Eya go dikagare

Eya go menyu wa bobedi

Dihlatse tša Jehofa

Sepedi

BAFSA BA A BOTŠIŠA

Ke ka Baka la Eng ke Swanetše go Ithuta Leleme le Lengwe?

Ke ka Baka la Eng ke Swanetše go Ithuta Leleme le Lengwe?

Go ithuta leleme le lengwe go ka go thuša gore o šome ka thata le go ba le boikokobetšo. Na go na le mehola? Bafsa ba bantši ba ka re ee! Sehlogo se se tla hlalosa gore ke ka baka la eng ba ithuta leleme le lengwe.

 Ke ka baka la’ng ke swanetše go ithuta leleme le lengwe?

Bafsa ba bantši ba ithuta leleme le lengwe ka baka la gore e le seo ba swanetšego go se dira sekolong. Ba bangwe ba na le mabaka a bona. Ka mohlala:

  • Kgarebe ya kua Australia yeo e bitšwago Anna, o ile a phetha ka gore a ithute leleme la Selatvia, e lego leleme leo le bolelwago ga gabo mmagwe. Anna o itše: “Lapa la gešo le rulaganya go etela Latvia, ka gona ke nyaka go kgona go boledišana le ba gešo ge re tla be re etetše moo.”

  • Gina e lego Hlatse ya Jehofa ya kua United States, o ile a ithuta Polelo ya Diatla ya Amerika gomme a hudugela Belize go yo hlankela Modimo ka mo go oketšegilego. O itše: “Batho ba difoa ga ba na batho ba bantši bao ba ka boledišanago le bona. Ba leboga kudu ge ke ba botša gore ke ithutile Polelo ya Diatla ya Amerika feela gore ke ithute le bona Beibele ka segagabo bona!”

Na o be o tseba? Beibele e boletše e sa le pele gore ditaba tše dibotse tša Mmušo wa Modimo di tla bolelwa go batho ba “ditšhaba tšohle, meloko yohle, maleme ohle le batho bohle.” (Kutollo 14:6) E le go phethagatša boporofeta bjo, bafsa ba bantši ba Dihlatse tša Jehofa ba ithutile leleme le lengwe gore ba hlankele Modimo ka mo go oketšegilego. Ba dira seo ba le nageng ya gabo bona goba nageng e nngwe.

 Go na le ditlhohlo dife?

Go ithuta leleme le lengwe ga go bonolo. Mofsa yo a bitšwago Corrina o re: “Ke be ke nagana gore go ithuta leleme le lengwe go bolela go no ithuta mantšu a mafsa, eupša ke ile ka bona gore go akaretša go ithuta setšo se sefsa le tsela e mpsha ya go nagana. Ka gona go ithuta leleme le lengwe go tloga go nyaka nako.”

Le gona go nyaka gore motho a be le boikokobetšo. Lesogana leo le bitšwago James leo le ilego la ithuta Sepanishi le re: “O swanetše go ithuta go itshega, ka baka la gore o tlo dira diphošo tše dintši. Eupša yeo ke tsela ya go ithuta.”

Therešo e sa fetogego: Ge o ka kgona go ithuta go lebeletšana le go fela o palelwa le go dira diphošo tša go leša dihlong, ruri o tla kgona go ithuta leleme le lengwe.

Keletšo: O se ke wa nyama ge ba bangwe ba bonagala ba dira tšwelopele ka pela go feta wena. Beibele e re: “Anke yo mongwe le yo mongwe a hlahlobe ditiro tša gagwe gomme o tla ba le lebaka la go hlalala ka yena ka noši, e sego ka go ipapiša le motho yo mongwe.”—Bagalatia 6:4.

 Mehola ke efe?

Mehola ya go ithuta leleme le lengwe ke e mentši. Ka mohlala, mofsa yo a bitšwago Olivia o re: “Ge o ithuta leleme le lengwe o tla ba le bagwera ba bafsa.”

Mofsa yo a bitšwago Mary o hweditše gore go ithuta leleme le lengwe go ile gwa mo thuša gore a ikholofele. O re: “Go thata gore ke ikgantšhe ka selo le ge e le sefe seo ke se dirago, eupša ka ge ga bjale ke ithuta leleme le lengwe, ke a thaba ka morago ga gore ke ithute lentšu le lengwe le le lengwe le lefsa. Seo se dira gore ke ikgantšhe ka nna.”

Gina, yo go boletšwego ka yena pejana, o lemogile gore go ruta batho Beibele ka polelo ya diatla go okeditše lethabo la gagwe ge a hlankela Modimo. O re: “Go bona batho ba thaba ge ke boledišana le bona ka leleme la bona ke moputso o mogolo!”

Therešo e sa fetogego: Go ithuta leleme le lengwe go ka go thuša gore o be le bagwera ba bafsa, o ikholofele o be o hlankele Modimo o thabile. Ke tsela e bohlokwa ya go fihlelela batho ba “ditšhabeng tšohle, melokong yohle, merafong yohle le malemeng ohle” ka ditaba tše dibotse.​—Kutollo 7:9.