Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Omalongo gashili gOmbiimbeli ogeni naanaa?

 OSHIGWEDHELWAKO

“Babiloni oshinene” oshike?

“Babiloni oshinene” oshike?

EMBO lyEhololo oli na omautumbulilo ogendji gopathaneko. Pashiholelwa, otali popi omukiintu ngoka e li ohonda a nyolwa edhina moshipala she, “Babiloni oshinene.” Omukiintu ngoka ota popiwa e li a kuutumba kombanda ‘yiigwana noongundu dhaantu.’ (Ehololo 17:1, 5, 15) Molwaashoka kapu na omukiintu gwolelalela ta vulu okuninga ngawo, osha yela kutya Babiloni Oshinene omukiintu gwopathaneko. Ihe mbela ohonda ndjoka yopathaneko otayi thaneke shike?

MEhololo 17:18, omukiintu oye tuu ngoka gwopathaneko ota hokololwa e li “oshilando oshinene shoka tashi pangele aakwaniilwa yokombanda yevi.” Oshitya “oshilando” otashi ulike kutya omukiintu ngoka gwopathaneko oku li ongundu yaantu yu unganekwa. Molwaashoka ‘oshilando shoka oshinene’ otashi pangele  ‘aakwaniilwa ayehe yokombanda yevi,’ omukiintu ngoka gwedhina Babiloni Oshinene oku li ehangano lyomuuyuni auhe ndyoka li na enwethomo enene. Oshilando shoka oshe eleka okwiithanwa uukwaniilwa womuuyuni auhe. Mbela uukwaniilwa woludhi luni? Uukwaniilwa wopalongelokalunga. Tala nkene oovelise oonkwawo ndhoka dhi li membo lyEhololo tadhi tu kwathele tu thike pehulithodhiladhilo ndyoka.

Uukwaniilwa otau vulu okukala wopapolotika, wopangeshefa nenge wopalongelokalunga. Omukiintu gwedhina Babiloni Oshinene ke shi uukwaniilwa wopapolotika molwaashoka Oohapu dhaKalunga otadhi ti kutya “aakwaniilwa yokombanda yevi,” nenge omahangano gopapolotika guuyuni mbuka, oga “hondele” naye. Oluhondelo lwe otalu ulike kuukuume mboka a panga naapangeli yokombanda yevi notalu yelitha kutya omolwashike ti ithanwa “ohonda kamana.”—Ehololo 17:1, 2; Jakob 4:4.

Babiloni Oshinene itashi vulu okukala uukwaniilwa wopangeshefa molwaashoka ‘aahalithi yiipindi yomuuyuni’ otaya thaneke oongeshefa, ndhoka tadhi ke shi nikila oluhodhi pokuhanagulwa po kwasho. Odhoshili kutya aakwaniilwa naahalithi otaya hokololwa ya tala Babiloni Oshinene ye li “ya thikama kokule.” (Ehololo 18:3, 9, 10, 15-17) Onkee ano, oshi li pandunge okuthika pehulithodhiladhilo kutya Babiloni Oshinene kashi shi uukwaniilwa wopapolotika nenge wopangeshefa, ihe owopalongelokalunga.

Uushili kutya Babiloni Oshinene oshi li uukwaniilwa wopalongelokalunga otau kolekwa kepopyo kutya ohashi pukitha iigwana ayihe “nuumpulile” washo. (Ehololo 18:23) Molwaashoka omaludhi agehe guumpulile oge na ekwatathano nomalongelokalunga noga nwethwa mo koompwidhuli, itashi kumitha sho Ombiimbeli tayi ti kutya Babiloni Oshinene oshi li “ehala lyoompwidhuli.” (Ehololo 18:2; Deuteronomium 18:10-12) Uukwaniilwa mboka otau hokololwa wo kutya ou li ompinge thiluthilu nelongelokalunga lyashili, tau hepeke ‘aaprofeti’ nosho wo ‘aayapuki.’ (Ehololo 18:24, OB-1954) Babiloni Oshinene oshi tonde unene elongelokalunga lyashili, molwaashoka ohashi hepeke nonyanya ‘aahokololi yaJesus’ noku ya dhipaga nokuli. (Ehololo 17:6, OB-1954) Onkee ano, osha yela kutya omukiintu ngoka ti ithanwa Babiloni Oshinene ota thaneke uukwaniilwa wuuyuni womalongelokalunga giifundja, ngoka ga kwatela mo omalongelokalunga agehe ngoka ge li ompinge naJehova Kalunga.