Nyakišišo e nngwe e bontšha gore bafsa ba diperesente tše 80 kua Amerika ba a rapela, eupša ke ba diperesente tše 40 feela bao ba rapelago letšatši le lengwe le le lengwe. Ba bangwe ba bona ba ka ba ba ipotšiša gore: ‘Na re no rapela feela gore re ikwe re le kaone goba thapelo e a thuša?’

•  Thapelo ke’ng?

•  Na Modimo o a re theetša?

•  Ke swanetše go bolela ka’ng ge ke rapela?

•  Seo dithaka tša gago di se bolelago

 Thapelo ke tsela yeo re boledišanago le Modimo, yena Mmopi wa dilo ka moka. E no nagana feela! Jehofa o feta batho kgole kudu, eupša “ga a kgole le yo mongwe le yo mongwe wa rena.” (Ditiro 17:27) E bile Beibele e na le taletšo e nngwe e kgahlišago kudu, yeo e rego: “Batamelang Modimo gomme o tla le batamela.”​—Jakobo 4:8.

 O ka batamela Modimo bjang?

•   Ka go rapela, e lego tsela yeo wena o bolelago le Modimo.

•   Ka go ithuta Beibele, e lego tsela yeo Modimo a bolelago le wena.

 Ge wena le Modimo le boledišana ka tsela yeo, seo se tla dira gore o be le segwera sa kgauswiuswi le yena.

 Jeremy o re: “Go boledišana le Jehofa Modimo yo a Phagamego ke e nngwe ya ditokelo tše dikgolo kudu tšeo batho ba nago le tšona.”

 Miranda o re: “Go botša Jehofa maikwelo a ka ge ke rapela go dira gore ke ikwe ke le kgauswiuswi le yena.”

 Le ge o ka ba o dumela gore Modimo o gona e bile o mo rapela, o ka no thatafalelwa ke go amogela gore o a go kwa. Lega go le bjalo, Beibele e re Jehofa ke “Mokwi wa thapelo.” (Psalme 65:2) E bile e go botša gore o ‘lahlele dipelaelo tša gago ka moka go yena.’ Ka baka la’ng? ‘Ka gobane o a go hlokomela.’​—1 Petro 5:7.

 Seo o ka naganago ka sona: Na o ipha nako ya go bolela le bagwera ba gago gantšinyana? Le Modimo o ka bolela le yena gantši. Mo rapele ka mehla o diriša leina la gagwe e lego, Jehofa. (Psalme 86:​5-7; 88:9) Beibele e re o ‘rapele ka mehla.’​—1 Bathesalonika 5:​17.

 Moises o re: “Thapelo ke tsela yeo ke boledišanago le Tate wa ka wa legodimong, ke mmotša dilo ka moka tšeo di lego pelong ya ka.”

 Karen o re: “Ge ke rapela Jehofa ke mmotša dilo ka moka, go swana le ge ke botša mma goba mogwera wa ka yo mogolo.”

 Beibele e re: “Dilong tšohle tsebišang Modimo dikgopelo tša lena ka thapelo le ka topo gotee le ka go leboga.”​—Bafilipi 4:6.

 Na seo se ra gore o ka bolela ka mathata a gago ge o rapela? Ee! E bile Beibele e re: “Lahlela maima a gago go Jehofa, gomme yena o tla go thekga.”​—Psalme 55:22.

 Ge o rapela ga se wa swanela go no bolela feela ka mathata a gago. Kgarebe yeo e bitšwago Chantelle e re: “Ke tla be ke sa bontšhe gore ke mogwera o mobotse ge ke no rapela Jehofa feela ge ke nyaka thušo. Ke nagana gore ke swanetše go thoma ka go leboga, e bile go be le dilo tše dintši tšeo ke di lebogago.”

 Seo o ka naganago ka sona: Ke dilo dife tšeo o di lebogago bophelong bja gago? Na go na le dilo tše tharo tšeo o ka lebogago Jehofa ka tšona lehono?

 Anita o re: “Le dilo tše dinyenyane, go swana le go kgahlwa ke letšoba le lebotse go ka dira gore o rapele Jehofa gomme o mo leboge.”

 Brian o re: “Naganišiša ka selo se itšego seo se go kgahlago tlholong goba o bale temana ya Beibele yeo e go kgothatšago, ke moka o leboge Jehofa.”