Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Omalongo gashili gOmbiimbeli ogeni naanaa?

 OSHIGWEDHELWAKO

Mikael omuyengeli omukuluntu oye lye?

Mikael omuyengeli omukuluntu oye lye?

OSHISHITWA shopambepo shoka hashi ithanwa Mikael inashi tumbulwa mo olundji mOmbiimbeli. Ihe poompito mpoka sha popiwa, osha popiwa tashi longo sha. Membo lyaDaniel, Mikael okwa popiwa ta kondjo naayengeli aakolokoshi; montumwafo yaJudas, okwa popiwa ta tsu oompata naSatana; nosho wo mEhololo, okwa popiwa ta kondjitha Ondiaboli noompwidhuli dhayo. Molwaashono Mikael oha popile epangelo lyaJehova noha kondjitha aatondi yaJehova, oha kala metsokumwe nedhina lye ndyoka tali ti: “Olye a fa Kalunga?” Ihe mbela Mikael oye lye?

Aantu yamwe oye na omadhina ogendji. Pashiholelwa, omukulusamane Jakob okwa li wo hi ithanwa Israel nomuyapostoli Petrus okwa li wo hi ithanwa Simon. (Genesis 49:1, 2; Mateus 10:2) Sha faathana, Ombiimbeli otayi ulike kutya Mikael olyo edhina limwe lyaJesus Kristus manga a li inee ya kombanda yevi nosho wo sho a shuna megulu. Natu konakoneni omatompelo gopamanyolo kutya omolwashike taku tiwa ngawo.

Omuyengeli omukuluntu. Oohapu dhaKalunga otadhi popi Mikael ‘omuyengelimukuluntu.’ (Judas 9) Uutumbulilo ‘omuyengelimukuluntu’ owa holoka owala paushimwe mOmbiimbeli, ihe hapauwindji nando. Shoka otashi ulike kutya oku na owala omuyengeli gumwe a tya ngaaka. Niishewe, Jesus ota popiwa e li pondondo yomuyengeli omukuluntu. Shi na ko nasha nomuyumudhwa Omuwa Jesus Kristus, 1 Aatessalonika 4:16 (OB-1954) otaya ti: “Omuwa mwene ota kuluka megulu nonkugo yelombwelo neigidho lyomuyengeli omukuluntu.” Kungawo, ewi lyaJesus otali popiwa  kutya olyomuyengeli omukuluntu. Onkee ano, enyolo ndyoka otali ulike kutya Jesus ye mwene oye omuyengeli omukuluntu Mikael.

Omuwiliki gwetanga lyaakwiita. Ombiimbeli otayi ti kutya ‘Mikael naayengeli ye oya kondjitha oshikoko pamwe naayengeli yasho.’ (Ehololo 12:7) Onkee ano, Mikael oku li Omuwiliki gwetanga lyaakwiita lyaayengeli aadhiginini. Ehololo otali hokolola wo Jesus e li Omuwiliki gwetanga lyaakwiita lyaayengeli aadhiginini. (Ehololo 19:14-16) Omuyapostoli Paulus okwa popi wo kondandalunde “Omuwa Jesus” nosho wo ‘aayengeli ye aanankondo.’ (2 Aatessalonika 1:7) Onkee ano, Ombiimbeli otayi popi Mikael ‘naayengeli ye’ nosho wo Jesus ‘naayengeli ye.’ (Mateus 13:41; 16:27; 24:31; 1 Petrus 3:22) Molwaashoka Oohapu dhaKalunga kadhi na mpoka tadhi popi kutya oku na omatanga gaakwiita gopaali gaayengeli aadhiginini megulu, limwe ndyoka ando tali wilikwa kuMikael nekwawo ndyoka tali wilikwa kuJesus, oshi li pandunge okuthika pehulithodhiladhilo kutya Mikael oye lela Jesus Kristus e li pondondo ye yomegulu. *

^ okat. 1 Uuyelele oundji mboka tau ulike kutya edhina Mikael otali ulike kOmwana gwaKalunga otau adhika mEmbo 2 lyo-Insight on the Scriptures, epandja 393-394, lya nyanyangidhwa kOonzapo dhaJehova.