Nako ye lu Swanela ku Tona
Mu Lute Bana Ba Mina
Nako ye lu Swanela ku Tona
MWENDI mwa lumela kuli ku tona ki kwa butokwa hahulu mutu ha li kwa sikolo. Batu ba bañata ba ozelanga ka nako ye ba li mwa kilasi, kono mutu u swanela ku tona haiba u bata ku ituta. Mwendi hape mwa yanga kwa mikopano ko mu yo itutanga Bibele.
Kiñi ze mu nahana kuli za kona ku mi tusa ku tonanga?— * Nto ye ñwi ye mu kona ku eza ki ku itahanelanga ku lobala busihu. Nto ye ñwi hape ye kona ku mi tusa ki ku lobala ka nakonyana musihali. Ha lu nyakisiseñi ze lu kona ku ituta ku ze ne ezahezi ku mutangana ya na ile mwa buloko busihu bo buñwi ka nako ya na fa ngambolo muapositola Paulusi. Ha mu apule Bibele ya mina kwa liñolo la Likezo kauhanyo 20, litimana 7 ku isa 12, mi mu bone ze ne ezahezi.
Paulusi naa sweli ku potela liputeho ze ne fumaneha kwa Troasi, ili tolopo ye ne li kwa likamba la liwate. Bibele i bulela kuli Paulusi “naa funduka habusa” ka sisepe. Kacwalo Paulusi “a zwelapili ku bulela cwalo ku isa mane fahalaa busihu.” Lu bala kuli: “Mutangana ya bizwa Eutiko ya naa inzi fa lihaulo la ndu, a swalwa ki buloko bo butuna Paulusi ha nzaa luta.” Ne ku ezaheziñi ku zwa fo?—
Eutiko a wa mwa lihaulo “ku zwa fa ndu ya bulaalu ya muyaho wa mandu a shangatami.” Paulusi ni batu ba bañwi ba matela fafasi fa na wezi mutu yo. Eutiko naa li fafasi mi naa shwile! Kana mwa kona ku nahana feela mo ne ba ikutwezi bumaswe kaufela bona ha ba yo mu fumana inze a shwile?— Bibele i bulela kuli Paulusi a kambeka mazoho a hae ku Eutiko ni ku mu kumbata. Hamulaho wa nakonyana, Paulusi a huwa ka tabo kuli: ‘Mu si ke mwa bilaela, u iketile!’ Mulimu u zusize Eutiko kwa bafu!
Lu kona ku itutañi ka za Mulimu ku ze ne ezahezi ku Eutiko?— Nto ye ñwi ye lu ituta kikuli Jehova, Ndataa luna wa kwa lihalimu, wa kona ku zusa bafu, ku kopanyeleza cwalo ni banana. Jehova wa mi utwisisa ni ku mi lata ku fita mo ba mi utwisiseza ni ku mi latela bashemi ba mina. Ha na li fa lifasi, Jesu naa bonisize mwa inezi Jehova ka ku kumbata banana ni ku ba fuyaula. Jesu hape naa zusize banana ba ne ba shwile, ku kopanyeleza cwalo ni musizana wa lilimo ze 12.
Mu ikutwa cwañi ka ku ziba kuli Ndataa mina wa kwa lihalimu wa mi lata?— Ku ba ni zibo yeo ku tahisa kuli ni luna lu late Jehova ni ku latelela za lu bulelela. Kana mwa ziba mo lu kona ku boniseza kuli lwa lata Jehova?— Nzila ye ñwi ki ka ku bulela kuli lwa mu lata. Jesu naa ize: “Ni lata Ndate.” Kono Jesu naa ezize ze ñata ku fita ku bulela feela kuli naa lata Mulimu. Na bonisize cwalo ka likezo za hae.
Jesu naa utwile Mulimu. Naa bulezi kuli: “Kamita ni eza lika ze mu tabisa.” Haiba lu latelela mutala wa Jesu, ili ku tabisa Jehova ni Mwanaa hae Jesu, lu ka lika ka mo lu konela kaufela ku tona ka nako ye lu swanela ku eza cwalo.
Mu bale mwa Bibele ya mina
[Litaluso za kwatasi]
^ para. 4 Haiba mu sweli ku bala ni mwanana, mutila o mu ka fumana hamulaho wa puzo ni puzo, u mi hupulisa kuli mu yeme ni ku susueza mwanana ku alaba.
