Genesis 6:1-22
6 Eshi ovanhu va hovela okuhapupala kombada yedu nova dala ovana oukadona,
2 ovanamati vaKalunga kashili*+ ova li va mona kutya oukadona ovo ovawa. Onghee ova li va hovela okulikufila ovakulukadi ovo va hala.
3 Opo nee Jehova okwa ti: “Itandi* ke lididimikila omunhu fiyo alushe,+ molwaashi ye oku li pambelela.* Ndele ye ota kala nomwenyo oule womido 120.”+
4 Okudja opo, kombada yedu okwa kala Ovatongolume.* Pefimbo olo, ovaengeli* ovo ova kala hava nangala novanakadona vovanhu, ndele tava dala ounona. Ounona ovo ova li ve na eenghono nova li va shiivika nawa apeshe.
5 Lwanima, Jehova okwa li a mona kutya oukolokoshi wovanhu owa hapupala kombada yedu; omadiladilo nomahalo omitima davo okwa li mai efimbo alishe.+
6 Jehova okwa li a nyemata* eshi a shitila ovanhu kombada yedu, nokwa li a uda nai* momutima.+
7 Onghee Jehova okwa ti: “Ohandi ka hanauna po ovanhu ovo nda shitila kombada yedu, oinamwenyo yopovanhu, oipuka noikwamavava, oyo tai tuka mewangadjo, molwaashi onde livela ombedi, eshi nde va shita.”
8 Ashike Noa okwa filwa onghenda koshipala shaJehova.
9 Ondjokonona i na sha naNoa.
Noa okwa li omulumenhu omuyuki.*+ Okwa ulika kutya ye omuyuki mokati kaavo va li ko pefimbo limwe naye.* Noa okwa enda pamwe naKalunga* kashili.+
10 Mokweendela ko kwefimbo, Noa okwa ka dala ovanamati vatatu, Sem, Ham naJafet.+
11 Ashike edu ola li la nyonaunwa momesho aKalunga kashili, nedu ola li la yada elongifo leenghono.
12 Kalunga okwa tala kedu, nokwa mona kutya ola li la nyonaunwa.+ Ombelela* aishe oya nyonauna okukala kwayo kombada yedu.+
13 Konima yaasho, Kalunga okwa lombwela Noa a ti: “Onda tokola okuhanauna po ovanhu aveshe kombada yedu, molwaashi edu oli yadi oukolokoshi omolwavo. Onghee ohandi ke va hanauna po nosho yo ashishe osho shi li kombada yedu.+
14 Tunga onguluwato* nomiti da kola.*+ Ou na yo oku i tukula momadimo, ndele to i vaeke eka+ meni nokombada.
15 Onguluwato ou na oku i tunga ngaha: Oule womukokomoko wayo omaludimbo* 300, ounene wayo omaludimbo 50, noule wopombada omaludimbo 30.
16 Ou na oku i tula ekende li na oule woludimbo limwe okudja pombada, opo li ete ouyelele* monguluwato. Ou na yo oku i tula oshivelo momunghulo,+ noku i tunga i na omadimo a londafana, edimo lotete, edimo etivali nosho yo edimo etitatu.
17 “Osheshi ame ohandi ka eta eyelu+ kombada yedu, opo li hanaune po ovanhu noinamwenyo* aishe. Oinima aishe kombada yedu otai ka xula po.+
18 Ohandi ka ninga ehangano naave; ove ou na okuya monguluwato pamwe novanamati voye, omukulukadi woye novakulukadi vovanamati voye.+
19 Monguluwato ou na okutula mo oinamwenyo yoludi keshe kooivali,+ oshindume noshikadi,+ opo i kale nomwenyo pamwe naave.
20 Tula mo yo oikwamavava pamaludi ayo, oinamwenyo yopovanhu pamaludi ayo noipuka aishe oyo i li kombada yedu pamaludi ayo; oi na okuya mo kooivali, opo oludi layo liha xule po.+
21 Ove ou na okwoongela oikulya yoludi keshe+ monguluwato, opo i ninge eendja deni nodoinamwenyo.”
22 Noa okwa ninga ashishe osho Kalunga e mu lombwela. Osho naanaa a ninga.+
Omashangelo opedu
^ Omupopyofano wOshiheberi tau ulike kovaengeli, ovanamati vaKalunga.
^ Eln., “Omhepo yange itai.”
^ Ile “oha longo oilonga yombelela.”
^ Tashi dulika tashi ti “Ovawifi,” sha hala okutya, ovanhu ovo hava wifa po vakwao. Tala Omafatululo oitya.
^ Eln., “ovanamati vaKalunga.”
^ Ile “ehama.”
^ Ile “nyika oluhodi.”
^ Ile “ehe na etimba.”
^ Eln., “epupi laye.”
^ Ile “okwa longela Kalunga.”
^ Ile “Ovanhu.”
^ Eln., “oshikefa.”
^ Omiti odo otashi dulika da yukila komingaalipi.
^ Oludimbo limwe oli fike peesendimeta 44,5. Tala Oshiw. B14.
^ MOshiheberi, tsohar. Efimbo limwe tsohar ohashi yukifwa koshookooko shi na oule woludimbo, ponhele yombululu yokweeta mo ouyelele, ile ekende.
^ Ile “nombelela.”
