Genesis 39:1-23
39 Josef okwa li a twalwa kuEgipiti,+ nOmuegipiti wedina Potifar,+ elenga laFarao nomukulunhu wovanangeli, okwe mu landa ko kOvaismael+ ovo ve mu twala ko.
2 Ashike Jehova okwa kala pamwe naJosef,+ naasho osha li sha kwafela Josef a kale ha pondola, nokwa li a nangekwa po a pashukile eumbo lomwene waye, Omuegipiti.
3 Omwene waye okwa mona kutya Jehova okwa li pamwe naJosef nonokutya Jehova oye a li ta endifa nawa oinima aishe oyo Josef a ninga.
4 Josef okwa kala a hokiwa komwene waye, nokwa ninga omupiya waye omulineekelwa. Potifar okwa li e mu hoolola a kale ta pashukile eumbo laye, noinima yaye aishe oya li ya tulwa mepashukilo laJosef.
5 Okudja pefimbo olo Potifar a hoolola Josef a kale ta pashukile eumbo laye noinima yaye aishe, Jehova okwa kala ta nangeke noupuna eumbo lOmuegipiti oo omolwaJosef, na Jehova okwa nangeka noupuna oinima aishe oyo Potifar a li e na meumbo nomepya.+
6 Lwanima, Potifar okwa li a efela oinima aishe mepashukilo laJosef, noka li he lipula nayo, kakele ashike koikulya oyo a li ta li. Shimwe vali, Josef okwa ka kala e na olutu la paluka nawa noku na ondjelo iwa.
7 Konima yoinima oyo, omukulukadi waPotifar okwa hovela okukala ta tale Josef e mu hala, ndele ta ti: “Nangala naame.”
8 Ashike Josef okwa li a anya, ndele ta ti komukulukadi womwene waye: “Omwene wange iha kala te lipula naasho handi ningi meumbo, nokwe lineekelela nge oinima aishe oyo e na i kale mepashukilo lange.
9 Meumbo omu kape na umwe e dule nge, nomwene wange ina kelela nge nande osha, kakele koye, molwaashi ove omukulukadi waye. Ongahelipi handi dulu okulonga owii u fike opo nokunyona kuKalunga?”+
10 Efiku nefiku okwa kala ha popi naJosef, ndele Josef ka li a dimina a nangale naye, ile a kale pamwe naye.
11 Ashike efiku limwe, eshi Josef a ya meumbo a ka longe oilonga yaye, kape na nande oumwe womovapiya vomeumbo a li mo.
12 Opo nee omukulukadi waPotifar okwa kwata Josef moshikutu, ndele ta ti: “Nangala naame.” Ndele Josef okwa faduka po a finda pondje, noshikutu shaye osha fyaala momake omukulukadi oo.
13 Diva eshi omukulukadi oo a mona kutya Josef okwa fiya oshikutu shaye momake aye nokwa faduka po a finda pondje,
14 okwa hovela okwiingida pombada ovalumenhu vambulavo, ndele ta ti kuvo: “Taleni! Potifar okwe tu etela omulumenhu ou, Omuheberi, e tu fife ohoni. Okwe uya kwaame a nangale naame, ndele ame onda hovela okwiingida pombada.
15 Diva eshi a mona kutya ohandi ingida pombada nohandi kuu, okwa fiya po oshikutu shaye pwaame, ndele ta faduka po a finda pondje.”
16 Konima yaasho, omukulukadi oo okwa tula oshikutu shaJosef popepi naye, fiyo omwene waJosef te uya meumbo.
17 Omukulukadi oo okwa lombwela omwene waJosef oshinima sha faafana a ti: “Omupiya, Omuheberi, oo we tu etela, okwe uya kwaame a fife nge ohoni.
18 Ashike diva eshi nda ingida pombada nonda hovela okukuwa, okwa fiya po oshikutu shaye pwaame, ndele ta faduka po a finda pondje.”
19 Eshi omwene waJosef a uda eendjovo domukulukadi waye, odo e mu lombwela a ti: “Oinima oyo oyo omupiya woye a ningila nge,” okwa li a handuka neenghono.
20 Onghee Potifar okwa kufa Josef, ndele te mu tulifa modolongo, konhele oko haku idililwa eenghwate dohamba, naako oko a kala e li modolongo.+
21 Ashike Jehova okwa twikila okukala pamwe naJosef, a kala te mu ulikile ohole i na oudiinini, nokwa ningifa omukulunhu wodolongo a kale e mu hokwa.+
22 Onghee omukulunhu wodolongo okwa li a tula po Josef a pashukile ovanadolongo aveshe ovo va li modolongo, noye a li ha ufa keshe shimwe osho va li tava longo modolongo.+
23 Omukulunhu wodolongo ka li he lipula noinima oyo ya li mepashukilo laJosef, molwaashi Jehova okwa li pamwe naJosef. Jehova okwa li a kwafela Josef a pondole mukeshe osho a li ta ningi.+
