Inda koshikalimo

Inda koshikalimo

Oonzapo dhaJehova

Hogolola elaka Oshindonga

 ONTOPOLWA 15

Elongelokalunga ndyoka lya hokiwa kuKalunga

Elongelokalunga ndyoka lya hokiwa kuKalunga
  • Mbela omalongelokalunga agehe oga hokiwa kuKalunga?

  • Ongiini to vulu okumona kutya elongelokalunga lyashili olini?

  • Oolye ye li aalongelikalunga yashili kombanda yevi nena?

1. Otatu ka mona ngiini uuwanawa mokulongela Kalunga momukalo gu uka?

JEHOVA KALUNGA oku na ko nasha natse noonkondo nokwa hala tu mone uuwanawa mewiliko lye lyopahole. Ngele otatu mu longele momukalo gu uka, otatu ka kala twa nyanyukwa notatu ka yanda omaupyakadhi ogendji monkalamwenyo. Ote ke tu laleka wo nuuyamba note ke tu kwathela. (Jesaja 48:17) Ihe opu na omalongelokalunga omathele ngoka taga ti kutya otaga longo aantu oshili kombinga yaKalunga. Nonando ongaaka, oga yooloka noonkondo momalongo gago ge na ko nasha nokutya Kalunga oye lye naashoka a hala tu ninge.

2. Ongiini tatu vulu okwiilonga omukalo gu uka gwokulongela Jehova, nethaneko lini tali tu kwathele okuuva ko omukalo moka tatu vulu oku shi ninga?

2 Ongiini to vulu okutseya omukalo gwokulongela Jehova ngoka gu uka? Ino pumbwa okukonakona nokuyelekanitha omalongo gomalongelokalunga agehe. Owa pumbwa owala okwiilonga shoka Ombiimbeli tayi ti lela kombinga yelongelokalunga lyashili. Oku shi thaneka: Miilongo oyindji omu na uupyakadhi u na ko nasha niimaliwa yiikengelela. Ando ou pewe iilonga yokukonga mo iimaliwa ya tya ngaaka yiikengelela, mbela ando oto ke shi enda ngiini? Mbela oto ki ilonga momutse omaukwatya agehe giimaliwa yiikengelela? Hasho. Pehala lyaashono, otashi ka kala pandunge okukonakona iimaliwa yoshili. Ngele owa tseya kutya iimaliwa yoshili oyi li ngiini, oto  ka vula okudhimbulula mo mbyoka yiikengelela. Sha faathana, ngele otwi ilongo kutya elongelokalunga lyashili olya tya ngiini, otatu vulu okudhimbulula mo omalongelokalunga ngoka giifundja.

3. Jesus okwa ti kutya otu na okuninga shike ngele otwa hala okukala twa hokiwa kuKalunga?

3 Osha simana okulongela Jehova momukalo moka a hokwa. Aantu oyendji oyi itaala kutya omalongelokalunga agehe oga hokiwa kuKalunga, ihe Ombiimbeli hasho tayi ti ngawo. Inashi gwana nokuli okutya owala otu li Aakriste. Jesus okwa ti: “Hakehe ngoka ti ithana ndje ‘Omuwa, Omuwa’, ta yi mOshilongo shegulu, aawe, oye tuu ngoka ta gwanitha ehalo lyaTate yomegulu.” Onkee ano, opo tu kale twa hokiwa kuKalunga, otu na okwiilonga shoka Kalunga a hala tu ninge noku shi gwanitha po. Jesus oku ula mboka ihaaya longo ehalo lyaKalunga a ti kutya “aakolokoshi.” (Mateus 7:21-23) Ngaashi iimaliwa yiikengelela, omalongelokalunga giifundja kage na ongushu yasha. Shoka oshiwinayi noonkondo nokuli, osho kutya omalongelokalunga ga tya ngaaka oga nika oshiponga.

4. Oohapu dhaJesus kombinga yoondjila mbali otadhi ti shike, nondjila kehe otayi fala peni?

4 Jehova okwa pa kehe gumwe e li kombanda yevi ompito yoku ka mona omwenyo gwaaluhe. Ihe opo tu ka kale nomwenyo sigo aluhe mOparadisa, otu na okulongela Kalunga momukalo gu uka nokukala ngashingeyi nonkalamwenyo ndjoka ya hokiwa kuye. Mupyamunene, oyendji ohaya tindi oku shi ninga. Omolwaashoka Jesus a popi a ti: “Indeni mo, mu pitile mosheelo shoka sha patekidha, oshoka osheelo shoka oshinene nondjila ndjoka ya mbwalangandja otayi fala mekano, noku na oyendji mboka taye yi lamba. Ihe osheelo shoka oshishona nondjila ndjoka ya thinana otayi fala komwenyo, naashona yowala mboka taa yi mono.” (Mateus 7:13, 14) Elongelokalunga lyashili otali fala komwenyo gwaaluhe. Omalongelokalunga giifundja go otaga fala mehanagulo. Jehova ina hala nando omuntu gumwe a ka hanagulwe po, nomolwaashono ha gandja ompito kaantu kehe pamwe yi ilonge kombinga ye. (2 Petrus 3:9) Odhoshili kutya momukalo moka tatu longele Kalunga otagu ti omwenyo nenge eso kutse.

 NKENE TO VULU OKUDHIMBULULA MO ELONGELOKALUNGA LYASHILI

5. Ongiini tatu vulu okudhimbulula mo mboka ye li melongelokalunga lyashili?

5 Ongiini ‘ondjila ndjoka tayi fala komwenyo’ tayi vulu okumonika? Jesus okwa ti kutya elongelokalunga lyashili otali ka kala li iwetikile mokukalamwenyo kwaantu mboka ye li mulyo. Okwa ti: “Otamu ya dhimbulula kiiyimati yawo. . . . Okehe tuu omuti omwaanawa otagu imi iiyimati iiwanawa.” (Mateus 7:16, 17) Niitya yimwe, mboka ye li melongelokalunga lyashili otaya dhimbululwa mo mokutala kwaashoka yi itaala nosho wo keihumbato lyawo. Nonando aalongelikalunga yashili oye li inaaya gwanenena nohaya ningi omapuko, yo ayehe ohaya kambadhala okulonga ehalo lyaKalunga. Natu konakoneni iinima ihamano mbyoka oyo tayi ndhindhilikitha mboka ye li melongelokalunga lyashili.

6, 7. Aapiya yaKalunga ohaya tala ko ngiini Ombiimbeli, nomoshinima shika Jesus okwa tula po oshiholelwa shini?

6 Omalongo gaapiya yaKalunga oga kankamekelwa kOmbiimbeli. Ombiimbeli otayi ti: “Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulukila omuntu ondjila yu uka, opo kehe ngoka ta longele Kalunga, a kale a gwana a pwa nokwoopalela oshilonga kehe oshiwanawa.” (2 Timoteus 3:16, 17) Omuyapostoli Paulus okwa li a nyolele Aakriste ooyakwawo a ti: “Sho twe mú etele oohapu dhaKalunga, omwe dhi uvu e tamu dhi taamba, hangaashi oohapu dhomuntu, ihe odhaKalunga, dho odho tuu shili.” (1 Aatessalonika 2:13) Onkee ano, omalongo nomikalo dhelongelokalunga lyashili inadhi ikolelela komataloko nenge komithigululwakalo dhaantu. Odhi ikolelela kOohapu dhaKalunga ndhoka a nwetha mo, Ombiimbeli.

7 Jesus Kristus okwa tula po oshiholelwa oshiwanawa mokukankamekela elongo lye kOohapu dhaKalunga. Okwa popi megalikano kuHe gwomegulu a ti: “Oohapu dhoye odho oshili.” (Johannes 17:17) Jesus okwa li i itaala Oohapu dhaKalunga, nakehe shoka a li ha longo aantu osha li shi li metsokumwe nadho. Olundji Jesus okwa li ha ti: “Okwa nyolwa.” (Mateus 4:4, 7, 10) Opo  nduno Jesus okwa li ha longitha enyolo. Aapiya yaKalunga yonena nayo wo ihaya longo aantu omadhiladhilo gawo yene. Oyi itaala kutya Ombiimbeli oyo Oohapu dhaKalunga noya kankamekela thiluthilu elongo lyawo kwaashono tayi popi.

8. Oshike sha kwatelwa mokulongela Jehova?

8 Mboka ye li melongelokalunga lyashili ohaya longele Jehova oye awike nohaya tseyitha edhina lye. Jesus okwa ti: “Omuwa Kalunga koye oye awike u na oku mu galikana noye awike u na oku mu longela.” (Mateus 4:10) Onkee ano, aapiya yaJehova ohaye mu longele oye awike. Elongelokalunga ndyoka olya kwatela mo okutseyithila aantu edhina lyaKalunga kashili nomaukwatya ge. Eksodus 5:3 (OB-1954) ota ti: “Jehova Ofule; edhina lye Jehova.” Jesus okwa tula po oshiholelwa shokukwathela yalwe ya tseye Kalunga, ngaashi e shi popya megalikano lye a ti: “Aantu mboka yomuuyuni we ya pa ndje, onde ya tseyithile edhina lyoye.” (Johannes 17:6) Aalongelikalunga yashili nena nayo ohaya longo aantu shi na ko nasha nedhina lyaKalunga, omalalakano ge nomaukwatya ge.

9, 10. Omomikalo dhini Aakriste yashili hayu ulikilathana ohole?

9 Oshigwana shaKalunga ohashi ulikilathana ohole yashili yokwaaihola mwene. Jesus okwa ti: “Ngele omu holathane, nena aantu ayehe otaa ka dhimbulula kutya one aalongwa yandje.” (Johannes 13:35) Aakriste yonale oya li ye holathane nohole ya tya ngaaka. Ohole yopakalunga ohayi pondola ontondo ndjoka hayi etithwa keyooloko lyopamihoko, lyopankalathano nolyopashigwana nohayi hanganitha aantu muumwayinathana washili nowa kola. (Aakolossa 3:14) Iilyo yomalongelokalunga giifundja kayi na ohole yuumwayinathana ya tya ngaaka. Otu shi shi ngiini? Ohayi dhipagathana omolwomayooloko gopashigwana nogopamihoko. Aakriste yashili ihaya kutha ombinga miita ya ka dhipage Aakriste ooyakwawo nenge aantu yalwe. Ombiimbeli otayi ti: “Eyooloko pokati kaana yaKalunga naana yomuhindadhi opo li li mpa: Shaa ngoka itaa longo shoka shu uka nenge kee hole mukwawo, oye ke shi omuna gwaKalunga. . . . Otse otu na okuholathana. Inatu kaleni twa fa Kain, ngoka a li ta longithwa komuhindadhi nokwa dhipaga po omumwayina.”—1 Johannes 3:10-12; 4:20, 21.

 10 Ohole yashili oya kwatela mo lela oshindji kaashi shi owala okwaadhipaga aantu yalwe. Aakriste yashili ohaya longitha nokwaaihola mwene ethimbo lyawo, oonkondo dhawo niiniwe yawo mokukwathelathana nomokutsaathana omukumo. (Aahebeli 10:24, 25) Ohaya kwathelathana momathimbo omadhigu nohaya kala nayalwe pauyuuki. Odhoshili kutya ohaya tula miilonga omayele gOmbiimbeli ngoka taga ti kutya naya ‘ningile kehe gumwe uuwanawa.’—Aagalati 6:10.

11. Omolwashike sha simana okutaamba ko Jesus Kristus e li ngoka ta longithwa kuKalunga omolwokuhupitha aantu?

11 Aakriste yashili oya taamba ko Jesus Kristus e li ngoka ta longithwa kuKalunga omolwokuhupitha aantu. Ombiimbeli otayi ti: “Omuye awike tamu tu zile ehupitho; oshoka muuyuni auhe kamu na nando ogumwe gwedhina Kalunga e li hololela aantu, tatu vulu okuhupithilwa muye.” (Iilonga 4:12) Ngaashi twa mona mOntopolwa onti-5, Jesus okwa gandja omwenyo gwe gu li ekulilo omolwaantu aavuliki. (Mateus 20:28) Kakele kaashono, Jesus oku li Omukwaniilwa a langekwa po kuKalunga mUukwaniilwa womegulu mboka tau ka pangela evi alihe. Kalunga okwa tegelela tu vulike kuJesus nokutula miilonga omalongo ge ngele otwa hala oku ka mona omwenyo gwaaluhe. Omolwaashono Ombiimbeli ya ti: “Oongoka i itaala Omwana, oku na omwenyo gwaaluhe, ihe ngoka itaa vulika kOmwana, ita ka mona ko omwenyo, ihe ondjahi yaKalunga otayi kala kombanda ye.”—Johannes 3:36.

12. Okukala twaahe shi oshitopolwa shuuyuni okwa kwatela mo shike?

12 Aalongelikalunga yashili kaye shi oshitopolwa shuuyuni mbuka. Sho Jesus a li mompangu koshipala shomupanguli Omuroma Pilatus, okwa tile: “Uukwaniilwa wandje kau shi womuuyuni mbuka.” (Johannes 18:36) Kashi na mbudhi kutya aalanduli yashili yaJesus oye li moshilongo shini, oye li aapangelwa yUukwaniilwa we womegulu nomolwaashono ihaya kutha ombinga momaipumomumwe guuyuni. Aalongeli yaJehova ihayi idhopo mwaashono yalwe haya ningi shi na ko nasha nokuya moongundu dhopapolotika, okukala ya hala okuhogololwa nenge okuhogolola. Ihe nonando aalongelikalunga yashili kaye na ombinga miinima yopapolotika, ohaya vulika koompango dhiilongo moka ye li. Omolwashike mbela? Omolwaashoka Oohapu dhaKalunga otadhi ya lombwele ya “vulike kaapangeli.” (Aaroma  13:1) Ngele opu na eipumomumwe pokati kaashoka Kalunga ta pula naashoka omilandu dhopapolotika tadhi pula, aalongelikalunga yashili ohaya landula oshiholelwa shaayapostoli, mboka ya tile: “Otse otu na okuvulika kuKalunga, hakaantu.”—Iilonga 5:29; Markus 12:17.

13. Aalanduli yashili yaJesus oya tala ko ngiini Uukwaniilwa waKalunga, nohaya ningi shike shi na ko nasha nawo?

13 Aalanduli yashili yaJesus ohayu uvitha kutya Uukwaniilwa waKalunga owo awike tau ka kandula po omaupyakadhi gaantu.  Jesus okwa hunganeke a ti: “Elaka ndika etoye [lyuukwaniilwa, KB] otali ka uvithilwa aantu ayehe, li ningile iigwana ayihe onzapo; notaku ya ihe ehulilo.” (Mateus 24:14) Pehala lyokuladhipika aantu yi inekele maapangeli yopantu ye ya kandulile po omaupyakadhi gawo, aalanduli yashili yaJesus Kristus ohayu uvitha kutya Uukwaniilwa waKalunga womegulu owo awike tau ke ga kandula po. (Episalomi 146:3) Jesus okwe tu longo tu galikane omolwepangelo ndyoka lya gwanenena, sho a ti: “[Uukwaniilwa woye nau ye, KB]. Ehalo lyoye nali gwanithwe kombanda yevi wo ngaashi megulu.” (Mateus 6:10) Oohapu dhaKalunga odha hunganeke kutya Uukwaniilwa mboka womegulu “otau ka nyanyagula notau ka teyagula po omaukwaniilwa agehe [ngoka ge li ko nena] noku ga hulitha po, ihe owo wene otau ka kala sigo aluhe.”—Daniel 2:44KB.

14. Elongelokalunga lini u wete hali gwanitha po iitegelelwa yelongelokalunga lyashili?

14 Shi ikolelela kwaashono twa za nokukundathana, ipula to ti: ‘Mbela elongelokalunga lini lya kankamekela omalongo galyo agehe kOmbiimbeli nohali tseyithile aantu edhina lyaJehova? Elongelokalunga lini hali ulike ohole yopakalunga, li na eitaalo tali longo muJesus, kaali shi oshitopolwa shuuyuni nohali uvitha kutya Uukwaniilwa waKalunga owo awike tau ka kandula po omaupyakadhi gaantu? Momalongelokalunga agehe kombanda yevi, mbela olini hali gwanitha po iitegelelwa ayihe mbyoka?’ Uushili otau ulike sha yela kutya elongelokalunga ndyoka olyOonzapo dhaJehova.—Jesaja 43:10-12.

OTO KA NINGA PO SHIKE?

15. Oshike ishewe Kalunga a hala tu ninge, kakele kokwiitaala kutya oko e li?

15 Inashi gwana owala okwiitaala Kalunga ngele otwa hala oku mu nyanyudha. Ombiimbeli otayi popi oshili sho tayi ti kutya noompwidhuli odhi itaala kutya Kalunga oko e li. (Jakob 2:19) Ihe osha yela kutya ihadhi longo ehalo lyaKalunga noinadhi hokiwa kuye. Opo tu kale twa hokiwa kuKalunga, katu na owala okwiitaala kutya oko e li, ihe otu na wo okulonga ehalo lye. Otu na wo okutopoka ko komalongelokalunga giifundja nokutaamba ko elongelokalunga lyashili.

16. Oshike omuntu e na okuninga ngele okwa kala ha kutha ombinga momalongelokalunga giifundja?

 16 Omuyapostoli Paulus okwe shi ulike kutya katu na okukutha ombinga momalongelokalunga giifundja. Okwa nyola a ti: “Zii mo mokati kawo, ne mu iyoolole mo muyo. Inamu kala mu na ekwatathano naashoka sha nyata, ongame notandi ke mú taamba.” (2 Aakorinto 6:17; Jesaja 52:11) Onkee ano, Aakriste yashili ohaya yanda kehe shimwe shoka shi na ekwatathano nelongelokalunga lyiifundja.

17, 18. “Babiloni oshinene” oshike, nomolwashike she endelela ‘okuza mo mokati kasho’?

17 Ombiimbeli otayi ulike kutya omalongelokalunga agehe giifundja oge li oshitopolwa ‘shaBabiloni oshinene.’ * (Ehololo 17:5) Edhina ndyoka otali tu dhimbulukitha oshilando shonale shedhina Babilonia, moka omalongelokalunga giifundja ga tameke konima yEyelu lyaNoowa. Omalongo nomikalo odhindji ndhoka dhi li apuhe nena momalongelokalunga giifundja odha tameka muBabilonia shonale. Pashiholelwa, Aababilonia oya li haya longele iikalunga yuukwatatu. Nena omalongelokalunga ogendji oga tala ko Uukwatatu u li elongo lya simanenena. Ihe Ombiimbeli otayi popi sha yela kutya opu na owala Kalunga kashili gumwe awike, Jehova, nosho wo kutya Jesus Kristus Omwana gwe. (Johannes 17:3) Aababilonia oya li wo yi itaala kutya aantu oye na omwenyo ihaagu si ngoka hagu hupu po konima ngele olutu lwa si notagu vulu oku ka mona iihuna mehala lyokuhepekwa. Nena omalongelokalunga ogendji ohaga longo aantu kutya oye na omwenyo ihaagu si nenge ombepo ihaayi si mbyoka hayi vulu okumona iihuna momulilo gwoheli.

18 Molwaashoka elongelokalunga lyaBabilonia shonale olya taandela kombanda yevi alihe, Babiloni Oshinene shonena oshe eleka okupopiwa shi li uukwaniilwa wuuyuni womalongelokalunga giifundja. Kalunga okwa hunganeke wo kutya uukwaniilwa mboka womalongelokalunga giifundja otau ka hanagulwa po ombaadhilila. (Ehololo 18:8) Mbela ou wete kutya omolwashike sha simanenena okukala wa topoka ko koshitopolwa kehe  shaBabiloni Oshinene? Jehova Kalunga okwa hala u ‘ze mo mokati kasho’ nziya manga ku na ethimbo natango.—Ehololo 18:4.

Mokulongela Jehova naantu ye, oto ka mona oshindji shi vulithe pwaashoka to ka kanitha

19. Oto ka mona mo uuwanawa washike mokulongela Jehova?

19 Ngele owa tokola okuza mo melongelokalunga lyiifundja, yamwe otashi vulika ye ethe po okweendathana nangoye. Ihe mokulongela Jehova pamwe noshigwana she, oto ka mona mo uuwanawa oundji u vulithe pwaashoka to kanitha. Ngaashi aalongwa yaJesus yonale mboka ya li ya thiga po iinima yilwe e taye mu landula, oto ka kala u na aamwaho naamwanyoko oyendji yopambepo. Oto ka ninga oshitopolwa shuukwanegumbo uunene womuuyuni auhe wAakriste yashili omamiliyona, mboka taye ke ku ulukila ohole yashili. Oto ka kala wo u na etegameno ekumithi lyomwenyo gwaaluhe ‘muuyuni tau ya.’ (Markus 10:28-30) Konima yethimbo, otashi vulika mboka ye etha po okweendathana nangoye omolweitaalo lyoye ya ka konakone shoka Ombiimbeli tayi ti e taya ningi aalongeli yaJehova.

20. Mboka ye li melongelokalunga lyashili oye na etegameno kutya oshike tashi ka ningwa po monakuyiwa?

20 Ombiimbeli otayi ti kutya masiku Kalunga ote ke eta ehulilo lyonkalelo ndjika yuukolokoshi e te ke yi pingena po nuuyuni uupe wuuyuuki mboka tau ka pangelwa kUukwaniilwa we. (2 Petrus 3:9, 13) Itau ka kala tuu uuyuni uukumithi! Monkalelo ompe yuuyuuki ndjoka otamu ka kala owala elongelokalunga limwe alike, ndyoka lyashili. Mbela kashi shi oshinima shopandunge kungoye okukatuka oonkatu ndhoka dha pumbiwa okutameka okweendathana naalongelikalunga yashili ngashingeyi?

^ okat. 17 Opo u mone uuyelele oundji kutya omolwashike Babiloni Oshinene tashi thaneke uukwaniilwa wuuyuni womalongelokalunga giifundja, tala Oshigwedhelwako pepandja 219-220.