Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Omalongo gashili gOmbiimbeli ogeni naanaa?

 ONTOPOLWA 19

Kala mohole yaKalunga

Kala mohole yaKalunga
  • Okukala tu hole Kalunga otashi ti shike?

  • Ongiini tatu vulu okukala mohole yaKalunga?

  • Jehova ota ka pa ngiini ondjambi mboka haya kala mohole ye?

Mbela oto ka ninga Jehova egameno lyoye pomathimbo ngano giikungulu?

1, 2. Openi tatu vulu okumona egameno lyashili nena?

DHILADHILA nduno ando to ende nondjila ku na omvula nombepo yoshikungulu. Egulu otali tameke okuluudha. Oombadhi otadhi tameke okushela nomingungumo otadhi ngunguma, opo nduno omvula onene yoshikungulu otayi tameke okuloka. Oto tameke okweendelela noonkondo, to kongo ehala lyokwoondama. Ohaluka, ou wete okatala pooha dhondjila. Oka kola, inamu tuta nomu li nawa nokwoondama. Ito ka kala tuu wa pandula ehala ndyoka lyegameno!

2 Otu li methimbo lya piyagana ndyoka tali yelekwa noshikungulu. Oonkalo dhuuyuni otadhi ende tadhi nayipala. Ihe opu na egameno li shi okwiinekelwa ndyoka tali vulu oku tu gamena kiiponga mbyoka tayi vulu okukala tayi tu ehameke. Egameno ndyoka olini? Ndhindhilika shoka omupisalomi ta popi sho ta lombwele Jehova ta ti: “Ongoye omupopili nomugameni gwandje. Ongoye Kalunga kandje, nde ku inekela.”—Episalomi 91:2.

3. Ongiini tatu vulu okuninga Jehova egameno lyetu?

3 Dhiladhila owala kwaashono! Jehova Omushiti nOmupangeli gweshito alihe, ota vulu okukala  egameno lyetu. Ota vulu oku tu gamena, molwaashoka oku na oonkondo oonenenene e vule kehe gumwe nenge kehe shimwe shoka tashi vulu oku tu etela oshiponga. Nokuli nongele otwe ehamekwa, Jehova ota vulu okukutha po uuwehame kehe. Ongiini tatu vulu okuninga Jehova egameno lyetu? Otwa pumbwa oku mu inekela. Niishewe, Oohapu dhaKalunga otadhi tu ladhipike tadhi ti: “Ne mwi ikaleke mohole yaKalunga.” (Judas 21) Eeno, otwa pumbwa okwiikaleka mohole yaKalunga mokukaleka po uukuume wopothingo naTate yetu gwomegulu. Opo nduno otatu vulu okukala neinekelo kutya ote tu gamene. Ihe ongiini tatu vulu okupanga uukuume wa tya ngaaka naye?

ZIMINA OHOLE YAKALUNGA E TO INYENGITHWA KUYO

4, 5. Omikalo dhimwe odhini moka Jehova e tu ulukila ohole?

4 Opo tu kale mohole yaKalunga, otwa pumbwa okuuva ko nkene Jehova e tu ulukila ohole ye. Dhiladhila komalongo gamwe gOmbiimbeli ngoka wi ilonga kekwatho lyembo ndika. Jehova e li Omushiti, okwe tu pa evi li kale egumbo lyetu ewanawa. Okwe li udhitha iikulya oyindji nomeya, oonzo dhopaunshitwe, iinamwenyo iikumithi nomahala omawanawa. Kalunga e li Omunyoli gwOmbiimbeli, okwe tu hololela edhina lye nomaukwatya ge. Kakele kaashono, Oohapu dhe otadhi holola kutya okwa tuma Omwana omuholike Jesus kombanda yevi, nokwe mu etha a mone iihuna noku se omolwetu. (Johannes 3:16) Mbela omagano ngoka otaga ti shike kutse? Otage tu pe etegameno lyonakuyiwa onkumithi.

5 Etegameno lyetu lyonakuyiwa olyi ikolelela wo koshinima shimwe shoka Kalunga a ninga. Jehova okwa dhika po epangelo lyomegulu, Uukwaniilwa wopaMesiasa. Masiku otau ka hulitha po okumona iihuna akuhe notau ka ninga evi oparadisa. Dhiladhila owala kwaashono! Otatu vulu oku ka kala moparadisa ndjoka mombili notu na enyanyu sigo aluhe. (Episalomi 37:29) Manga ethimbo ndyoka inaali thika, Kalunga okwe tu pe ewiliko li na ko nasha nankene tatu vulu okukala nonkalamwenyo ya dhenga mbanda nena. Okwe tu pe wo omagano gegalikano ndyoka okupitila mulyo tatu vulu okupopya naye twa manguluka ethimbo kehe. Ndhoka odho owala omikalo dhimwe po moka Jehova u ulukile aantu ayehe ohole nosho wo ngoye pauhandimwe.

6. Mbela ou na okwiinyenga ngiini kohole ndjoka Jehova e ku ulukila?

 6 Epulo lya simanenena ndyoka u na okwiipula olyo kutya: Mbela otandi ki inyenga ngiini kohole yaJehova? Aantu oyendji otaya ka tya: “Ondi na okukala ndi hole Jehova.” Mbela osho nangoye u uvite ngawo? Jesus okwa ti kutya oshipango oshinenenene kiikwawo ayihe osho: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.” (Mateus 22:37) Osha yela kutya ou na omatompelo ogendji okukala u hole Jehova Kalunga. Ihe mbela okukala u uvite kutya ou na ohole ya tya ngaaka osho owala sha kwatelwa mokukala u hole Jehova nomutima gwoye aguhe, nomwenyo gwoye aguhe nosho wo nomadhiladhilo goye agehe?

7. Mbela osha gwana okukala owala tu uvite kutya otu hole Kalunga? Shi yelitha.

7 Ngaashi sha hokololwa mOmbiimbeli, okuhola Kalunga osha kwatela mo oshindji kaashi shi owala okukala nomaiyuvo kutya otu mu hole. Dhoshili, nonando otu uvite kutya okukala tu hole Jehova osha simanenena, omaiyuvo ga tya ngaaka oge li owala etameko lyohole yashili yoku mu hola. Opo pu holoke omuti gwiiyimati yiiyapula, onkenya yeyapula oyo ya pumbiwa lela. Ihe ngele owa hala eyapula, mbela oto ka kala wa gwanenwa ngele gumwe e ku pe owala onkenya yeyapula? Hasho nando! Sha faathana, okukala u uvite kutya ou hole Jehova Kalunga oku li owala etameko. Ombiimbeli otayi ti: “Ohole yokuhola Kalunga oyo okuvulika kiipango ye. Iipango ye kayi shi iidhigu kutse.” (1 Johannes 5:3) Opo ohole yokuhola Kalunga yi kale yi li paushili, oyi na okwiimika iiyimati iiwanawa. Oyi na okuulikwa okupitila miilonga.—Mateus 7:16-20.

8, 9. Ongiini tatu vulu okuulika ohole yetu yokuhola Kalunga nolupandu lwoku mu pandula?

8 Otatu ulike ohole yetu yokuhola Kalunga ngele tatu dhiginine iipango ye nokutula miilonga omakotampango ge. Kashi shi oshidhigu okuninga ngawo. Oompango dhaJehova pehala lyokukala oondhigu, odha nuninwa oku tu kwathela tu kale nonkalamwenyo ombwanawa, yinyanyudha notayi mbilipaleke. (Jesaja 48:17,  18) Ngele tatu kala metsokumwe newiliko lyaTate yetu gwomegulu Jehova, otatu mu ulukile kutya otwa pandula shili iinima ayihe mbyoka e tu ningila. Shiyemateka, aantu owala aashona muuyuni nena haya pandula iinima mbyoka. Inatu hala okukala ihaatu pandula, ngaashi aantu yamwe mboka ya li ko sho Jesus a li kombanda yevi. Jesus okwa li a aludha aanashilundu omulongo, ihe omunashilundu owala gumwe a li e mu galukile e mu pandule. (Lukas 17:12-17) Natse inatu halelela tuu okukala twa fa omunashilundu ngoka a li e na olupandu, ihe hangaashi mbeyaka omugoyi mboka ya li kaaye na olupandu!

9 Ihe iipango yaJehova mbyoka twa pumbwa okudhiginina oyini? Otwa kundathana oyindji yomuyo membo ndika, ihe natu endululeni yimwe yomuyo. Okudhiginina iipango yaKalunga otaku tu kwathele tu kale mohole ye.

TSIKILA OKUHEDHA POPEPI NAJEHOVA

10. Yelitha to gandja oshiholelwa kutya omolwashike sha simana okutsikila okumona ontseyo yokutseya Jehova Kalunga.

10 Okwiilonga kombinga yaJehova oku li onkatu ya  simanenena mokuhedha popepi naye. Oku na okukala oshinima tashi tsikile. Mbela ando owa li u li moshiheke uusiku to huhulukwa muutalala wamemememe, ando oto ke etha omulilo gu dhime po? Hasho. Oto ka kala to tula po iikuni opo omulilo gu kale gwa tema nawa. Ngele hasho, oto vulu okusa kuutalala. Ngaashi owala iikuni hayi kaleke omulilo gwa tema, “ontseyo yokutseya Kalunga” ohayi koleke ohole yetu yoku mu hola.—Omayeletumbulo 2:1-5.

Ngaashi owala omulilo gwa pumbwa iikuni opo gu kale gwa tema, owa pumbwa ontseyo opo ohole yoye yokuhola Jehova yi kale ya hwama

11. Elongo lyaJesus olya li lya nwetha mo ngiini aalanduli ye?

11 Jesus okwa li a hala aalanduli ye ya tsikile okukala nohole ya hwama yokuhola Jehova nosho wo Oohapu dhe dhoshili dhi na ongushu. Konima yeyumuko lye, Jesus okwa li a longo aalongwa ye yaali kombinga yomahunganeko gontumba ge li mOmanyolo gOshihebeli ngoka ga li ga gwanithilwa muye. Oshizemo osha li shike? Konima yethimbo oya li ya popi ya ti: “Katwa li tuu tu na ehwamo moomwenyo dhetu, sho a popi natse mondjila nokwe tu fatululile Omanyolo”!—Lukas 24:32.

12, 13. (a) Oshike sha ningwa po kunena shi na ko nasha nohole yaantu oyendji yokuhola Kalunga nosho wo Ombiimbeli? (b) Ongiini tatu vulu okukeelela ohole yetu kaayi huhwe?

12 Sho wi ilongo tango omalongo gashili gOmbiimbeli, mbela omwenyo gwoye kagwa li gwa hwama enyanyu, nokawa li mbela u uvite u na uulaadhi nohole yokuhola Kalunga? Osha yela kutya osho wa li u uvite ngawo. Aantu oyendji osho haya kala ye uvite ngawo. Ngashingeyi, eshongo ndyoka wa taalela olyo okutsikila okukala nohole ya hwama noku yi kokeka. Inatu hala okulandula iikala yuuyuni wonena. Jesus okwa hunganeke a ti: ‘Ohole yoyendji otayi huhwa.’ (Mateus 24:12) Ongiini to vulu okukeelela ohole yoye yokuhola Jehova nosho wo oshili yOmbiimbeli kaayi huhwe?

13 Tsikila okumona ontseyo yokutseya Jehova Kalunga naJesus Kristus. (Johannes 17:3) Tedhatedha nenge u dhiladhile muule kombinga yaashoka wi ilonga mOohapu dhaKalunga, mokwiipula to ti: ‘Mbela oshinima shika otashi longo ndje shike kombinga yaJehova Kalunga? Omatompelo galwe ogeni tashi pe ndje ndi kale ndi mu hole nomutima gwandje aguhe, noondunge dhandje adhihe nonomadhiladhilo gandje agehe?’ (Episalomi  119:97) Okutedhatedha kwa tya ngaaka otaku kaleke ohole yoye yokuhola Jehova ya hwama.

14. Ongiini egalikano tali vulu oku tu kwathela tu kaleke ohole yetu yokuhola Jehova ya hwama?

14 Omukalo gumwe natango gwokukaleka ohole yoye yokuhola Jehova ya hwama ogwo okugalikana pandjigilile. (1 Aatessalonika 5:17) MOntopolwa onti-17 yembo ndika, otwi ilonga kutya egalikano oli li omagano ge na ondilo ga za kuKalunga. Ngaashi owala ekwatathano lyaantu hali kala lya kola ngele haya kundathana pandjigilile ya manguluka, osho wo ekwatathano lyetu naJehova hali kolekwa kokukala tatu galikana kuye pandjigilile. Osha simana okuyanda okugalikana omagalikano itaaga zi komutima, sha hala okutya, kaatu galikane omagalikano ga faathana ethimbo kehe nopwaahe na omaiyuvo nenge eityo lyasha. Otwa pumbwa okupopya naJehova ngaashi okanona taka popi nahe omunahole. Otwa hala lela okupopya nesimaneko notwa manguluka, tatu popi oshili notashi zi komutima. (Episalomi 62:8) Eeno, ekonakonombiimbeli lyopaumwene negalikano tali zi komutima oyi li iinima ya simanenena mokulongela Kalunga kwetu, notayi tu kwathele tu kale mohole ye.

LONGELA KALUNGA NENYANYU

15, 16. Omolwashike she eleka okutala ko iilonga yokuuvitha Uukwaniilwa yi li ompito ombwaanawa neliko lyondilo?

15 Okukonakona Ombiimbeli paumwene nokugalikana oku li omukalo moka tatu vulu okulongela Kalunga pauhandimwe. Ihe ngashingeyi natu tale komukalo gumwe moka tatu vulu oku mu longela montaneho: okupopya naantu yalwe kombinga yeitaalo lyetu. Mbela owa lombwela nale aantu yalwe oshili yontumba yOmbiimbeli? Ngele owe shi ninga, osha li ompito ombwaanawa kungoye. Ngele otatu lombwele aantu yalwe oshili ndjoka twi ilonga kombinga yaJehova Kalunga, otatu gwanitha po oshilonga sha simanenena shoka sha pewa Aakriste ayehe yashili shokuuvitha onkundana ombwanawa yUukwaniilwa waKalunga.—Mateus 24:14; 28:19, 20.

16 Omuyapostoli Paulus okwa li a tala ko uukalele we u li oshinima shi na ondilo nokwe u ithana eliko. (2 Aakorinto 4:7, OB-1954) Okupopya naantu kombinga yaJehova Kalunga  nomalalakano ge oko iilonga ya dhenga mbanda mbyoka to vulu okulonga. Oyi li iilonga mbyoka tatu longele Mwene gwetu omwaanawa kwaahe na we notayi etele aantu uuwanawa wa dhenga mbanda. Ngele to kutha ombinga miilonga mbyoka, oto kwathele aanamitima dhu uka ya hedhe popepi naTate yetu gwomegulu  noye ende mondjila ndjoka tayi fala komwenyo gwaaluhe. Mbela opu na ngaa iilonga yilwe natango tayi vulu okukala tayi mbilipaleke noonkondo yi vule mbika? Natango, okugandja uunzapo kombinga yaJehova nOohapu dhe otaku koleke eitaalo lyoye notaku kaleke ohole yoye yoku mu hola ya hwama. Jehova okwa pandula noonkondo oonkambadhala dhoye. (Aahebeli 6:10) Okukala wi ipyakidhila niilonga ya tya ngaaka otaku ku kwathele u kale mohole yaKalunga.—1 Aakorinto 15:58.

17. Omolwashike uukalele wopaKriste we endelela nena?

17 Osha simana okudhimbulukwa kutya iilonga yokuuvitha Uukwaniilwa oye endelela. Omolwashike? Oohapu dhaKalunga otadhi tu lombwele tadhi ti: “Esiku enene lyOMUWA oli li popepi—popepilela notali ya tali endelele.” (Sefanja 1:14) Eeno, ethimbo ndyoka sho Jehova ta ka hulitha po onkalelo ayihe ndjika oli li popepi lela. Aantu oya pumbwa okulondodhwa. Oya pumbwa okutseya kutya ngashingeyi olyo ethimbo lyokuhogolola Jehova a kale Omupangeli gwawo. Ehulilo “itali kalelele ko.”—Habakuk 2:3, OB-1954.

18. Omolwashike tu na okulongela Jehova montaneho pamwe nAakriste yashili?

18 Jehova okwa hala tu mu longele montaneho pamwe nAakriste yashili. Omolwaashono Oohapu dhe tadhi ti: “Tu silathaneni oshimpwiyu, tu kwathathaneni mokuholathana nomokulongelathana uuwanawa. Inatu etha po okugongala pamwe, ngaashi yamwe haa ningi. Ihe natu kumagidhathaneni, unene sho tu wete esiku lyOmuwa tali hedha popepi.” (Aahebeli 10:24, 25) Ngele tatu gongala nooitaali ooyakwetu pokugongala kwopaKriste, otu na ompito ombwanawa okutanga nokulongela Kalunga ketu omuholike. Otatu tungathana wo nokutsaathana omukumo.

19. Ongiini tatu vulu okukoleka ekwatathano lyopahole megongalo lyopaKriste?

19 Sho tatu endathana naalongeli yaJehova ooyakwetu, otatu koleke ekwatathano lyopahole nosho wo uukuume megongalo. Osha simana okukonga omaukwatya omawanawa muyamwe, ngaashi naanaa Jehova ha kongo omaukwatya omawanawa mutse. Ino kala wa tegelela ooitaali ooyakweni ya kale ya gwanenena. Dhimbulukwa kutya atuheni otu li poondondo dha  yoolokathana mokukoka pambepo, nakehe gumwe gwomutse oha ningi omapuko. (Aakolossa 3:13) Kambadhala okupanga uukuume wopothingo naamboka ye hole Jehova shili, nokungawo oto ka koka pambepo. Okulongela Jehova pamwe naamwaho naamwanyoko yopambepo otaku ke ku kwathela u kale mohole yaKalunga. Ongiini Jehova ha gandja ondjambi kwaamboka haye mu longele nuudhiginini nohayi ikaleke mohole ye?

LALAKANENA “OKUKALAMWENYO KWASHILI”

20, 21. “Okukalamwenyo kwashili” oshike, nomolwashike ku li etegameno ekumithi?

20 Jehova oha gandja ondjambi yomwenyo kaapiya ye aadhiginini, ihe omwenyo ngoka ogwa tya ngiini? Mbela otu na ngaa shili omwenyo ngashingeyi? Oyendji yomutse otatu ka tya kutya eeno, otu na omwenyo, molwaashoka ohatu fudha, ohatu li nohatu nu. Kapu na omalimbililo kutya otu na omwenyo. Uuna twa nyanyukwa unene, otashi vulika nokuli tu popye tatu ti: “Ndjino oyo naanaa onkalamwenyo ndji!” Ihe Ombiimbeli otayi ulike kutya kaku na omuntu e na onkalamwenyo yashili nena.

Jehova okwa hala u nyanyukilwe “okukalamwenyo kwashili.” Mbela oto ka kala po u ku nyanyukilwe?

21 Oohapu dhaKalunga otadhi tu ladhipike tu ‘imonene okukalamwenyo kwashili.’ (1 Timoteus 6:19) Oohapu ndhoka otadhi ulike kutya “okukalamwenyo kwashili” okwo oshinima shoka twa tegelela oku ka mona monakuyiwa. Eeno, sho tatu ka kala twa gwanenena, otatu ka kala tu na onkalamwenyo yolela, molwaashoka otatu ka kala ngaashi Kalunga a li a hala tu kale petameko. Sho tatu ka kala meviparadisa tu na uukolele thiluthilu, ombili nenyanyu, otatu ka nyanyukilwa “okukalamwenyo kwashili,” sha hala okutya, omwenyo gwaaluhe. (1 Timoteus 6:12) Mbela kali shi etegameno ekumithi ndyono?

22. Ongiini to vulu “okwiimonena okukalamwenyo kwashili”?

22 Ongiini tatu vulu “okwiimonena okukalamwenyo kwashili”? Montopolwa moka mwa za oohapu ndhoka, Paulus okwa ladhipike Aakriste ya ‘longe uuwanawa’ noya “ninge aayamba yiilonga iiwanawa.” (1 Timoteus 6:18) Onkee ano, osha yela kutya oshindji oshi ikolelela kunkene tatu tula miilonga oshili ndjoka twi ilonga mOmbiimbeli. Ihe mbela Paulus okwa li a hala okutya otatu vulu okwiimonena “okukalamwenyo kwashili” mokulonga iilonga iiwanawa? Hasho, molwaashoka etegameno ndyoka  ekumithi olyi ikolelela owala ‘kesilohenda’ lyaKalunga. (Aaroma 5:15) Nonando ongaaka, Jehova okwa nyanyukwa okupa ondjambi mboka taye mu longele nuudhiginini. Okwa hala oku ku mona to nyanyukilwa “okukalamwenyo kwashili.” Mboka taya kala mohole yaKalunga oya tegelela oku ka kala nomwenyo gwaaluhe ye na enyanyu nombili.

23. Omolwashike sha simanenena okukala mohole yaKalunga?

23 Kehe gumwe gwomutse oku na okwiipula ta ti: ‘Mbela ohandi longele Kalunga metsokumwe naashono a popya mOmbiimbeli?’ Ngele otwa hala okukala mondjila yu uka, otu na okushilipaleka esiku nesiku kutya otatu longele Kalunga momukalo gwu uka. Otatu vulu okukala neinekelo kutya Jehova oye egameno lyetu. Ota ka gamena aapiya ye aadhiginini momasiku ngaka gahugunina gu udha omaupyakadhi guuyuni mbuka wa yonuka. Jehova ote ke tu fala wo muuyuni uupe uukumithi mboka u li popepi ngashingeyi. Itatu ka kala tuu twa nyanyukwa okukala muuyuni wa tya ngaaka! Noitatu ka kala tuu twa nyanyukwa sho twa ninga omatokolo gu uka momasiku ngaka gahugunina! Ngele owa ningi omatokolo ga tya ngaaka ngashingeyi, oto ka nyanyukilwa “okukalamwenyo kwashili” sigo aluhe, ngaashi Jehova Kalunga a li a hala tu kale okuza petameko.

 

Tseya oshindji

ELANDULATHANO LYEKONAKONOMBIIMBELI

Omolwashike wa pumbwa okukonakona Ombiimbeli?

Ombiimbeli otayi kwathele aantu omamiliyona ya mone omayamukulo gomapulo ga simana monkalamwenyo. Mbela nangoye owa hala okumona omayamukulo gomapulo ngoka?