Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Omalongo gashili gOmbiimbeli ogeni naanaa?

 ONTOPOLWA 4

Jesus Kristus oye lye?

Jesus Kristus oye lye?
  • Jesus ota dhana onkandangala yi ikalekelwa yini?

  • Okwa zile peni?

  • Okwa li omuntu a tya ngiini?

1, 2. (a) Omolwashike okutseya gumwe ngoka a simana itaashi ti kutya ou mu shi lela? (b) Engwangwano lini li li po shi na ko nasha naJesus?

OPU na aantu oyendji ya tseyika nawa muuyuni. Yamwe oya tseyika nawa momikunda dhawo, miilando yawo nenge miilongo yawo. Yalwe oya tseyika nawa muuyuni auhe. Ihe okutseya owala edhina lyomuntu gumwe a simana itashi ti kutya ou mu shi lela. Itashi ti kutya ou shi lela ondjokonona ye nosho wo omaukwatya ge.

2 Aantu muuyuni auhe oyu uva shi na ko nasha naJesus Kristus, nokuli nonando kombanda yevi okwa li ko oomvula 2 000 lwaampono dha pita. Ihe oyendji oya ngwangwana kutya Jesus okwa li naanaa lye. Yamwe otaya ti kutya okwa li owala omuntu omwaanawa. Yalwe otaya ti kutya okwa li owala omupolofeti. Niishewe yalwe oyi itaala kutya Jesus oye Kalunga noye e na okugalikanwa. Mbela oye e na okugalikanwa shili?

3. Omolwashike sha simana kungoye u tseye oshili kombinga yaJesus?

3 Osha simana okutseya oshili kombinga yaJesus. Omolwashike? Omolwaashoka Ombiimbeli otayi ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.” (Johannes 17:3) Eeno, okutseya oshili kombinga yaJehova Kalunga nosho wo kombinga yaJesus Kristus otaku vulu okufala komwenyo gwaaluhe moparadisa kombanda yevi. (Johannes 14:6) Natango, Jesus okwa tula po oshiholelwa dhingi shankene tu na okukala nayalwe nosho wo nkene tu na okuungaunga nayo. (Johannes 13:34, 35) Montopolwa yotango yembo ndika, otwa  kundathana oshili kombinga yaKalunga. Ngashingeyi natu kundathaneni shoka Ombiimbeli tayi ti naanaa kombinga yaJesus Kristus.

MESIASA NGOKA U UVANEKWA

4. Omadhinasimaneko “Mesiasa” nosho wo “Kristus” otaga ti shike?

4 Nalenale manga Jesus inaa valwa e li omuntu kombanda yevi, Ombiimbeli oya hunganeke okuya kwaangoka Kalunga a li ta ka tuma e li Mesiasa nenge Kristus. Edhinasimaneko “Mesiasa” (lya za koshitya shOshihebeli) nosho wo “Kristus” (lya za koshitya shOshigreka) agehe gaali otaga ti “Omugwayekwa.” Omuuvanekwa Ngoka okwa li ta ka gwayekwa, sha hala okutya, okwa li ta ka pewa ondondo yi ikalekelwa kuKalunga. Moontopolwa dhembo ndika ndhoka dhi li komeho,  otatu ki ilonga oshindji kombinga yondondo ya simana yaMesiasa mokugwanitha omauvaneko gaKalunga. Otatu ki ilonga wo kombinga yomalaleko nuuyamba ngoka Jesus ta vulu oku tu etela nokuli ngashingeyi. Ihe manga Jesus a li inaa valwa e li omuntu kombanda yevi, osha yela kutya oyendji oya li tayi ipula taya ti: ‘Olye mbela ta ka kala Mesiasa?’

5. Aalongwa yaJesus oya li yi itaala thiluthilu shike shi na ko nasha naye?

5 Methelemumvo lyotango E.N., aalongwa yaJesus Omunasaret oya li yi itaala thiluthilu kutya oye Mesiasa ngoka u uvanekwa. (Johannes 1:41, OB-1954) Omulumentu gwedhina Simon Petrus ngoka a li gumwe gwomaalongwa, okwa li a popi a manguluka ta lombwele Jesus ta ti: “Ongoye Kristus.” (Mateus 16:16) Ihe ongiini aalongwa mboka ya li ya vulu okukala nuushili kutya Jesus oye lela Mesiasa ngoka u uvanekwa, nongiini natse tatu vulu oku shi tseya?

6. Shi thaneka nkene Jehova a kwathele aadhiginini ya dhimbulule mo Mesiasa.

6 Aapolofeti yaKalunga mboka ya li ko manga Jesus inee ya kombanda yevi oya li ya hunganeke omauyelele ogendji ge na ko nasha naMesiasa. Omauyelele ngoka oga li taga ka kwathela yalwe ye mu dhimbulule mo. Otatu vulu oku shi thaneka ngeyi: Natu tye nduno owa pulwa u ka tale omuntu ngoka kuu shi nando onale kehala hoka haku thikama oombesa nenge kosasiona yomashina nenge kokapale koondhila hoka ku na aantu oyendji. Mbela itashi ka kwathela ngele gumwe okwe ku pe uuyelele u na ko nasha naangoka to ka tala? Sha faathana, okupitila maapolofeti yopethimbo lyOmbiimbeli, Jehova okwa gandja uuyelele oundji wa yela u na ko nasha naashoka Mesiasa a li ta ka ninga naashoka a li ta ka ningilwa. Egwanitho lyomahunganeko ngoka ogendji olya li tali ka kwathela aadhiginini ye mu dhimbulule mo nawa.

7. Omahunganeko gaali geni ga li ga gwanithwa ge na ko nasha naJesus?

7 Tala owala kiiholelwa iyali. Shotango, oomvula 700 manga Jesus inaa valwa, omupolofeti Mika okwa li a hunganeke kutya Ngoka u uvanekwa okwa li ta ka valelwa muBetlehem, omukunda omushona moshilongo shaJuda. (Mika 5:2) Openi naanaa Jesus a li a valelwa? Omomukunda naanaa moka! (Mateus 2:1,  3-9) Oshitiyali, omathelemimvo ogendji manga Mesiasa inaa holoka, ehunganeko ndyoka lya nyolwa muDaniel 9:25 olya li lya popi omumvo gwokondandalunde moka a li e na okuholoka—mo 29 E.N. * Egwanitho lyomahunganeko ngoka nosho wo galwe otali ulike kutya Jesus oye a li Mesiasa ngoka u uvanekwa.

Jesus pokuninginithwa kwe okwa ningi Mesiasa nenge Kristus

8, 9. Omauliko geni ga yela nawa pokuninginithwa kwaJesus ga li gu ulike kutya oye Mesiasa?

8 Omauliko galwe tagu ulike kutya Jesus oye a li Mesiasa oga ka yela mo nawa kehulilo lyomumvo 29 E.N. Ngoka ogwo omumvo moka Jesus a yile kuJohannes Omuninginithi a ka ninginithwe momulonga gwaJordan. Jehova okwa li u uvaneke okumonitha Johannes endhindhiliko opo a vule okudhimbulula mo Mesiasa. Johannes endhindhiliko ndyoka okwa li e li mono pokuninginithwa kwaJesus. Ombiimbeli otayi popi shoka sha li sha ningwa po, tayi ti: “Jesus sho a [ninginithwa, NW], okwa zi momeya mbalambala. * Nena egulu olye eguluka, nokwa mono Ombepo yaKalunga ya kuluka ya fa onguti e tayi mu lambele. Megulu nomwa zi ewi lya ti: ‘Nguka oye Omumwandje omuholike nde mu hokwa.’” (Mateus 3:16, 17) Konima yokumona nokuuva shoka sha ningwa po, Johannes ka li e na omalimbililo kutya Jesus okwa tumwa kuKalunga. (Johannes 1:32-34) Pethimbo opo tuu mpoka sho Jesus a tililwa ombepo yaKalunga nenge oonkondo dhe tadhi longo, okwa ningi Mesiasa, nenge Kristus, ngoka a langekwa po a kale Omuwiliki nOmukwaniilwa.—Jesaja 55:4.

9 Egwanitho lyomahunganeko gOmbiimbeli nosho wo uunzapo waJehova Kalunga mwene oyu ulike sha yela kutya Jesus oye Mesiasa ngoka a li u uvanekwa. Ihe Ombiimbeli otayi yamukula omapulo galwe gaali ga simana ge na ko nasha naJesus Kristus: Okwa zile peni nokwa li omuntu a tya ngiini?

 JESUS OKWA ZILE PENI?

10. Ombiimbeli otayi ti shike shi na ko nasha nokukala po kwaJesus manga a li inee ya kombanda yevi?

10 Ombiimbeli otayi ti kutya Jesus okwa li a kala megulu nale manga inee ya kombanda yevi. Mika okwa li a hunganeke kutya Mesiasa okwa li ta ka valelwa muBetlehem nokwa ti wo kutya okwa kala po okuza ‘muuyuni wonale.’ (Mika 5:2) Iikando oyindji, Jesus okwa li a popi kutya ye okwa kala nale megulu manga inaa valwa e li omuntu. (Johannes 3:13; 6:38; 17:4, 5) Sho Jesus a li oshishitwa shopambepo megulu, okwa li e na ekwatathano lyi ikalekelwa naJehova.

11. Ombiimbeli otayi ulike ngiini kutya Jesus oye Omwana gwaJehova omuholike?

11 Jesus oye Omwana gwaJehova omuholike, nopu na etompelo ewanawa kutya omolwashike shi li ngawo. Oti ithanwa “omutango gwiishitwa ayihe,” molwaashoka oye a shitwa tango kuKalunga. * (Aakolossa 1:15) Opu na natango oshinima shilwe shoka tashi ningi Omwana ngoka a kale i ikalekelwa. Oye “Epona.” (Johannes 3:16, OB-1954) Shoka osha hala okutya Jesus oye awike a shitwa kuKalunga shu ukilila. Jesus oye wo awike a longithwa kuKalunga sho a shiti iinima ayihe yilwe. (Aakolossa 1:16) Ihe Jesus oti ithanwa wo “Ohapu.” (Johannes 1:14) Shoka otashi tu lombwele kutya okwa li ha popile ko Kalunga, sha yela kutya okwa li ha gandja omatumwalaka nomalombwelo ge koyanamati yalwe yaKalunga yopambepo noyopantu.

12. Otu shi shi ngiini kutya Omwana gwaKalunga gwosheeli ke thike puYe?

12 Mbela Omwana gwaKalunga ngoka gwosheeli oku thike puYe, ngaashi yamwe yi itaala? Shoka hasho Ombiimbeli tayi ti. Ngaashi twe shi mona mokatendo ka tetekele, Omwana okwa shitwa. Onkee ano, osha yela kutya ye oku na etameko, omanga Jehova Kalunga kee na etameko nenge ehulilo. (Episalomi 90:2) Omwana epona ina kambadhala nando onale nokuli a kale  e thike pamwe naHe. Ombiimbeli otayi popi sha yela kutya He oku vule Omwana. (Johannes 14:28; 1 Aakorinto 11:3) Jehova oye awike “Kalunga Omunankondoawike.” (Genesis 17:1) Onkee ano, kapu na ngoka e thike puye. *

13. Ombiimbeli oya hala okutya shike ngele tayi popi Omwana kutya oye ‘olupe lwaKalunga ihaa monika’?

13 Jehova nOmwana gwosheeli oya kala taya nyanyukilwa ekwatathano lyopothingo uule woomvula omamiliyona omayuvi, nale manga egulu lyu udha oonyothi nosho wo evi inaayi shitwa. Kaya li tuu ye holathane! (Johannes 3:35; 14:31) Omwana ngoka omuholike okwa li a fa He thiluthilu. Omolwaashoka Ombiimbeli tayi popi Omwana ngoka kutya oye ‘olupe lwaKalunga ihaa monika.’ (Aakolossi 1:15) Eeno, ngaashi naanaa omwanamati ha vulu okukala a fa he thiluthilu momikalo dhi ili nodhi ili, Omwana ngoka gwomegulu oku na omaukwatya ga fa gaHe.

14. Ongiini Omwana gwaJehova epona a li a valwa e li omuntu kombanda yevi?

14 Omwana gwaJehova epona okwa zi megulu nehalo ewanawa e te ya kombanda yevi a kale omuntu gwokombanda yevi. Ihe otashi vulika to ipula to ti: ‘Mbela ongiini oshishitwa shopambepo tashi wapa okuvalwa shi li omuntu kombanda yevi?’ Opo Jehova a gwanithe po shoka, okwa longo oshikumithalonga. Okwa lundululile omwenyo gwOmwana gwosheeli okuza megulu e te gu tula moshivalelo shomukadhona Omujuda gwedhina Maria. Ka li e na he gwopantu. Onkee ano Maria okwa li a vala okanona okamati ka gwanenena nokwe ka luku Jesus.—Lukas 1:30-35.

JESUS OKWA LI OMUNTU A TYA NGIINI?

15. Omolwashike taku vulu okutiwa kutya otatu vulu okutseya nawa Jehova okupitila muJesus?

15 Shoka Jesus a popi naashoka a ningi sho a li kombanda yevi otashi tu kwathele tu mu tseye nawa. Kakele kaashono, okupitila muJesus otatu vulu okutseya Jehova nawa. Omolwashike mbela shi li ngawo? Dhimbulukwa kutya Omwana ngoka oku li olupe lwaHe lwa gwanenena. Omolwaashono Jesus a li a lombwele  gumwe gwomaalongwa ye a ti: “Kehe ngoka a mono ndje, okwa mona wo Tate.” (Johannes 14:9) Omambo gOmbiimbeli gane hagi ithanwa Omavaangeli, Mateus, Markus, Lukas naJohannes, otage tu lombwele oshindji kombinga yonkalamwenyo, iilonga nosho wo omaukwatya gaJesus Kristus.

16. Oshike sha li etumwalaka lyaJesus lya simana, nelongo lye olya zile peni?

16 Jesus okwa li a tseyika nawa kutya oye ‘Omuhongi’ nenge omulongi. (Johannes 1:38; 13:13) Oshike a li a longo aantu? Etumwalaka lye lya simana olya li “elaka etoye [lyUukwaniilwa, KB],” sha hala okutya, Uukwaniilwa waKalunga, epangelo lyomegulu ndyoka tali ka pangela ombanda yevi ayihe notali ke etela aantu aavuliki omalaleko nuuyamba kaage na ehulilo. (Mateus 4:23) Mbela etumwalaka ndyoka olya li lyalye? Jesus okwa ti: “Elongo ndika tandi li longo, kali shi lyandje mwene, ihe olya za kuKalunga, ngoka a tuma ndje,” sha hala okutya, olya li lyaJehova. (Johannes 7:16) Jesus okwa kala a tseya kutya He okwa hala aantu yu uve onkundana ombwanawa yUukwaniilwa. MOntopolwa onti-8, otatu ki ilonga oshindji kombinga yUukwaniilwa waKalunga naashoka tau ka gwanitha po.

17. Jesus okwa li ha longele aantu peni, nomolwashike a li ha ningi oonkambadhala odhindji opo a longe yalwe?

17 Jesus okwa li ha longele aantu peni? Shaampono a li a adha aantu, momikunda nomiilando, pomahala gomalandithilo nomomagumbo gawo. Jesus ka li ha tegelele aantu oyo ye ye kuye. Oye a li ha yi kuyo. (Markus 6:56; Lukas 19:5, 6) Mbela omolwashike Jesus a li ha ningi oonkambadhala odhindji dha tya ngaaka nokulongitha ethimbo lye olindji mokuuvithila aantu noku ya longa? Omolwaashoka Kalunga osho a li a hala a ninge. Jesus okwa li a longo aluhe ehalo lyaHe. (Johannes 8:28, 29) Ihe opwa li pu na etompelo lilwe ishewe kutya omolwashike a li hu uvitha. Okwa li e uvitile ohenda oongundu dhaantu mboka ya li ye ya kuye. (Mateus 9:35, 36) Kaya li ya silwa oshimpwiyu kaawiliki yomalongelokalunga gawo, mboka ya li ye na oku ya longa oshili kombinga yaKalunga nomalalakano ge. Jesus okwa li a tseya kutya aantu oya pumbwa unene okuuva etumwalaka lyUukwaniilwa.

18. Omaukwatya geni gaJesus wa mona omahokithi noonkondo?

 18 Jesus okwa li omuntu omunahole ngoka e na ko nasha nayalwe. Omolwaashono yalwe ya li ye wete kutya ye omunambili noshipu kuyo okupopya naye. Nokuli naanona oya li haya kala ye uvite ya manguluka okukala puye. (Markus 10:13-16) Jesus ka li e na okatongotongo. Okwa li e tonde uulingilingi nokwaahe na uuyuuki. (Mateus 21:12, 13) Omathimbo gamwe sho aakiintu ya li ihaaya simanekwa noya li ye na owala omauthemba omashona, okwa li u ungaunga nayo nesimaneko. (Johannes 4:9, 27) Jesus okwa li lela omwiifupipiki. Pompito yimwe, okwa li a yogo oompadhi dhaayapostoli ye, iilonga mbyoka ya li hayi longwa komupiya gwowala.

Jesus okwa li u uvitha shaampoka a li a adha aantu

19. Oshiholelwa shini tashi ulike kutya Jesus okwa li e na ko nasha noompumbwe dhayalwe?

19 Jesus okwa li e na ko nasha noompumbwe dhayalwe. Shoka osha li shi iwetikile mo unene tuu sho a li a longitha oonkondo dhombepo ondjapuki yaKalunga okulonga iikumithalonga yokwaaludha. (Mateus 14:14) Pashiholelwa, omulumentu gumwe e na uuvu woshilundu okwa li e ya kuJesus nokwa ti: “Ngele owa hala okwaaludha ndje, oto shi vulu.” Jesus okwa li e uvitile  ohenda omulumentu ngoka a li te ehama nota mono iihuna. Mokwiinyengithwa kohenda, Jesus okwa yelutha oshikaha she nokwa gumu omulumentu ngoka, e ta ti: “Onda hala, yela!” Opo nduno omulumentu ngoka a li te ehama okwa aluka. (Markus 1:40-42) Mbela ou shi kutya omulumentu ngoka okwa li a nyanyukwa shi thike peni?

OKWA KALA OMUDHIGININI SIGO OKEHULILO

20, 21. Jesus okwa tula po ngiini oshiholelwa shokuvulika nuudhiginini kuKalunga?

20 Jesus okwa tula po oshiholelwa oshiwanawa noonkondo shokuvulika nuudhiginini kuKalunga. Okwa kala omudhiginini kuHe gwomegulu moonkalo adhihe nonando opwa li omapataneko gi ili nogi ili nokumona iihuna kehe. Jesus okwa li a kondjitha omamakelo gaSatana netokolotoko nonomupondo. (Mateus 4:1-11) Opwa li ethimbo ndyoka aapambele ye yamwe kaaya li ye mu itaala noya li ye mu ula nokuli kutya “ota yi oonkwengu.” (Markus 3:21) Ihe ine etha ye mu nwethe mo; okwa li a tsikile nokulonga iilonga yaKalunga. Nonando Jesus okwa li a tukwa nokwa hepekwa, okwa kala neipangelo noina  kambadhala nando okugalulila aapataneki ye uuwinayi.—1 Petrus 2:21-23.

21 Jesus okwa kala omudhiginini sigo okeso, eso enyanyalithi noliehameka sho a dhipagwa kaatondi ye. (Aafilippi 2:8) Tala shoka a li i idhidhimikile mesiku lyahugunina lyonkalamwenyo ye e li omuntu kombanda yevi. Okwa li a kwatwa, a lundilwa koonzapo dhiifundja, a pangulwa kaapanguli kaaye na uuyuuki, a shekwa koongundu dhaahongakanithi nokwa li a hepekwa kaakwiita. Sho a li e li komuti hoka a li a alelwa, okwa fudha mo omufudho gwe gwahugunina nokwi igidha a ti: “Ayihe ya gwanithwa!” (Johannes 19:30; Aagalati 3:13) Ihe mesiku etitatu konima yeso lye, He gwomegulu okwe mu yumudha a kale ishewe nomwenyo gwopambepo. (1 Petrus 3:18) Iiwike yontumba konima yaashono, okwa shuna megulu. Moka “okwa kuutumba kolulyo lwaKalunga” nokwa li a tegelela okupewa oonkondo dhopaukwaniilwa.—Aahebeli 10:12, 13.

22. Jesus okwe tu egululile ompito yashike mokukala omudhiginini sigo okeso?

22 Jesus okwe tu egululile ompito yashike mokukala omudhiginini sigo okeso? Eso lyaJesus olye tu egululile shili ompito yoku ka mona omwenyo gwaaluhe moparadisa kombanda yevi, metsokumwe nelalakano lyaJehova lyopetameko. Montopolwa tayi landula otatu ka kundathana nkene eso lyaJesus lya ningi oshinima shoka shi kale tashi wapa.

^ okat. 7 Omolweyelitho li na ko nasha nokugwanithwa kwehunganeko lyaDaniel kombinga yaJesus, tala Oshigwedhelwako pepandja 197-199.

^ okat. 8 Shaa mpoka oshitya “eshasho” tashi holoka mOmbiimbeli yOshindonga, otatu ka longitha Ombiimbeli yOshiingilisa New World Translation (NW), molwaashoka etoloko lyayo otali toloka sha yela nawa oshitya shika tali ti kutya “eninginitho.” Opo u mone uuyelele wa gwedhwa po, tala Ontopolwa 18, okatendo 3.

^ okat. 11 Jehova ohi ithanwa Tate molwaashoka oye Omushiti. (Jesaja 64:8) Molwaashoka Jesus okwa shitwa kuKalunga, ohi ithanwa Omwana gwaKalunga. Molwomatompelo ogo tuu ngoka, iishitwa iikwawo yopambepo nonokuli nomulumentu Adam otayi ithanwa oyana yaKalunga.—Job 1:6, OB-1954; Lukas 3:38.

^ okat. 12 Opo u mone omauliko galwe kutya Omwana osheeli ke thike puKalunga, tala Oshigwedhelwako pepandja 201-204.