ဘုရားသခင့်ရည်ရွယ်တော်မူချက်ကိုပြည့်စုံစေသည့် စီမံခန့်ခွဲမှုတစ်ရပ်

ဖွင့်ပါ

‘[ဘုရားသခင်သည်] မိမိအလိုတော်နှင့်အညီ အလုံးစုံတို့ကို စီရင်ပြုပြင်တော်မူ၏။’—ဧဖက် ၁:၁၁။

၁။ ယေဟောဝါသက်သေများ၏ အသင်းတော်အားလုံးသည် ၂၀၀၆ ခုနှစ် ဧပြီလ ၁၂ ရက်နေ့တွင် အဘယ်ကြောင့် စုဝေးကြမည်နည်း။

ဆယ့်ခြောက်သန်းခန့်သောသူတို့သည် ၂၀၀၆ ခုနှစ် ဧပြီလ ၁၂ ရက်၊ ဗုဒ္ဓဟူးနေ့ ညနေပိုင်းတွင် သခင့်ညစာစားပွဲ ကျင်းပရန် စုရုံးကြပေမည်။ စည်းဝေးကျင်းပရာ နေရာအသီးသီး၌ ခရစ်တော်၏ကိုယ်ခန္ဓာကို ကိုယ်စားပြုသည့် တဆေးမဲ့မုန့်နှင့် ကိုယ်တော်သွန်းလောင်းရာ အသွေးတော်ကို ပုံဆောင်သော အနီရောင်စပျစ်ဝိုင်တို့ကို စားပွဲပေါ်တွင် တည်ခင်းထားပေမည်။ ယေရှု၏သေခြင်း အောက်မေ့ရာပွဲအဓိပ္ပာယ်ကို ရှင်းပြသည့် ဟောပြောချက်ပြီးခါနီးတွင် တက်ရောက်လာသူတို့အား အထိမ်းအမှတ်များဖြစ်သော မုန့်နှင့်စပျစ်ဝိုင်တို့ကို လက်ဆင့်ကမ်းပေးပါမည်။ ယေဟောဝါသက်သေများ၏ အသင်းတော်အနည်းငယ်တွင် မုန့်နှင့်စပျစ်ဝိုင်သုံးဆောင်မည့်သူ တစ်ဦးနှစ်ဦးမျှသာရှိပေမည်။ သို့သော် အသင်းတော်အများစုတွင်မူ သုံးဆောင်မည့်သူ တစ်ဦးမျှရှိမည်မဟုတ်ချေ။ ကောင်းကင်တွင် အသက်ရှင်ရန်မျှော်လင့်သည့် ခရစ်ယာန်အနည်းငယ်သာ သုံးဆောင်ကြပြီး မြေကြီးပေါ်တွင် ထာဝစဉ်အသက်ရှင်ရန်မျှော်လင့်သည့် လူအများစုမှာမူ အဘယ်ကြောင့် မသုံးဆောင်ကြသနည်း။

၂၊ ၃။ (က) ယေဟောဝါသည် မိမိရည်ရွယ်တော်မူချက်အတိုင်း မည်သို့ဆက်၍ ဖန်ဆင်းတော်မူခဲ့သနည်း။ (ခ) ယေဟောဝါသည် ကမ္ဘာမြေကြီးနှင့် လူသားများကို အဘယ်ရည်ရွယ်ချက်ဖြင့် ဖန်ဆင်းတော်မူခဲ့သနည်း။

^၂ယေဟောဝါသည် ရည်ရွယ်တော်မူချက်ရှိသည့် ဘုရားသခင်ဖြစ်တော်မူ၍ ၎င်းကိုပြည့်စုံစေရန် ‘မိမိအလိုတော်နှင့်အညီ အလုံးစုံတို့ကို စီရင်ပြုပြင်တော်မူ၏။’ (ဧဖက် ၁:၁၁) ကိုယ်တော်သည် တစ်ပါးတည်းသောသားတော်ကို ဦးဆုံးဖန်ဆင်းတော်မူခဲ့၏။ (ယောဟန် ၁:၁၊ ၁၄; ဗျာ. ၃:၁၄) ထို့နောက် ဤသားတော်အားဖြင့် ယေဟောဝါသည် ကောင်းကင်သားများကို ဖန်ဆင်းပြီး နောက်ဆုံးတွင် ကမ္ဘာကြီးနှင့် လူသားအပါအဝင် ရူပစကြဝဠာကို ဖန်ဆင်းတော်မူခဲ့သည်။—ယောဘ ၃၈:၄၊ ၇; ဆာလံ ၁၀၃:၁၉-၂၁; ယောဟန် ၁:၂၊ ၃; ကောလောသဲ ၁:၁၅၊ ၁၆။

^၃ယေဟောဝါသည် ခရစ်ယာန်ဘောင်ချာ့ခ်ျများစွာ သွန်သင်သည့်အတိုင်း ကောင်းကင်တွင် ကောင်းကင်သားများ တိုးများလာစေရန် ကမ္ဘာကြီးကို စမ်းသပ်ရာအရပ်အဖြစ် ဖန်ဆင်းတော်မမူခဲ့ချေ။ မြေကြီးကို “သတ္တဝါနေစရာဖို့” အတိအကျ ရည်ရွယ်ပြီး ဖန်ဆင်းတော်မူခဲ့၏။ (ဟေရှာယ ၄၅:၁၈) ဘုရားသခင်သည် မြေကြီးကို လူသားများအတွက်၊ လူသားများကို မြေကြီးအတွက် ဖန်ဆင်းတော်မူခဲ့၏။ (ဆာလံ ၁၁၅:၁၆) ကမ္ဘာမြေတစ်ခွင်လုံး ပရဒိသုဖြစ်လာကာ ယင်းကို ပြုစုစောင့်ရှောက်မည့် ဖြောင့်မတ်သူများဖြင့် ပြည့်လာရန်ဖြစ်သည်။ တစ်နေ့သောအခါ ကောင်းကင်သို့သွားမည်ဟူသည့် မျှော်လင့်ချက်ကို ပထမလူသားမောင်နှံအား တစ်ခါမျှမပေးခဲ့ချေ။—ကမ္ဘာဦး ၁:၂၆-၂၈; ၂:၇၊ ၈၊ ၁၅။

ယေဟောဝါ၏ရည်ရွယ်တော်မူချက်ကို စောဒကတက်

၄။ အကြွင်းမဲ့ပိုင်သအုပ်စိုးမှု ယေဟောဝါကျင့်သုံးပုံကို လူ့သမိုင်းအစတွင် မည်သို့စောဒကတက်ခဲ့သနည်း။

^၄ဘုရားသခင်၏ ကောင်းကင်သားတစ်ဦးသည် ပုန်ကန်ပြီး ဘုရားသခင်ပေးထားသော လွတ်လပ်စွာလုပ်ပိုင်ခွင့် ဆုကျေးဇူးကို တလွဲသုံးကာ ယေဟောဝါ၏ရည်ရွယ်တော်မူချက် ပျက်ပြားသွားစေရန် ကြံစည်ခဲ့သည်။ သူသည် ယေဟောဝါ၏ အကြွင်းမဲ့ပိုင်သအုပ်စိုးမှုကို နှစ်သက်မြတ်နိုးစွာ လက်အောက်ခံသူအားလုံး၏ ငြိမ်သက်မှုကို မွှေနှောက်ခဲ့၏။ စာတန်သည် ပထမလူသားမောင်နှံကို ဘုရားသခင်အား မကိုးစားသည့်လမ်းစဉ်ပေါ် ရောက်သွားအောင် တွန်းပို့ခဲ့လေသည်။ (ကမ္ဘာဦး ၃:၁-၆) ယေဟောဝါ၏တန်ခိုးတော်ကို သူအသိအမှတ်ပြုသော်လည်း ကိုယ်တော်၏ အကြွင်းမဲ့ပိုင်သအုပ်စိုးမှု ကျင့်သုံးပုံကိုသာမက အုပ်ချုပ်ပိုင်ခွင့်ကိုပါ စောဒကတက်ခဲ့၏။ ဤသို့ဖြင့် ယေဟောဝါ၏ အကြွင်းမဲ့ပိုင်သအုပ်စိုးမှုဆိုင်ရာ အဓိကအရေးကိစ္စသည် ဤမြေကြီးပေါ်၊ လူ့သမိုင်းအစတွင်ပင် ပေါ်ပေါက်လာခဲ့သည်။

၅။ အဘယ်ဒုတိယအရေးကိစ္စ ပေါ်ပေါက်လာခဲ့သနည်း။ ထိုအရေးကိစ္စသည် အခြားမည်သူတို့ကိုပါ ဂယက်ရိုက်ခဲ့သနည်း။

^၅စကြဝဠာအကြွင်းမဲ့ ပိုင်သအုပ်စိုးမှုဆိုင်ရာ ထိုအဓိကအရေးကိစ္စသည် ယောဘလက်ထက်တွင် စာတန်ပေါ်ပေါက်စေခဲ့သည့် ဒုတိယအရေးကိစ္စနှင့်လည်း ဆက်နွှယ်နေ၏။ ယေဟောဝါအား လက်အောက်ခံပြီး အမှုတော်ထမ်းဆောင်နေကြသည့် ကိုယ်တော့်ဖန်ဆင်းရာသတ္တဝါများ၏ ရည်ရွယ်ချက်ကို စာတန်သံသယဝင်စေခဲ့သည်။ သူတို့သည် ကိုယ်ကျိုးအတွက် ထိုသို့လုပ်ဆောင်ခြင်းဖြစ်ကြောင်း၊ စမ်းသပ်ခံရလျှင် ဘုရားသခင်ကို ဆန့်ကျင်လိမ့်မည်ဖြစ်ကြောင်း စာတန်သွယ်ဝိုက်ပြောဆိုခဲ့သည်။ (ယောဘ ၁:၇-၁၁; ၂:၄၊ ၅) ယေဟောဝါ၏ လူသားကျေးကျွန်တစ်ဦးနှင့်ပတ်သက်၍ ထိုသို့စောဒကတက်ခဲ့သော်လည်း ၎င်းသည် ဘုရားသခင်၏ကောင်းကင်သားများအပြင် ယေဟောဝါ၏တစ်ပါးတည်းသော သားတော်နှင့်ပါ ပတ်သက်ခဲ့လေသည်။

၆။ ယေဟောဝါသည် မိမိရည်ရွယ်တော်မူချက်နှင့် နာမတော်အတိုင်း မည်သို့ပြုမူတော်မူခဲ့သနည်း။

^၆ယေဟောဝါသည် မိမိရည်ရွယ်တော်မူချက်နှင့် နာမတော်၏အဓိပ္ပာယ်အတိုင်း ကိုယ်တော်တိုင်အား ပရောဖက်တစ်ပါးနှင့် ကယ်တင်ရှင်တစ်ပါး ဖြစ်လာစေခဲ့သည်။ * စာတန်ကို ကိုယ်တော် ဤသို့မိန့်ဆိုတော်မူ၏– “သင်နှင့်မိန်းမကိုလည်းကောင်း သင်၏အမျိုးအနွယ်နှင့် မိန်းမ၏အမျိုးအနွယ်ကိုလည်းကောင်း၊ ငါသည် ရန်ငြိုးဖွဲ့စေမည်။ သူသည် သင်၏ခေါင်းကို ကြိတ်လိမ့်မည်။ သင်သည် သူ၏ဖနောင့်ကို ကြိတ်လိမ့်မည်။” (ကမ္ဘာဦး ၃:၁၅) ယေဟောဝါသည် မိမိကောင်းကင်အဖွဲ့အစည်း၏ အစိတ်အပိုင်းဖြစ်သော “မိန်းမ” ၏မျိုးနွယ်တော်အားဖြင့် စာတန်၏စောဒကကို ချေပပြီး အာဒံ၏သားစဉ်မြေးဆက်များအား လွတ်မြောက်ခြင်းနှင့် အသက်ရှင်ခြင်းမျှော်လင့်ချက် ပေးမည်ဖြစ်သည်။—ရောမ ၅:၂၁; ဂလာတိ ၄:၂၆၊ ၃၁။

“အလိုတော်၏ မြင့်မြတ်သောလျှို့ဝှက်ချက်”

၇။ ယေဟောဝါသည် တမန်တော်ပေါလုမှတစ်ဆင့် အဘယ်ရည်ရွယ်တော်မူချက်ကို ဖော်ပြခဲ့သနည်း။

^၇ဧဖက်ခရစ်ယာန်များထံ တမန်တော်ပေါလု ရေးပို့သည့်စာတွင် ကိုယ်တော့်ရည်ရွယ်တော်မူချက် ပြည့်စုံလာရန် အလုံးစုံတို့ကို ယေဟောဝါ မည်သို့စီမံခန့်ခွဲတော်မူကြောင်း ပိုင်နိုင်စွာရှင်းပြထားသည်။ ပေါလု ဤသို့ရေးသားခဲ့၏– “ကိုယ်တော်သည် မိမိအလိုတော်၏ မြင့်မြတ်သောလျှို့ဝှက်ချက်ကို ငါတို့အား သိစေတော်မူ၏။ ၎င်းလျှို့ဝှက်ချက်မှာ ရည်ရွယ်တော်မူသော သဘောတော်မြတ်နှင့်အညီ ချိန်းချက်သောအချိန်ကာလများ ပြည့်စုံသည့်အခါ စီမံခန့်ခွဲမှုတစ်ရပ်ကို စီစဉ်ခြင်းပင်ဖြစ်သည်။ တစ်နည်းဆိုရသော် ကောင်းကင်ပေါ်ရှိ အရာများ၊ မြေကြီးပေါ်ရှိ အရာများ ခပ်သိမ်းကို ခရစ်တော်၌ ပြန်လည်စုစည်းစေခြင်းပင်ဖြစ်သတည်း။” (ဧဖက် ၁:၉၊ ၁၀၊ ကဘ) ယေဟောဝါ၏မွန်မြတ်သော ရည်ရွယ်တော်မူချက်မှာ ကိုယ်တော်၏အကြွင်းမဲ့ပိုင်သအုပ်စိုးမှုကို နှစ်သက်မြတ်နိုးစွာ လက်အောက်ခံသည့် သတ္တဝါများနေထိုင်ကြသော စည်းလုံးညီညွတ်သည့် စကြဝဠာတစ်ခု ဖြစ်ပေါ်လာစေရန်ဖြစ်သည်။ (ဗျာ. ၄:၁၁) ဤသို့ဖြင့် ကိုယ်တော်၏နာမတော်သည် သန့်ရှင်းမြင့်မြတ်မည်ဖြစ်ပြီး စာတန်သည် မုသာကောင်ဖြစ်ကြောင်း ထင်ရှားလာလိမ့်မည်။ ထိုအခါ ကိုယ်တော်၏အလိုတော်သည် “ကောင်းကင်ဘုံ၌ ပြည့်စုံသကဲ့သို့ မြေကြီးပေါ်မှာ ပြည့်စုံ” လာပါလိမ့်မည်။—မဿဲ ၆:၁၀။

၈။ “စီမံခန့်ခွဲမှု” ဟူ၍ပြန်ဆိုထားသည့် စကားလုံး၏အဓိပ္ပာယ်ကား အဘယ်နည်း။

^၈ယေဟောဝါ၏ “သဘောတော်မြတ်” သို့မဟုတ် ရည်ရွယ်တော်မူချက်သည် “စီမံခန့်ခွဲမှုတစ်ရပ်” အားဖြင့် ပြည့်စုံလာပါလိမ့်မည်။ ပေါလုသည် စာသားအရ “အိမ်ထောင်စီမံအုပ်ချုပ်မှု” ဟူ၍အဓိပ္ပာယ်ရှိသည့် စကားလုံးကို အသုံးပြုခဲ့၏။ ယင်းသည် မေရှိယနိုင်ငံတော်အုပ်ချုပ်မှုကဲ့သို့သော အစိုးရတစ်ခုကိုမဟုတ်ဘဲ စီမံအုပ်ချုပ်နည်းတစ်ရပ်ကို ရည်ညွှန်းနေခြင်းဖြစ်၏။ * မိမိရည်ရွယ်တော်မူချက် အထမြောက်ရန် အလုံးစုံတို့ကို ယေဟောဝါစီမံခန့်ခွဲမည့် မွန်မြတ်သောနည်းလမ်းတွင် ရာစုနှစ်များတစ်လျှောက် အဆင့်ဆင့်သိရှိလာမည့် “မြင့်မြတ်သောလျှို့ဝှက်ချက်” တစ်ခုပါဝင်သည်။—ဧဖက် ၁:၁၀; ၃:၉၊ ကဘ၊ အောက်ခြေမှတ်ချက်။

၉။ ယေဟောဝါသည် မိမိအလိုတော်၏ မြင့်မြတ်သောလျှို့ဝှက်ချက်ကို မည်သို့အဆင့်ဆင့် ဖွင့်ပြတော်မူခဲ့သနည်း။

^၉ယေဟောဝါသည် ဧဒင်အရပ်၌ ကတိပြုခဲ့သည့် မျိုးနွယ်တော်နှင့်ပတ်သက်သော မိမိရည်ရွယ်တော်မူချက် မည်သို့ပြည့်စုံလာမည်ဖြစ်ကြောင်း ပဋိညာဉ်တသီတတန်းဖြင့် တဖြည်းဖြည်း ဖော်ပြတော်မူခဲ့သည်။ ကတိထားရာမျိုးနွယ်တော်သည် မြေကြီးပေါ်တွင် အာဗြဟံ၏မျိုးရိုးမှ ဆင်းသက်လာကာ ၎င်းအားဖြင့် “လူမျိုးအပေါင်း” ကောင်းချီးခံစားရမည်ဖြစ်ကြောင်း အာဗြဟံနှင့်ဖွဲ့ခဲ့သောပဋိညာဉ်က ဖော်ပြ၏။ ထိုပဋိညာဉ်က မျိုးနွယ်တော်၏အဓိကပုဂ္ဂိုလ်နှင့် ပူးပေါင်းမည့် အခြားသူများလည်းရှိကြောင်း ဖော်ပြ၏။ (ကမ္ဘာဦး ၂၂:၁၇၊ ၁၈) ဇာတိဣသရေလလူမျိုးနှင့် ဖွဲ့ခဲ့သည့် ပညတ်ပဋိညာဉ်က “ယဇ်ပုရောဟိတ်နိုင်ငံ” တစ်ခုရှိရန် ယေဟောဝါရည်ရွယ်တော်မူကြောင်း ဖော်ပြသည်။ (ထွက်မြောက်ရာ ၁၉:၅၊ ၆၊ သမ္မာ) ဒါဝိဒ်နှင့်ဖွဲ့ခဲ့သည့် ပဋိညာဉ်က မျိုးနွယ်တော်သည် ဘုရားသခင့်နိုင်ငံတော်၏ဦးစီး အစဉ်အမြဲ ဖြစ်လိမ့်မည်ဟု ဖော်ပြသည်။ (၂ ဓမ္မရာဇဝင် ၇:၁၂၊ ၁၃; ဆာလံ ၈၉:၃၊ ၄) ပညတ်ပဋိညာဉ်က ဂျူးများကို မေရှိယထံ ပို့ဆောင်ပြီးသည်နှင့် ယေဟောဝါသည် မိမိရည်ရွယ်တော်မူချက်ကို ပြည့်စုံစေသည့် နောက်ထပ်အသွင်အပြင်များကို ဖော်ပြသည်။ (ဂလာတိ ၃:၁၉၊ ၂၄) မျိုးနွယ်တော်၏အဓိကပုဂ္ဂိုလ်နှင့် ပူးပေါင်းသူတို့သည် ကြိုဟောထားသည့် “ယဇ်ပုရောဟိတ်နိုင်ငံ” တွင် ပါဝင်မည်ဖြစ်ကာ ဝိညာဉ်ရေး ‘ဣသရေလလူမျိုး’ အသစ်အဖြစ် “ပဋိညာဉ်တရားသစ်” ထဲသို့ ဆောင်ကြဉ်းခံကြရမည်ဖြစ်သည်။—ယေရမိ ၃၁:၃၁-၃၄; ဟေဗြဲ ၈:၇-၉။ *

၁၀၊ ၁၁။ (က) ယေဟောဝါသည် ကြိုဟောထားသည့် မျိုးနွယ်တော်အကြောင်း မည်သို့ဖော်ပြတော်မူခဲ့သနည်း။ (ခ) ဘုရားသခင်၏ တစ်ပါးတည်းသောသားတော်သည် အဘယ်ကြောင့် မြေကြီးပေါ်သို့ ကြွလာခဲ့ရသနည်း။

^၁၀ဘုရားသခင့်ရည်ရွယ်တော်မူချက်နှင့်ဆိုင်သည့် စီမံခန့်ခွဲမှုနှင့်အညီ ကမ္ဘာပေါ်သို့ ကြိုဟောထားသော မျိုးနွယ်တော်ရောက်ရှိရမည့်အချိန် ဆိုက်ရောက်လာလေသည်။ ယေဟောဝါသည် ကောင်းကင်တမန်ဂါဗြေလကို စေလွှတ်၍ ယေရှုဟု အမည်ပေးရမည့် သားတစ်ဦးမွေးဖွားလာမည့်အကြောင်း မာရိအား ပြောဆိုစေသည်။ အဆိုပါကောင်းကင်တမန်က မာရိကို ဤသို့ပြော၏– “ထိုသားသည်ကား၊ ကြီးမြတ်သောသူဖြစ်လိမ့်မည်။ အမြင့်ဆုံးသောဘုရား [သခင်] ၏သားတော်ဟု ခေါ်ဝေါ်သမုတ်ခြင်းကို ခံရလိမ့်မည်။ သူ့အဘဒါဝိဒ်၏ ရာဇပလ္လင်ကို ထာဝရအရှင်ဘုရားသခင်သည် သူ့အားပေးတော်မူမည်။ ထိုသူသည်လည်း ယာကုပ်အမျိုးအနွယ်ကို အစဉ်မပြတ်အုပ်စိုးလိမ့်မည်။ သူ၏နိုင်ငံသည်လည်း ဆုံးခြင်းမရှိရ။” (လုကာ ၁:၃၂၊ ၃၃) သို့နှင့် ကတိထားရာမျိုးနွယ်တော်သည် မည်သူမည်ဝါဖြစ်ကြောင်း ထင်ရှားလာလေသည်။—ဂလာတိ ၃:၁၆; ၄:၄။

^၁၁ယေဟောဝါ၏ တစ်ပါးတည်းသောသားတော်သည် အဆုံးစွန်စမ်းသပ်ခံရန် မြေကြီးပေါ်သို့ ကြွလာရမည်ဖြစ်၏။ စာတန့်စောဒကကို ဟာကွက်မရှိ ချေပနိုင်ဖို့ဆိုသည်မှာ ယေရှု၏ဘဝလမ်းစဉ်အပေါ် မူတည်သည်။ ကိုယ်တော်သည် ခမည်းတော်အပေါ် သစ္စာရှိမည်လော။ ဤတွင် မြင့်မြတ်သောလျှို့ဝှက်ချက် ပါဝင်ပတ်သက်နေ၏။ တမန်တော်ပေါလုက နောက်ပိုင်းတွင် ယေရှု၏အခန်းကဏ္ဍကို ဤသို့ရှင်းပြခဲ့သည်– ‘မှန်သောကိုးကွယ်ခြင်း၏ နက်နဲသောအရာ [“မြင့်မြတ်သောလျှို့ဝှက်ချက်၊” ကဘ] သည် ကြီးစွာသောအရာဖြစ်သည်ဟု ငြင်းခုံရန်မရှိ။ ဘုရားသခင်သည် ကိုယ်ခန္ဓာ၌ ပေါ်ထွန်းတော်မူပြီ။ ဟုတ်မှန်တော်မူခြင်းအကြောင်းသည် ဝိညာဉ်တော်အားဖြင့် ထင်ရှားပြီ။ ကောင်းကင်တမန်တို့သည် ကိုယ်တော်ကို ရှုမြင်ရကြပြီ။ တစ်ပါးအမျိုးသားတို့သည် သတင်းတော်ကို ကြားရကြပြီ။ လောကသားတို့သည် ယုံကြည်ရကြပြီ။ ဘုန်းအသရေနှင့်တကွ အထက်သို့ဆောင်ယူခြင်းကို ခံတော်မူပြီ။’ (၁ တိမောသေ ၃:၁၆) ယေရှုသည် သေသည့်တိုင် မယိမ်းမယိုင် သမာဓိစောင့်သိခြင်းအားဖြင့် စာတန့်စောဒကကို ယတိပြတ်ချေပခဲ့၏။ သို့သော် မြင့်မြတ်သောလျှို့ဝှက်ချက်၏ အခြားအသေးစိတ်အချက်အလက်များကို ဆက်ဖော်ပြရန် ရှိနေပါသေးသည်။

“ဘုရားသခင့်နိုင်ငံတော်၏ မြင့်မြတ်သောလျှို့ဝှက်ချက်”

၁၂၊ ၁၃။ (က) “ဘုရားသခင့်နိုင်ငံတော်၏ မြင့်မြတ်သောလျှို့ဝှက်ချက်” အသွင်အပြင်တစ်ခုကား အဘယ်နည်း။ (ခ) ကောင်းကင်သို့သွားရန် အရေအတွက် ကန့်သတ်ထားသော လူသားများကို ယေဟောဝါရွေးချယ်ရာတွင် အဘယ်အရာပါဝင်သနည်း။

^၁၂ဂါလိလဲနယ်၌ လှည့်လည်ဟောပြောခဲ့ချိန်များအနက် တစ်ကြိမ်တွင် မြင့်မြတ်သောလျှို့ဝှက်ချက်သည် မိမိ၏မေရှိယနိုင်ငံတော်အစိုးရနှင့် ဆက်စပ်နေကြောင်း ယေရှုဖော်ပြခဲ့သည်။ တပည့်နောက်လိုက်များကို ယေရှုက “သင်တို့သည် ကောင်းကင်နိုင်ငံတော် [“ဘုရားသခင့်နိုင်ငံတော်၊” မာကု ၄:၁၁] ၏ နက်နဲသောအရာ [“မြင့်မြတ်သောလျှို့ဝှက်ချက်၊” ကဘ] တို့ကို သိရသောအခွင့်ရှိကြ၏” ဟုမိန့်ဆိုခဲ့သည်။ (မဿဲ ၁၃:၁၁) အဆိုပါလျှို့ဝှက်ချက်၏ အသွင်အပြင်တစ်ခုမှာ မျိုးနွယ်တော်နှင့်သက်ဆိုင်သူများအဖြစ် သားတော်နှင့်အတူ ကောင်းကင်ဘုန်းဝင်စားမည့် “သိုးစုငယ်” ဖြစ်သော ၁၄၄,၀၀၀ ကို ယေဟောဝါရွေးချယ်ခြင်းဖြစ်၏။—လုကာ ၁၂:၃၂; ဗျာ. ၁၄:၁၊ ၄။

^၁၃လူသားများကို မြေကြီးပေါ်တွင်နေထိုင်ရန် ဖန်ဆင်းခဲ့သည်ဖြစ်ရာ လူတချို့ ကောင်းကင်သွားဖို့ ယေဟောဝါ “အသစ်ပြုပြင်သော” အရာလိုအပ်သည်။ (၂ ကောရိန္သု ၅:၁၇) ထူးမြတ်သော ဤကောင်းကင်မျှော်လင့်ချက်ကို ရရှိထားသူတစ်ဦးအနေဖြင့် တမန်တော်ပေတရုက ဤသို့ရေးသားခဲ့၏– “အသက်ရှင်ခြင်းနှင့်စပ်ဆိုင်သော မျှော်လင့်ခြင်းအကြောင်းရှိစေခြင်းငှာ၊ ဖောက်ပြန်ခြင်း၊ ညစ်စွန်းခြင်း၊ ညှိုးနွမ်းခြင်းနှင့်ကင်းစင်သော အမွေတော်ကို ငါတို့သည် ခံရစေမည်အကြောင်း၊ ယေရှုခရစ်ကို သေခြင်းမှ ထမြောက်စေတော်မူသောအားဖြင့် ကြီးစွာသောကရုဏာတော်နှင့်အညီ ငါတို့ကို တစ်ဖန်ဖြစ်ပွားစေတော်မူသော ငါတို့သခင်ယေရှုခရစ်၏ ခမည်းတော်ဘုရားသခင်သည် မင်္ဂလာရှိတော်မူစေသတည်း။ ထိုအမွေတော်သည်ကား . . . သင်တို့အဖို့ ကောင်းကင်ဘုံ၌ သိုထားလျက်ရှိသော အမွေတည်း။”—၁ ပေတရု ၁:၃-၅။

၁၄။ (က) ဂျူးမဟုတ်သူများသည် “ဘုရားသခင့်နိုင်ငံတော်၏ မြင့်မြတ်သောလျှို့ဝှက်ချက်” တွင် မည်သို့ပါဝင်ခဲ့ကြသနည်း။ (ခ) “ဘုရားသခင်၏နက်နဲသောအရာတို့ကို” ကျွန်ုပ်တို့ မည်သို့နားလည်လာနိုင်ကြသနည်း။

^၁၄ဘုရားသခင်၏ အနာဂတ်အစိုးရနှင့်ပတ်သက်သည့် မြင့်မြတ်သောလျှို့ဝှက်ချက် နောက်တစ်ခုမှာ ခရစ်တော်နှင့်အတူ ကောင်းကင်ဘုန်းဝင်စားရန် ခေါ်တော်မူခြင်းခံရမည့်သူ လူနည်းစုတွင် ဂျူးမဟုတ်သူများကိုလည်း ပါဝင်စေရန် ဘုရားသခင် အလိုတော်ရှိခြင်းဖြစ်သည်။ ယေဟောဝါ၏ “စီမံခန့်ခွဲမှု” သို့မဟုတ် ကိုယ်တော့်ရည်ရွယ်တော်မူချက်ကို ပြည့်စုံစေသည့် စီမံအုပ်ချုပ်နည်း၏ ဤအသွင်အပြင်ကို ပေါလု ဤသို့ရှင်းပြသည်– “ထိုနက်နဲသောအရာကို သန့်ရှင်းသောတမန်တော်တို့နှင့် ပရောဖက်တို့အား ယခုကာလ၌ ဝိညာဉ်တော်အားဖြင့် ဖွင့်လှစ်တော်မူသည်နည်းတူ၊ အခြားသောကာလတို့၌ လူမျိုးတို့အား ပြတော်မမူ။ ထိုနက်နဲသောအရာဟူမူကား၊ တစ်ပါးအမျိုးသားတို့သည် ဧဝံဂေလိတရားအားဖြင့် ယုဒအမျိုးသားတို့နှင့်အတူ အမွေခံ၍၊ တစ်လုံးတစ်ဝတစ်ကိုယ်တည်းဖြစ်လျက်၊ ခရစ်တော်နှင့်ဆိုင်သောကတိတော်ကို ဆက်ဆံရကြသတည်း။” (ဧဖက် ၃:၅၊ ၆) မြင့်မြတ်သောလျှို့ဝှက်ချက်၏ ဤကဏ္ဍကို နားလည်စေရန် “သန့်ရှင်းသောတမန်တော်တို့” အား ဖွင့်ဟဖော်ပြခဲ့၏။ ယနေ့လည်း သန့်ရှင်းသောဝိညာဉ်တော် အကူအညီမရလျှင် “ဘုရားသခင်၏နက်နဲသောအရာတို့ကို” ကျွန်ုပ်တို့ နားလည်နိုင်ကြမည်မဟုတ်ပေ။—၁ ကောရိန္သု ၂:၁၀; ၄:၁; ကောလောသဲ ၁:၂၆၊ ၂၇။

၁၅၊ ၁၆။ ယေဟောဝါသည် ခရစ်တော်၏တွဲဖက်အုပ်စိုးရှင်များကို လူတို့အထဲက အဘယ်ကြောင့် ရွေးချယ်တော်မူခဲ့သနည်း။

^၁၅ကောင်းကင်ဇိအုန်တောင်တွင် “သိုးသငယ်” နှင့်အတူ ရပ်နေကြသည့် “တစ်သိန်းလေးသောင်းလေးထောင်” သည် “မြေကြီးမှရွေးနုတ်သောသူ၊” “လူတို့အထဲကရွေးနုတ်၍ ဘုရားသခင်နှင့်သိုးသငယ် [ခရစ်တော်ယေရှု] အဖို့ အဦးသီးသောအသီး” များဖြစ်ကြသည်။ (ဗျာ. ၁၄:၁-၄) ဧဒင်အရပ်တွင် ကတိပြုခဲ့သည့် မျိုးနွယ်တော်၏ အဓိကပုဂ္ဂိုလ်ဖြစ်လာရန် မိမိ၏ကောင်းကင်သားများတွင် အဦးဆုံးသောသူကို ယေဟောဝါ ရွေးချယ်သည်မှန်သော်လည်း ခရစ်တော်၏အပေါင်းပါများကိုမူ လူတို့အထဲက အဘယ်ကြောင့် ရွေးချယ်တော်မူရသနည်း။ ကန့်သတ်ထားသော ဤအရေအတွက်ကို “[ယေဟောဝါ၏] ကြံစည်တော်မူခြင်းအတိုင်း၊” “မိမိအလိုတော်၏သဘောတော်မြတ်နှင့်အညီ” ခေါ်တော်မူခဲ့ခြင်းဖြစ်ကြောင်း တမန်တော်ပေါလုက ရှင်းပြသည်။—ရောမ ၈:၁၇၊ ၂၈-၃၀; ဧဖက် ၁:၅၊ ကဘ၊ ၁၁; ၂ တိမောသေ ၁:၉။

^၁၆ယေဟောဝါ၏ ရည်ရွယ်တော်မူချက်မှာ မြင့်မြတ်သန့်ရှင်းသော မိမိနာမတော်ကို ရိုသေလေးမြတ်ခြင်းရှိစေရန်၊ မိမိ၏စကြဝဠာ အကြွင်းမဲ့ပိုင်သအုပ်စိုးမှုအာဏာကို သံသယကင်းရှင်းစေရန်ဖြစ်သည်။ တုနှိုင်းမရအောင် ပညာရှိသော မိမိ၏ “စီမံခန့်ခွဲမှု” သို့မဟုတ် စီမံအုပ်ချုပ်နည်းဖြင့် ယေဟောဝါသည် မိမိသားဦးကို မြေကြီးပေါ်သို့စေလွှတ်ကာ အဆုံးစွန် စမ်းသပ်မှုခံစေခဲ့သည်။ ၎င်းပြင် သားတော်၏ မေရှိယနိုင်ငံတော်အစိုးရတွင် မိမိ၏အကြွင်းမဲ့ပိုင်သအုပ်စိုးမှုကို သေသည့်တိုင် ထောက်ခံခဲ့သူတို့ကိုလည်း ပါဝင်စေဖို့ ယေဟောဝါ ဆုံးဖြတ်ထားတော်မူ၏။—ဧဖက် ၁:၈-၁၂; ဗျာ. ၂:၁၀၊ ၁၁။

၁၇။ ခရစ်တော်နှင့် ကိုယ်တော်၏တွဲဖက်အုပ်စိုးရှင်များသည် လူသားများကဲ့သို့ပင် အသက်ရှင်ဖူးခဲ့ကြသည့်အတွက် ကျွန်ုပ်တို့ အဘယ်ကြောင့် ဝမ်းသာနိုင်သနည်း။

^၁၇ယေဟောဝါသည် မိမိသားတော်ကို မြေကြီးပေါ်သို့ စေလွှတ်ခြင်းဖြင့်လည်းကောင်း၊ ဘုရားသခင့်နိုင်ငံတော်အစိုးရတွင် သားတော်နှင့်အတူ ဘုန်းဝင်စားမည့်သူတို့ကို လူတို့အထဲက ရွေးချယ်ခြင်းဖြင့်လည်းကောင်း အာဒံ၏သားစဉ်မြေးဆက်ကို အလွန်ချစ်မြတ်နိုးကြောင်း ဖော်ပြတော်မူခဲ့၏။ အာဗေလအချိန်မှစ၍ ယေဟောဝါအပေါ် သစ္စာရှိခဲ့သူအပေါင်းကို ယင်းက မည်သို့အကျိုးပြုနိုင်သနည်း။ အပြစ်နှင့်သေခြင်း၏ ကျေးကျွန်များအဖြစ် မွေးဖွားလာရသည့် မစုံလင်သောလူသားများသည် ယေဟောဝါ၏ မူလရည်ရွယ်တော်မူချက်နှင့်အညီ ဝိညာဉ်ရေးနှင့်ကာယရေးဘက် စုံလင်သည်အထိ ပြုပြင်ခံရကြလိမ့်မည်။ (ရောမ ၅:၁၂) မိမိတို့၏ရှင်ဘုရင်သည် မြေကြီးဓမ္မအမှုဆောင်စဉ် တပည့်နောက်လိုက်များကို မေတ္တာပြသခဲ့သည့်အတိုင်း မိမိတို့အပေါ်လည်း မေတ္တာပြကာ စာနာထောက်ထားမည်ဖြစ်ကြောင်း သိရှိရခြင်းက မြေကြီးပေါ် ထာဝစဉ်အသက်ရှင်ရန် မျှော်လင့်သူအားလုံးအတွက် အလွန်စိတ်ချမ်းမြေ့စရာပင်။ (မဿဲ ၁၁:၂၈၊ ၂၉; ဟေဗြဲ ၂:၁၇၊ ၁၈; ၄:၁၅; ၇:၂၅၊ ၂၆) ထို့ပြင် ဘုရင်ယဇ်ပုရောဟိတ်များအဖြစ် ခရစ်တော်နှင့်အတူ ကောင်းကင်ဘုန်းဝင်စားမည့်သူတို့သည် ကျွန်ုပ်တို့ကဲ့သို့ပင် ကိုယ်ကိုယ်တိုင်၏အားနည်းချက်များကို ဆိုင်ပြိုင်တိုက်လှန်ရပြီး ဘဝအခက်အခဲများ ကြုံတွေ့ခဲ့ကြရသူ သစ္စာရှိအမျိုးသား အမျိုးသမီးများဖြစ်ကြောင်း သိရှိရခြင်းကလည်း အလွန်အားရှိစရာပင်။—ရောမ ၇:၂၁-၂၅။

ယေဟောဝါ၏မပြောင်းလဲနိုင်သော ရည်ရွယ်တော်မူချက်

၁၈၊ ၁၉။ ကျွန်ုပ်တို့အတွက် ဧဖက် ၁:၈-၁၁ ပါ ပေါလု၏စကားများ အဘယ်ကြောင့် ပို၍ရှင်းလင်းလာသနည်း။ နောက်ဆောင်းပါးတွင် အဘယ်အကြောင်းကို သုံးသပ်မည်နည်း။

^၁၈ဧဖက် ၁:၈-၁၁ တွင်ဖတ်ရသည့်အတိုင်း ဝိညာဉ်တော်ဖွားခရစ်ယာန်များအား ပေါလုပြောခဲ့သည့် စကားအဓိပ္ပာယ်ကို ယခု ကောင်းစွာနားလည်နိုင်ကြပေပြီ။ ယေဟောဝါသည် သူတို့ကို “အလိုတော်၏နက်နဲသောအရာ [“မြင့်မြတ်သောလျှို့ဝှက်ချက်၊” ကဘ]” ကိုသိရှိစေခဲ့ကြောင်း၊ ခရစ်တော်နှင့်အတူ “အမွေခံ” မည့်သူများအဖြစ် ခန့်အပ်ခဲ့ကြောင်း၊ ‘မိမိအလိုတော်နှင့်အညီ အလုံးစုံတို့ကို စီရင်ပြုပြင်တော်မူတတ်သောသူ၏ ကြံစည်ခြင်းရှိသည့်အတိုင်း၊ ရှေးမဆွက ခွဲခန့်မှတ်သားတော်မူ’ ခဲ့ကြောင်း ပေါလုပြောပြသည်။ ယင်းသည် ယေဟောဝါအလိုတော်ပြည့်စုံရန် အလုံးစုံတို့ကို အံ့ဖွယ်နည်းဖြင့် ကိုယ်တော် “စီမံခန့်ခွဲ” ပုံနှင့် အံဝင်ခွင်ကျဖြစ်ကြောင်း ကျွန်ုပ်တို့သဘောပေါက်ကြ၏။ ထို့ပြင် သခင့်ညစာစားပွဲကို တက်ရောက်ကြသည့် ခရစ်ယာန်များစွာအနက် အနည်းငယ်ကသာ မုန့်နှင့်စပျစ်ဝိုင်ကို အဘယ်ကြောင့် သုံးဆောင်ကြကြောင်းကိုလည်း နားလည်စေ၏။

^၁၉ခရစ်တော်၏သေခြင်း အောက်မေ့ရာပွဲသည် ကောင်းကင်မျှော်လင့်ချက်ရှိသည့် ခရစ်ယာန်များအတွက် အဘယ်အဓိပ္ပာယ်ရှိကြောင်း၊ မြေကြီးပေါ် ထာဝစဉ်အသက်ရှင်ရန် မျှော်လင့်ချက်ရှိသူ သန်းပေါင်းများစွာသည် အောက်မေ့ရာပွဲ ပုံဆောင်ချက်များကို အဘယ်ကြောင့် အလွန်စိတ်ဝင်စားသင့်ကြောင်း နောက်ဆောင်းပါးမှ သိရှိရပါလိမ့်မည်။

[အောက်ခြေမှတ်ချက်များ]

^ အပိုဒ်၊ 6 ဘုရားသခင်၏နာမတော်သည် စာသားအရ “ကိုယ်တော်ဖြစ်လာစေသည်” ဟူ၍ အဓိပ္ပာယ်ရှိ၏။ ယေဟောဝါသည် မိမိရည်ရွယ်တော်မူချက်ပြည့်စုံရန် လိုအပ်သလို ဖြစ်လာနိုင်သည်။—ထွက်မြောက်ရာ ၃:၁၄; ကျေးဇူးပြု၍ ယေဟောဝါထံချဉ်းကပ်လော့၊ အခန်း ၁၊ စာမျက်နှာ ၅၊ အပိုဒ် ၈ ကိုရှု။

^ အပိုဒ်၊ 8 ပေါလုက မိမိခေတ်တွင် စီမံခန့်ခွဲမှုရှိနေပြီဖြစ်ကြောင်း ဖော်ပြသော်လည်း သမ္မာကျမ်းစာကမူ ၁၉၁၄ ခုနှစ်မတိုင်မချင်း မေရှိယနိုင်ငံတော် မတည်ထောင်ခဲ့ကြောင်း ဖော်ပြ၏။

^ အပိုဒ်၊ 9 ဘုရားသခင့်ရည်ရွယ်တော်မူချက် အကောင်အထည်ပေါ်ရေးနှင့်ဆိုင်သည့် အဆိုပါပဋိညာဉ်များအကြောင်း အသေးစိတ်ဆွေးနွေးချက်ကို သိလိုပါက ၁၉၉၀ ပြည့်နှစ် ဖေဖော်ဝါရီလ ၁ ရက်နေ့ထုတ် ကင်းမျှော်စင်၊ စာမျက်နှာ ၉-၁၅ ကိုရှု။

ပြန်လည်သုံးသပ်ချက်

• ယေဟောဝါသည် အဘယ်ကြောင့် ကမ္ဘာမြေကြီးကိုဖန်ဆင်းပြီး လူသားများကို ထိုတွင် နေထိုင်စေတော်မူသနည်း။

• ယေဟောဝါ၏ တစ်ပါးတည်းသောသားတော်သည် ကမ္ဘာမြေကြီးပေါ်တွင် အစမ်းသပ်ခံရန် အဘယ်ကြောင့်လိုအပ်သနည်း။

• ယေဟောဝါသည် ခရစ်တော်နှင့်တွဲဖက်အုပ်စိုးမည့်သူများကို လူတို့အထဲက အဘယ်ကြောင့် ရွေးချယ်တော်မူခဲ့သနည်း။

[လေ့လာရန်မေးခွန်းများ]

ကင်းမျှော်စင်—လေ့လာရန် စာစောင်