Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Omalongo gashili gOmbiimbeli ogeni naanaa?

Mbela ndika olyo lya li elalakano lyaKalunga?

Mbela ndika olyo lya li elalakano lyaKalunga?

LESHA oshifokundaneki kehe. Tala o-TV nenge u pulakene oradio. Oto ka lesha mo nokuuva mo omahokololo ogendji ge na ko nasha nomiyonena, iita nosho wo uukulo. Dhiladhila komaupyakadhi goye mwene. Otashi vulika uuwehame nenge eso lyomuholike gwoye ye ku nikitha oluhodhi olunene. Otashi vulika u kale u uvite ngaashi omulumentu e li nawa Job, ngoka a li a ti kutya okwa “kamwa koluhepo.”—Job 10:15, OB-1954.

Ipula to ti:

  • Mbela ndika olyo lya li elalakano lyaKalunga li na ko nasha nangame nosho wo naantu ayehe?

  • Mbela openi tandi vulu okumona ekwatho opo ndi vule okukandula po omaupyakadhi gandje?

  • Mbela opu na ngaa etegameno lyasha kutya onatu ka mone ombili kombanda yevi?

Ombiimbeli otayi gandja omayamukulo taga mbilipaleke komapulo ngoka.

 OMBIIMBELI OTAYI TI KUTYA KALUNGA OTE KE ETA OMALUNDULUKO NGAKA KOMBANDA YEVI.

  • “Ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame.”—Ehololo 21:4

  • “Oshitiningili otashi ka nuka ngomenye.”—Jesaja 35:6

  • “Omeho gaaposi otaga ka tsikuluka.”—Jesaja 35:5

  •  “Ayehe mboka ye li moombila . . . oyo notaa ka za mo.”—Johannes 5:28, 29

  • “Kapu na nando ogumwe . . . ta ka tya: ‘Otandi ehama.’”—Jesaja 33:24

  • “Moshilongo namu kale eloolo lyiilya.”—Episalomi 72:16

 MONA UUWANAWA MOMALONGO GOMBIIMBELI

Ino endelela okudhiladhila kutya shoka shu ulikwa pomapandja ngoka ga tetekele oshi li owala ondjodhi. Kalunga oku uvaneka kutya ota ka gwanitha po iinima mbyoka, nOmbiimbeli otayi yelitha nkene te ke shi ninga.

Ihe Ombiimbeli otayi yelitha oshindji kaashi shi owala shoka. Otayi gandja uuyelele u na ko nasha nankene to vulu okunyanyukilwa onkalamwenyo tayi ti sha lela nokuli ngashingeyi. Dhiladhila kashona kombinga yiimpwiyu yoye nosho wo omaupyakadhi goye. Otashi vulika ya kwatela mo oluhepo lwiimaliwa, omaupyakadhi guukwanegumbo, okwaahe na uukolele, nenge okusilwa omuholike gwoye. Ombiimbeli otayi vulu oku ku kwathela u ungaunge nomaupyakadhi nena notayi gandja epepelelo mokuyamukula omapulo ngaka taga landula:

  • Omolwashike tatu mono iihuna?

  • Ongiini tatu vulu okuungaunga niimpwiyu yonkalamwenyo?

  • Ongiini tatu vulu okukala twa nyanyukwa muukwanegumbo wetu?

  • Oshike hashi tu ningilwa ngele tatu si?

  • Mbela oonakusa yetu aaholike otatu ke ya mona we ngaa?

  • Ongiini tatu vulu okukala nuushili kutya Kalunga ota ka gwanitha po omauvaneko ge ge na ko nasha nonakuyiwa?

 Sho to lesha embo ndika, otashi ulike kutya owa hala okutseya omalongo gOmbiimbeli. Embo ndika otali ke ku kwathela. Ndhindhilika kutya omu na omapulo ga pambathana nuutendo ge li pevi lyomapandja. Aantu omamiliyona oya nyanyukilwa omukalo gwokulongitha omapulo nomayamukulo ngele taya kundathana Ombiimbeli nOonzapo dhaJehova. Otwi inekela nangoye wo oto ke gu nyanyukilwa. Kalunga ne ku laleke nuuyamba sho to nyanyukilwa oshimoniwa shika shinyanyudha notashi mbilipaleke shokwiilonga kutya omalongo gOmbiimbeli ogeni naanaa.

Tseya oshindji

ELANDULATHANO LYEKONAKONOMBIIMBELI

Mbela Ombiimbeli ohayi konakonwa ngiini?

Oonzapo dhaJehova odha tseyika nawa kutya ohadhi konakona naantu Ombiimbeli oshali. Tala nkene hadhi shi ningi.