Genesis 8:1-22
8 Kalunga okwa li a dimbuluka Noa, oinamwenyo yomoixwa noinamwenyo yopovanhu, oyo a li nayo monguluwato.+ Kalunga okwa li yo a pepifa omhepo kombada yedu, nomeva okwa li a hovela okupwiinina.
2 Eefifiya domoule domeva okeulu nomivelo dokeulu oda li da pata, nodula oya li ya sheka.+
3 Opo nee omeva okwa li a hovela okweenda taa pwiinine kombada yedu. Konima yomafiku 150, omeva okwa li a ninipala.
4 Momafiku 17 omwedi omutiheyali, onguluwato oya li ya kanghama komhunda yaArarat.
5 Omeva okwa enda taa pwiinine fiyo omomwedi omutimulongo. Mefiku lotete lomwedi omutimulongo, eexulo deemhunda oda li da djuuka ko.+
6 Konima yomafiku 40, Noa okwa li a yeulula ekende+ longuluwato,
7 ndele ta pitifa mo ekola. Opo nee ekola ola kala tali i pondje lo tali aluka, fiyo osheshi omeva a pwiinina ko kombada yedu.
8 Lwanima, okwa pitifa mo onghuti, opo a tale ngeenge omeva okwa pwiinina ko kombada yedu.
9 Onghuti kaya li ya mona apa tai wile,* onghee oya li ya alukila kuye monguluwato, molwaashi natango kombada yedu alishe okwa li ku na omeva.+ Noa okwa li a pitifa mo eke laye, ndele te i eta monguluwato.
10 Okwa teelela vali pa pite omafiku aheyali, ndele natango ta pitifa mo onghuti monguluwato.
11 Eshi onghuti ya alukila kuye lwokonguloshi, oya li i na efo lolumono litalala komulungu. Onghee Noa okwa li a mona kutya omeva okwa pwiinina ko kombada yedu.+
12 Natango okwa li a teelela vali pa pite omafiku aheyali. Opo nee okwa pitifa mo vali onghuti, ndele inai mu alukila vali.
13 Mefiku lotete lomwedi wotete, momudo 601+ wokukalamwenyo kwaNoa, omeva okwa li a pwiinina ko kombada yedu, na Noa okwa li a patulula onguluwato moshookooko, nokwa li a mona kutya kedu otaku ende taku kukuta.
14 Momafiku 27 omwedi omutivali, edu ola li la kukuta filufilu.
15 Kalunga okwa li a lombwela Noa a ti:
16 “Dja mo monguluwato, ove nomukulukadi woye, ovanamati voye novakulukadi vovanamati voye.+
17 Pitifa mo oinamufudo yomaludi aeshe,+ oikwamavava, oinamwenyo noipuka aishe yokombada yedu, opo i tane kombada yedu, nokudalafana nokuhapupala kombada yedu.”+
18 Noa okwa dja mo monguluwato pamwe novanamati vaye,+ omukulukadi waye novakulukadi vovanamati vaye.
19 Oinamufudo aishe, oipuka aishe, oikwamavava aishe noinima aishe tai linyenge kombada yedu oya dja mo monguluwato pamaludi ayo.+
20 Opo nee Noa okwa tungila Jehova oaltari,+ nokwa kufa imwe yomoinamwenyo aishe oyo ya koshoka, naimwe yomoikwamavava aishe oyo ya koshoka,+ ndele te i yambe koaltari i li omaxwikiloyambo.+
21 Jehova okwa li e udite edimba liwa.* Onghee Jehova okwe lipopila momutima a ti: “Edu itandi ke li finga vali*+ omolwovanhu, osheshi omahalo omutima womunhu omai okudja kounona waye.+ Itandi ka hanauna po vali oinamufudo aishe ngaashi nda ninga.+
22 Okudja paife, efimbo lokukuna nolokuteya, loutalala noupyu, okufu nokwenye, omutenya noufiku+ itai xulu po vali.”
