Mapan iti linaonna

Mapan iti segundario a pagpilian

Dagiti Saksi ni Jehova

Iloko

Apay a Saan a Makiramraman iti Politika Dagiti Saksi ni Jehova?

Apay a Saan a Makiramraman iti Politika Dagiti Saksi ni Jehova?

Saan a makiramraman iti politika dagiti Saksi ni Jehova gapu iti naammuanda nga isursuro ti Biblia. Saankami nga agkampania, agbutos, agkandidato, ken makipaset iti aniaman a protesta tapno sukatan dagiti agtuturay. Kombinsidokami iti ibaga ti Biblia no apay a saankami a makiraman kadagitoy:

  • Tultuladenmi ti ulidan ni Jesus a nagkedkedanna ti maaddaan iti saad iti gobierno. Insurona kadagiti adalanna a “saanda a paset ti lubong” ken imbagana a saanda a makibiang kadagiti isyu a mainaig iti politika.Juan 17:14, 16; 18:36; Marcos 12:13-17.

  • Matalekkami iti Pagarian ti Dios. Tinukoy dayta ni Jesus idi kinunana: “Daytoy naimbag a damag ti pagarian maikaskasabanto iti intero a mapagnaedan a daga.” (Mateo 24:14) Kas pannakabagi ti Pagarian ti Dios, iwaragawagmi ti iyaay dayta. Saankami a makiramraman iti politika iti aniaman a pagilian, agraman ti lugar a paggigiananmi.2 Corinto 5:20; Efeso 6:20.

  • Gapu ta saankami a makiramraman iti politika, nawayakami a mangikasaba iti naimbag a damag ti Pagarian ti Dios iti amin a tattao. Ipakpakitami babaen iti sao ken aramid nga agtalekkami a solbaren ti Pagarian ti Dios amin problema ditoy lubong.Salmo 56:11.

  • Yantangay saankami a nasinasina gapu iti politika, agkaykaysakami nga agkakabsat iti intero a lubong. (Colosas 3:14; 1 Pedro 2:17) Iti sabali a bangir, nasinasina ti miembro dagiti relihion a makiramraman iti politika.1 Corinto 1:10.

Panagraem iti gobierno. Nupay saankami a makiraman iti politika, raraemenmi dagiti agtuturay iti gobierno iti pagilianmi. Maitunos dayta iti bilin ti Biblia: “Tunggal kararua paiturayan koma kadagiti nangatngato nga autoridad.” (Roma 13:1) Agtulnogkami iti linteg, agbayad ti buis, ken tumulongkami iti panangikagumaan ti gobierno mangipaay iti pagimbagan dagiti umili. Saankami a makiraman iti aniaman a panangikagumaan a mangdadael iti gobierno, imbes ketdi, sursurotenmi ti balakad ti Biblia nga ikararagan dagiti ‘ar-ari ken amin dagidiay addaan iti saad,’ nangruna no mangaramidda iti desision a mangapektar iti wayawaya nga agdayaw.1 Timoteo 2:1, 2.

Raemenmi met ti kalintegan ti sabsabali a mangaramid iti bukodda a desision mainaig iti politika. Kas pagarigan, saanmi a riribuken ti eleksion wenno biangan dagiti agbutos.

Baro kadi nga ideya ti saanmi a pannakiraman iti politika? Saan, uray dagiti apostol ken ti dadduma pay a Kristiano idi umuna a siglo ket saan a nakiraman iti politika. Kas iti kinuna ti libro a Beyond Good Intentions: “Nupay patienda a rumbeng a raemenda dagiti agtuturay, saan a nakiraman iti politika dagiti nagkauna a Kristiano.” Kuna ti libro nga On the Road to Civilization nga “awan ti nagtakem iti gobierno” kadagiti nagkauna a Kristiano.

Pangta kadi iti seguridad ti pagilian ti saanmi a pannakiraman iti politika? Saan. Mannakikappiakami, isu nga awan ti rumbeng a pagdanagan dagiti agtuturay. Usigem ti 2001 a report ti National Academy of Sciences iti Ukraine. Kuna ti report maipapan iti saanmi a pannakiraman iti politika: “Kagura ti dadduma ita daytoy a takder dagiti Saksi ni Jehova; dayta idi ti kangrunaan a rason nga inakusaran ida ti diktador a turay ti Nazi ken dagiti Komunista.” Ngem uray indadanes ida ti turay ti Soviet, dagiti Saksi ket “nagtalinaed a natulnog nga umili. Saanda a pangta iti turay dagiti Komunista gapu ta mapagtalkan ken managsakripisioda a trabahador kadagiti talon ken planta.” Kasta met, ti pammati ken ar-aramid dagiti Saksi ni Jehova ita, kuna ti report a saan a “pangta iti seguridad ken panagkaykaysa iti aniaman a pagilian.”

Ammuem ti Ad-adu Pay

MASANSAN A MAISALUDSOD

Apay a Saan a Makigubgubat Dagiti Saksi ni Jehova?

Pagaammo dagiti Saksi ni Jehova iti intero a lubong a saan a makigubgubat. Ammuem no apay a saankami a makigubgubat.