Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Omalongo gashili gOmbiimbeli ogeni naanaa?

 ONTOPOLWA 10

Iishitwa yopambepo otayi vulu oku tu ningila shike?

Iishitwa yopambepo otayi vulu oku tu ningila shike?
  • Mbela aayengeli ohaya kwathele aantu?

  • Oombepo dhuuwinayi odha nwetha mo aantu ngiini?

  • Mbela otwa pumbwa okukala twa tila oombepo dhuuwinayi?

1. Omolwashike twa hala okwiilonga kombinga yaayengeli?

OKUTSEYA omuntu olundji ohaku kala kwa kwatela mo okwiilonga sha kombinga yuukwanegumbo waandjawo. Okutseya Jehova Kalunga nako okwa kwatela mo okutseya nawa uukwanegumbo we waayengeli. Ombiimbeli otayi popi aayengeli ye li ‘oyana aamati yaKalunga.’ (Job 38:7, KB) Mbela onkandangala yini taya dhana mokugwanithwa kwelalakano lyaKalunga? Mbela oya dhana onkandangala mondjokonona yaantu? Mbela aayengeli otaya vulu oku ku ningila sha monkalamwenyo? Ngele osho, ongiini mbela?

2. Aayengeli oya shitwa kulye, noye li yangapi?

2 Ombiimbeli oya popya shi na ko nasha naayengeli iikando omathele. Natu konakoneni gamwe gomomanyolo ngoka taga popi aayengeli opo tu ilongeni oshindji kombinga yawo. Aayengeli oya shitwa kulye? Aakolossa 1:16 otaya ti: “Kalunga okwa shititha Kristus iinima ayihe yomegulu noyokombanda yevi.” Onkee ano iishitwa ayihe yopambepo mbyoka hayi ithanwa aayengeli oya shitwa kuJehova Kalunga okupitila mOmwana gwosheeli. Aayengeli oye li yangapi? Ombiimbeli otayi ulike kutya opwa shitwa aayengeli omamiliyona omathele, naayehe oye na oonkondo.—Episalomi 103:20. *

3. Job 38:4-7 ote tu lombwele shike shi na ko nasha naayengeli?

 3 Oohapu dhaKalunga, Ombiimbeli, otadhi tu lombwele kutya sho evi lya shitwa, ‘oyana ayehe aamati yaKalunga oya nyanyukwa.’ (Job 38:4-7, KB) Onkee ano aayengeli oya kala ko okuza nale manga aantu inaaya shitwa, nomanga nokuli evi lya li inaali shitwa. Ovelise ndjoka yOmbiimbeli otayi ulike wo kutya aayengeli oye na omaiyuvo, omolwaashono tayi ti kutya oya li ya ‘nyanyukwa pamwe.’ Ndhindhilika kutya ‘oyana ayehe aamati yaKalunga’ oya li ya nyanyukwa pamwe. Pethimbo ndyoka, aayengeli ayehe oya li oshitopolwa shuukwanegumbo wa hangana tau longele Jehova Kalunga.

EKWATHO NEGAMENO LYAAYENGELI

4. Ombiimbeli otayi ulike ngiini kutya aayengeli aadhiginini oye na ko nasha naashoka aantu taya ningi?

4 Okuza sho iishitwa iidhiginini yopambepo ya mono nkene aantu yotango taya shitwa, oya kala yi na ohokwe onene maantu mboka tayi indjipala nosho wo mokugwanithwa kwelalakano lyaKalunga. (Omayeletumbulo 8:30, 31; 1 Petrus 1:11, 12) Ihe mokweendela ko kwethimbo, aayengeli oya mono kutya aantu oyendji oye etha po okulongela Omushiti gwawo omunahole. Kapu na omalimbililo kutya shoka osha li sha yemateke aayengeli aadhiginini. Mepingathano naashoka, ngele omuntu gumwe ta galukile kuJehova, ‘aayengeli ohaya kala ya nyanyukwa.’ (Lukas 15:10) Molwaashoka aayengeli oye na ko nasha lela nonkalonawa yaamboka taya longele Kalunga, itashi kumitha sho Jehova a kala he ya longitha iikando niikando okukoleka nokugamena aapiya ye aadhiginini kombanda yevi. (Aahebeli 1:7, 14) Tala kiiholelwa yimwe.

“Kalunga okwa tumu omuyengeli gwe, a mutike omakana goonime.”Daniel 6:22

5. Iiholelwa yokukwathelwa kaayengeli yini tatu adha mOmbiimbeli?

5 Aayengeli yaali oya li ya kwathele omulumentu omuyuuki Lot noyanakadhona ya hupe mehanagulo lyaakolokoshi miilando yaSodom naGomorra, moku ya pititha mo muyo. (Genesis 19:15, 16) Omathelemimvo konima yaashono, omupolofeti Daniel okwa li u umbilwa mekololo lyooniime, ihe inadhi mu ninga sha nokwa popi a ti: “Kalunga okwa tumu omuyengeli gwe, a mutike omakana goonime.” (Daniel 6:22) Methelemumvo lyotango E.N., omuyengeli gumwe okwa li a mangulula omuyapostoli  Petrus mondholongo. (Iilonga 12:6-11) Natango aayengeli oya li ya yambidhidha Jesus petameko lyuukalele we kombanda yevi. (Markus 1:13) Nokathimbo okafupi manga Jesus inaa sa, okwa li a holokelwa komuyengeli, e te “mu tsu omukumo.” (Lukas 22:43) Shoka kasha li tuu ehekeleko kuJesus pomathimbo ngoka ga li ga simanenena monkalamwenyo ye!

6. (a) Aayengeli ohaya gamene ngiini aapiya yaKalunga nena? (b) Omapulo geni tatu ka kundathaneni ngashingeyi?

6 Nena aayengeli ihaya holokele we aapiya yaKalunga kombanda yevi ye wetike. Nonando ihaya monika we kaantu, aayengeli yaKalunga aanankondo ohaya gamene natango aapiya ye, unene tuu kiinima mbyoka ya nika oshiponga pambepo. Ombiimbeli otayi ti: “Omuyengeli gwOMUWA ota tonatele mboka haa vulika kOMUWA note ya hupitha moshiponga.” (Episalomi 34:7) Mbela omolwashike oohapu ndhoka dhi na oku tu hekeleka noonkondo? Omolwaashoka opu na iishitwa yopambepo iikolokoshi noya nika oshiponga mbyoka ya hala oku tu hanagula po. Mbela oyo oolye? Oya za peni? Ongiini hayi kambadhala oku tu etela oshiponga? Opo tu mone omayamukulo komapulo ngoka, natu konakoneni paufupi oshinima shoka sha ningwa petameko lyondjokonona yaantu.

IISHITWA YOPAMBEPO MBYOKA YI LI AATONDI YETU

7. Satana okwe shi pondola okugamuna ko aantu ye thike peni kuKalunga?

7 Ngaashi twi ilonga mOntopolwa onti-3 yembo ndika, gumwe gwomaayengeli okwe etha ehalo lyokupangela ooyakwawo li koke muye, nokungawo okwa tukuluthile Kalunga oshipotha. Konima yethimbo, omuyengeli ngoka okwa ka tseyika e li Satana Ondiaboli. (Ehololo 12:9, OB-1954) Uule womathelemimvo 16 konima sho Satana a pukitha Eva, okwe shi pondola okugamuna ko konyala aantu ayehe kuKalunga, kakele kaantu aashona mboka ya li aadhiginini, ngaashi Abel, Henok naNoowa.—Aahebeli 11:4, 5, 7.

8. (a) Oshe ende ngiini opo aayengeli yamwe ya ninge oompwidhuli? (b) Opo oompwidhuli dhi hupe pEyelu lyopethimbo lyaNoowa, odha li dha ningi po shike?

8 Pethimbo lyaNoowa, aayengeli yamwe oya li wo ya tukuluthile Jehova oshipotha. Oya li ya thigi po omahala gawo muukwanegumbo  waJehova womegulu nokuya kombanda yevi e taya lundulukile momalutu gopanyama. Omolwashike mbela? Otatu lesha muGenesis 6:2, taku tiwa: “Aamati aana yaKalunga oya tala aakadhona aana yaantu yo opala noya hokana mboka ye yi ihogololele.” Ihe Jehova Kalunga ine etha iilonga yaayengeli mboka neyonuko ndyoka ya li ye etele aantu, yi tsikile. Okwe eta eyelu muuyuni auhe kombanda yevi, ndyoka lya kombo po aakolokoshi ayehe, e ta hupitha owala aapiya ye aadhiginini. (Genesis 7:17, 23) Onkee ano, aayengeli aanashipotha nenge oompwidhuli oya li ya thininikwa ya thige po omalutu gawo gopanyama e taya shuna megulu ye li iishitwa yopambepo. Oya li yi igameke kOndiaboli ndjoka ya ningi ‘omukuluntu gwoompwidhuli.’—Mateus 9:34.

9. (a) Oshike sha li sha ningilwa oompwidhuli sho dha li dha shuna megulu? (b) Otatu ka konakona shike shi na ko nasha noompwidhuli?

 9 Sho aayengeli mboka ihaaya vulika ya li ya shuna megulu, yo ngaashi omupangeli gwawo Satana, kaya li we taya vulu okukala oshitopolwa shuukwanegumbo waKalunga waayengeli. (2 Petrus 2:4) Nonando nena itaya vulu okulundulukila momalutu gopanyama, otaya nwetha mo natango aantu nenwethomo ewinayi noonkondo. Kekwatho lyoompwidhuli ndhoka, Satana ‘ota pukitha uuyuni auhe.’ (Ehololo 12:9; 1 Johannes 5:19) Ngiini? Oompwidhuli ohadhi longitha unene omikalo ndhoka dha nunina okupukitha nadho aantu. (2 Aakorinto 2:11) Natu konakoneni dhimwe dhomomikalo ndhoka.

NKENE OOMPWIDHULI HADHI PUKITHA AANTU

10. Uumpulile oshike?

10 Opo oompwidhuli dhi pukithe aantu, ohadhi longitha uumpulile. Uumpulile owo okukala nekwatathano noompwidhuli momukalo gu ukilila nomokupitila maapopi noompwidhuli yopantu. Ombiimbeli oyi indika uumpulile notayi tu londodha tu kale kokule nakehe shimwe shoka shi na ekwatathano nawo. (Aagalati 5:19-21) Oompwidhuli ohadhi longitha uumpulile ngaashi owala aayuli yoohi haya longitha uukulya opo ya yule oohi. Omuyuli gwoohi oha longitha uukulya wi ili nowi ili opo a kwate oohi dhomaludhi gi ili nogi ili. Oombepo dhuuwinayi nadho ohadhi longitha uumpulile womaludhi gi ili nogi ili opo dhi nwethe mo aantu yomaludhi agehe.

11. Eanekelo oshike, nomolwashike tu na oku li yanda?

11 Uukulya wumwe mboka hau longithwa koompwidhuli owo eanekelo. Eanekelo oshike? Olyo okukambadhala okutseya kombinga yonakuyiwa nenge kombinga yoshinima kaashi shiwike. Omaludhi gamwe gokwaanekela ongaashi okutala “momukonda,” okutala “mokakola,” okufatulula okulila kwontumba kwiinamwenyo nosho wo oondjodhi, okutongolola omisinda ndhoka dhi li peke nosho wo uuteyi wiipo. Nonando aantu oyendji ohaya tala ko okwaanekela ku li oshinima inaashi nika oshiponga, Ombiimbeli otayi ulike kutya aayanekeli noombepo dhuuwinayi oyo iinima mbyoka hayi endele pamwe. Pashiholelwa, Iilonga 16:16-18 (OB-1954) otayi popi ‘ombepo yuumpulile’  ndjoka ya li hayi vulitha okakadhona kamwe ka ‘hunganeke.’ Ihe kaka li we taka vulu okuhunganeka sho ompwidhuli ya tidhwa mo muko.

Oompwidhuli ohadhi longitha omikalo dhi ili nodhi ili okupukitha aantu

12. Omolwashike sha nika oshiponga okukambadhala okupopya noonakusa?

12 Omukalo gulwe natango moka oompwidhuli hadhi pukitha aantu ogwo oku ya ladhipika ya popye noonakusa. Aantu mboka ya nika oluhodhi omolweso lyomuholike gwawo olundji ohaya pukithwa nomadhiladhilo ga puka kombinga yaamboka ya sa. Omupopi noompwidhuli otashi vulika a gandje uuyelele wi ikalekelwa nenge tashi vulika a popye newi lya fa naanaa lyanakusa. Oshizemo, aantu oyendji ohayi itaalithwa kutya oonakusa oye na shili omwenyo nonokutya okuninga ekwatathano nayo otaku ka kwathela aanamwenyo yi idhidhimikile oluhodhi. Ihe ehekeleko kehe lya tya ngaaka olyiifundja lela nolya nika oshiponga. Omolwashike mbela? Omolwaashoka oompwidhuli ohadhi vulu okuholela ewi lyomuntu ngoka a sa nokupa omupopi noombepo uuyelele kombinga yanakusa. (1 Samuel 28:3-19) Mepingathano naashoka, ngaashi twi ilonga mOntopolwa  onti-6, oonakusa kaye na omwenyo. (Episalomi 115:17) Onkee ano, ngoka “ta kongo omapukululo kaasi,” okwa pukithwa koombepo dhuuwinayi noita katuka pahalo lyaKalunga. (Deuteronomium 18:10, 11, KB; Jesaja 8:19) Nomolwaashono, kala wa kotoka waaha ye momwigo ngoka gwa nika oshiponga, ngoka hagu longithwa koompwidhuli.

13. Aantu mboka ya li haya tila nale oompwidhuli oya vulu okuninga shike?

13 Oombepo dhuuwinayi ihadhi pukitha owala aantu, ihe ohadhi ya tilitha wo. Nena Satana noompwidhuli dhe oya tseya kutya oye na ko “okathimbo okafupi kowala” manga iilonga yawo inaayi hulithwa po, noya nika oshiponga unene shi vulithe nale. (Ehololo 12:12, 17) Ihe nonando osho shi li ngawo, aantu omayuvi mboka ya li haya kala ya tila oombepo dhuuwinayi dha tya ngaaka esiku kehe, oya vula okumanguluka ko kuumbanda mboka. Mbela oye shi enda ngiini? Omuntu ota vulu okuninga shike nonando oha kutha nale ombinga muumpulile?

NKENE TATU VULU OKUKONDJITHA OOMBEPO DHUUWINAYI

14. Ngaashi Aakriste yomethelemumvo lyotango yomuEfeso, ongiini tatu vulu okumanguluka ko koombepo dhuuwinayi?

14 Ombiimbeli otayi tu lombwele nkene tu na okukondjitha oombepo dhuuwinayi nonkene tu na okumanguluka ko kudho. Tala koshiholelwa shAakriste yomethelemumvo lyotango moshilando shaEfeso. Yamwe yomuyo oya li ya kutha ombinga muumpulile manga inaaya ninga Aakriste. Sho ya li ya tokola okumanguluka ko kuumpulile, oya li ya ningi po shike? Ombiimbeli otayi ti: “Oyendji yomwaamboka ya li haa longitha uumpulile, oye eta omambo gawo agehe taga popi uumpulile e taye ga fike po montaneho yaantu ayehe.” (Iilonga 19:19) Mokuhanagula po omambo gawo ge na ko nasha nuumpulile, Aakriste mboka oya tulile po oshiholelwa mboka ya hala okukondjitha oombepo dhuuwinayi nena. Aantu mboka ya hala okulongela Jehova oya pumbwa okweekelahi kehe shimwe shoka shi na ekwatathano nuumpulile. Shoka osha kwatela mo iinima mbyoka tayi ladhipike okukutha ombinga muumpulile noku u ninga wa fa uhokitha nounyanyudha, ngaashi omambo, iifo, ookino, omathano nuungalo woomusika.  Omwa kwatelwa wo iiketi nenge iinima yimwe mbyoka hayi zalwa omolwokwiigamena kuuwinayi.—1 Aakorinto 10:21.

15. Oshike twa pumbwa okuninga opo tu kondjithe oombepo dhuuwinayi?

15 Oomvula dhontumba konima sho Aakriste yomuEfeso ya li ya hanagula po omambo gawo ge na ko nasha nuumpulile, omuyapostoli Paulus okwa li e ya nyolele a ti: ‘Tse otatu kondjitha oonkondo dhuuwinayi.’ (Aaefeso 6:12) Oompwidhuli kadha li dha sholola. Odha li natango tadhi kambadhala okusinda Aakriste mboka. Mbela oya li ya pumbwa okuninga po shike natango? Paulus okwa ti: “Ethimbo alihe zaleni eitaalo ongehuuyanza, opo mu wape okudhima nalyo iikuti ayihe ya hwama omulilo mbyoka tayi umbwa kuMwiinayi [Satana].” (Aaefeso 6:16) Mpo ngaa pu thike okukola kwehuyanza lyetu lyeitaalo, opo ngaa tapu ka kala pu thike okuvula kwetu okukondjitha oombepo dhuuwinayi.—Mateus 17:20.

16. Ongiini tatu vulu okukoleka eitaalo lyetu?

16 Ihe ongiini tatu vulu okukoleka eitaalo lyetu? Omokukonakona Ombiimbeli. Okukola kwekuma okwi ikolelela thiluthilu kokukola kwekankameno lyalyo. Momukalo gwa faathana, okukola kweitaalo lyetu okwi ikolelela thiluthilu kokukola kwekankameno lyalyo ndyoka li li ontseyo yashili yOohapu dhaKalunga, Ombiimbeli. Ngele tatu lesha nokukonakona Ombiimbeli kehe esiku, eitaalo lyetu otali ka kala lya kola. Ngaashi ekuma lya kola, eitaalo lya tya ngaaka otali ke tu gamena kenwethomo lyoombepo dhuuwinayi.—1 Johannes 5:5.

17. Onkatu yini twa pumbwa okukatuka opo tu kondjithe oombepo dhuuwinayi?

17 Onkatu yimwe yini Aakriste mboka yomuEfeso ya li ya pumbwa okukatuka? Oya li ya pumbwa natango egameno molwaashoka oya li moshilando shu udha enwethomo lyoompwidhuli. Omolwaashono Paulus a li e ya lombwele a ti: “Ayihe yi longeni negalikano okwiindila ekwatho lyaKalunga. Galikaneni aluhe, Ombepo ngaashi te mú wilike.” (Aaefeso 6:18) Molwaashoka natse otu li muuyuni mbuka wu udha enwethomo lyoompwidhuli, okugalikana kuJehova twa mana mo opo e tu gamene okwa simanenena mokukondjitha oombepo dhuuwinayi. Ihe otwa pumbwa okulongitha edhina lyaJehova momagalikano getu.  (Omayeletumbulo 18:10) Onkee ano, otu na okutsikila okugalikana kuKalunga e tu “gamene kuMwiinayi,” Satana Ondiaboli. (Johannes 17:15) Ngele tatu galikana ngawo twa mana mo, Jehova ota ka yamukula omagalikano getu.—Episalomi 145:19.

18, 19. (a) Omolwashike tatu vulu okukala tu na uushili kutya otatu ka sindana mokukondjitha iishitwa yopambepo iikolokoshi? (b) Epulo lini tali ka yamukulwa montopolwa tayi landula?

18 Oombepo dhuuwinayi odha nika oshiponga, ihe inatu pumbwa okukala twe dhi tila ngele otatu kondjitha Ondiaboli nokuhedha popepi naKalunga mokulonga ehalo lye. (Jakob 4:7, 8) Oonkondo dhoombepo dhuuwinayi odha ngambekwa. Oombepo dhuuwinayi ndhoka odha li dha geelwa pethimbo lyaNoowa nodha tegelela epangulo lyadho lyahugunina monakuyiwa. (Judas 6) Dhimbulukwa wo kutya otu na egameno lyaayengeli yaJehova aanankondo. (2 Aakwaniilwa 6:15-17) Aayengeli mboka oya halelela tu pondole mokukondjitha oombepo dhuuwinayi. Oku shi popya pathaneko, aayengeli aayuuki otaye tu tsu omukumo. Onkee ano, natu kaleni popepi naJehova nosho wo nuukwanegumbo we wiishitwa yopambepo iidhiginini. Natu yandeni wo oludhi kehe lwuumpulile nokutula aluhe miilonga omayele gOohapu dhaKalunga. (1 Petrus 5:6, 7; 2 Petrus 2:9) Opo nduno otatu ka kala tu na uushili kutya otatu ka sindana mekondjo lyetu lyokukondjitha iishitwa yopambepo iikolokoshi.

19 Ihe omolwashike Kalunga e ethele oombepo dhuuwinayi dhi kale po nosho wo uukolokoshi mboka tau monitha aantu iihuna noonkondo? Epulo ndyoka otali ka yamukulwa montopolwa tayi landula.

^ okat. 2 Shi na ko nasha naayengeli aayuuki, Ehololo 5:11 (OB-1954) otali ti: ‘Omwaalu gwawo ogwa li omayuvi omulongo lwomayuvi omulongo neyuvi lweyuvi.’ Onkee ano Ombiimbeli otayi ulike kutya Kalunga okwa shiti aayengeli omamiliyona omathele.