Eya go dikagare

Dihlatse tša Jehofa

Kgetha leleme Sepedi

BAFSA BA A BOTŠIŠA

Nka Dira Eng Gore Batswadi ba ka ba Hlomphe Ditaba tša ka?

Nka Dira Eng Gore Batswadi ba ka ba Hlomphe Ditaba tša ka?

 Ke ka baka la eng eka batswadi ba tsenatsena ditaba tša ka?

Batswadi ba gago ba re ba fo ba ba tshwenyegile ka wena. Eupša wena o bona seo e le go tsenatsena bophelo bja gago. Ka mohlala:

  • Mofsa yo a bitšwago Erin o re: “Papa o be a tšea founo ya ka, a nyake password ya ka gomme a bale melaetša ka moka. Ge ke be ke sa nyake, o be a nagana gore go na le seo ke se fihlago.”

  • Denise, yoo gona bjale a lego mengwageng ya mathomong a bo-20 o gopola kamoo mmagwe a bego a hlahloba founo ya gagwe. O re: “Mma o be a lebelela dinomoro ka moka tše di lego ka founong ya ka gomme a mpotšiša gore ke tša bomang le gore ke bolela ka eng le batho bao.”

  • Mofsa yo a bitšwago Kayla o re mmagwe o kile a bala e nngwe ya dipuku tša gagwe tšeo a bego a ngwalela diphiri tša gagwe ka go yona. O re: “Ka pukung yeo ke be ke ngwadile maikwelo a ka le ditaba tše dingwe tša mabapi le yena mma. Ka morago ga gore a e bale, ke ile ka se sa ngwala selo ka pukung yeo.”

Therešo e sa fetogego: Batswadi ba gago ba na le maikarabelo a go go hlokomela, ka gona o ka se ba botše gore ba go hlokomele bjang. Na ka dinako tše dingwe go ka bonagala eka ga ba hlomphe ditaba tša gago? Mohlomongwe go ka bonagala bjalo. Lega go le bjalo, sa go thabiša ke gore go na le dilo tšeo o ka di dirago gore o se sa ikwa ka tsela yeo.

 Seo o ka se dirago

O se ke wa fihla ditaba. Beibele e re kgothaletša gore re “[itshware] ka go botega dilong tšohle.” (Baheberu 13:18) Dira maiteko a go diriša lengwalo le ge o dirišana le batswadi ba gago. Batswadi ba gago ba ka se tsenatsene bophelo bja gago ge e ba o botega e bile o sa ba fihlele ditaba.

Seo o ka naganago ka sona: Na o tsebega ka gore o a botega? Na o fihla gae ka nako yeo o e beetšwego? Na batswadi ba gago ba tseba bagwera ba gago? Na o fihlela batswadi ba gago dilo tšeo o di dirago?

Delia o re: “Ke dira gore dilo di be bonolo bakeng sa batswadi ba ka. Ke ba botša dilo tšeo di diregago bophelong bja ka. Ke ba botša dilo ka moka tšeo ba nyakago go di tseba, gomme ge ke dira bjalo ba a mpota e bile ga ba tsenatsene bophelo bja ka.”

O se ke wa fela pelo. Beibele e re: “Dulang le itlhatsela seo lena ka noši le lego sona.” (2 Bakorinthe 13:5) Go ka tšea nako go dira gore batho ba bangwe ba go bote, eupša maiteko a gago e ka se be a lefeela.

Seo o ka naganago ka sona: O se ke wa lebala gore batswadi ba gago e kile ya ba bafsa. O nagana gore seo se kgoma bjang tsela yeo ba tshwenyegago ka wena?

Daniel o re: “Ke nagana gore batswadi ba gopola diphošo tšeo ba ilego ba di dira ge e be e sa le bafsa, ka gona ga ba nyake gore bana ba bona ba bušeletše diphošo tšeo.”

Naganela ba bangwe. Leka go bona dilo ka tsela yeo batswadi ba gago ba di bonago ka yona. Beibele e re mosadisadi “o šetša tšeo di dirwago lapeng la gagwe,” le gore tate yo bohlale o godiša bana ba gagwe “ka tayo le temošo ya Jehofa.” (Diema 31:27; Baefeso 6:4) Tsela e nnoši ya gore batswadi ba gago ba phethe seo, ke gore ba swanetše go tseba seo se diregago bophelong bja gago.

Seo o ka naganago ka sona: Ge nkabe o le motswadi, o tseba gore bafsa ba bjang, na o be o tla dumelela morwa goba morwedi wa gago go no itaola, o sa mmotšiše selo ka bophelo bja gagwe?

James o re: “Ge o le mofsa, o nagana gore batswadi ba gago ba tsenatsena bophelo bja gago. Eupša gona bjale ge ke godile ke a bona gore ke ka baka la eng batswadi ba swanetše go dira seo. Ke tsela ya go go bontšha gore ba a go rata.”