Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Omalongo gashili gOmbiimbeli ogeni naanaa?

 ONTOPOLWA 5

Ekulilo olyo omagano ge li dhingi ga za kuKalunga

Ekulilo olyo omagano ge li dhingi ga za kuKalunga
  • Ekulilo oshike?

  • Olya gandjwa ngiini?

  • Otali ti shike kungoye?

  • Ongiini to vulu okuulika kutya owe li pandula?

1, 2. (a) Uunake omagano haga kala ge na ongushu onene kungoye pauhandimwe? (b) Omolwashike taku vulu okutiwa kutya ekulilo olyo omagano ge na ongushu onenenene ngoka to vulu okupewa?

OMAGANO ge li dhingi kwaagehe ngoka wa pewa ogeni? Omagano inashi pumbiwa ga kale gondilo opo ga kale ga simana. Odhoshili kutya ongushu yashili yomagano ihayi uthwa naanaa kuuwindji wiimaliwa mbyoka ga kotha. Ihe ngele omagano otage ku nyanyudha nenge otaga gwanitha po ompumbwe yolela monkalamwenyo yoye, nena oge na ongushu onene kungoye pauhandimwe.

2 Momagano agehe ngoka to vulu okupewa, omu na gamwe ngoka ga dhenga mbanda komakwawo agehe. Ogo omagano ngoka Kalunga a pa aantu. Okwe tu pa iinima oyindji, ihe omagano ngoka e tu pa ge li dhingi ogo ekuliloyambo lyOmwana, Jesus Kristus. (Mateus 20:28) Ngaashi tatu ke shi mona montopolwa ndjika, ekulilo olyo omagano ge na ongushu onenenene ngoka to vulu okupewa, molwaashoka otali vulu oku ku etela enyanyu olindji notali vulu okugwanitha po oompumbwe dhoye dha simanenena. Ekulilo olyo lela euliko enenenene lyohole yaJehova yoku ku hola.

EKULILO OSHIKE?

3. Ekulilo oshike, noshike twa pumbwa okuuva ko opo tu pandule omagano ngoka gekulilo ge na ongushu onene?

3 Oku shi popya paunathangwa, ekulilo olyo esiloshimpwiyu  lyaJehova lyokumangulula nenge okuhupitha aantu muulunde neso. (Aaefeso 1:7) Opo tu uve ko shoka elongo ndika lyOmbiimbeli tali ti, otwa pumbwa okudhiladhila shoka sha ningilwe po moshikunino shaEden. Otatu vulu owala okuuva ko kutya ekulilo oli li omagano ge na ongushu kutse ngele otu shi shoka Adam a kanitha sho a yono.

4. Osha li tashi ti shike kuAdam okukala nomwenyo gwopantu gwa gwanenena?

4 Sho Jehova a shiti Adam, okwa li e mu pe sha shi na ongushu lela—omwenyo gwopantu gwa gwanenena. Dhiladhila kutya shoka osha li tashi ti shike kuAdam. Molwaashoka okwa li a shitwa nolutu nomadhiladhilo ga gwanenena, ka li ando ta ka kala he ehama nandonando, ta ka kulupa nenge a se. E li omuntu a gwanenena, okwa li e na ekwatathano lyi ikalekelwa naJehova. Ombiimbeli otayi ti kutya Adam ‘oyaKalunga.’ (Lukas 3:38) Onkee ano Adam okwa li e na ekwatathano lyopothingo naJehova Kalunga, lya fa ndyoka hali kala pokati komumati nahe omunahole. Jehova okwa li ha popi nomwanamati gwokombanda yevi Adam, nokwa li e mu pe iilonga yinyanyudha noku mu tseyithila shoka a li a tegelela kuye.—Genesis 1:28-30; 2:16, 17.

5. Ombiimbeli oya hala okutya shike sho tayi ti kutya Adam okwa li a shitwa ‘oshifetha shaKalunga’?

5 Adam okwa li a shitwa ‘oshifetha shaKalunga.’ (Genesis 1:27) Shoka kasha li tashi ti kutya Adam okwa li a fa Kalunga mondjelo. Ngaashi twi ilonga mOntopolwa 1 yembo ndika, Jehova oye ombepo ihaayi monika. (Johannes 4:24) Onkee ano, Jehova ke na olutu lwopanyama. Okushitwa kwaAdam oshifetha shaKalunga osha hala okutya Adam okwa li a shitwa e na omaukwatya ga fa ngoka gaKalunga, ga kwatela mo ohole, uunongo, uuyuuki noonkondo. Adam okwa li a fa He momukalo gulwe gwa simana molwaashoka naye okwa li e na emanguluko okuninga omatokolo. Onkee ano, Adam ka li a fa eshina ndyoka hali vulu owala okulonga shoka lya nuninwa nenge shoka lya longekidhilwa li ninge. Pehala lyaashono, okwa li ta vulu okuninga omatokolo paumwene nokwa li ta vulu okuhogolola pokati kaashono shi li mondjila naashoka  sha puka. Ando okwa hogololele okuvulika kuKalunga, ando okwa vulu okukala nomwenyo sigo aluhe mOparadisa kombanda yevi.

6. Sho Adam a kala inaa vulika kuKalunga, okwa kanitha shike, nosha gumu ngiini oluvalo lwe?

6 Ano osha yela kutya sho Adam a li inaa vulika kuKalunga nokwa li a pangulilwa eso, okwa li a kanitha oshinima shi na ondilo onenenene. Okuyona kwe okwe mu kanithitha omwenyo gwopantu gwa gwanenena nosho wo omalaleko nuuyamba gagwo agehe. (Genesis 3:17-19) Mupyamunene, Adam ini ikanithila owala omwenyo ngoka gu na ondilo, ihe okwe gu kanithile wo noluvalo lwe lwomonakuyiwa. Oohapu dhaKalunga otadhi ti: “Uulunde owe etwa muuyuni komuntu gumwe [Adam], nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Aaroma 5:12) Odhoshili kutya atuheni otwa thigulula uulunde kuAdam. Ano Ombiimbeli otayi ti kutya okwi ‘ilanditha po’ nosho wo oluvalo lwe kuupika wuulunde neso. (Aaroma 7:14) Adam naEva kaya li ye na we etegameno, molwaashoka oya yonene owina kuKalunga. Ihe ongiini shi na ko nasha noluvalo lwawo, natse twa kwatelwa mo?

7, 8. Oshitya ekulilo osha kwatela mo omaityo gopaali geni?

7 Jehova okwa katuka onkatu opo a hupithe aantu okupitila mekulilo. Ekulilo oshike? Oshitya ekulilo osha kwatela mo unene tuu omaityo gopaali. Lyotango, ekulilo olyo ofuto ndjoka hayi futwa shi na ko nasha nokumangulula nenge okulanda ko oshinima. Otali vulu okuyelekanithwa nofuto ndjoka hayi futwa okumangulula omuntu ngoka a kwatwa ombambyona. Etiyali, ekulilo olyo ofuto ndjoka hayi gandjwa okufutila po oshinima. Olya faathana nofuto ndjoka hayi futile po oshinima shoka sha yonwa po. Pashiholelwa, ngele omuntu okwe etitha oshiponga, oku na okufuta omuyalu ngoka gwe eleka lela ongushu yoshinima shoka sha yonwa po.

8 Mbela osha li tashi wapa ngiini okufutila po ashihe shoka twa kanithilwa kuAdam noku tu mangulula muupika  wuulunde neso? Natu kundathaneni ekulilo ndyoka Jehova a gandja naashoka tali ti kutse.

NKENE JEHOVA A GANDJA EKULILO

9. Iikulila ya tya ngiini ya li ya pumbiwa?

9 Molwaashoka opwa li pwa kanithwa omwenyo gwopantu gwa gwanenena, kapwa li nando omwenyo gwopantu inaagu gwanenena gwa li tagu vulu oku gu kulila ko. (Episalomi 49:7, 8) Shoka sha li sha pumbiwa osha li ekulilo li na ongushu yi thike pwaashoka sha kanithwa. Shoka oshi li metsokumwe nekotampango li na ko nasha nuuyuuki wa gwanenena ndyoka tali adhika mOohapu dhaKalunga, tali ti: “Omwenyo omomwenyo.” (Deuteronomium 19:21) Ano oshike sha li tashi vulu okufutila po ongushu yomwenyo gwopantu gwa gwanenena ngoka gwa kanithwa kuAdam? Opwa li pwa pumbiwa omwenyo gwopantu gwa gwanenena gu kale iikulila ya gwana po.—1 Timoteus 2:6.

10. Jehova okwa li a longekidha ngiini ekulilo?

10 Jehova okwa li a longekidha ngiini ekulilo? Okwa li a tumu kombanda yevi gumwe gwomoyanamati yopambepo ya gwanenena. Ihe Jehova ina tuma owala oshishitwa shopambepo kehe. Okwa li a tumu Omwana gwe ngoka e hole unenenene, epona lye. (1 Johannes 4:9, 10) Omwana ngoka okwa li a thigi po ehala lye megulu nehalo ewanawa. (Aafilippi 2:7) Ngaashi twi ilonga montopolwa ya tetekele yembo ndika, Jehova okwa longo oshikumithalonga sho a lundululile omwenyo gwOmwana ngoka moshivalelo shaMaria. Okupitila mombepo ondjapuki yaKalunga, Jesus okwa valwa e li omuntu a gwanenena noka li e na uulunde washa.—Lukas 1:35.

Jehova okwa gandja Omwana gwe epona e li ekulilo omolwetu

11. Ongiini omuntu gumwe a li ta vulu okukala ekulilo lyaantu oyendji?

11 Mbela ongiini omuntu gumwe a li ta vulu okukala ekulilo lyaantu oyendji? Oshe ende ngiini opo aantu ya kale aalunde? Dhimbulukwa kutya sho Adam a yono, okwa kanitha oshiniwe shi na ongushu, omwenyo gwopantu gwa gwanenena. Onkee ano, ka li ta vulu oku gu taambekidha koluvalo lwe. Pehala lyaashono, okwa li a vulu oku lu taambekidha owala uulunde  neso. Jesus ngoka Ombiimbeli tayi mu ithana “Adam ngoka a hugunine,” okwa li e na omwenyo gwopantu gwa gwanenena noina yona sha nandonando. (1 Aakorinto 15:45) Kungawo, Jesus okwa pingena po Adam opo e tu hupithe. Okupitila mokuyamba po omwenyo gwe gwa gwanenena mokuvulika thiluthilu kuKalunga, Jesus okwa gandja iikulila omolwokuyona kwaAdam. Nokungawo Jesus okwa pe oluvalo lwaAdam etegameno.—Aaroma 5:19; 1 Aakorinto 15:21, 22.

12. Oshike sha li shu ulikwa kokumona iihuna kwaJesus?

12 Ombiimbeli otayi hokolola nawa okumona iihuna hoka Jesus a li i idhidhimikile manga inaa sa. Okwa li a dhengwa nonyanya, a alelwa komukalo gu ehameka nokwa si eso li uvitha omwenyo omutoye komuti gwomahepeko. (Johannes 19:1, 16-18, 30; Oshigwedhelwako pepandja 204-206) Omolwashike Jesus a li e na okumona iihuna noonkondo? Montopolwa yilwe yi li komeho membo ndika, otatu ka mona kutya Satana okwa tsu ompata kutya Jehova ke na aapiya yopantu mboka taya ka kala aadhiginini ngele taya makelwa. Mokwiidhidhimika nuudhiginini nonando opwa li okumona iihuna okunene hoka, Jesus okwa gandja eyamukulo dhingi keshongo lyaSatana. Jesus oku ulike kutya omuntu a gwanenena e na emanguluko okuninga omatokolo, okwa li ta vulu okukakatela uudhiginini wa gwanenena kuKalunga kutya nduno Ondiaboli otayi ningi shike. Jehova ka li tuu a nyanyukilwa noonkondo uudhiginini wOmwana ngoka omuholike!—Omayeletumbulo 27:11.

13. Ekulilo olya li lya gandjwa ngiini?

13 Ekulilo olya li lya gandjwa ngiini? Mesiku eti-14 lyomwedhi gwOshijuda Nisan mo 33 E.N., Jehova okwe etha Omwana a gwanenena nokee na ondjo a dhipagwe. Kungawo, Jesus okwa yamba po omwenyo gwe gwopantu gwa gwanenena “lumwe aluke.” (Aahebeli 10:10) Mesiku etitatu konima yeso lye, Jehova okwe mu yumudha a kale ishewe nomwenyo gwopambepo. Sho Jesus a yi megulu, okwa gandja ongushu yomwenyo gwe gwopantu gwa gwanenena gu li ekulilo omolwoluvalo lwaAdam. (Aahebeli 9:24) Jehova okwa taamba  ko eyambo lyaJesus li li ekulilo ndyoka lya li lya pumbiwa okumangulula aantu muupika wuulunde neso.—Aaroma 3:23, 24.

SHOKA EKULILO TALI TI KUNGOYE

14, 15. Opo tu ‘dhiminwe po oondjo dhetu,’ otu na okuninga shike?

14 Nonando inatu gwanenena, otatu vulu okunyanyukilwa omalaleko nuuyamba kaage shi okuyelekwa nasha gekulilo. Natu taleni gamwe gomomauwanawa ngoka tatu mono ngashingeyi nosho wo monakuyiwa omolwomagano ngoka ge li dhingi ga za kuKalunga.

15 Edhiminopo lyoondjo. Molwaashoka otwa thigulula okwaagwanenena, otatu kondjo lela okulonga shoka shu uka. Atuheni ohatu yono moohapu nomiilonga. Ihe okupitila mekuliloyambo lyaJesus, otatu vulu ‘okudhiminwa po oondjo dhetu.’ (Aakolossa 1:13, 14) Ihe opo tu dhiminwe po, otu na okwiiyela lela ombedhi. Otu na wo okugalikana Jehova neifupipiko, tatu mu pula e tu dhimine po pakankameno lyeitaalo lyetu mekuliloyambo lyOmwana.—1 Johannes 1:8, 9.

16. Oshike tashi shi ningi tashi vulika tu longele Kalunga tu na eiyuvo lya yela, nuuwanawa uni eiyuvo lya tya ngaaka tali tu etele?

16 Eiyuvo lya yela koshipala shaKalunga. Eiyuvo li uvite li na ondjo otali vulu oku tu ningitha nuupu tu kale twaahe na etegameno noku tu uvitha kaatu na oshilonga. Ihe okupitila medhiminopo ndyoka lya ningwa tali wapa kekulilo, Jehova pasilohenda lye ote shi ningi tashi vulika tu mu longele tu na eiyuvo lya yela nonando inatu gwanenena. (Aahebeli 9:13, 14) Shoka otashi shi ningi tashi wapa kutse tu kale twa manguluka okupopya naye. Onkee ano, otatu vulu okupopya naye megalikano twa manguluka. (Aahebeli 4:14-16) Okukala neiyuvo lya yela otaku tu pe ombili yopamadhiladhilo, otaku tu ningi tu kale tu uvite tu na oshilonga notaku eta enyanyu.

17. Omalaleko nuuyamba geni ge li taga wapa okumonika molwaashoka Jesus a si molwetu?

17 Etegameno lyomwenyo gwaaluhe moparadisa kombanda yevi. Aaroma 6:23 otaya ti: “Eso olyo ondjambi yuulunde.”  Ovelise oyo tuu ndjoka otayi gwedha ko tayi ti: “Ihe omwenyo gwaaluhe ogwo omagano gesilohenda lyaKalunga muukumwe naJesus Kristus, Omuwa gwetu.” Montopolwa onti-3 yembo ndika, otwa kundathana omalaleko nuuyamba ge na ko nasha nOparadisa kombanda yevi ndjoka tayi ke ya. (Ehololo 21:3, 4) Omalaleko nuuyamba agehe ngoka gomonakuyiwa, oga kwatela mo omwenyo gwaaluhe nuukolele wa gwanenena, iinima mbyoka yi li tayi wapa molwaashoka Jesus okwa si molwetu. Opo tu mone omalaleko nuuyamba ngoka, otwa pumbwa okuulika kutya otwa pandula omagano ngoka gekulilo.

ONGIINI TO VULU OKUULIKA OLUPANDU LWOYE?

18. Omolwashike tu na okupandula Jehova sho e tu pa omagano gekulilo?

18 Omolwashike tu na okupandula Jehova noonkondo omolwekulilo? Omagano ohaga kala unene ge na ongushu ngele omugandji okwa longitha ethimbo lye, oonkambadhala dhe nenge iiniwe ye oku ga longekidha. Omitima dhetu ohadhi kala dha gumwa ngele tu wete kutya omagano ngoka twa pewa oge li euliko lyohole yashili yomugandji kutya oku tu hole shili. Ekulilo olyo omagano ge na ondilo yi vule omagano agehe, molwaashoka Kalunga okwa ningi eiyambo enenenene inaali ningwa nando onale opo e li gandje. Johannes  3:16 ota ti: “Kalunga [okwa] kala e hole uuyuni, oye a gandja Omwana awike.” Ekulilo olyo euliko enenenene lyohole yaJehova yoku tu hola. Oli li wo euliko lyohole yaJesus, molwaashoka okwa gandja nehalo ewanawa omwenyo gwe omolwetu. (Johannes 15:13) Onkee ano, omagano gekulilo oge na oku tu tompa kutya Jehova nOmwana oye tu hole pauhandimwe.—Aagalati 2:20.

Okutseya oshindji shi na ko nasha naJehova oko omukalo gumwe moka to ulike kutya owa pandula omagano ge gekulilo

19, 20. Omomikalo dhini to vulu okuulika kutya owa pandula omagano gekulilo ngoka ga za kuKalunga?

19 Ihe ongiini to vulu okuulika kutya owa pandula omagano gekulilo ngoka ga za kuKalunga? Tangotango, tseya oshindji shi na ko nasha nOmugandji Omunene, Jehova. (Johannes 17:3) Okukonakona Ombiimbeli okupitila membo ndika otaku ke ku kwathela oku mu tseya. Sho to indjipalitha ontseyo yoye yokutseya Jehova, ohole yoye yoku mu hola otayi kala yomuule. Niishewe, ohole ndjoka otayi ke ku ningitha u kale wa hala oku mu nyanyudha.—1 Johannes 5:3.

20 Ulika kutya owi itaala ekuliloyambo lyaJesus. Jesus okwa ti: “Oongoka i itaala Omwana, oku na omwenyo gwaaluhe.” (Johannes 3:36) Ongiini tatu vulu okuulika kutya otwi itaala Jesus? Eitaalo lya tya ngaaka ihali ulikwa owala noohapu. Jakob 2:26 ota ti: ‘Eitaalo lyaa na iilonga, olya sa.’ Odhoshili kutya eitaalo lyashili ohali ulikwa ‘kiilonga,’ sha hala okutya, kwaashoka tatu ningi. Omukalo gumwe moka tatu ulike kutya otwi itaala Jesus ogwo oku mu holela mwaashoka tatu popi nomwaashoka tatu ningi.—Johannes 13:15.

21, 22. (a) Omolwashike tu na okukala pedhano lyokomumvo lyUulalelo wOmuwa? (b) Oshike tashi ka kundathanwa mOntopolwa onti-6 nonti-7?

21 Kala pedhano lyokomumvo lyUulalelo wOmuwa. Ongulohi yomasiku 14 Nisan 33 E.N., Jesus okwa dhikile po edhano lyi ikalekelwa ndyoka Ombiimbeli tayi li ithana “Uulalelo wOmuwa.” (1 Aakorinto 11:20; Mateus 26:26-28) Edhano ndyoka ohali ithanwa wo Edhimbuluko lyeso lyaKristus. Jesus okwe li toto po opo a kwathele aayapostoli ye nosho wo ayehe mboka ya li taya ka ninga Aakriste yashili ya dhimbulukwe kutya  okupitila meso lye e li omuntu a gwanenena, okwa gandja omwenyo gwe gu li iikulila. Shi na ko nasha nedhano ndyoka, Jesus okwa li e ya lombwele a ti: “Shi ningeni nokudhimbulukwa ndje.” (Lukas 22:19) Okudhana Edhimbuluko ohaku tu dhimbulukitha ohole onene ndjoka yu ulikwa kuJehova nosho wo kuJesus okupitila mekulilo. Tse otatu vulu okuulika olupandu lwetu omolwekulilo mokukala pedhano lyokomumvo lyEdhimbuluko lyeso lyaJesus. *

22 Esiloshimpwiyu lyaJehova li na ko nasha nekulilo oli li shili omagano ge na ondilo onenenene. (2 Aakorinto 9:14, 15) Omagano ngoka ge na ondilo onenenene otaga vulu okweetela uuwanawa nokuli naantu mboka ya sa. Ontopolwa onti-6 nonti-7 otadhi ka yelitha kutya ongiini.

^ okat. 21 Opo u mone uuyelele oundji shi na ko nasha naashoka Uulalelo wOmuwa tau ti, tala Oshigwedhelwako pepandja 206-208.