Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Omalongo gashili gOmbiimbeli ogeni naanaa?

 OSHIGWEDHELWAKO

Etompelo molwaashono Aakriste yashili ihaaya longitha omushigakano mokulongela Kalunga kwawo

Etompelo molwaashono Aakriste yashili ihaaya longitha omushigakano mokulongela Kalunga kwawo

OMUSHIGAKANO ogu holike nogwa simanekwa kaantu omamiliyona. Embo The Encyclopædia Britannica otali popi omushigakano gu li “endhindhiliko lya simana lyelongelokalunga lyopaKriste.” Ihe nando ongaaka, Aakriste yashili ihaya longitha omushigakano mokulongela Kalunga kwawo. Omolwashike mbela?

Etompelo lya simana olyo kutya Jesus Kristus ina sila komushigakano. Oshitya shOshigreka sha tolokwa olundji “omushigakano” osho stau·rosʹ. Otashi ti lelalela “opaala nenge oshiti shu ukilila.” The Companion Bible otayi ti: “[Stau·rosʹ] itashi ti nandonando iiti iyali ya shigakana momukalo gwontumba . . . Kapu na sha shoka sha nyolwa [mEtestamendi Epe] lyOshigreka shoka tashi ulike kiiti iyali.”

Momanyolo ogendji, aanyoli yOmbiimbeli oya longitha oshitya shimwe shi ili shi na ko nasha naahoka kwa sila Jesus. Osho oshitya shOshigreka xyʹlon. (Iilonga 5:30, OB-1954; 10:39, OB-1954; 13:29,  OB-1954; Aagalati 3:13) Oshitya shoka otashi ti owala “endangalati” nenge “oshiti, ondhimbo nenge omuti.”

Mokuyelitha kutya omolwashike omuti gwowala gwa kewa gwa li hagu longithwa olundji omolwokudhipagela ko aantu, embo Das Kreuz und die Kreuzigung (Omushigakano nokwaalelwa komushigakano), lya nyolwa kuHermann Fulda, otali ti: “Omiti kadha li dhi li kehe pamwe pomahala ngoka ga li ga hogololwa okudhipagela aantu montaneho. Onkee ano, omuti gwa kewa gu ukilila ogwa li hagu fulilwa elambo e tagu tulwa mevi. Aayoni oya li haya alelwa ye endjelela komuti gwa tya ngaaka, nomaako gawo gu uka pombanda nolundji oompadhi dhawo odha li hadhi mangwa nenge dhi alelwe noomboha.”

Ihe uunzapo mboka tau tompo aantu noonkondo otau zi mOohapu dhaKalunga. Omuyapostoli Paulus okwa ti: “Kristus sho a thingwa omolwetu, okwe tu mangulula mo methingo ndyoka ompango ye li tu etele. Oshoka enyolo otali ti: ‘Kehe ngoka te endjelelekwa komuti, oye okwa thingwa.’” (Aagalati 3:13) Menyolo ndyoka Paulus okwa kutha muDeuteronomium 21:22, 23, ngoka ta popi sha yela shi na ko nasha nomuti, ihe hanomushigakano. Molwaashoka aantu mboka ya li haya dhipagwa momukalo gwa tya ngaaka oya li haya talika ko ya “thingwa,” itashi ka kala shu uka kAakriste okukala ye na omathano gaKristus a alelwa momagumbo gawo.

Kapu na shoka tashi ulike kutya uule woomvula 300 dhotango konima yeso lyaKristus, mboka ya li tayi iti kutya oye li Aakriste oya li haya longitha omushigakano mokulongela Kalunga. Ihe methelemimvo etine, omukeesali omupagani Constantine okwa li a ningi oshilyo shUukwakriste uushunimonima e ta humitha komeho omushigakano gu li endhindhiliko lyawo. Kashi na nduno mbudhi kutya einyengotompelo lyaConstantine olya li shike, omushigakano kagwa li gu na ko nasha naJesus Kristus nandonando. Odhoshili kutya elongitho lyomushigakano olya li lya tamekele kaapagani. Embo New Catholic Encyclopedia olye shi zimina tali ti: “Omushigakano otagu adhika momaputuko gaamboka ya tetekele ethimbo lyUukriste nosho wo mugaamboka inaaya taamba ko Uukriste.” Iinyolomwa iikwawo yi shi okwiinekelwa otayi ulike kutya omushigakano ogwa li hagu longithwa melongelokalunga lyokugalikana uunshitwe nomomikalo dhoshipagani dha kwatela mo omilalo.

Ihe omolwashike endhindhiliko ndyoka lyoshipagani lya humithwa komeho? Otashi vulika sha ningwa nelalakano lyoku shi ninga oshipu kaapagani opo ya taambe ko “Uukriste.” Ihe nando ongaaka, okugalikana endhindhiliko kehe lyoshipagani oshi  indikwa thiluthilu kOmbiimbeli. (2 Aakorinto 6:14-18) Omanyolo otagi indike wo okulongela iikalunga kwoludhi kehe. (Eksodus 20:4, 5; 1 Aakorinto 10:14) Onkee ano, Aakriste yashili oye na etompelo ewanawa sho ihaaya longitha omushigakano mokulongela Kalunga kwawo. *

^ okat. 4 Opo u mone uuyelele oundji kombinga yoonkundathana dhi na ko nasha nomushigakano, tala epandja 89-93 lyembo Reasoning From the Scriptures, lya nyanyangidhwa kOonzapo dhaJehova.