Mapan iti linaonna

Mapan iti segundario a pagpilian

Dagiti Saksi ni Jehova

Iloko

Apay a Saan a Makigubgubat Dagiti Saksi ni Jehova?

Apay a Saan a Makigubgubat Dagiti Saksi ni Jehova?

Saan a makigubgubat dagiti Saksi ni Jehova gapu kadagiti sumaganad a rason:

  1. Panagtulnog iti Dios. Kuna ti Biblia a dagiti adipen ti Dios “pitpitendanto dagiti kampilanda a pagbalinen a subsob ti arado” ken saanda a “sursuruenen ti pannakigubat.”—Isaias 2:4.

  2. Panagtulnog ken Jesus. Kinuna ni Jesus ken ni apostol Pedro: “Ipulangmo ta kampilanmo iti lugarna, ta amin dagidiay mangaramat iti kampilan mataydanto iti kampilan.” (Mateo 26:52) Gapuna, insuro ni Jesus kadagiti pasurotna a saanda nga agusar kadagiti armas a pakigubat.

    Tungtungpalen dagiti adalan ni Jesus ti bilinna a ‘saanda nga agbalin a paset ti lubong’ babaen ti panagtalinaedda a neutral iti politika. (Juan 17:16) Saanda nga agprotprotesta kadagiti namilitariaan nga aktibidad wenno laplapdan dagiti mayat nga agsoldado.

  3. Ayat kadagiti sabsabali. Imbilin ni Jesus kadagiti adalanna nga ‘ayatenda ti maysa ken maysa.’ (Juan 13:34, 35) Gapuna, agbalinda a miembro ti sangalubongan a panagkakabsat a pulos a saan a makigubat kadagiti kakabsatda.—1 Juan 3:10-12.

  4. Ulidan dagiti nagkauna a Kristiano. Kuna ti Encyclopedia of Religion and War: “Dagiti immuna a pasurot ni Jesus saanda a nakiraman kadagiti gubat wenno nagserbi iti militar,” ta ibilangda dagita nga aramid a “saan a maitunos iti pannursuro ni Jesus maipapan iti panangipakita iti ayat agraman kadagiti kabusor.” Kastoy met ti kinuna ti maysa nga Aleman a teologo a ni Peter Meinhold maipapan kadagiti nagkauna nga adalan ni Jesus: “Saan a mabalin nga agsoldado ti maysa a Kristiano.”

Tulong iti komunidad

Dagiti Saksi ni Jehova ket napateg a miembro ti kagimongan ken saanda a pangta iti seguridad kadagiti pagilian a pagnanaedanda. Raraemenmi ti autoridad ti gobierno maitunos kadagitoy a bilin ti Biblia:

  • “Tunggal kararua paiturayan koma kadagiti nangatngato nga autoridad.”—Roma 13:1.

  • “Ngarud, ibayadyo ken Cesar ti bambanag ni Cesar, ngem iti Dios ti bambanag ti Dios.”—Mateo 22:21.

Gapuna, tungtungpalenmi ti linteg, agbaybayadkami iti buis, ken makitintinnulongkami iti gobierno para iti pagsayaatan ti umili.

 

Ammuem ti Ad-adu Pay

TI PAGWANAWANAN

Ti European Court Intandudona ti Kalintegan nga Agkedked nga Agsoldado

Basaem ti maipapan iti daytoy nagpateg a desision nga agserbi a pagtuladan para iti dadduma pay a pagilian ti Europe.