Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Omalongo gashili gOmbiimbeli ogeni naanaa?

 OSHIGWEDHELWAKO

Oshili kombinga yaHe, yOmwana noyombepo ondjapuki

Oshili kombinga yaHe, yOmwana noyombepo ondjapuki

AANTU mboka yi itaala elongo lyUukwatatu ohaya ti kutya Kalunga okwa thikama po maantu yatatu mugumwe: He, Omwana nosho wo Ombepo Ondjapuki. Omuntu kehe gwomaantu mboka yatatu otaku tiwa kutya oku thike pamwe nayakwawo, oye li aanankondoadhihe nokaye na etameko. Onkee ano, elongo ndyoka lyUukwatatu otali ti kutya He oKalunga, Omwana oKalunga nosho wo Ombepo Ondjapuki oKalunga, ihe opu na owala Kalunga gumwe awike.

 Aantu oyendji mboka yi itaala Uukwatatu oya zimina kutya itaya vulu okuyelitha elongo ndyoka. Nonando ongaaka, otaya dhiladhila kutya otau longwa kOmbiimbeli. Oshindhindhilikwedhi osho kutya oshitya “Uukwatatu” kashi mo nandonando mOmbiimbeli. Ihe mbela edhiladhilo lyUukwatatu omo li li mOmbiimbeli? Opo tu yamukule epulo ndyoka, natu taleni kenyolo ndyoka mboka yi itaala Uukwatatu olundji haya longitha oku wu popila.

‘OHAPU OYA LI KALUNGA’

Johannes 1:1 ota ti: “Ohapu oya li ko, manga uuyuni inaau shitwa. Ohapu oya li puKalunga nOhapu oya li Kalunga.” Konima yethimbo, omuyapostoli Johannes okwe ke shi ulika nawa montopolwa oyo tuu ndjoka kutya “Ohapu” ndjoka oJesus. (Johannes 1:14) Ihe molwaashoka Ohapu otayi popiwa yi li Kalunga, yamwe oya thiki pehulithodhiladhilo kutya Omwana naHe oye li Kalunga gumwe awike.

Dhimbulukwa kutya enyolo ndyoka lyOmbiimbeli olya li lya nyolwa tango mOshigreka. Konima yethimbo, aatoloki oya toloka omanyolo gOshigreka momalaka galwe. Ihe aatoloki oyendji yOmbiimbeli inaya longitha uutumbulilo ‘Ohapu oya li Kalunga.’ Omolwashike mbela? Pantseyo yawo yOshigreka shoka sha li sha longithwa okunyola Ombiimbeli, aatoloki mboka oya li ya thika pehulithodhiladhilo kutya uutumbulilo ‘Ohapu oya li Kalunga’ ou na okutolokwa shimwe shi ili. Ngiini mbela? Iiholelwa yimwe oyo mbika: “Ohapu oya li puKalunga noya li yi na uukwatya wa fa we.” (The Translator’s New Testament) “Ohapu oya li kalunga.” (The New Testament in an Improved Version) Mpaka uutumbulilo “kalunga” mboka wa nyolwa nondanda onshona, otau ti “omunankondo.” Poompito dhimwe Ombiimbeli ohayi longitha uutumbulilo mboka okuulika kiishitwa iinankondo. Pashiholelwa, Ombiimbeli otayi ithana aapanguli yopantu ‘ookalunga.’ (Episalomi 82:1-6; Johannes 10:34, 35) Nokuli Satana oti ithanwa “kalunga komuuyuni mbuka” mAakorinto aatiyali 4:4. Jesus oku li pondondo ya simana noonkondo e vule aantu inaya gwanenena naSatana. Onkee ano ngele yo otayi ithanwa “ookalunga” nenge aanankondo, nopwaahe na omalimbililo Jesus ota vulu wo okwiithanwa “kalunga.” Ihe ke shi nando Kalunga Omunankondoadhihe.

MONA UUYELELE OUNDJI

Aantu oyendji kaye shi Oshigreka shoka sha longithwa okunyola Ombiimbeli. Ano ongiini to vulu okutseya shoka omuyapostoli Johannes a li a hala okutya lelalela? Dhiladhila koshiholelwa shika: Omulongisikola ta yelithile aalongwa ye oshinima shontumba. Konima  yethimbo, aalongwa oya ka kala ye na omadhiladhilo ga yoolokathana kombinga yokuuva ko eyelithilo ndyoka. Ongiini aalongwa mboka taya vulu okukandula po uupyakadhi mboka? Otaya vulu okupula omulongisikola e ya pe uuyelele oundji. Kapu na omalimbililo kutya okumona uuyelele wa gwedhwa po otaku ke ya kwathela yu uve ko nawa oshinima shoka. Sha faathana, opo u uve ko eityo lyaJohannes 1:1, oto vulu okutala mEvaangeli lyaJohannes opo u mone uuyelele oundji kombinga yondondo yaJesus. Ngele to mono uuyelele wa gwedhwa po u na ko nasha noshinima shika, otashi ke ku kwathela u thike pehulithodhiladhilo li li mondjila.

Pashiholelwa, konakona shoka Johannes a nyola natango montopolwa 1, ovelise 18, a ti: “Kaku na omuntu a mono Kalunga [Omunankondoadhihe] nando olumwe.” Ihe aantu oya mona Jesus, Omwana, omolwaashono Johannes a ti: “Ohapu [Jesus] nokwa ningi omuntu nokwa kala mokati ketu. Otse otwa tala eadhimo lye.” (Johannes 1:14) Ngele osho ngawo, ongiini Omwana ta vulu okukala e li Kalunga Omunankondoadhihe? Johannes okwa ti wo kutya Ohapu oya kala ‘puKalunga.’ Ihe ongiini omuntu ta vulu okukala e li pamwe nomukwawo, ihe ayehe yaali oye li omuntu gumwe? Niishewe, ngaashi sha nyolwa muJohannes 17:3, Jesus okwa yelitha nawa eyooloko pokati ke naHe gwomegulu. Ota popi He e li “Kalunga awike kashili.” Johannes okwe shi ngongo nawa pehulilo lyEvaangeli lye a ti: “Mbika oya nyolwa, opo mu itaale kutya Jesus oye Kristus, Omuna gwaKalunga.” (Johannes 20:31) Ndhindhilika kutya Jesus ota popiwa e li Omwana gwaKalunga, ihe haKalunga. Uuyelele oundji mboka wa gandjwa mEvaangeli lyaJohannes otau ulike nkene Johannes 1:1 e na okuuviwa ko. Jesus, Ohapu, oku li “kalunga” meityo ndyoka kutya oku na ondondo yopombanda, ihe inayi faathana naandjoka yaKalunga Omunankondoadhihe.

SHILIPALEKA UUYELELE MBOKA

Dhiladhila natango kombinga yoshiholelwa shomulongisikola naalongwa. Natu tye nduno ando aalongwa yamwe oye na natango omalimbililo, nokuli nokonima sho ya pulakene omayele gomulongi ga gwedhwa po. Oshike ya li taya vulu okuninga po? Oya li taya vulu okuya komulongi gumwe i ili opo ya mone uuyelele oundji u na ko nasha noshinima osho tuu shoka. Ngele omulongi ngoka okwa koleke omayelithilo gomulongi gwotango, aanasikola oyendji otaya ka za momalimbililo. Sha faathana, ngele ku na uushili kombinga yekwatathano lyaJesus naKalunga Omunankondoadhihe, oto vulu okutala membo lyomunyoli gwOmbiimbeli gumwe i ili opo u mone uuyelele wa gwedhwa po. Pashiholelwa, tala kwaashoka sha  nyolwa kuMateus. Okwa totha moohapu dhaJesus sho a popi kombinga yehulilo lyuuyuni mbuka a ti: “Esiku notundi ndjoka kaku na ngoka e yi shi, nando aayengeli yomegulu nenge Omwana, oTate oye awike.” (Mateus 24:36) Oohapu ndhoka otadhi koleke ngiini kutya Jesus ke shi Kalunga Omunankondoadhihe?

Jesus okwa ti kutya He okwa tseya oshindji e vule Omwana. Ihe ando Jesus okwa li oshitopolwa shaKalunga Omunankondoadhihe, ando okwa tseya omauyelele agehe ngoka He e shi. Onkee ano, Omwana naHe itaya vulu okukala ye thike pamwe. Ihe yamwe otashi vulika ya tye: ‘Jesus okwa li e na uuntu wopaali. Mpaka ota popiwa e li omuntu.’ Ihe nonando ando osho sha li ngawo, ongiini kombinga yombepo ondjapuki? Ngele oyo Kalunga ngoka oye He, omolwashike Jesus inaa tya kutya oya tseya shoka He e shi?

Sho to tsikile okukonakona Ombiimbeli, oto ka tseya nawa omanyolo ogendjigendji gOmbiimbeli ngoka ge na uuyelele oundji wa pamba oshinima shoka. Otaga koleke oshili kombinga yaHe, yOmwana noyombepo ondjapuki.—Episalomi 90:2; Iilonga 7:55; Aakolossa 1:15.