morero wa Jehofa Modimo ke go fodiša malwetši ka moka! O ka bala taba ye ka Beibeleng go Jesaya 33:24 le go Kutollo 21:1-4.

Bafsa ba bantši bao ba tshwenywago ke malwetši ba lemogile gore go ba le tumelo go Modimo le dikholofetšong tša gagwe go a ba matlafatša. Ela hloko mehlala e latelago e mene.

 YEIMY

Ge ke be ke na le nywaga e 11, ke ile ka swanela ke go sepela ka setulo sa digole. Ga ke kgone go dira dilo tše bonolo tše bjalo ka go kuka dilo tše bohwefo.

Ge ke be ke na le nywaga e mehlano, go ile gwa hwetšwa gore ke na le bolwetši bja go fokola ga mešifa, e lego bolwetši bjo bo golofatšago bjoo bo dirago gore ke se kgone go dira dilo tše dintši. Ka dinako tše dingwe, ke nolega moko ka gobane ga ke kgone go dira dilo tšeo dithaka tša ka di kgonago go di dira. Eupša batswadi ba ka le bao ke kopanelago le bona ka phuthegong ba a nthuša e bile ba nthekga maikwelong le moyeng. Ke hlankela bjalo ka modiredi wa nako e tletšego, gomme gantši Bakristegotee le nna ba sepela le nna ge ke eya go swara dithuto tša Beibele le batho bao ba thabelago.

Jesu o itše letšatši le lengwe le le lengwe le na le dipelaelo tša lona. (Mateo 6:34) Ka gona ke leka gore ke fo nagana ka tša lehono gomme ke se tshwenyege ka tša ka moso, e bile ke ipeela dipakane tšeo nka kgonago go di fihlelela. Ke fagahletše lefaseng le lefsa la Modimo moo ke tla hwetšago ‘bophelo bja kgonthe,’ letšatšing leo ke tla bago ke fodile bolwetši bjo bjo bošoro.—1 Timotheo 6:19.

Seo o ka naganago ka sona: Yeimy o thušwa ke go ipeela ‘dipakane tšeo a ka kgonago go di fihlelela.’ O ka mo ekiša bjang?—1 Bakorinthe 9:26.

 MATTEO

Mokokotlo wa ka o ile wa thoma go opa ge ke be ke na le nywaga e tshelelago, gomme mathomong dingaka di ile tša fo re e be e le go gola. Lega go le bjalo, ka morago ga ngwaga di ile tša hwetša gore go be go na le serurugi seo se golago mokokotlong wa ka.

Ke ile ka dirwa ophareišene, eupša ngaka yeo e bego e ntira ophareišene yeo e ile ya kgona go ntšha feela diperesente tše 40 tša serurugi seo. Ke moka ka morago ga dikgwedi tše pedi feela, serurugi seo se be se lekana le mathomong! Ga e sa le go tloga ka nako yeo, ke ile ka dirwa ditlhahlobo tše dintši, ka newa dikalafo tše dintši e bile ka nyama gantši.

Ka dinako tše dingwe, serurugi se se dira gore ke be le dihlabi tšeo e kego ke hlabja ka thipa mo gohle, kudukudu ka mo mokokotlong le sehubeng. Lega go le bjalo, ke leka go dira gore boemo bja ka bo se ke bja nnola moko. Ke ikgopotša gore ba bangwe le bona ba kgotleletše maemo a thata, eupša ba na le pono e nepagetšego. Selo se segolo seo se nthušago go dula ke na le pono e nepagetšego ke kgodišego yeo ke nago le yona ya gore ka letšatši le lengwe Jehofa Modimo o tla phethagatša kholofetšo ya gagwe ya go fediša tlaišego ka moka.—Kutollo 21:4.

Seo o ka naganago ka sona: Go nagana ka kholofetšo ya Modimo ya gore o tla fediša tlaišego ka moka go ka go thuša bjang go kgotlelela go etša ge go thušitše Matteo?—Jesaya 65:17.

 BRUNA

Ka ge ke sa bonagale ke babja, batho ba bangwe ba ka fo nagana gore ke a tšwafa. Lega go le bjalo, ge e le gabotse ke thatafalelwa ke selo se sengwe le se sengwe, go akaretša mešongwana ya ka gae, go ithuta goba gaešita le go tsoga malaong.

Ge ke be ke na le nywaga e 16, ke ile ka swarwa ke bolwetši bja multiple sclerosis, e lego bolwetši bjo bo golofatšago le bjo bo sa folego bjo bo dirago gore ke palelwe ke go šoma gotee le go tšea karolo medirong ya Bokriste ka tsela yeo nka ratago. Gantši ke bala 1 Petro 5:7, yeo e rego: ‘Le lahlele dipelaelo tša lena ka moka go Modimo, gobane o a le hlokomela.’ Ke matlafatšwa ke taba ya gore Jehofa o hlokomela yo mongwe le yo mongwe wa rena. Taba yeo e tšwela pele go mmatlafatša go fihla le lehono.

Seo o ka naganago ka sona: O ka holwa bjang ke go lahlela dipelaelo tša gago go Jehofa go etša Bruna?—Psalme 55:22.

 ANDRÉ

Batho ba bangwe ba ntshwara bjalo ka ge eka ke ngwana wa nywaga e 10. Lega go le bjalo, ga ke ba sole ka gobane ke bonagala bjalo ka ngwana.

Ge ke be ke na le nywaga e mebedi, ke ile ka swarwa ke mohuta o sa tlwaelegago wa kankere yeo e ilego ya thoma ka mokokotlong ke moka ya fetela bjokong. Dingaka di ile tša kgona go laola bolwetši bjo, eupša dikalafo di ile tša dira gore ke se sa gola gabotse. Lehono, ke wa botelele bja dimithara tše 1,37 feela. Batho ba bantši ba nagana gore ke bolela maaka ge ke re ke na le nywaga e 18!

Batho ba ntshwara ka seriti ka phuthegong ya Bokriste. Ga ba mpapadiše bjalo ka ngwana go etša bana bao ke bego ke tsena le bona sekolo. Ke leka go dula ke na le pono e nepagetšego ka boemo bja ka. Ruri ke diragaletšwe ke selo se sekaonekaone bophelong—ke tseba Jehofa! Ke kgodišegile gore Jehofa o tla ntlhokomela selong le ge e le sefe seo ke swanetšego go se kgotlelela. Go nagana ka lefase le lefsa leo le kgahlišago leo Jehofa Modimo a le holofeditšego go nthuša gore ke dule ke na le pono e nepagetšego.—Jesaya 33:24.

Seo o ka naganago ka sona: Go etša ge André a bolela, ke ka baka la’ng go tseba Jehofa e le “selo se sekaonekaone bophelong”?—Johane 17:3.