Kana Mwa Likanyisa Jehova ka ku Babalela Ba Bañwi?

“MU NEPELE lipilaelo za mina kaufela fahalimw’a [Mulimu], kakuli wa mi tokomela.” (1 Pitrosi 5:7) Yeo ki memo ye tabisa luli! Jehova Mulimu u iyakatwa hahulu batu ba hae. Lwa kona ku ikutwa ku silelezwa mwa pabalelo ya hae.

Ni luna lu swanela ku babalela ba bañwi. Kono bakeñisa kuli ha lu si ka petahala, ku na ni lika ze ñwi ze lu swanela ku tokomela. Pili lu si ka nyakisisa kale lika zeo, ha lu nyakisiseñi linzila m’o Jehova a boniseza kuli wa babalela batu ba hae.

Walisamu Davida na itusisize mutala wa mulisana kuli a bonise Mulimu mwa babalelela batu ba hae, ha na ize: “[Muñ’a] Bupilo ki mulisana wa ka; ha ni na ku tokwa se siñwi. U ni pumuliseza mwa mafulisezo a matala; u ni zamaisa fakaufi ni mezi a kuzize. U wetulula moya wa ka. . . . Niha ni ka zamaya mwa musindi wa muluti wa lifu, ha ni na ku saba bumaswe niheba bu li buñwi; kakuli Wena u inzi ni na.”—Samu 23:1-4.

Davida na ziba mwa ku babalelela mutapi bakeñisa kuli na li mulisana. Mulisana u silelezanga lingu za hae kwa libatana ze cwale ka litau, mawawa, ni libere. Mulisana u silelezanga lingu kuli li si ke za hasana, u batanga lingu ze latehile, u shimbanga lingu ze fokozi fa sifuba sa hae, mi u babalelanga lingu ze kula ni ze holofezi. U li nwisanga mezi zazi ni zazi. Fo ha ku talusi kuli mulisana wa li kotopa ko li ya kaufela. Lingu li kona ku ifulela ko li lata kaufela, kono li silelelizwe.

Ni Jehova kona mwa babalelela batu ba hae cwalo. Muapositola Pitrosi na ñozi kuli: ‘Mu silelezwa ki mata a Mulimu.’ Pulelo ya ku “silelezwa” fa i talusa ‘ku kantelwa.’ (1 Pitrosi 1:5) Jehova wa lu kantela kamita, mi u itukiselize ku lu tusa ha lu kupa tuso bakeñisa kuli wa lu lata luli. Kono Jehova u lu file m’ata a ku iketela, kona libaka ha sa ikenyangi mwa litaba ni likatulo ze lu eza. Lu kona ku likanyisa cwañi Jehova mwa taba ye?

Mu Likanyise Mulimu Ha Mu Babalela Bana Ba Mina

“Bana ki sanda se si zwa ku [Muñ’a] Bupilo.” Kacwalo bashemi ba swanela ku sileleza ni ku babalela bana ba bona. (Samu 127:3) Ba kona ku susueza bana ba bona ku talusa mo ba ikutwela ni ku beya maikuto a bona mwa munahano ha ba sebelisana ni bona. Kono haiba ba lika ku kotopa bana ba bona mwa lika kaufela, ni ku sa beya maikuto a bona  mwa munahano, ba ka swana sina mulisana ya lika ku zamaisa lingu ka mihala. Ha ku na mulisana ya kona ku lisa lingu za hae cwalo, mi nihaiba Jehova ha koni ku lu lisa cwalo.

Bo Mariko * ba li: “Ka lilimo-limo, ne ni bulelelanga banake kuli, ‘Mu eze sa kuli-kuli’ kamba ‘Mu si ezi cwalo.’ Ne ni ikutwa kuli ne ni na ni swanelo ya ku tomela banake milao ka ku ba mushemi wa bona. Ne ni sa ba babazangi kamba nihaiba ku ambolisana hande ni bona.” Nihaike mwan’a bo Mariko wa musizana n’a ambolanga ni balikani ba hae ka nako ye telele fa luwaile, n’a sa ambolangi ni bomahe cwalo. Bo Mariko ba zwelapili ku talusa kuli: “Kiha ni lemuha taba yeo. Ha n’a ambolanga ni balikani ba hae, mwanake n’a itusisanga lipulelo ze bonisa kuli n’a iyakatwa ba bañwi, ze cwale ka ‘Ee, ki niti,’ kamba ‘Ni na ni bona cwalo.’ Ni na se ni kala ku itusisa lipulelo ze swana kuli ni tuse mwanake ku talusa maikuto a hae, mi lwa kala ku ambolisananga hande ka nako ye telele.” Taba ye i bonisa kuli ku ambolisananga hande ki kwa butokwa, mi kuli ku be cwalo, mañi ni mañi u swanela ku ambola, isi mutu a li muñwi fela.

Bashemi ba tokwa ku susueza bana ba bona ku talusa maikuto a bona, mi ni bona bana ba tokwa ku ziba kuli haiba ba latelela ze ba bata bashemi ba bona, ba ka silelezwa. Bibele i eleza bana ku utwa bashemi ba bona; mi i bonisa libaka ha ku li kwa butokwa ku eza cwalo, i li: “Kuli za hao li konde, mi u pile mazazi a matelele mwa lifasi.” (Maefese 6:1, 3) Bana ba ba ziba bunde bwa ku utwa bashemi ba bona ba fumana bunolo ku latelela litaelo ze ba fiwa.

Mu Likanyise Mulimu Ha Mu Babalela Mutapi wa Jehova

Pabalelo ya Jehova ya iponelwa hande mwa puteho ya Sikreste. Jesu Kreste, ka ku ba Toho ya puteho, u eleza maeluda kuli ba babalele mutapi wa hae. (Joani 21:15-17) Linzwi la Sigerike le li tolokilwe kuli muokameli li swana ni linzwi le li talusa ‘ku libelela.’ Pitrosi u eleza maeluda ka mo ba kona ku ezeza cwalo, u li: “Mu lise mutapi wa Mulimu o ku mina, isi ka ku hapelezwa, kono ibe ka ku lata ku ezeza Mulimu; isi kabakala bufumu bo bu maswe, kono ibe ka pilu ye lata; isi ka ku busa mitapi  ya mina ka tata, kono ka ku ezeza mutapi mutala.”—1 Pitrosi 5:2, 3.

Kaniti luli musebezi wa maeluda u swana ni wa balisana. Maeluda ba Sikreste ba swanela ku tiisa ba ba fokozi kwa moya ni ku ba tusa ku mamela likuka za Bibele. Maeluda ki bona ba ba swanela ku lukisa za misebezi ya puteho, ye cwale ka mikopano, ni ku bona teñi kuli lika li zamaya hande mwa puteho.—1 Makorinte 14:33.

Kono manzwi a Pitrosi a lemusa kuli maeluda ha ba swaneli ku “busa” puteho. Maeluda ba kona ku busa puteho haiba ba itomela milao ye siyo. Fokuñwi eluda u kona ku ikutwa kuli u bata ku sileleza mutapi, kono ha nze a eza cwalo u kona ku tula tikanyo. Mwa puteho ye ñwi ya kwa Bucabela, maeluda ne ba tomile milao ya mwa ku lumeliseza batu kwa Ndu ya Mubuso, ye cwale ka ya kuli ya swanela ku kalisa ku lumelisa yo muñwi ki mañi, ka ku nahana kuli ku latelela milao yeo ne ku ka tisa kozo mwa puteho. Nihaike kuli ne ba nahana kuli milao yeo ki ye minde, kana kikuli maeluda bao ne ba likanyisa Jehova mwa babalelela batu ba hae? Muapositola Paulusi na ize: “Isikuli lu busa tumelo ya mina, kono lu lata ku mi tusa ze mi tabisa; kakuli mu yemi ka tumelo.” (2 Makorinte 1:24) Jehova u sepile batu ba hae.

Maeluda ba ba babalela mutapi ha ba swaneli fela ku ambuka ku itomela milao ye si ya ka Mañolo, kono hape ba swanela ku tokolomoha ku patulula likunutu. Ba hupula temuso ya Bibele ye li: “U si ke wa punya makunutu a yo muñwi.”—Liproverbia 25:9.

Muapositola Paulusi n’a swaniselize puteho ya Bakreste ba ba tozizwe kwa mubili wa mutu, ha n’a ize: “Mulimu u kopanyize mubili . . . kuli ku kauhana ku tokwahale mwa mubili; kono lilama li babalelane.” (1 Makorinte 12:12, 24-26) Pulelo ya Sigerike ya ‘ku babalelana’ i talusa ‘ku iyakatwa ba bañwi.’ Ba mwa puteho ya Sikreste ba swanela ku bonisa kuli ba iyakatwa mizwale ni likaizeli za bona.—Mafilipi 2:4.

Bakreste ba niti ba kona ku bonisa cwañi kuli ba ‘iyakatwa ba bañwi’? Ba kona ku eza cwalo ka ku lapelela ni ku tusa ba ba shebile mwa puteho. Mi haiba ba eza cwalo ba kona ku ba susueza. Lu ngeni mutala wa bo Tadataka ba ne ba tusizwe ka nzila ye cwalo. Ne ba kolobelize inge ba na ni lilimo ze 17, mi ne li bona fela ba ne ba sebeleza Jehova mwa lubasi lwa bona. Ba li: “Lubasi lo luñwi mwa puteho ne lu ni memelanga kwa sico ni kwa tukiti. Ne ni yo ba hatanga ibato ba zazi ni zazi kakusasa ha ne ni ya kwa sikolo ilikuli ni yo nyakisisa liñolo la zazi ni bona. Ne ba ni tusize ku ziba mwa ku tatululela matata kwa sikolo, mi ne lu lapelanga hamoho ka za teñi. Lubasi lo ne lu ni lutile ku ba ni moya wa ku fana.” Bo Tadataka ba itusisa tuto ye ba itutile yeo kakuli cwale se ba sebeleza kwa mutai o muñwi wa Lipaki za Jehova.

Muapositola Paulusi n’a lemusize za taba ye ñwi ye lu swanela ku ambuka ha lu iyakatwa ba bañwi. N’a bulezi za basali ba bañwi ba ne ba li “babuabui, ba [ba] ikenya mwa litaba za ba bañwi, [ba] ba bulela ze sa swaneli.” (1 Timotea 5:13) Nihaike ku iyakatwa ba bañwi ki kwa butokwa, lu swanela ku tokomela kuli ha lu ikenyi mwa litaba za bona za ka butu. Mutu u kona ku bonisa kuli u ikenya hahulu mwa litaba za ba bañwi haiba a bulela “ze sa swaneli,” inge cwalo ku ba nyaza-nyaza.

Lu swanela ku hupula kuli Bakreste ba kona ku eza lika ka ku shutana-shutana, inge cwalo lico ze ba tabela ku ca, ni mwa ku ishumuseza. Mañi ni mañi wa kona ku iketela za ku eza, ibile fela ha lobi likuka za Bibele. Paulusi n’a elelize Bakreste ba kwa Roma kuli: “Lu si ke lwa nyazana hape. . . . Lu tundamene mwa ku bata ze tahisa kozo, ni ze lu ka yahisana ka zona.” (Maroma 14:13, 19) Lu swanela ku bonisa kuli lwa iyakatwa ba bañwi mwa puteho ka ku itakaleza ku ba tusa, isi ka ku ikenya mwa litaba za bona. Haiba lu babalelana cwalo, ku ka ba ni lilato ni swalisano mwa mabasi ni mwa liputeho za luna.

[Litaluso za kwatasi]

[Siswaniso se si fa likepe 19]

Mu susueze bana ba mina ku talusa maikuto a bona ka ku ba babaza ni ku bonisa kuli mwa iyakatwa bona