Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Omalongo gashili gOmbiimbeli ogeni naanaa?

 OSHIGWEDHELWAKO

Omumvo 1914 omundhindhilikwedhi momahunganeko gOmbiimbeli

Omumvo 1914 omundhindhilikwedhi momahunganeko gOmbiimbeli

MANGA kwa li ku na oomvula omilongo dhontumba, aakonakoni yOmbiimbeli oya li ya tseyitha kutya momumvo 1914 otamu ka ningwa iiningwanima iindhindhilikwedhi. Iiningwanima mbyoka oyini nuunzapo uni tau ulike kutya omumvo 1914 ogwo omumvo gwa simana?

Ngaashi sha nyolwa muLukas 21:24, Jesus okwa ti: “Aapagani otaa ka lyatagula Jerusalem, sigo ethimbo lyawo lya hulu po.” Jerusalem osha kala oshilandopangelo shoshigwana shAajuda shono shi li ondingandinga yepangelo lyaakwaniilwa yomezimo lyomukwaniilwa  David. (Episalomi 48:1, 2) Ihe aakwaniilwa mboka oya li yi ikalekelwa maawiliki yiigwana yilwe. Oya li haya kala omutumba “koshipangelapundi shoka sha tulwa po kOMUWA” ye li aakalelipo ye. (1 Ondjalulo 29:23) Kungawo, Jerusalem osha li shi lile po epangelo lyaJehova.

Ihe ongiini nuunake epangelo lyaKalunga lya li lya tameke ‘okulyatagulwa kaapagani’? Shoka osha li sha ningwa mo 607 K.E.N., sho Jerusalem sha li sha sindwa kAababilonia. Kapwa li we ngoka a li a kuutumba “koshipangelapundi shoka sha tulwa po kOMUWA,” nezimo lyaakwaniilwa mboka ya li oluvalo lwaDavid olya li lya hulithwa po pokathimbo. (2 Aakwaniilwa 25:1-26) Mbela ‘okulyatagulwa’ hoka okwa li taku ka tsikila sigo aluhe? Hasho, molwaashoka ehunganeko lyaHesekiel olya popi kombinga yomukwaniilwa gwahugunina gwaJerusalem, Zedekija, lya ti: “Egala nali ze komutse, oshishani pohi . . . sigo oongoka te ya po, a gwana, nangame tandi ke shi mu pa.” (Hesekiel 21:31, 32, OB-1954 [ovelise 26 no-27 mo OB-1986]) Ngoka a “gwana” okupewa oshishani shaDavid, oKristus Jesus. (Lukas 1:32, 33) Onkee ano, ‘okulyatagulwa’ okwa li taku ka hula po ngele Jesus a ningi Omukwaniilwa.

 Oshiningwanima shoka sha simana osha li tashi ka ningwa uunake? Jesus okwa li u ulike kutya aapagani oya li taya ka pangela uule wethimbo lya ngambekwa. Ehokololo ndyoka li li muDaniel ontopolwa onti-4 otali gandja uuyelele wa simana kutya ethimbo ndyoka olya li tali ka kala li na uule u thike peni. Otali hokolola ondjodhi yopahunganeko ndjoka ya li ya yagumwa komukwaniilwa Nebukadnezzar gwaBabilonia. Okwa li a mono omuti omunenenene ngoka gwa li gwa kewa po. Oshithindi shago kasha li tashi ka tsapuka molwaashoka osha li sha mangwa niiyela iiluudhe nosho wo niiyela iikushu. Omuyengeli okwa ti: ‘Omathimbo gaheyali nage mu kukile ngaaka.’—Daniel 4:7-13, OB-1954 (ovelise 10-16 mo OB-1986).

MOmbiimbeli, omiti omathimbo gamwe ohadhi longithwa okuthaneka omapangelo. (Hesekiel 17:22-24; 31:2-5) Onkee ano, okukewa po kwomuti ngoka gwopathaneko okwa li taku thaneke nkene epangelo lyaKalunga ndyoka lya li li lilwe po kaakwaniilwa mboka ya li muJerusalem, lya li tali ka yiwa moshipala. Ihe emoniko ndyoka olya ti kutya ‘okulyatagulwa kwaJerusalem’ okwa li taku ka kala kwopokathimbo, sha hala okutya, uule ‘womathimbo gaheyali.’ Ethimbo ndyoka olya li li na uule u thike peni?

Ehololo 12:6, 14 otali ulike kutya omathimbo gatatu netata oge thike ‘pomasiku 1 260.’ Ano “omathimbo gaheyali” oge thike pomasiku 1 260 gi indjipalekwa lwaali, sha hala okutya, oge thike pomasiku 2 520. Ihe iigwana yaapagani inayi ‘lyatagula’ owala epangelo lyaKalunga uule womasiku 2 520 konima yokuteka po kwaJerusalem. Ano osha yela kutya okwa li tashi pula ethimbo ele noonkondo opo ehunganeko ndyoka li gwanithwe. Pakupopya kwaNumeri 14:34 naHesekiel 4:6, moka tamu popiwa kutya “omumvo gumwe ogu lile po esiku kehe,” “omathimbo gaheyali” oge thike pomimvo 2 520.

Oomvula 2 520 odha li dha tameke muKotoba 607 K.E.N., sho Jerusalem sha li sha gwile miikaha yAababilonia nomukwaniilwa gwomezimo lyaDavid okwa li a kuthwa ko koshipangelapundi. Ethimbo ndyoka olya li lya hulu po muKotoba 1914. ‘Ethimbo lyaapagani’ olya hulu po momumvo ngoka, na Jesus Kristus okwa langekwa po e li Omukwaniilwa gwaKalunga gwomegulu. *Episalomi 2:1-6; Daniel 7:13, 14.

 Ngaashi naanaa Jesus a li a hunganeke, ‘okuya’ nenge okukala po kwe e li Omukwaniilwa gwomegulu okwa kala kwa ndhindhilikilwa kiiningwanima tayi halukitha mbyoka tayi ningwa muuyuni auhe—iita, ondjala, ekakamo lyevi, omikithi dholutapo nosho tuu. (Mateus 24:3-8; Lukas 21:11) Iiningwanima mbyoka otayi gandja uunzapo wa kola kutya momumvo 1914 omo shili Uukwaniilwa waKalunga womegulu wa li wa dhikwa po nomo mwa tameke ‘omasiku gahugunina’ guuyuni mbuka wongashingeyi wa kolokosha.—2 Timoteus 3:1-5, OB-1954.

^ okat. 4 Okuza muKotoba 607 K.E.N. sigo omuKotoba omumvo 1 K.E.N. opu na oomvula 606. Okuza muKotoba omumvo 1 K.E.N. sigo omuKotoba 1914 E.N. opu na oomvula 1 914. Okutula kumwe omiyalu ndhoka mbali otaku tu pe oomvula 2 520 (606 + 1914 = 2 520). Opo u mone uuyelele oundji u na ko nasha nokuteka po kwaJerusalem mo 607 K.E.N., tala oshitopolwa “Chronology [Eyalulo lyethimbo]” membo Insight on the Scriptures, lya nyanyangidhwa kOonzapo dhaJehova.