Genesis 25:1-34
25 Abraham okwa ka hombolulula omukulukadi umwe wedina Ketura.
2 Mokweendela ko kwefimbo, Ketura okwa dalela Abraham ovana ava: Simran, Joksan, Medan,+ Midian, Isbak naSuah.+
3 Joksan okwa dala Sheba naDedan.
Dedan okwa dala Ovaassuri, Ovaletusi nOvaleumi.
4 Ovanamati vaMidian ova li: Efa, Efer, Henok, Abida naEldaa.
Alishe olo oludalo laKetura.
5 Lwanima, Abraham okwa ka yandja oinima yaye aishe kuIsak,+
6 ashike ovanamati vaye, ovo va dalwa kovakainhu vopomunghulo, navo okwa li e va pa eeshali. Ofimbo Abraham ina fya, okwa li a lekela ovana ovo va ka kale koushilo kokule naIsak,+ kedu lokOushilo.
7 Abraham okwa kala nomwenyo oule womido 175.
8 Opo nee okwa fuda mo omufudo waye waxuuninwa nokwa fya moukulupe waye, ndele ta pakwa povakwao.* Okwa li a hafela onghalamwenyo efimbo lile.
9 Ovanamati vaye, Isak naIsmael, ove mu paka mekololo laMakpela olo la li mepya laEfron, omonamati waSohar, Omuheti, olo la li popepi naMamre.+
10 Epya olo Abraham okwa li e li landa kovanamati vaHeti. Abraham nomukulukadi waye, Sara, omo va pakwa omo.+
11 Konima eshi Abraham a fya, Kalunga okwa twikila okunangeka noupuna Isak,+ na Isak okwa li ha di popepi naBeer-lahai-roi.+
12 Ei ondjokonona yaIsmael,+ omonamati waAbraham, oo a dalelwa kuHagar,+ Omuegipiti, omupiya waSara.
13 Aa omadina ovanamati vaIsmael, a shikulafana she likolelela komaludi avo omo va dja: Nebaiot,+ oshiveli shaIsmael, Kedar,+ Adbeel, Mibsam,+
14 Misma, Duma, Massa,
15 Hadad, Tema, Jetur, Nafis naKedma.
16 Ovo ovanamati vaIsmael, naao omadina avo she likolelela keenhele opo va li hava di naapo va li va dika omatwali avo;* eehamba 12 she likolelela komaludi avo.+
17 Ismael okwa kala nomwenyo oule womido 137. Opo nee okwa fuda mo omufudo waye waxuuninwa, ndele ta pakwa povakwao.*
18 Ova dja mo muHavila,+ osho sha li popepi naSur.+ Sur osha li popepi naEgipiti nosha ya fiyo okuAssiria. Ova li hava di popepi novamwaina vavo aveshe.*+
19 Ei ondjokonona yaIsak, omonamati waAbraham.+
Abraham okwa dala Isak.
20 Isak okwa li e na eedula 40, eshi a hombola Rebeka, omonakadona waBetuel,+ Omuaram wokuPaddan-aram. Rebeka omumwainakadona waLaban, Omuaram.
21 Isak okwa kala ta ilikana kuJehova shi na sha nomukulukadi waye, molwaashi okwa li ongadji, na Jehova okwa li a nyamukula eilikano laye, ndele omukulukadi waye ta ningi oufimba.
22 Ovanamati vaye, ovo va li medimo, ova li va hovela okuundulafana,+ ndele ta ti: “Ngeenge osho shi li ngaha, omolwashike ndi na okukala nomwenyo?” Opo nee okwa ilikana kuJehova, opo a shiive kutya omolwashike osho tashi ningwa.
23 Na Jehova okwe mu lombwela kutya: “Mwoove omu na oiwana ivali,+ novanhu vavali ovo tava ka dja mwoove+ otave ke litukauka. Oshiwana shimwe otashi ka kala shi na eenghono shi dule shikwao,+ naao a kula ota ka ninga omupiya waau munini.”+
24 Eshi efimbo laye lokudala la fika, tala! okwa dala epasha.
25 Okaana kotete oka dja mo katilyana noka li ka fa oshikutu omolwolududi,+ onghee ove ka luka Esau.*+
26 Konima yaasho, omumwaina okwa dja mo e kwete moshififinwa shaEsau,+ onghee Isak okwe mu luka Jakob.*+ Eshi ounona ovo va dalwa, Isak okwa li e na eedula 60.
27 Eshi oumati ovo va kula, Esau okwa li a ninga omukongo onghulungu+ nokwa li e hole mofuka, ashike Jakob okwa li omulumenhu omuyuki noha kala momatwali.+
28 Isak okwa li e hole Esau omolwombelela oyo a li he mu etele, ofimbo Rebeka a li e hole Jakob.+
29 Efiku limwe eshi Esau a dja mofuka a loloka, okwa hanga Jakob ta teleke omakunde.
30 Esau okwa tya kuJakob: “Alikana, pe nge mo* diva momakunde matilyana oo to teleke,* osheshi onda loloka.”* Osho osho she mu lukifa Edom.*+
31 Opo nee Jakob okwa ti: “Landife nge po tete oufemba woye wokukala oshiveli.”+
32 Esau okwa weda ko a ti: “Ame ondi li pokufya. Oufemba wokukala oshiveli otau kwafele nge shike?”
33 Jakob okwa ti: “Anene nge tete.” Opo nee okwe mu anena, ndele ta landifa po kuJakob oufemba waye wokukala oshiveli.+
34 Onghee Jakob okwa pa Esau omungome nomunghoka womakunde, nokwa lya nokunwa, ndele ta fikama nokuya. Kungaho, Esau okwa kwata okahetengi oufemba waye wokukala oshiveli.
Omashangelo opedu
^ Oo omupopyo wopaitevo tau ulike kefyo.
^ Ile “omatwali oo a li a dingililwa koluumbo lekuma.”
^ Oo omupopyo wopaitevo tau ulike kefyo.
^ Ile tashi dulika, “va li ve tondike kovamwaina aveshe.”
^ Tali ti “Olududi.”
^ Tali ti “E kwete moshififinwa; Okuya ponhele yaumwe.”
^ Ile “pe nge mo kanini.”
^ Eln., “itilyana, oyo itilyana.”
^ Ile “onda fya ondjala unene.”
^ Tali ti “Itilyana.”
