Genesis 16:1-16
-
Hagar naIsmael (1-16)
16 Sarai ka li a dalela omushamane waye, Abram, ounona,+ ashike okwa li e na omupiya Omuegipiti wedina Hagar.+
2 Onghee Sarai okwa tya kuAbram: “Jehova ina pitika nge ndi dale ounona. Alikana, nangala nomupiya wange, pamwe ota dalele nge ounona.”+ Abram okwa li a itavela osho Sarai e mu lombwela.
3 Konima eshi Abram a kala medu laKaanan eedula omulongo, omukulukadi waye Sarai okwa li a kufa omupiya waye, Omuegipiti, Hagar, ndele te mu yandje kuAbram.
4 Abram okwa nangala naHagar, ndele ta ningi oufimba. Eshi Hagar a mona kutya omufimba, okwa hovela okudina omwene waye Sarai.
5 Sarai okwa tya kuAbram: “Hagar okwa dina nge omolwoye. Aame mwene nde ku pa omupiya wange,* ndele eshi a mona kutya omufimba, okwa hovela okudina nge. Jehova ne tu tokole, opo a mone kutya olyelye e na ondjo.”
6 Abram okwa tya kuSarai: “Tala! Omupiya woye oku li koshi yepangelo loye. Mu ningila keshe osho u wete kutya osha yuka.” Opo nee Sarai okwa ungaunga naye nai, ndele Hagar te mu faduka po.
7 Lwanima, omweengeli waJehova okwa ka hanga Hagar pofifiya i li mombuwa, pondjila ya finda kuSur.+
8 Opo nee omweengeli okwa ti: “Hagar, omupiya waSarai, oto di peni nowa finda peni?” Hagar okwa ti: “Ohandi faduka po omwene wange Sarai.”
9 Omweengeli waJehova okwa tya kuye: “Shuna komwene woye, ndele to dulika kuye mukeshe osho te ku lombwele.”
10 Opo nee omweengeli waJehova okwa tya: “Ohandi ka hapupalifa oludalo loye, ndele tali ka nyengana okuvalula.”+
11 Omweengeli waJehova okwa weda ko a ti: “Paife oumufimba, noto ka dala okaana okamati, ndele to ke ka luka Ismael,* molwaashi Jehova okwa mona okuhepekwa kwoye.
12 Ismael ota ka kala omulumenhu a fa ondongi yomoixwa.* Ota ka kala e tonde keshe umwe, ta ka tondika kwaaveshe nota ka kala e tonde ovamwaina.”
13 Hagar okwa popya kombinga yaJehova, oo a li ta popi naye, a ti: “Ove oKalunga ha mono ko.”+ Okwa ti yo: “Onda mona oo a mona nge.”
14 Osho osho sha li sha ningifa omufima oo wa li pokati kaKades naBered u lukwe Beer-lahai-roi.*
15 Hagar okwa dalela Abram omonamati, na Abram okwe mu luka Ismael.+
16 Abram okwa li e na eedula 86, eshi Hagar a dala Ismael.
