Steven o re: “Ka morago ga gore ke kgaogane le kgarebe yeo ke bego ke ratana le yona, ke ile ka nyama kudu. Ga sa nka ka kwa bohloko ka tsela ye.”

 Na o kile wa kgaogana le motho yo o bego o ratana le yena? Ge e ba go le bjalo, sehlogo se se tla go thuša.

•  Go kgaogana go dira gore batho ba ikwe bjang?

•  Seo o ka se dirago

 Go kgaogana go dira gore batho ba ikwe bjang?

 Ge le kgaogane, ka moka ga lena le kwa bohloko.

•  Ge e ba e le wena o tlilego ka taba ya gore le kgaogane, mohlomongwe o ka kwešiša seo Jasmine a se boletšego ge a be a re: “Go kweša motho yo ke bego ke mo rata bohloko go be go nkimela e bile ke holofela gore nka se hlwe ke sa dira selo sa mohuta woo gape.”

•  Ge e ba e se wena o tlilego ka taba ya gore le kgaogane, o ka ba o kwešiša gore ke ka baka la eng batho ba ikwa eka lefase le ka bulega ba tsena ge motho a ba boditše gore ga a sa nyaka go ratana le bona. Kgarebe yeo e bitšwago Janet o re: “Ka morago ga gore ke kgaogane le lesogana la ka, ke ile ka se dumele gore go fedile, ka ikwa ke galefile, ke hlakahlakane e bile ke gateletšegile. Eupša ka morago ga ngwaga, ke ile ka amogela.”

 Therešo e sa fetogego: Ge le kgaogane o tla kwa bohloko kudu le go nyama. Mongwadi yo mongwe wa Beibele o itše: “Moya o nyamilego o omiša marapo.”​—Diema 17:22.

 Seo o ka se dirago

•  Bolela le motho yo o mo tshepago. Beibele e re: “Mogwera wa kgonthe o dula a na le lerato ka dinako tšohle, e bile ke ngwanabo motho yo o ka ithekgago ka yena mohlang wa tlalelo.” (Diema 17:17) Go botša motswadi wa gago kamoo o ikwago ka gona goba motho yo o mo tshepago go ka go thuša go bona dilo gabotse.

   Janet o re: “Ke feditše dikgwedi tše dintši ke phela ke nnoši e bile go se na motho yo ke mmotšago gore ke ikwa bjang. Eupša bagwera ba ka go thuša gore o ikwe o le kaone. Ke ile ka imologa feela ka morago ga gore ke ba botše gore ke ikwa bjang.”

•  Ithute go seo se go diragaletšego. Seema se sengwe sa ka Beibeleng se re: “Hwetša bohlale, o hwetše le tlhaologanyo.” (Diema 4:5) Ge o fetile mathateng o kgona go ithuta gore o motho wa mohuta mang le go bona gore o rarolla bjang mathata.

   Steven o re: “Ka morago ga gore ke kgaogane le motho yo ke bego ke ratana le yena, mogwera wa ka o ile a mpotšiša gore, ‘O ithutile’ng ge o be o ratana gomme o ka diriša bjang seo ge o tlo ratana le motho yo mongwe gape?’”

•  Rapela. Beibele e re: “Lahlela maima a gago go Jehofa, gomme yena o tla go thekga.” (Psalme 55:22) Thapelo e ka go thuša go lebeletšana le go nyama gomme wa bona dilo ka tsela e fapanego.

   Marcia o re: “Rapela ka mehla. Jehofa o a kwešiša gore o kwa bohloko e bile o go kwešiša go go feta.”

•  Thuša ba bangwe. Beibele e re: “Le se ke la kgahlegela ditaba tša lena feela, eupša le kgahlegele le tša ba bangwe.” (Bafilipi 2:4) Ge o dula o swaregile ka go thuša batho ba bangwe, ka pejana o tla kgona go bona dilo gabotse.

   Evelyn o re: “Ge o kgaogana le motho yo o bego o ratana le yena o tla kwa okare lefase le fihlile mafelelong, le gona bohloko bja gona bo feta bjo o bo kwago mmeleng. Eupša mafelelong o a lebala. Ke ile ka no swanelwa ke go se fele pelo.”